23
1 ဖဲစီၤဒၤဝံးအသးပှၢ်ထီၣ်နးမးန့ၣ်အဝဲဒုးကဲထီၣ်အဖိခွါ စီၤၡလိၤမိၤလၢအံၣ်စရ့လးအစီၤပၤန့ၣ်လီၤ.
2 စီၤပၤဒၤဝံးဒုးအိၣ်ဖှိၣ်ရိဖှိၣ်ကယဲၢ်ပှၤအံၣ်စရ့လးအခိၣ် အနၢ်ခဲလၢာ်ဒီးကယဲၢ်ပှၤလုၢ်တၢ်အခိၣ်ဒီးပှၤလ့ၤဝံဖိတဖၣ်ခဲ လၢာ်န့ၣ်လီၤ.
3 အဝဲမၤတၢ်ဂံၢ်ဒီးတၢ်ဆဲးလီၤကယဲၢ်ပှၤလ့ၤဝံဖိပိာ်ခွါတဖၣ် လၢအသးအိၣ်သၢဆံဒီးဆူအဖီခိၣ်ခဲလၢာ်အမံၤန့ၣ်လီၤ. ပှၤအတၢ်ဂံၢ်ခဲလၢာ်မ့ၢ်ဝဲပှၤ သၢကလးဃိးကထိဂၤန့ၣ်လီၤ.
4 စီၤပၤဃုထၢပာ်လီၤတ့ၢ်ပှၤ ခံကလးလွံၢ်ကထိ ဂၤလၢကပၢဆှၢယွၤအတၢ်လုၢ်ဟံၣ်အတၢ်မၤအဂီၢ်, ပှၤဃုကထိဂၤလၢကပၢၤဃာ်တၢ်ကွဲးနီၣ်တဖၣ်ဒီးကမ့ၢ်ပှၤစံၣ်ညီၣ်ကွီၢ်တဖၣ်အဂီၢ်,
5 ပှၤ လွံၢ်ကထိ ဂၤလၢကပၢၤပဲတြီ, ဒီးပှၤလွံၢ်ကထိ ဂၤလၢကစံးထီၣ်ပတြၢၤယွၤအိၣ်ဒီးတၢ်သူၣ်ဝံၣ်သးဆၢအပီးအလီ တဖၣ်လၢအဘၣ်တၢ်ဟ့ၣ်အီၤလၢစီၤပၤ, လၢတၢ်ကွၢ်စိအံၤအဂီၢ်န့ၣ်လီၤ.
6 စီၤဒၤဝံးနီၤဖးလီၤပှၤလ့ၤဝံဖိတဖၣ်ဆူပှၤသၢကရူၢ်, ဒ်အဒူၣ်ထၢဒၣ်ဝဲအသိးလၢအမ့ၢ်က့ရၡိၣ်အဒူၣ်, ကဃးအဒူၣ်ဒီးမရၤရံၤအဒူၣ်န့ၣ်လီၤ.
7 စီၤက့ရၡိၣ်အိၣ်ဒီးအဖိခွါခံဂၤလၢအမ့ၢ်ဝဲ, စီၤလၤဒၣ်ဒီးစီၤၡံမံၤန့ၣ်လီၤ.
8 စီၤလၤဒၣ်အိၣ်ဒီးအဖိခွါသၢဂၤလၢအမ့ၢ်ဝဲစီၤယဃံအ့လး, စီၤစ့သၣ်ဒီးစီၤယိၤအ့လး,
9 လၢအမ့ၢ်ဒူၣ်ထၢတဖၣ်အခိၣ်လၢအဟဲလီၤစၢၤလီၤသွဲၣ်လၢစီၤလၤဒၣ် န့ၣ်လီၤ. (စီၤၡံမံၤအိၣ်ဒီးအဖိခွါသၢဂၤလၢအမ့ၢ်ဝဲ, စီၤၡလိမံး, စီၤဃစံၤအ့လးဒီးစီၤဃၤရၣ်န့ၣ်လီၤ.)
10 စီၤၡံမံၤအိၣ်ဒီးအဖိခွါလွံၢ်ဂၤဒီးဒ်အသးအနံၣ်အလါအပှၢ် အစၢ်အသိးန့ၣ်မ့ၢ်ဝဲ, စီၤယၤဃး, စီၤစံနၤ, စီၤယဧူၡးဒီး
11 စီၤဘရံဧၤန့ၣ်လီၤ. စီၤယဧူၡးဒီးစီၤဘရံဧၤတအိၣ်ဒီးအစၢၤ အသွဲၣ်အါအါဂီၢ်ဂီၢ်ဘၣ်. လၢတၢ်န့ၣ်အဃိအဝဲသ့ၣ်ဘၣ်တၢ်ဂံၢ်အီၤဒ်ပှၤတဒူၣ်တထၢအသိးန့ၣ် လီၤ.
12 စီၤကဃးအိၣ်ဒီးအဖိခွါလွံၢ်ဂၤလၢအမ့ၢ်ဝဲ, စီၤဧၤမရၣ်, စီၤယံးစဟၢ်, စီၤဃ့ဘြိၣ်ဒီးစီၤဧူးစံၤအ့လးန့ၣ်လီၤ.
13 အဝဲအဖိဝဲၢ်ကိစီၤဧၤမရၣ်န့ၣ်မ့ၢ်စီၤအၤဟရိၣ်ဒီးစီၤမိၤၡ့ အပၢ်န့ၣ်လီၤ. (စီၤအၤဟရိၣ်ဒီးအစၢၤအသွဲၣ်တဖၣ်ဘၣ်တၢ်ပာ်အီၤလီၤဆီဒ်သိး ကမ့ၢ်ပှၤအဒိၣ်လၢတၢ်ကွၢ်ထွဲတၢ်စီဆှံအဃၢၤအဃိာ်တဖၣ်အဂီၢ်လီၤ စိၤလီၤထီ, ဒီးကဘၣ်ဆူးကဲၤတၢ်နၢမူ လၢတၢ်ဘူၣ်ထီၣ်ဘါထီၣ်ယွၤအပူၤ, လၢကမၤယွၤအတၢ်ဒီးကဆိၣ်ဂ့ၤ ပှၤဂီၢ်မုၢ်လၢအဝဲအမံၤအပူၤအဂီၢ်န့ၣ်လီၤ.
14 ဘၣ်ဆၣ်, ကစၢ်ယွၤအပှၤကညီစီၤမိၤၡ့အဖိခွါတဖၣ်ကဘၣ်တၢ်ဂံၢ်ဃုာ် အီၤလၢပှၤလ့ၤဝံဖိတဖၣ်အကျါန့ၣ်လီၤ.)
15 စီၤမိၤၡ့အိၣ်ဒီးအဖိခွါခံဂၤလၢအမ့ၢ်ဝဲ, စီၤက့ရၡိၣ်ဒီးစီၤအလၤဧစၢ်န့ၣ်လီၤ.
16 ပှၤအခိၣ်လၢစီၤက့ရၡိၣ်အဖိခွါတဖၣ်အကျါမ့ၢ်ဝဲစီၤၡဘူၤအ့လးန့ၣ်လီၤ.
17 စီၤအလၤဧစၢ်အိၣ်ဒီးအဖိခွါထဲတဂၤဧိၤလၢအမ့ၢ်ဝဲစီၤရဃါဘ ယၤ, ဘၣ်ဆၣ်စီၤရဃါဘယၤအိၣ်ဒီးအစၢၤအသွဲၣ်အါမးန့ၣ်လီၤ.
18 စီၤကဃးအဖိခွါခံဂၤတဂၤလၢအမ့ၢ်စီၤယံးစဟၢ်အိၣ်ဒီးအဖိ ခွါတဂၤလၢအမ့ၢ်စီၤၡလိမံးပှၤအခိၣ်လၢဒူၣ်ထၢအပူၤန့ၣ်လီၤ.
19 စီၤကဃးအဖိခွါသၢဂၤတဂၤ, စီၤဃ့ဘြိၣ်န့ၣ်အိၣ်ဒီးအဖိခွါ လွံၢ်ဂၤလၢအမ့ၢ်ဝဲစီၤယရံယၤ, စီၤအမၤရယၤ, စီၤယၤဃစံၤအ့လးဒီးစီၤယကၤမၣ်န့ၣ်လီၤ.
20 စီၤကဃးအဖိခွါလွံၢ်ဂၤတဂၤစီၤဧူးစံအ့လး, အိၣ်ဒီးအဖိခွါခံဂၤလၢအမ့ၢ်ဝဲစီၤမံၤကါဒီးစီၤယၡံယၤ န့ၣ်လီၤ.
21 စီၤမရၤရံအိၣ်ဒီးအဖိခွါခံဂၤလၢအမ့ၢ်ဝဲစီၤမးဃၤလံၤ ဒီးစီၤမူၡံၤန့ၣ်လီၤ. စီၤမးဃၤလံၤအိၣ်စ့ၢ်ကီးဒီးအဖိခွါခံဂၤလၢအမ့ၢ်ဝဲ, စီၤအလၤဧစၢ်ဒီးစီၤကံၣ်,
22 ဘၣ်ဆၣ်စီၤအလၤဧစၢ်သံဝဲဒီးအဖိပိာ်ခွါတအိၣ်ဘၣ်နီတဂၤဘၣ်, အိၣ်ဒၣ်ထဲအဖိမုၣ်တဖၣ်ဧိၤန့ၣ်လီၤ. အဖိမုၣ်တဖၣ်ဟံးန့ၢ်အတခွါတဖၣ်လၢအမ့ၢ်စီၤကံၣ်အဖိခွါတဖၣ် န့ၣ်လီၤ.
23 စီၤမရၤရံၤအဖိခွါခံဂၤတဂၤစီၤမူၡံၤအိၣ်ဒီးအဖိခွါသၢဂၤလၢအမ့ၢ်ဝဲ, စီၤမးဃၤလံၤ, စီၤဧ့ဒ့ၢ်ဒီးစီၤယရံမိးန့ၣ်လီၤ.
24 ပှၤသ့ၣ်တဖၣ်အံၤမ့ၢ်စီၤလ့ၤဝံအစၢၤအသွဲၣ်တဖၣ်ဒ်အဒူၣ်ထၢတဖၣ် ဒီးအဟံၣ်ဖိဃီဖိတဖၣ်အိၣ်ဝဲအသိး, ဒီးအဝဲသ့ၣ်ကိးဂၤဒဲးဘၣ်တၢ်ထၢဒီးကွဲးနီၣ်အမံၤဒ်အအိၣ်ဝဲ အသိးန့ၣ်လီၤ. အဝဲအစၢၤအသွဲၣ်တဖၣ်လၢအသးအိၣ်အနံၣ်ခံဆံဒီးအါန့ၢ်အန့ၣ်တဂၤ ဘၣ်တဂၤစုာ်စုာ်အိၣ်ဒီးအမူအဒါလၢအလီၤဘၣ်အီၤတဂၤတမံၤလၢ ယွၤအတၢ်လုၢ်ဟံၣ်အပူၤန့ၣ်လီၤ.
25 စီၤဒၤဝံးစံးဝဲ, “ယွၤ, အံၣ်စရ့လးအကစၢ်ယွၤဟ့ၣ်တ့ၢ်တၢ်ဃူ တၢ်ဖိးဆူအပှၤဂီၢ်မုၢ်, ဒီးအဝဲအနီၢ်ကစၢ်ဒၣ်ဝဲကအိၣ်ဝဲဆိးဝဲ လၢဝ့ၢ်ယရူၤၡလ့ၣ်အပူၤလီၤစိၤလီၤထီန့ၣ်လီၤ.
26 လၢတၢ်န့ၣ်အဃိ, အလီၢ်တအိၣ်လၢၤနီတဘျီလၢပှၤလ့ၤဝံဖိ တဖၣ်တဘၣ်စိာ်လၢၤဒဲစီဆှံလၢယွၤအိၣ်ဝဲဆိးဝဲဒီးတၢ်အဃၢၤ အဃိာ်လၢတၢ်သူအီၤလၢတၢ်ဘူၣ်တၢ်ဘါအပူၤန့ၣ်ဘၣ်.”
27 ဒိးသန့ၤထီၣ်အသးလၢစီၤဒၤဝံးအတၢ်နဲၣ်ကျဲၤလၢခံကတၢၢ်တဖၣ် အဖီခိၣ်န့ၣ်, ကယဲၢ်ပှၤလ့ၤဝံဖိခဲလၢာ်ဘၣ်တၢ်ထၢဒီးကွဲးနီၣ်အမံၤလၢတၢ်မၤ အဂီၢ်ဖဲအဝဲသ့ၣ်အသးပှဲၤထီၣ်အနံၣ်ခံဆံန့ၣ်,
28 ဒီးဘၣ်တၢ်ဟ့ၣ်မူဟ့ၣ်ဒါအီၤ, မူဒါဒ်လၢလာ်တဖၣ်အံၤ, လၢကမၤစၢၤပှၤလုၢ်တၢ်အခိၣ်တဖၣ်လၢအဟဲလီၤစၢၤလီၤသွဲၣ်လၢစီၤ အၤဟရိၣ်လၢတၢ်ဘူၣ်ထီၣ်ဘါထီၣ်လၢယွၤအတၢ်လုၢ်ဟံၣ်အပူၤအဂီၢ်, လၢကကွၢ်ထွဲအဂၢၤတဖၣ်ဒီးအဒၢးသ့ၣ်တဖၣ်, ဒီးကပၢၤဃာ်ကယဲၢ်တၢ်တမံၤလၢ်လၢ်လၢအစီဆှံန့ၣ်ဒ်သိးသု တဘၣ်တၢ်မၤတကဆှီအီၤတဂ့ၤ,
29 ဒ်သိးကဟံးန့ၢ်မူဒါလၢကိၣ်လၢကဘၣ်တၢ်လုၢ်ထီၣ်အီၤဆူ ကစၢ်ယွၤအအိၣ်, ကိၣ်ကမူၣ်လၢအဘၣ်တၢ်သူအီၤလၢတၢ်လုၢ်မၤဘူၣ် တဖၣ်အဂီၢ်, ကိၣ်ဘ့ၣ်ဘၣ်တဖၣ်လၢတအိၣ်ဒီးကိၣ်မံၣ်အဂီၢ်, တၢ်လုၢ်မၤဘူၣ်တဖၣ်လၢတၢ်ကုၢ်အီၤအဂီၢ်ဒီးကိၣ်ကမူၣ်လၢအဘၣ်တၢ် ဃါဃုာ်အီၤဒီးသ့ၣ်စၤယံးအသိအဂီၢ်, လၢတၢ်စီၤဒီးတၢ်ထိၣ်မ့ၢ်ဂ့ၤဃီၣ်မ့ၢ်ဂ့ၤတၢ်ဟ့ၣ်ဆူအတၢ်လုၢ် တၢ်ပာ်တဖၣ်အဂီၢ်,
30 ဒီးလၢတၢ်စံးထီၣ်ပတြၢၤဒီးတၢ်မၤလၤကပီၤယွၤကိးမုၢ်ဂီၤ ဒီးကိးမုၢ်ဟါအဂီၢ်,
31 ဒီးဖဲတၢ်လုၢ်မၤဘူၣ်ဆူယွၤတဖၣ်, ဘၣ်တၢ်ဆူးကဲၤအီၤလၢမုၢ် အိၣ်ဘှံးနံၤ, ဒီးလါထီၣ်သီအမူးဒီးမူးအဂၤတဖၣ်အဂီၢ်အခါန့ၣ်လီၤ. တၢ်သိၣ်တၢ်ဘျၢလၢတၢ်ဘူၣ်ထီၣ်ဘါထီၣ်ယွၤကိးကတီၢ်ဒဲးအတၢ်မၤ အဂီၢ်ဘၣ်တၢ်ပာ်လီၤအီၤလီၤတံၢ်လီၤဆဲးန့ၣ်လီၤ. ပှၤလ့ၤဝံဖိတဖၣ်ဘၣ်တၢ်ဟ့ၣ်မူဟ့ၣ်ဒါအီၤလၢတၢ်ဘူၣ်ထီၣ်ဘါ ထီၣ်ယွၤကိးဆၢကိးကတီၢ်ဒဲးအဂီၢ်န့ၣ်လီၤ.
32 အဝဲသ့ၣ်ဘၣ်တၢ်ဟ့ၣ်မူဟ့ၣ်ဒါအီၤလၢကအံးထွဲကွၢ်ထွဲယွၤအဒဲ စီဆှံလၢယွၤအိၣ်ဝဲ, ဒီးယွၤအတၢ်လုၢ်ဟံၣ်, ဒီးကဘၣ်မၤစၢၤအဝဲသ့ၣ်အဘူးအတံၢ်တဖၣ်, ပှၤလုၢ်တၢ်အခိၣ်တဖၣ်လၢအဟဲလီၤစၢၤလီၤသွဲၣ်လၢစီၤအၤဟရိၣ်လၢ တၢ်ဘူၣ်တၢ်ဘါလၢတၢ်လုၢ်ဟံၣ်ပူၤန့ၣ်လီၤ.