18
(၁စီၤပၤ ၂၂:၁-၂၈)
1 တုၤကီၢ်ယူဒၤအစီၤပၤစီၤယဟိၡၤဖးထူးထီၣ်တီၤထီၣ်ဝဲဒီး အမံၤဟူသၣ်ဖျါထီၣ်ဝဲန့ၣ်, အဝဲသုးကျဲၤတၢ်တ့တၢ်ဖျီတခါလၢအဝဲအဒူၣ်ဖိထၢဖိတဂၤဒီး ကီၢ်အံၣ်စရ့လးအစီၤပၤအၤဃာ်အဒူၣ်ဖိထၢဖိတဂၤအဘၢၣ်စၢၤန့ၣ်လီၤ.
2 တဘျုးနံၣ်ဝံၤအလီၢ်ခံန့ၣ်, စီၤယဟိၡၤဖးလဲၤဆူဝ့ၢ်ၡၤမရံ လၢကလဲၤအိၣ်သကိးစီၤအၤဃာ်အဂီၢ်န့ၣ်လီၤ. လၢတၢ်မၤလၤကပီၤစီၤယဟိၡၤဖး, ဒီးပှၤလဲၤဃုာ်တၢ်ဒီးအီၤ တဖၣ်အဂီၢ်, စီၤအၤဃာ်မၤသံသိဒီးဂီၤဖံးအါအါဂီၢ်ဂီၢ်လၢတၢ်အီၣ်အမူး ဖးဒိၣ်တဘျီအဂီၢ်န့ၣ်လီၤ. အဝဲဂုာ်ကျဲးစၢးကွဲန့ၢ်လွဲန့ၢ်စီၤယဟိၡၤဖးအသးဒ်သိးကပာ် ဖှိၣ်အသးဒီးအီၤလၢအတၢ်လဲၤထီၣ်ဒုးဝ့ၢ်ရၤမိး, လၢကီၢ်ကံးလဧးအပူၤအဂီၢ်န့ၣ်လီၤ.
3 အဝဲသံကွၢ်ဝဲ, “မ့ၢ်နကလဲၤသကိးတၢ်ဒီးယၤလၢတၢ်ကလဲၤထီၣ်ဒုးဝ့ၢ်ရၤမိးအဂီၢ်န့ၣ်ဧါ.” စီၤယဟိၡၤဖးစံးဆၢဝဲ, “နမ့ၢ်အိၣ်ကတဲာ်ကတီၤနသးဒီးယအိၣ် ကတဲာ်ကတီၤယသးန့ၣ်လီၤ. ဒ်န့ၣ်အသိးပှၤသုးမုၢ်စ့ၢ်ကီးအိၣ်ကတဲာ်ကတီၤအသးန့ၣ်လီၤ. ပကလဲၤဃုာ်သကိးဒီးနၤလီၤ.”
4 အန့ၣ်ဝံၤဒီးအဝဲစံးအါထီၣ်ဝဲ, “ဘၣ်ဆၣ်အဆိကတၢၢ်န့ၣ်, မ်ပကသံကွၢ်တၢ်လၢယွၤတက့ၢ်.”
5 လၢတၢ်န့ၣ်အဃိစီၤအၤဃာ်ကိးနုာ်ဝံတဖၣ်လၢကအိၣ်ဝဲ အဂၤလွံၢ်ကယၤဃၣ်ဃၣ်ဒီးသံကွၢ်အဝဲသ့ၣ်, “မ့ၢ်ယကဘၣ်လဲၤထီၣ်ဒုးဝ့ၢ်ရၤမိးန့ၣ်ဧါ. မ့တမ့ၢ်ယတဘၣ်လဲၤဘၣ်န့ၣ်ဧါ.” အဝဲသ့ၣ်စံးဆၢဝဲ, “လဲၤထီၣ်ဒုးအီၤတက့ၢ်. ကစၢ်ယွၤကဟ့ၣ်နၤတၢ်မၤနၢၤန့ၣ် လီၤ.”
6 ဘၣ်ဆၣ်စီၤယဟိၡၤဖးသံကွၢ်ဝဲ, “ယွၤအဝံတအိၣ်ဘၣ်ဖဲအံၤနီ တဂၤလၢပသံကွၢ်အီၤတၢ်ကသ့န့ၣ်ဘၣ်ဧါ.”
7 စီၤအၤဃာ်စံးဆၢဝဲ, “အိၣ်ဒံးဝဲတဂၤန့ၣ်လီၤ. မ့ၢ်စီၤယံးမလၤအဖိခွါစီၤမံၤကါယၤန့ၣ်လီၤ. ဘၣ်ဆၣ်ယသးဟ့အီၤမ့ၢ်လၢအဝဲတကတိၤတၢ်လၢဝံအကျိာ်အဂ့ၤနီ တမံၤလၢယဂီၢ်နီတစုဘၣ်အဃိလီၤ. ထီဘိမ့ၢ်ထဲတၢ်တမံၤမံၤလၢအအၢန့ၣ်လီၤ.” စီၤယဟိၡၤဖးစံးဝဲ, “နတကြၢးစံးတၢ်ဒ်သိးန့ၣ်ဘၣ်.”
8 လၢတၢ်န့ၣ်အဃိ, စီၤပၤအၤဃာ်ကိးနုာ်ကွီၢ်ဘျီၣ်အပဒိၣ်တဂၤ, ဒီးတဲဘၣ်အီၤလၢကလဲၤကိးန့ၢ်စီၤမံၤကါယၤတဘျီဃီန့ၣ်လီၤ.
9 စီၤပၤခံဂၤန့ၣ်, ကူသိးဝဲစီၤပၤအဆ့ကၤဒိၣ်တဖၣ်ဒီးဆ့ၣ် နီၤဝဲလၢအဝဲသ့ၣ်အလီၢ်ပစိာ်တဖၣ်အဖီခိၣ်ဖဲပှၤကြဲၢ်တၢ်အလီၢ်, လၢအအိၣ်ဖဲဝ့ၢ်ၡၤမရံအတြဲၤဖးဒိၣ်အချၢ, ဒီးကယဲၢ်ဝံတဖၣ်ကတိၤတၢ်လၢဝံအကျိာ်လၢအဝဲသ့ၣ်အမဲာ်ညါန့ၣ်လီၤ.
10 လၢအဝဲသ့ၣ်အကျါတဂၤလၢအမ့ၢ်စီၤကနၤနါအဖိခွါစီၤစံးဒကံ ယၤပိာ်န့ၢ်နၢၤထးတဖၣ်ဒီးစံးဘၣ်စီၤအၤဃာ်, “အအံၤမ့ၢ်တၢ်လၢယွၤစံးဝဲဒၣ်န့ၣ်လီၤ. နကဒုးပှၤစူၤရံဖိ တဖၣ်လၢတၢ်တဖၣ်အံၤဒီးနကမၤနၢၤအဝဲသ့ၣ်လၢာ်လၢာ်ဆ့ဆ့န့ၣ် လီၤ.”
11 ကယဲၢ်ဝံအဂၤခဲလၢာ်စံးတၢ်တမံၤဃီဒ်န့ၣ်လီၤ. အဝဲသ့ၣ်စံးဝဲ, “လဲၤထီၣ်ဒုးတၢ်ထီဒါဝ့ၢ်ရၤမိးဒီးနကမၤ နၢၤတၢ်လီၤ. ယွၤကဟ့ၣ်နၤတၢ်မၤနၢၤန့ၣ်လီၤ.”
12 ဖဲန့ၣ်အခါ, ပဒိၣ်လၢအလဲၤကိးစီၤမံၤကါယၤန့ၣ်စံးဘၣ်စီၤ မံၤကါယၤ, “ကယဲၢ်ဝံအဂၤခဲလၢာ်ကတိၤတ့ၢ်တၢ်လၢဝံအကျိာ်ဘၣ်ထွဲဒီးတၢ် မၤနၢၤလၢစီၤပၤအဂီၢ်, သတးဒီးနကြၢးမၤစ့ၢ်ကီးတၢ်တမံၤဃီန့ၣ်လီၤ.”
13 ဘၣ်ဆၣ်စီၤမံၤကါယၤစံးဆၢဝဲ, “လၢယွၤလၢအမူဝဲတဂၤအမံၤ အပူၤန့ၣ်, ယကစံးတၢ်လၢယကစၢ်ယွၤမၢယတဲန့ၣ်လီၤ.”
14 တုၤအဝဲလဲၤအိၣ်ဖျါထီၣ်လၢစီၤပၤအၤဃာ်အမဲာ်ညါန့ၣ်, စီၤပၤသံကွၢ်အီၤ, “စီၤမံၤကါယၤဧၢ, မ့ၢ်စီၤပၤယဟိၡၤဖး ဒီးယၤပကြၢးလဲၤထီၣ်ဒုးဝ့ၢ်ရၤမိးဧါ. မ့တမ့ၢ်ပတကြၢးလဲၤဒုးဘၣ်န့ၣ်ဧါ.” စီၤမံၤကါယၤစံးဆၢဝဲ, “လဲၤထီၣ်ဒုးတက့ၢ်. သပှၢ်ကတၢၢ်နကမၤနၢၤတၢ်လီၤ. ယွၤကဟ့ၣ်နၤတၢ်မၤနၢၤန့ၣ်လီၤ.”
15 ဘၣ်ဆၣ်စီၤအၤဃာ်စံးဆၢဝဲ, “ဖဲနကတိၤတၢ်ဒီးယၤဖဲ ယွၤအမံၤအပူၤန့ၣ်, တဲတၢ်မ့ၢ်တၢ်တီတက့ၢ်. မ့ၢ်ယကဘၣ်တဲနၤတၢ်န့ၣ်ပှဲၤဘျီလဲၣ်.”
16 စီၤမံၤကါယၤစံးဆၢဝဲ, “ယထံၣ်ဘၣ်ကီၢ်အံၣ်စရ့လးအသုးမုၢ်လီၤပြံလီၤပြါဝဲလၢတၢ်လူၢ် တဖၣ်အလိၤဒ်သိလၢအတအိၣ်ဒီးပှၤကွၢ်သိအသိးန့ၣ်လီၤ. ဒီးယွၤစံးဝဲဒၣ်, ပှၤတဖၣ်အံၤတအိၣ်ဒီးအခိၣ်အနၢ်ဘၣ်. မ်အဝဲသ့ၣ်က့ၤဆူ အဟံၣ်မုာ်မုာ်တက့ၢ်.”
17 စီၤအၤဃာ်စံးဘၣ်စီၤယဟိၡၤဖး, “ယတဲတ့ၢ်နၤလၢအဝဲတကတိၤ တၢ်အဂ့ၤနီတမံၤလၢဝံအကျိာ်လၢယဂီၢ်နီတစုဘၣ်. ထီဘိမ့ၢ်တၢ်တမံၤမံၤလၢအအၢန့ၣ်လီၤ.”
18 စီၤမံၤကါယၤစံးအါထီၣ်ဝဲ, “ခဲကနံၣ်အံၤဒိကနၣ်တၢ်လၢယွၤ စံးဝဲန့ၣ်တက့ၢ်. ယထံၣ်ဘၣ်ယွၤဆ့ၣ်နီၤလၢအလီၢ်ပစိာ်အဖီခိၣ်လၢမူ ခိၣ်, အိၣ်ဒီးအကလူးတဖၣ်ဆၢထၢၣ်လၢအကပၤန့ၣ်လီၤ.
19 ယွၤသံကွၢ်ဝဲ, မ့ၢ်မတၤကလီန့ၢ်စီၤအၤဃာ်ဒ်သိးအဝဲကလဲၤဝဲ ဒီးဘၣ်တၢ်မၤသံအီၤလၢဝ့ၢ်ရၤမိးန့ၣ်လဲၣ်. ကလူးတနီၤ, စံးတၢ်တမံၤဒီးအဂၤတနီၤ, စံးတၢ်အဂၤတမံၤဒၣ်,
20 တုၤလၢသးတဂၤဟဲထီၣ်ဆၢထၢၣ်, သုးဘူးအသးဆူယွၤအအိၣ်ဒီးစံး ဝဲ, ယကလီန့ၢ်အီၤလီၤ. ယွၤသံကွၢ်ဝဲ, နကလီအီၤဒ်လဲၣ်.
21 သးန့ၣ်စံးဆၢက့ၤဝဲ, ယကလဲၤဒီးမၤဒ်သိးကယဲၢ်စီၤအၤဃာ်အဝံ ခဲလၢာ်ကတဲတၢ်လီတၢ်ဝ့ၤတဖၣ်န့ၣ်လီၤ. ယွၤစံးဝဲဒၣ်, လဲၤဒီးလီန့ၢ်အီၤတက့ၢ်. နကမၤနၢၤတၢ်န့ၣ်လီၤ.”
22 ဒီးစီၤမံၤကါယၤမၤကတၢၢ်အတၢ်ကတိၤ, “တၢ်အံၤမ့ၢ်တၢ်လၢအမၤ တ့ၢ်အသးန့ၣ်လီၤ. ယွၤမၤတ့ၢ်ဒ်သိးနဝံတဖၣ်အံၤကလီန့ၢ်နၤလီၤ. ဘၣ်ဆၣ်အဝဲအနီၢ်ကစၢ်ဒၣ်ဝဲခါလီၤတ့ၢ်အကလုၢ်လၢနကထံၣ်ဘၣ်ဒီးတၢ် တတၢးတနါန့ၣ်လီၤ.”
23 အန့ၣ်ဒီးဝံစံးဒကံယၤလဲၤဃီၤဆူစီၤမံၤကါယၤအအိၣ်, ဒဲဝဲအမဲာ်, ဒီးသံကွၢ်ဝဲ, “ယွၤအသးဟးဖးဒီးယၤဒီးကတိၤတၢ်ဒီးနၤ, စးထီၣ်အခါဖဲလဲၣ်.”
24 စီၤမံၤကါယၤစံးဆၢဝဲ, “နကထံၣ်သ့ၣ်ညါအီၤဖဲနလဲၤနုာ်ဆူ ဒၢးလၢတၢ်လီၢ်ခံန့ၣ်လီၤ.”
25 အန့ၣ်ဒီး, စီၤပၤအၤဃာ်ဟ့ၣ်လီၤအကလုၢ်ဆူအပဒိၣ်ဖးဒိၣ်အကျါ တဂၤစံးဝဲ, “ဖီၣ်စီၤမံၤကါယၤဒီးလဲၤကိးအီၤဆူဝ့ၢ်အပဒိၣ်ဖးဒိၣ်စီၤ အၤမိၣ်အအိၣ်ဒီးဆူစီၤပၤဖိခွါစီၤယိၤအၣ်အအိၣ်န့ၣ်တက့ၢ်.
26 တဲဘၣ်အဝဲသ့ၣ်လၢကဒၢနုာ်အီၤဆူဃိာ်ပူၤဒီးဟ့ၣ်အီၣ်အီၤထဲ လၢကိၣ်ဒီးထံဧိၤတုၤလီၤလၢယဟဲက့ၤကဒါက့ၤပူၤပူၤဖျဲး ဖျဲးတက့ၢ်.”
27 စီၤမံၤကါယၤစံးဝဲ, “နမ့ၢ်ဟဲက့ၤပူၤပူၤဖျဲးဖျဲးန့ၣ် ဒီး, ယွၤတကတိၤတၢ်ခီဖျိယၤဘၣ်.” ဒီးအဝဲစံးအါထီၣ်ဝဲ, “ပှၤခဲလၢာ်သ့ၣ်ဧၢ, ဒိကနၣ်တၢ်လၢယစံးတ့ၢ်န့ၣ်တက့ၢ်.”
(၁စီၤပၤ ၂၂:၂၉-၃၅)
28 အန့ၣ်ဝံၤဒီးကီၢ်အံၣ်စရ့လးအစီၤပၤအၤဃာ်ဒီးကီၢ်ယူဒၤအစီၤ ပၤစီၤယဟိၡၤဖးလဲၤထီၣ်ဝဲဒ်သိးကဒုးဝ့ၢ်ရၤမိးလၢကီၢ်ကံး လဧးအပူၤန့ၣ်လီၤ.
29 စီၤအၤဃာ်စံးဘၣ်စီၤယဟိၡၤဖး, “တုၤပလဲၤထီၣ်ဒုးတၢ်န့ၣ်, ယကပျိာ်လီၤဆီယသး, မ့မ့ၢ်နဲ, ကူသိးဒၣ်နစီၤပၤအတၢ်ကူတၢ် သိးန့ၣ်တက့ၢ်.” လၢတၢ်န့ၣ်အဃိကီၢ်အံၣ်စရ့လးအစီၤပၤလဲၤထီၣ်ဆူတၢ်ဒုးအပူၤ အိၣ်ဒီးတၢ်ပျိာ်လီၤဆီအသးန့ၣ်လီၤ.
30 ကီၢ်စူၤရံအစီၤပၤဟ့ၣ်လီၤတ့ၢ်အကလုၢ်ဆူအလ့ၣ်ကဟၣ်သုးအခိၣ် တဖၣ်လၢအသုတလဲၤထီၣ်ဒုးပှၤအဂၤတဂ့ၤ. မ့မ့ၢ်ကဒုးဒၣ်ထဲကီၢ်အံၣ်စရ့လးအစီၤပၤဧိၤန့ၣ်လီၤ.
31 လၢတၢ်န့ၣ်အဃိ, တုၤအဝဲသ့ၣ်ထံၣ်ဃီၤစီၤယဟိၡၤဖးန့ၣ်, အဝဲသ့ၣ်ခဲလၢာ်ဆိကမိၣ်လၢအဝဲမ့ၢ်ကီၢ်အံၣ်စရ့လးအစီၤပၤဒီး အဝဲသ့ၣ်ဃၣ်အသးလၢကဒုးအီၤအဂီၢ်န့ၣ်လီၤ. ဘၣ်ဆၣ်စီၤယဟိၡၤဖးကိးထီၣ်ဝဲဒီးယွၤ, ကစၢ်ယွၤမၤပူၤဖျဲး အီၤဒီးဃၣ်ကွံာ်တၢ်ဒုးယံၤဒီးအီၤန့ၣ်လီၤ.
32 လ့ၣ်ကဟၣ်အခိၣ်တဖၣ်ထံၣ်ဘၣ်ဝဲလၢအဝဲတမ့ၢ်ကီၢ်အံၣ်စရ့လးအစီၤ ပၤဘၣ်, အဃိအဝဲသ့ၣ်ဆိကတီၢ်အတၢ်လူၤထွဲအီၤန့ၣ်လီၤ.
33 ဘၣ်ဆၣ်ဒီး, လၢတၢ်ဘၣ်ဆၢၣ်ဘၣ်တီၤအဃိ, ကီၢ်စူၤရံၤအသုးဖိတဂၤခးချံၣ်တဘ့ၣ်လၢအဘၣ်စီၤအၤဃာ်ဖဲ အသဃိးအဆၢန့ၣ်လီၤ. အဝဲကိးထီၣ်ဆူအပှၤနီၣ်လ့ၣ်ကဟၣ်သုးအ အိၣ်, “ယဘၣ်ဒိလံ. ဃၣ်တရံးက့ၤဒီးဟးထီၣ်ကွံာ်လၢတၢ်ဒုးပျီန့ၣ် တက့ၢ်.”
34 ဖဲတၢ်ဒုးတၢ်ယၤဆူၣ်ဝဲအခါန့ၣ်, စီၤပၤအၤဃာ်ဘၣ်တၢ်ပိာ်ဆၢ ထၢၣ်ဒံးဒၣ်အီၤလၢအဝဲအလ့ၣ်ကဟၣ်သုးအပူၤကွၢ်ဆၢညါပှၤစူၤရံ ဖိတဖၣ်န့ၣ်လီၤ. တုၤမုၢ်လီၤနုာ်န့ၣ်အဝဲသံဝဲဒၣ်လီၤ.