21
(၂ မူၤ.၂၄:၁-၅)
1 မုၣ်ကီၤလံၢ်အဲၣ်ဒိးဒုးလီၤဘၣ်တၢ်ကိၢ်တၢ်ဂီၤတမံၤလၢအံၣ်စရ့ လးအပှၤဂီၢ်မုၢ်အလိၤအဃိအဝဲထိၣ်ဂဲၤစီၤဒၤဝံးအသးလၢကထၢပှၤ ထံဖိကီၢ်ဖိအနီၣ်ဂံၢ်ဒီးမၤတၢ်ဆဲးလီၤမံၤန့ၣ်လီၤ.
2 စီၤဒၤဝံးဟ့ၣ်လီၤအကလုၢ်ဆူစီၤယိၤအာ်ဒီးသုးခိၣ်သုးနၢ် အဂၤတဖၣ်ဒီးစံးဝဲ, “လဲၤတၢ်သကုၤကီၢ်အံၣ်စရ့လးဒီဘ့ၣ်စးထီၣ်လၢဝ့ၢ်ဘ့ၤၡဘၤ တုၤဆူဝ့ၢ်ဒၣ်ဒီးဂံၢ်ပှၤကညီအနီၣ်ဂံၢ်တက့ၢ်. ယသးအိၣ်သ့ၣ်ညါပှၤအိၣ်ထဲလဲၣ်န့ၣ်လီၤ.”
3 စီၤယိၤအာ်စံးဆၢအီၤ, “မ်ယွၤမၤအါထီၣ်အံၣ်စရ့လးအပှၤ ဂီၢ်မုၢ်အနီၣ်ဂံၢ်အစးတကယၤအါန့ၢ်ဒံးခဲအံၤအါအါဂီၢ်ဂီၢ် န့ၣ်တက့ၢ်. ကစၢ်စီၤပၤဧၢ, အဝဲသ့ၣ်ခဲလၢာ်မ့ၢ်ဒၣ်နခ့နပှၤတဖၣ်လီၤ. ဘၣ်မနုၤလၢနသးအိၣ်မၤတၢ်အံၤဒီးဒုးကဲထီၣ်ပှၤဒီတကလုာ်လၢ ပှၤမၤကမၣ်တၢ်န့ၣ်လဲၣ်.”
4 ဘၣ်ဆၣ်စီၤပၤဒုးစူၢ်စီၤယိၤအာ်လၢတၢ်ဟ့ၣ်လီၤတၢ်ကလုၢ်န့ၣ် လီၤ. စီၤယိၤအာ်ဟးထီၣ်, လဲၤတၢ်သကုၤကီၢ်အံၣ်စရ့လးဒီဘ့ၣ်ညါ, ဝံၤဒီးဟဲက့ၤကဒါက့ၤဆူဝ့ၢ်ယရူၤၡလ့ၣ်န့ၣ်လီၤ.
5 အဝဲပာ်ဖျါန့ၢ်ဆူစီၤပၤဒၤဝံးလၢပှၤပိာ်ခွါလၢအမၤတၢ်လၢ သုးအပူၤသ့အတၢ်ဂံၢ်ခဲလၢာ်မ့ၢ်ဝဲ, ပှၤအဂၤ ဆံတကလီၢ် လၢအံၣ်စရ့လးအပူၤဒီးအဂၤ လွံၢ်ကလီၢ်နွံကလး လၢယူဒၤအပူၤန့ၣ်လီၤ.
6 မ့ၢ်လၢစီၤယိၤအာ်တဘၣ်သူၣ်ဘၣ်သးထွဲစီၤပၤအတၢ်ဟ့ၣ်လီၤအကလုၢ် ဘၣ်အဃိ, အဝဲတထၢဘၣ်ပှၤကညီအနီၣ်ဂံၢ်လၢပှၤလ့ၤဝံဒီးပှၤဘံၣ်ယၤမံၣ်ဖိ အဒူၣ်တဖၣ်အပူၤနီတဂၤဘၣ်န့ၣ်လီၤ.
7 တၢ်လၢအမၤတ့ၢ်အသးအံၤကစၢ်ယွၤတဘၣ်အသးဘၣ်အဃိ စံၣ်ညီၣ်တ့ၢ်အံၣ်စရ့လးန့ၣ်လီၤ.
8 စီၤဒၤဝံးစံးဘၣ်ကစၢ်ယွၤ, “ယမၤဘၣ်တ့ၢ်တၢ်ဒဲးဘးလီၤပျံၤ လီၤဖုးတမံၤခီဖျိတၢ်မၤအံၤန့ၣ်လီၤ. ဝံသးစူၤပျၢ်ယတၢ်ကမၣ်တက့ၢ်. ယမၤဘၣ်တၢ်ဒ်ပှၤဟးဂီၤဖိတဂၤအသိးန့ၣ်လီၤ.”
9-10 အန့ၣ်ဒီး, ယွၤစံးဘၣ်စီၤဒၤဝံးအဝံ စီၤကး, “လဲၤဒီးတဲဘၣ်စီၤဒၤဝံးလၢယဟ့ၣ်အီၤတၢ်သၢမံၤလၢကဘၣ်ဃု ထၢဝဲထဲတမံၤန့ၣ်လီၤ. တၢ်လၢအဃုထၢဝဲတမံၤန့ၣ်, ယကမၤလီၤ.”
11 စီၤကးလဲၤဆူစီၤဒၤဝံးအအိၣ်, တဲဘၣ်အီၤတၢ်လၢယွၤစံးတ့ၢ် ဝဲဒီးသံကွၢ်အီၤ, “နကဃုထၢဖဲလဲၣ်တမံၤလဲၣ်.
12 တၢ်သၣ်ဝံၤလီၤဒိကအိၣ်ဝဲသၢနံၣ်ဧါ. မ့တမ့ၢ်နကဃ့ၢ်ကွံာ်လၢနဒုၣ်နဒါအသုးမုၢ်တဖၣ်အတၢ်လူၤနၤသၢလါ ဧါ. မ့တမ့ၢ်ယွၤကဘၣ်ထီဒါနၤသၢသီလၢအနးဒီးဒုးအိၣ်ထီၣ်တၢ်သံသ တြိာ်တမံၤကမၤအသးလၢကီၢ်ပူၤခီဖျိ သူအကလူးလၢကမၤသံတၢ်လၢကီၢ်အံၣ်စရ့လးသကုၤန့ၣ်ဧါ. ယကဘၣ်က့ၤဟ့ၣ်ယွၤတၢ်စံးဆၢမနုၤတမံၤလဲၣ်.”
13 စီၤဒၤဝံးစံးဆၢစီၤကး, “တၢ်အံၤမ့ၢ်တၢ်ဃုထၢအကီတမံၤလၢ ယဂီၢ်န့ၣ်လီၤ. ယတအဲၣ်ဒိးလၢပှၤကညီကစံၣ်ညီၣ်ယၤန့ၣ်ဘၣ်. မ်ယွၤအနီၢ်ကစၢ်ဒၣ်ဝဲကမ့ၢ်ပှၤတဂၤလၢကစံၣ်ညီၣ်ယၤန့ၣ်တက့ၢ်. အဂ့ၢ်ဒ်အံၤအဝဲမ့ၢ်ယွၤလၢအသးကညီၤတၢ်န့ၣ်လီၤ.”
14 လၢတၢ်န့ၣ်, အဃိယွၤဆှၢလီၤတၢ်သံသတြိာ်လၢအံၣ်စရ့လးအပှၤဂီၢ် မုၢ်အလိၤ, ဒီးပှၤသံဝဲ နွံကလး ဂၤလၢအဝဲသ့ၣ်အကျါန့ၣ်လီၤ.
15 အန့ၣ်ဒီးအဝဲဆှၢလီၤကလူးတဂၤလၢကမၤဟးဂီၤကွံာ်ဝ့ၢ်ယရူၤ ၡလ့ၣ်န့ၣ်လီၤ. ဘၣ်ဆၣ်အဝဲလဲလိာ်ကွံာ်အတၢ်ပာ်လီၤအသးဒီးစံးဘၣ်ကလူးန့ၣ်, “ဆိကတီၢ်တက့ၢ်. ဘၣ်လံ.” ကလူးန့ၣ်ဆၢထၢၣ်ဝဲဖဲပှၤယဘူၣ်ဖိစီၤအၤရနၤအကြဲၢ်ပူၤန့ၣ်လီၤ.
16 စီၤဒၤဝံးထံၣ်တ့ၢ်ကလူးန့ၣ်ဂဲၤဆၢထၢၣ်လၢမူခိၣ်ဒီးဟီၣ်ခိၣ် အဘၢၣ်စၢၤ, စိာ်ဒီးနးလၢအစုပူၤ, အိၣ်ကတဲာ်ကတီၤအသးလၢကမၤဟးဂီၤဝ့ၢ်ယရူၤၡလ့ၣ်န့ၣ်လီၤ. တုၤနုၤတစုစီၤဒၤဝံးဒီးပှၤဂီၢ်မုၢ်အခိၣ်အနၢ်တဖၣ်, အဝဲသ့ၣ်ကိးဂၤဒဲးကူသိးဝဲထၢၣ်တၢ်ကံးယာ်ဒီး, သကုးလီၤအသးအိၣ်ဒီးအမဲာ်သၣ်တဖၣ်လၢအကျးလီၤအသးလၢဟီၣ်ခိၣ် လိၤန့ၣ်လီၤ.
17 စီၤဒၤဝံးဘါထုကဖၣ်တၢ်ဒီးစံးဝဲ, “ကစၢ်ယွၤဧၢ, ယမ့ၢ်ပှၤတဂၤလၢအမၤကမၣ်တ့ၢ်တၢ်န့ၣ်လီၤ. ယမ့ၢ်ပှၤတဂၤလၢအဟ့ၣ်လီၤတ့ၢ်အကလုၢ်လၢတၢ်ကထၢဒီးကွဲးနီၣ်ပှၤ ကညီအနီၣ်ဂံၢ်န့ၣ်လီၤ. ပှၤဂီၢ်မုၢ်အံၤမ့ၢ်ဒၣ်သိတဖုလီၤ. အဝဲသ့ၣ်မၤကမၣ်တ့ၢ်တၢ်မနုၤလဲၣ်. ယွၤ, ယကစၢ်ဧၢ, စံၣ်ညီၣ်ယၤဒီးယပှၤဟံၣ်ဖိဃီဖိတဖၣ်န့ၣ်တက့ၢ်. ဒီးပျဲပူၤဖျဲးနပှၤဂီၢ်မုၢ်အံၤတက့ၢ်.”
18 ယွၤအကလူးန့ၣ်တဲဘၣ်စီၤကးလၢကမၤလိာ်စီၤဒၤဝံးဒ်သိးကလဲၤ ဒီးသူၣ်ထီၣ်တၢ်လုၢ်လီၢ်တခါလၢယွၤအဂီၢ်ဖဲစီၤအၤရနၤအကြဲၢ် ပူၤန့ၣ်လီၤ.
19 စီၤဒၤဝံးစူၢ်ယွၤအတၢ်မၤလိာ်ဒီးလဲၤဝဲဒ်စီၤကးတဲဘၣ်တ့ၢ် အီၤအသိးန့ၣ်လီၤ.
20 ဖဲန့ၣ်, လၢတၢ်ကြဲၢ်ဘုအလီၢ်န့ၣ်စီၤအၤရနၤဒီးအဖိခွါလွံၢ် ဂၤကြဲၢ်ဘုဒီးဖဲအဝဲသ့ၣ်ထံၣ်ကလူးန့ၣ်, ဖိခွါတဖၣ်ဃ့ၢ်ဒီးအိၣ်ခူ သူၣ်ဝဲန့ၣ်လီၤ.
21 တုၤစီၤအၤရနၤထံၣ်ဘၣ်စီၤပၤဒၤဝံးဟဲသုးဘူးအသးန့ၣ်ဒီး အဝဲဟးထီၣ်လၢကြဲၢ်ဘုအလီၢ်ဒီးသကုးလီၤအသးအိၣ်ဒီးအမဲာ်သၣ် လၢအကျးလီၤအသးလၢဟီၣ်ခိၣ်လိၤန့ၣ်လီၤ.
22 စီၤဒၤဝံးစံးဘၣ်အီၤ, “ဆါန့ၢ်ယၤနကြဲၢ်တၢ်အလီၢ်ဒ်သိး ယကသူၣ်ထီၣ်တၢ်လုၢ်လီၢ်တခါလၢယွၤအဂီၢ်ကသ့ဝဲဒ်သိးကဆိကတီၢ်တၢ် သံသတြိာ်အဂီၢ်န့ၣ်တက့ၢ်. ယကဟ့ၣ်နၤလၢအပှ့ၤအလၢအပှဲၤန့ၣ်လီၤ.”
23 စီၤအၤရနၤစံးဝဲ, “တၢ်ဒိၣ်ကစၢ်စီၤပၤဧၢ, ဟံးန့ၢ်အီၤဒီးမၤတၢ်လၢအဘၣ်နသးတမံၤလၢ်လၢ်န့ၣ်တက့ၢ်. ဖဲအံၤဂီၤဘုၣ်ဂီၤဖံးတဖၣ်အံၤအိၣ်ဝဲလၢတၢ်ကဆူးကဲၤအီၤဒ် တၢ်လုၢ်တၢ်ပာ်တမံၤလၢတၢ်လုၢ်လီၢ်အဖီခိၣ်, ဒီးအအံၤမ့ၢ်နီၣ်တီၢ်ဘုတဖၣ်လၢနကသူအီၤဒ်သ့ၣ်မုၣ်အသိး, ဒီးဘုကၠူၣ်တဖၣ်လၢနကဟ့ၣ်ထီၣ်အီၤဒ်တၢ်လုၢ်တၢ်ပာ်တမံၤအသိး အဂီၢ်န့ၣ်လီၤ. ယဟ့ၣ်လီၤနၤတၢ်တဖၣ်အံၤခဲလၢာ်လီၤ.”
24 ဘၣ်ဆၣ်စီၤပၤစံးဆၢဝဲ, “တမ့ၢ်ဘၣ်. ယကဟ့ၣ်နၤအပှ့ၤအလၢအပှဲၤ န့ၣ်လီၤ. ယတဟ့ၣ်ဘၣ်တၢ်လၢအဘၣ်ဃးဒီးနၤ, တၢ်လၢယတဟ့ၣ်ဘၣ်အပှ့ၤနီတမံၤ, ဒ်တၢ်လုၢ်တမံၤအသိးဆူယွၤန့ၣ် ဘၣ်.
25 ဒီးအဝဲဟ့ၣ်စီၤအၤရနၤလၢတီကါထူအဘ့ၣ်ဃုကယၤလၢကြဲၢ်အလီၢ် န့ၣ်အဂီၢ်လီၤ.
26 အဝဲသူၣ်ထီၣ်တၢ်လုၢ်လီၢ်တခါလၢယွၤအဂီၢ်ဖဲန့ၣ်, ဒီးဆူးကဲၤတၢ်လုၢ်မ့ၣ်အူတဖၣ်ဒီးတၢ်လုၢ်မၤဃူမၤဖိးတဖၣ် န့ၣ်လီၤ. အဝဲဘါထုကဖၣ်တၢ်ဒီးယွၤစံးဆၢအီၤခီဖျိတၢ်ဆှၢလီၤမ့ၣ်အူ လၢမူခိၣ်ဒ်သိးကအီၣ်ကွံာ်တၢ်လုၢ်တဖၣ်လၢအအိၣ်လၢတၢ်လုၢ်လီၢ် အဖီခိၣ်န့ၣ်လီၤ.
27 ယွၤတဲဘၣ်ကလူးန့ၣ်လၢကထုးက့ၤအနးဒီးဒၢနုာ်က့ၤဆူ အတြိးပူၤဒီးကလူးန့ၣ်စူၢ်အီၤလီၤ.
28 ခီဖျိတၢ်အံၤန့ၣ်စီၤဒၤဝံးထံၣ်တ့ၢ်ဝဲလၢယွၤစံးဆၢတ့ၢ် အတၢ်ထုကဖၣ်အဃိ, အဝဲလုၢ်တၢ်လုၢ်တၢ်ပာ်တဖၣ်လၢတၢ်လုၢ်လီၢ်အဖီခိၣ်ဖဲစီၤအၤရနၤ အကြဲၢ်ပူၤန့ၣ်လီၤ.
29 ဖဲဆၢကတီၢ်အံၤန့ၣ်, ဒဲစီဆှံလၢကစၢ်ယွၤအိၣ်ဝဲဆိးဝဲလၢအ ပူၤ, လၢစီၤမိၤၡ့ဘှီထီၣ်တ့ၢ်ဝဲလၢပှၢ်မုၢ်ကနၢအပူၤ, ဒီးတၢ်လုၢ်လီၢ်လၢတၢ်လုၢ်တၢ်ပာ်တဖၣ်ဘၣ်တၢ်ဆိၣ်ကဲၤထီၣ်အီၤလၢ အဖီခိၣ်န့ၣ်အိၣ်ဒံးဒၣ်လၢတၢ်ဘူၣ်ထီၣ်ဘါထီၣ်အလီၢ်လၢဝ့ၢ်ကံး ဘိၣ်န့ၣ်လီၤ.
30 ဘၣ်ဆၣ်ဒီး, လၢတၢ်ဘူၣ်ထီၣ်ဘါထီၣ်ကစၢ်ယွၤအဂီၢ်, စီၤဒၤဝံးလဲၤဆူန့ၣ်တသ့ဘၣ်, မ့ၢ်လၢအပျံၤဘၣ်တ့ၢ်ယွၤအကလူး အနးအဃိန့ၣ်လီၤ.