4
(၁စီၤပၤ ၇:၂၃-၅၁)
1 စီၤပၤၡလိၤမိၤမၢပှၤမၤထီၣ်တၢ်လုၢ်လီၢ်တိၢ်ဘီတခါလၢအထီ အိၣ်ဝဲအပျၢ်ခံဆံ, အဒီၣ်ဃီၤအိၣ်ဝဲအပျၢ်ခံဆံဒီးအကစီၤထီၣ် အိၣ်ဝဲဆံဆဲၣ်ပျၢ်န့ၣ်လီၤ.
2 အဝဲမၢပှၤမၤစ့ၢ်ကီးထံဒၢတိၢ်ဘီဖးဒိၣ်ဖျၢၣ်သလၢၣ်တဖျၢၣ်, လၢအယိာ်အိၣ်ဝဲယဲၢ်ပျၢ်, ဒီးအဒီၣ်တူာ်အိၣ်ဝဲအပျၢ်တဆံဒီး အခိၣ်ဒုးဝးတရံးအတၢ်ထိၣ်မ့ၢ်ဝဲအပျၢ်သၢဆံန့ၣ်လီၤ.
3 လၢထံဒၢဖးဒိၣ်အခီၣ်ထံး, အကနုၤဝးတရံးအလိၤန့ၣ်, ဂီၤဖံးဖါလၢအပိာ်လိာ်အခံအဂီၤတဖၣ်ဘၣ်တၢ်ဒဲးကံၣ်ဒဲးဝ့ၤဃာ် အီၤလီၤ. ဂီၤဖံးဖါတဖၣ်အံၤ, တၢ်နီၤဖးအီၤခံဂ့ၢ်, တဂ့ၢ်လၢအဖီခိၣ်ဒီးတဂ့ၢ်လၢအဖီလာ်လၢအစီၤစုၤလိာ်အသးတဂ့ၢ် တပျၢ်န့ၣ်လီၤ.
4 ထံဒၢဖးဒိၣ်န့ၣ်ဘၣ်တၢ်ပာ်ထီၣ်အီၤလၢဂီၤဖံးဖါတိၢ်ဘီ တဆံခံဒုအလိၤ, လၢအကွၢ်တၢ်ဆူတၢ်ပျီပူၤ, သၢဒုကွၢ်ဝဲဆူ ကလံၤစိး, သၢဒုကွၢ်ဝဲဆူမုၢ်နုာ်, သၢဒုကွၢ်ဝဲဆူကလံၤထံး, ဒီးသၢဒုကွၢ်ဝဲဆူမုၢ်ထီၣ်န့ၣ်လီၤ.
5 ထံဒၢဖးဒိၣ်န့ၣ်တီၣ်ဝဲသၢစုမုၢ်ဒိၣ်လီၤ. အခိၣ်ဒူအကနုၤမၤအသးဒ်သလၢတဖျၢၣ်အခိၣ်ဒူအသိး, လီၤဂာ်ဒ်ဖီတဖီးအကဘျံးတဖၣ်အတၢ်သလၣ်ထီၣ်အသးအသိးန့ၣ်လီၤ. ထံဒၢဖးဒိၣ်န့ၣ်တြီၢ်ဝဲအဘၤသးသၢကထိန့ၣ်လီၤ.
6 အဝဲသ့ၣ်မၤစ့ၢ်ကီးဝဲသရာ်အဖျၢၣ်တဆံ, ယဲၢ်ဖျၢၣ်ကဘၣ်တၢ်ပာ်အီၤလၢယွၤအတၢ်လုၢ်ဟံၣ်အကလံၤထံး, ဒီးယဲၢ်ဖျၢၣ်လၢအကလံၤစိးန့ၣ်လီၤ. သရာ်တဖၣ်န့ၣ်ကဘၣ်တၢ်သူအီၤလၢတၢ်ကသ့ကွံာ်ဆၣ်ဖိ ကီၢ်ဖိအကူာ်တဖၣ်လၢတၢ်ဆူးကဲၤထီၣ်တ့ၢ်လံအီၤဒ်တၢ်လုၢ်တၢ်ပာ် တဖၣ်န့ၣ်လီၤ. ထံလၢထံဒၢဖးဒိၣ်န့ၣ်ကဘၣ်တၢ်သူ အီၤလၢပှၤလုၢ်တၢ်အခိၣ်တဖၣ်ကသ့အသးအဂီၢ်န့ၣ်လီၤ.
7 အဝဲသ့ၣ်မၤ, တၢ်ပာ်မ့ၣ်အူဒၢအလီၢ်လၢထူဆံဆဲၣ်ခါဒ်အက့ၢ်အဂီၤ ညီနုၢ်အိၣ်ပာ်စၢၤ, ဒီးပာ်အီၤလၢယွၤအတၢ်လုၢ်ဟံၣ်အဒၢးမိၢ်ပှၢ်အပူၤ, ယဲၢ်ခါလၢကလံၤထံးဒီးယဲၢ်ခါလၢကလံၤစိးန့ၣ်လီၤ.
8 အဝဲသ့ၣ်မၤစ့ၢ်ကီးစီၢ်နီၤခိၣ်ဆံဆဲၣ်ဖျၢၣ်ဒီးပာ်ဝဲလၢတၢ် လုၢ်ဟံၣ်အဒၢးမိၢ်ပှၢ်အပူၤ, ယဲၢ်ဖျၢၣ်လၢကလံၤထံးဒီးယဲၢ်ဖျၢၣ်လၢကလံၤစိးန့ၣ်လီၤ. အဝဲသ့ၣ်မၤစ့ၢ်ကီးသရာ်ထူအဖျၢၣ်တကယၤန့ၣ်လီၤ.
9 အဝဲသ့ၣ်မၤဂၢၤအိၣ်လၢတၢ်အိပူၤတဖျၢၣ်လၢပှၤလုၢ်တၢ်အခိၣ်တဖၣ် အဂီၢ်, ဒီးမၤစ့ၢ်ကီးဝဲဂၢၤလၢတၢ်ချၢတဖျၢၣ်န့ၣ်လီၤ. တြဲၤတဖၣ်လၢအအိၣ်ဖဲဂၢၤတဖၣ်အဘၢၣ်စၢၤန့ၣ်ဘၣ်တၢ်ကျးဘၢအီၤလၢ တိၢ်ဘီန့ၣ်လီၤ.
10 ထံဒၢဖးဒိၣ်န့ၣ်ဘၣ်တၢ်ပာ်အီၤဘူးဒီးယွၤအတၢ်လုၢ်ဟံၣ်အသနၢၣ် လၢမုၢ်ထီၣ်ကလံၤထံးတခီန့ၣ်လီၤ.
11 စီၤဃူရၣ်အဘံမၤစ့ၢ်ကီးဝဲသပၢၤတဖၣ်, တပူာ်တဖၣ်ဒီးသရာ်တဖၣ် န့ၣ်လီၤ.
12 အဝဲမၤဝံၤကွံာ်ကယဲၢ်တၢ်ခဲလၢာ်လၢအအၢၣ်လီၤတ့ၢ်ဝဲ စီၤၡလိၤမိၤလၢအကမၤဝဲလၢယွၤအတၢ်လုၢ်ဟံၣ်အဂီၢ်န့ၣ်လီၤ. တၢ်တဖၣ်န့ၣ်မ့ၢ်ဝဲထူၣ်ခံထူၣ်, တၢ်အခိၣ်ထိးသရာ်အဂီၤခံဖျၢၣ် လၢထူၣ်တဖၣ်အခိၣ်ထိး, တၢ်အက့ၢ်အဂီၤထးသွဲတဖၣ်ထါပကံအသးလၢတၢ်အခိၣ်ထိးတဖျၢၣ်စုာ် စုာ်အလိၤ,
13 တိၢ်ဘီသလၢအဖျၢၣ်လွံၢ်ကယၤ, ဘၣ်တၢ်ရဲၣ်လီၤအီၤခံဂ့ၢ်ဝးတရံး တၢ်အက့ၢ်အဂီၤလၢအအိၣ်လၢတၢ်အခိၣ်ထိးတခါစုာ်စုာ်အလိၤ,
14 တၢ်ပာ်ထီၣ်သရာ်အလီၢ်ဆံဆဲၣ်ခါဒီးသရာ်ဆံဆဲၣ်ဖျၢၣ်,
15 ထံဒၢဖးဒိၣ်, ဂီၤဖံးဖါတဆံခံဒုလၢအယိးဃာ်ထံဒၢဖးဒိၣ်,
16 သပၢၤတဖၣ်, တပူာ်တဖၣ်ဒီးနီၣ်ဆဲးတဖၣ်န့ၣ်လီၤ. ပှၤအခိၣ်လၢအမၤတၢ်သ့လၢစု, စီၤဃူရၣ်အဘံမၤကယဲၢ်တၢ်သ့ၣ်တဖၣ် အံၤခဲလၢာ်လၢတိၢ်ဘီလၢတၢ်ထူးဘျ့ကတြ့ၣ်ထီၣ်အီၤ, ဒ်စီၤပၤၡလိၤမိၤမၤလိာ်တ့ၢ်ဝဲ, လၢကဘၣ်တၢ်သူ အီၤလၢယွၤအတၢ်လုၢ်ဟံၣ်အပူၤန့ၣ်လီၤ.
17 စီၤပၤမၢအသိတၢ်တဖၣ်အံၤခဲလၢာ်လၢကပံာ်လၢအအိၣ်ဝဲဖဲ စူးကိၤသးဒီးဝ့ၢ်စၢ်ဒသၤအဘၢၣ်စၢၤလၢအအိၣ်ဝဲ ဖဲထံကျိယၢ်ဒ့ၣ်အတၢ်ပၢၤခိၣ်န့ၣ်လီၤ.
18 တၢ်ပီးတၢ်လီအါအါဂီၢ်ဂီၢ်ဘၣ်တၢ်သိအီၤသတးဒီးတိၢ်ဘီ အတၢ်လီၤသယၢၢ်ခဲလၢာ်မ့ၢ်ထဲလဲၣ်ထဲလဲၣ်န့ၣ်, ပှၤတဲတသ့နီတဂၤဘၣ်.
19 စီၤပၤၡလိၤမိၤမၢပှၤမၤစ့ၢ်ကီးတၢ်ပီးတၢ်လီလၢထူတဖၣ်လၢ ယွၤအတၢ်လုၢ်ဟံၣ်အဂီၢ်, ဒ်တၢ်လုၢ်လီၢ်ဒီးစီၢ်နီၤခိၣ်တဖၣ်လၢတၢ်ကပာ်ထီၣ်ကိၣ်လၢတၢ်လုၢ် ထီၣ်အီၤဆူကစၢ်ယွၤအအိၣ်,
20 တၢ်ပာ်ထီၣ်မ့ၣ်အူဒၢအလီၢ်တဖၣ်ဒီးမ့ၣ်အူဒၢထူစီတဖၣ်လၢကဘၣ် တၢ်ဒွဲၣ်ကပီၤထီၣ်အီၤလၢတၢ်လီၢ်စီဆှံကတၢၢ်အမဲာ်ညါဒ်တၢ်တိာ် ပာ်အိၣ်ဝဲအသိး,
21 တၢ်မၤဃံမၤလၤလၢဖီတဖၣ်, မ့ၣ်အူဒၢတဖၣ်, ဒီးနီၣ်တံာ်လၢကမၤပံာ်မ့ၣ်အူတဖၣ်,
22 နီၣ်တံာ်လၢကမၤကဆှီမ့ၣ်အူအဆၣ်တဖၣ်, သလၢတဖၣ်, ခွးလၢတၢ်နၢမူအဂီၢ်တဖၣ်, ဒီးသပၢၤဘံၣ်သလၣ်တဖၣ်လၢတၢ်ကစိာ် မ့ၣ်အူအ့ၣ်တဖၣ်န့ၣ်လီၤ. တၢ်တဖၣ်ခဲလၢာ်အံၤဘၣ်တၢ်မၤအီၤလၢထူစီန့ၣ်လီၤ. ယွၤအတၢ်လုၢ်ဟံၣ်အတြဲၤလၢတၢ်ချၢတဖၣ်ဒီးတြဲၤလၢတၢ်လဲၤနုာ် ဆူတၢ်လီၢ်စီဆှံကတၢၢ်တဖၣ်န့ၣ်, ဘၣ်တၢ်ကျးဘၢအီၤလၢထူန့ၣ်လီၤ.