28
1 စီၤပၤစီၤဒၤဝံးမၤလိာ်ကယဲၢ်အံၣ်စရ့လးအပဒိၣ်ပပှၢ်ခဲလၢာ်လၢ ကဟဲအိၣ်ဖှိၣ်ရိဖှိၣ်ဖဲဝ့ၢ်ယရူၤၡလ့ၣ်အပူၤန့ၣ်လီၤ. လၢတၢ်န့ၣ်အဃိ, ကယဲၢ်ဒူၣ်တဖၣ်အခိၣ်အနၢ်ခဲလၢာ်, ခိၣ်နၢ်တဖၣ်လၢအပၢဆှၢတ့ၢ်ဘီမုၢ်အတၢ်မၤ, ခိၣ်နၢ်တဖၣ်လၢဒူၣ်ထၢတဖၣ်အပူၤ, ပှၤတဖၣ်လၢအပၢဆှၢသုးကျဲၤ တၢ်စုလီၢ်ခီၣ်ခိၣ်ဒီးဆၣ်ဖိကီၢ်ဖိတဖၣ်လၢအဘၣ်ထွဲ ဆူစီၤပၤဒီးအဝဲအဖိခွါတဖၣ်, သပှၢ်ကတၢၢ်ပှၤလၢအမ့ၢ်ကယဲၢ် ပဒိၣ်ပပှၢ်တဖၣ်လၢနီပူၤ, ပှၤသုးဖိတဖၣ်လၢအလဲၤလၢညါ, ဒီးပှၤအကါဒိၣ်တဖၣ်, ဟဲပာ်ဖှိၣ်အသးလၢဝ့ၢ်ယရူၤၡလ့ၣ်အပူၤ န့ၣ်လီၤ.
2 စီၤဒၤဝံးဆၢထၢၣ်လၢအဝဲသ့ၣ်အမဲာ်ညါ, ဒီးကတိၤလီၤတၢ်ဆူ အဝဲသ့ၣ်အအိၣ်, “ယပှၤထံဖိကီၢ်ဖိသ့ၣ်ဧၢ, ဒိကနၣ်ယၤတက့ၢ်. တၢ်မိၢ်သူၣ်ထီၣ်တ့ၢ်ဘၣ်ယသးလၢဟံၣ်အဂၢၢ်အကျၢၤတဖျၢၣ်လၢယွၤ အတလါစီဆှံ, ယွၤပကစၢ်ယွၤအခီၣ်ယီၢ်လီၤအလီၢ်အဂီၢ်န့ၣ်လီၤ. လၢတၢ်မၤလၤမၤကပီၤအီၤအဂီၢ်, ယကတဲာ်ကတီၤတ့ၢ်တၢ်တဖၣ်လၢတၢ်ကသူၣ်ထီၣ်တၢ်လုၢ်ဟံၣ်တဖျၢၣ်,
3 ဘၣ်ဆၣ်အဝဲတြီတ့ၢ်ယၤလၢယကမၤတၢ်န့ၣ်, မ့ၢ်လၢယမ့ၢ်ပှၤသုးဖိ တဂၤဒီးဂၢ်လီၤဘၣ်တ့ၢ်တၢ်သွံၣ်အါမးအဃိန့ၣ်လီၤ.
4 ယွၤ, အံၣ်စရ့လးအကစၢ်ယွၤဃုထၢတ့ၢ်ယၤဒီးယစၢၤယသွဲၣ်တဖၣ်လၢ ကပၢအံၣ်စရ့လးလီၤစိၤလီၤထီန့ၣ်လီၤ. အဝဲဃုထၢတ့ၢ်ပှၤယူဒၤဖိအဒူၣ်လၢကဟ့ၣ်ထီၣ်ခိၣ်နၢ်တဖၣ်, ဒီးလၢယူဒၤအကျါန့ၣ်, အဝဲဃုထၢတ့ၢ်ယပၢ်အပှၤဟံၣ်ဖိ ဃီဖိန့ၣ်လီၤ. လၢကယဲၢ်ပှၤဟံၣ်ဖိဃီဖိခဲလၢာ်အကျါ, အဝဲဘၣ်သူၣ်ဘၣ်သးတ့ၢ်လၢကဃုထၢယၤဒီးဒုးကဲထီၣ်ယၤစီၤပၤ လၢပှၤအံၣ်စရ့လးဖိခဲလၢာ်အဖီခိၣ်န့ၣ်လီၤ.
5 အဝဲဟ့ၣ်ယၤဖိခွါအါဂၤဒီးလၢကယဲၢ်အဝဲသ့ၣ်အကျါန့ၣ်, အဝဲဃုထၢထီၣ်တ့ၢ်စီၤၡလိၤမိၤဒ်သိးကပၢတၢ်လၢကီၢ်အံၣ်စရ့ လး, ယွၤအဘီအမုၢ်အဖီခိၣ်န့ၣ်လီၤ.
6 ယွၤစံးဘၣ်ယၤ, နဖိခွါစီၤၡလိၤမိၤကမ့ၢ်ပှၤတဂၤလၢကသူၣ်ထီၣ် ယတၢ်လုၢ်ဟံၣ်န့ၣ်လီၤ. ယဃုထၢတ့ၢ်အီၤလၢကမ့ၢ်ယဖိခွါဒီးယကမ့ၢ်အဝဲအပၢ်န့ၣ်လီၤ.
7 အဝဲမ့ၢ်စူၢ်ထွဲကယဲၢ်ယတၢ်သိၣ်တၢ်သီတဖၣ်ဒီးတၢ်မၤလိာ်တဖၣ်လီၤ တံၢ်လီၤဆဲးဒ်အမၤဝဲခဲအံၤအသိးန့ၣ်ဒီး, ယကဒုးအိၣ်ဂၢၢ်ဆိးကျၢၤအဘီအမုၢ်လီၤစိၤလီၤထီန့ၣ်လီၤ.
8 လၢတၢ်န့ၣ်အဃိ, ယပှၤဂီၢ်မုၢ်သ့ၣ်ဧၢ, လၢပကစၢ်ယွၤဒီးကယဲၢ်အံၣ် စရ့လး, ယွၤအပှၤဂီၢ်မုၢ်, အတၢ်ပာ်ဖှိၣ်သးအံၤအမဲာ်ညါ, ယသိၣ်လီၤမၤလိာ်သုလၢသုကစူၢ်ကယဲၢ်တၢ်လၢယွၤပကစၢ်ယွၤမၤလိာ် တ့ၢ်ပှၤလီၤတံၢ်လီၤဆဲး, ဒ်သိးသုကအိၣ်ဆိးထွဲဘၣ်လၢကီၢ်အဂ့ၤအံၤအပူၤ, ဒီးဒ်သိးသုကဟ့ၣ်န့ၢ်သါဘၣ်ဒံးဆူပှၤစိၤလၢခံတဖၣ်လီၤစိၤ လီၤထီအဂီၢ်န့ၣ်လီၤ.”
9 ဒီးအဝဲစံးဘၣ်ဝဲစီၤၡလိၤမိၤ, “ယဖိခွါဧၢ, ယသိၣ်လိမၤလိာ်နၤလၢနကသ့ၣ်ညါနပၢ်အကစၢ်ယွၤဒီးနကမၤအတၢ်မၤ လၢနသးဒီဖျၢၣ်ညါဒီးလၢတၢ်သူၣ်အိၣ်သးအိၣ်အပူၤန့ၣ်လီၤ. အဝဲသ့ၣ်ညါပတၢ်ဆိကမိၣ်တဖၣ်ခဲလၢာ်ဒီးပတၢ်မိၣ်န့ၢ်သးလီ တဖၣ်ခဲလၢာ်န့ၣ်လီၤ. နမ့ၢ်လဲၤဆူအအိၣ်ဒီးအဝဲကတူၢ်လိာ်နၤ, ဘၣ်ဆၣ်နမ့ၢ်ဃၣ်ကွံာ်နသးလၢအီၤဒီးအဝဲကကွံာ်တ့ၢ်ကွံာ်နၤလီၤ စိၤလီၤထီန့ၣ်လီၤ.
10 နကဘၣ်သ့ၣ်ညါလၢယွၤဃုထၢတ့ၢ်နၤလၢနကသူၣ်ထီၣ်အတၢ်လုၢ်ဟံၣ်စီ ဆှံအဂီၢ်န့ၣ်လီၤ. ခဲကနံၣ်အံၤမၤအီၤ, ဒီးမၤအီၤအိၣ်ဒီးတၢ်ပာ်လီၤသးကျၢၤမုဆှုတက့ၢ်.”
11 စီၤဒၤဝံးဟ့ၣ်ဃီၤစီၤၡလိၤမိၤလၢကယဲၢ်တၢ်တိာ်ကျဲၤတဖၣ်လၢ တၢ်သူၣ်ထီၣ်ယွၤအတၢ်လုၢ်ဟံၣ်ဒီးအဂၢၤတဖၣ်အဂီၢ်, လၢတၢ်ပာ်ဖှိၣ်အဒၢးတဖၣ်ဒီးကယဲၢ်ဒၢးအဂၤခဲလၢာ်အဂီၢ်ဒီးလၢ တၢ်အလီၢ်စီဆှံကတၢၢ်, ဖဲတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤအလီၢ်အဂီၢ်န့ၣ်လီၤ.
12 အဝဲဟ့ၣ်လီၤစ့ၢ်ကီးအီၤလၢကယဲၢ်တၢ်တိာ်ကျဲၤလၢအအိၣ်လၢအသး ပူၤ, လၢတၢ်လုၢ်ဟံၣ်ဂၢၤတဖၣ်, ဒီးဒၢးအိၣ်ဝးတရံးအီၤတဖၣ်အဂီၢ်ဒီးလၢယွၤအတၢ်လုၢ်ဟံၣ်အတၢ် ပီးတၢ်လီဒီးတၢ်ဟ့ၣ်လၢအဘၣ်တၢ်ပာ်စီဆှံတ့ၢ်အီၤဆူယွၤ, အတၢ်ပာ်ဖှိၣ်အဒၢးတဖၣ်အဂီၢ်န့ၣ်လီၤ.
13 စီၤဒၤဝံးဟ့ၣ်ဃီၤစ့ၢ်ကီးအီၤလၢတၢ်တိာ်ကျဲၤတဖၣ်လၢအဘၣ်ထွဲ ဒီးတၢ်ကရၢကရိထီၣ်ပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ် လၢကမၤအတၢ်မၤတဖၣ်အဂီၢ်, လၢကမၤယွၤအတၢ်လုၢ်ဟံၣ်အတၢ်မၤအဂီၢ်, ဒီးလၢကအံးထွဲကွၢ်ထွဲ ကယဲၢ်ယွၤအတၢ်လုၢ်ဟံၣ်အဃၢၤအဃိၢ်တဖၣ်အဂီၢ်န့ၣ်လီၤ.
14 အဝဲဟ့ၣ်လီၤစ့ၢ်ကီးတၢ်သိၣ်လီၤမၤလိာ်တဖၣ်လၢ, တၢ်ကဘၣ်သူထူဒီးစ့တဖၣ်ဆံးအါလၢတၢ်ကမၤတၢ်လုၢ်ဟံၣ်အဃၢၤ အဃိာ်တဖၣ်အဂီၢ်လဲၣ်,
15 ဆံးအါလၢမ့ၣ်အူဒၢဒီးတၢ်ပာ်မ့ၣ်အူဒၢအလီၢ်တခါစုာ်စုာ် အဂီၢ်လဲၣ်,
16 ဆံးအါလၢစီၢ်နီၤခိၣ်စ့တဖၣ်အဂီၢ်လဲၣ်, ဆံးအါလၢစီၢ်နီၤခိၣ် ထူတဖျၢၣ်စုာ်စုာ်, လၢကိၣ်တဖၣ်လၢတၢ်လုၢ်ထီၣ်အီၤဆူ ကစၢ်ယွၤအအိၣ်ကဘၣ်တၢ်ပာ်ထီၣ်အီၤအဂီၢ်, လဲၣ်န့ၣ်လီၤ.
17 အဝဲဟ့ၣ်လီၤစ့ၢ်ကီးတၢ်သိၣ်လီၤမၤလိာ်တဖၣ်ဘၣ်ထွဲဒီးတၢ်က ဘၣ်သူထူအစီဆံးအါလၢတၢ်ကမၤနီၣ်ဆဲးတဖၣ်, သလၢတဖၣ်ဒီးသပၢၤတဖၣ်အဂီၢ်လဲၣ်, တၢ်ကဘၣ်သူစ့ဒီးထူ ဆံးအါလၢတၢ်ကမၤလီခီတဖၣ်အဂီၢ်လဲၣ်,
18 ဒီးလၢတၢ်ကမၤတၢ်လုၢ်လီၢ်လၢတၢ်နၢမူဘၣ်တၢ်ဆိၣ်ကဲၤအီၤအ ဂီၢ်, ဒီးလၢတၢ်မၤလ့ၣ်ကဟၣ်လၢယွၤအတၢ်အၢၣ်လီၤအီလီၤအတလါစီဆှံ လၢခ့ရူာ်တဖၣ်သလၣ်ထီၣ်အဒံးဆ့လၢအလိၤဘၣ်တၢ်ပာ်ထီၣ်အီၤအ ဂီၢ်, တၢ်ကဘၣ်သူထူစီဆံးအါလဲၣ်န့ၣ်လီၤ.
19 စီၤပၤဒၤဝံးစံးဝဲ, “ကယဲၢ်တၢ်ခဲလၢာ်အံၤအိၣ်လၢတၢ်တိာ် ကျဲၤလၢတၢ်ကွဲးလီၤအီၤဒ်ယွၤအနီၢ်ကစၢ်ဒၣ်ဝဲသိၣ်လီၤမၤလိာ် ဒီးဟ့ၣ်လီၤယၤလၢယကမၤထွဲအီၤအပူၤအသိးန့ၣ်လီၤ.”
20 စီၤပၤစီၤဒၤဝံးစံးဘၣ်အဖိခွါစီၤၡလိၤမိၤ, “နာ်န့ၢ်လီၤနသးဒီးပာ်နသးကျၢၤမုဆှုတက့ၢ်. စးထီၣ်နတၢ်မၤဒီးပျဲတၢ်နီတမံၤဒုးဆိကတီၢ်နၤတဂ့ၤ. ယွၤ, ကစၢ်ယွၤလၢယမၤအတၢ်ကအိၣ်ဒီးနၤလီၤ. အဝဲတပာ်လီၤတဲာ်နၤဘၣ်. မ့မ့ၢ်အဝဲကအိၣ်ဒီးနၤတုၤနသူၣ်ထီၣ်ယွၤအတၢ်လုၢ်ဟံၣ်ဝံၤဝဲ တစုန့ၣ်လီၤ.”
21 ပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်ဘၣ်တၢ်ဟ့ၣ်လီၤတ့ၢ်လံ အမူအဒါလၢကမၤဝဲလၢယွၤအတၢ်လုၢ်ဟံၣ်အပူၤအဂီၢ်န့ၣ်လီၤ. ပှၤမၤတၢ်ဖိတဖၣ်လၢအအိၣ်ဒီးကယဲၢ်တၢ်သ့တၢ်ဘၣ်အကလုာ်ကလုာ်သး အိၣ်မၤစၢၤနၤ, ဒီးကယဲၢ်ပှၤဂီၢ်မုၢ်ခဲလၢာ်ဒီးအဝဲသ့ၣ်အခိၣ်အနၢ်တဖၣ်ကမၤတၢ်ဒ် နမၤလိာ်အီၤန့ၣ်လီၤ.