20
(၂ မူၤ.၁၂:၂၆-၃၁)
1 လၢတၢ်မဲထီၣ်အကတီၢ်, ဖဲတၢ်ဆၢကတီၢ်လၢစီၤပၤတဖၣ်ညီနုၢ်လဲၤ ထီၣ်ဒုးတၢ်န့ၣ်, စီၤယိၤအာ်ဆှၢထီၣ်အသုးမုၢ်ဒီးလဲၤနုာ်ဒုးကီၢ်ဧၣ်မိၣ်န့ၣ်လီၤ. မ့မ့ၢ်စီၤပၤဒၤဝံးအိၣ်ဒၣ်လၢဝ့ၢ်ယရူၤၡလ့ၣ်န့ၣ်လီၤ. အဝဲသ့ၣ်ကဝီၤဃာ်ဝ့ၢ်ရးဘး, ဒုးအီၤ, ဒီးမၤဟးဂီၤကွံာ်အီၤန့ၣ်လီၤ.
2 ပှၤဧၣ်မိၣ်ဖိအတၢ်ဂီၤမိလး (လၢဧ့ၤဘြံၤကျိာ်အဝဲသ့ၣ်အစီၤပၤ) အိၣ်ဒီးခိၣ်သလုးထူတဖျၢၣ်လၢအဃၢလီၤတယၢၢ်တကံကၢ်န့ၣ်လီၤ. လၢအလိၤအိၣ်ဝဲဒီးတၢ်မျၢ်တဖျၢၣ်လၢစီၤဒၤဝံးဟံးန့ၢ်ဝဲဒီး ပာ်နုာ်ဝဲလၢအခိၣ်သလုးပူၤန့ၣ်လီၤ. အဝဲဟံးန့ၢ်စ့ၢ်ကီးဝဲတၢ်ဂုာ်န့ၢ်အါအါကလဲာ်လၢဝ့ၢ်ပူၤန့ၣ်လီၤ.
3 အဝဲဖီၣ်န့ၢ်ဝ့ၢ်အပှၤဂီၢ်မုၢ်ဒီးမၢအမၤတၢ်လၢထးဘူးတၢ်တဖၣ်, ထးကြဲတဖၣ်ဒီးကွါတဖၣ်န့ၣ်လီၤ. ပှၤဂီၢ်မုၢ်လၢကယဲၢ်ပှၤဧၣ်မိၣ်ဖိအဝ့ၢ်အဂၤတဖၣ်အပူၤန့ၣ်, မၤဝဲဒ်န့ၣ်အသိးတမံၤဃီန့ၣ်လီၤ. အန့ၣ်ဝံၤဒီးအဝဲဒီးအပှၤတဖၣ်ဟဲက့ၤကဒါက့ၤဆူဝ့ၢ်ယရူၤၡလ့ၣ်န့ၣ်လီၤ.
(၂ ၡမူၤ. ၂၁:၁၅-၂၂)
4 လၢခံန့ၣ်တၢ်ဒုးတၢ်ယၤမၤကဒီးအသးဒီးပှၤဖလ့ၡသးဖိတဖၣ် ဖဲဝ့ၢ်က့စ့ၢ်န့ၣ်လီၤ. ဒီးတၢ်အံၤမၤအသးဖဲပှၤဃူၡသးဖိစီၤစၤဘကဲ မၤသံပှၤနီၢ်ဒိၣ်နီၢ်သွါတဂၤလၢအမံၤမ့ၢ်စီၤစးဖဲၤဒီးပှၤ ဖလ့ၡသးဖိတဖၣ်ဘၣ်တၢ်မၤနၢၤကွံာ်အီၤန့ၣ်လီၤ.
5 တၢ်ဒုးတၢ်ယၤအဂၤတဘျီအိၣ်ထီၣ်ကဒီးဝဲဒီးပှၤဖလ့ၡသးဖိတ ဖၣ်, ဒီးစီၤယၤအံၢ်အဖိခွါစီၤအ့လဃၤနၣ်မၤသံကွံာ်ပှၤကံးတံး ဖိလၢဝ့ၢ်ကၤသးစီၤကၤလယၤအဒီပုၢ်ဝဲၢ်ခွါစီၤလၤဃမံလၢအဘီ အိၣ်ဒီးအတိၢ်လီၤဂာ်ဒီးပှၤထါထၣ်ဖိအနီၣ်ဘိန့ၣ်လီၤ.
6 တၢ်ဒုးတၢ်ယၤအဂၤတဘျီအိၣ်ထီၣ်ကဒီးဝဲလၢဝ့ၢ်ကၤသးအပူၤဖဲ ပှၤနီၢ်ဒိၣ်နီၢ်သွါတဂၤလၢအစုတခီစုာ်စုာ်အိၣ်ဒီးအစုမုၢ်ဃု ဘိ, ဒီးအခီၣ်တခီစုာ်စုာ်အိၣ်ဒီးအခီၣ်မုၢ်ဃုဘိန့ၣ်လီၤ. အဝဲမ့ၢ်ပှၤတဂၤလၢအဟဲလီၤစၢၤလီၤသွဲၣ်လၢပှၤနီၢ်ဒိၣ်နီၢ်သွါ လၢပျၢၤတဖၣ်န့ၣ်လီၤ.
7 အဝဲကတိၤဆါပှၤအံၣ်စရ့လးဖိတဖၣ်လၢတၢ်ကတိၤဆဲးအဲးအဃိစီၤ ဒၤဝံးအဒီပုၢ်ဝဲၢ်စီၤၡံမၤအဖိခွါစီၤယိနၤသၣ်မၤသံကွံာ်အီၤန့ၣ်လီၤ.
8 ပှၤသၢဂၤလၢအဘၣ်တၢ်မၤသံကွံာ်အီၤလၢစီၤဒၤဝံးဒီးအပှၤသ့ၣ် တဖၣ်အံၤ, မ့ၢ်ပှၤတဖၣ်လၢအဟဲလီၤစၢၤလီၤသွဲၣ်လၢပှၤနီၢ်ဒိၣ်နီၢ်ထီတဖၣ် လၢဝ့ၢ်ကၤသးန့ၣ်လီၤ.