စံးထီၣ်ပတြၢၤ 81
1 သးဝံၣ်ထီၣ်ကစၢ်ယွၤ, ပဂံၢ်ပဘါ
လၢတၢ်သးခုကိးပသူထီၣ်ဒိၣ်ဒိၣ်ဆူ
စီၤယၤကိာ်အကစၢ်ယွၤတက့ၢ်.
2 စးထီၣ်တၢ်သးဝံၣ်, ပှီၢ်ဒၢဖိတဖၣ်,
ဒီးဒ့တၢ်သးဝံၣ်အမုာ်လၢသီတူၢ်ဒီးတနၢ်
3 အူထီၣ်ကွဲၤလၢဘူၣ်အဂီၢ်,
ဖဲလါထီၣ်သီဒီးဖဲလါပှဲၤအနံၤန့ၣ်တက့ၢ်.
4 အဂ့ၢ်ဒ်အံၤ, တၢ်အံၤမ့ၢ်တၢ်သိၣ်တၢ်သီလၢ
အံၣ်စရ့လးအကီၢ်ပူၤ,
ဒီးမ့ၢ်စီၤယၤကိာ်အကစၢ်ယွၤအတၢ်မၤလိာ်န့ၣ်လီၤ.
5 အဝဲဟ့ၣ်လီၤတၢ်န့ၣ်
ဆူအံၣ်စရ့လးအပှၤဂီၢ်မုၢ်,
ဖဲအဒုးကီၢ်အဲၤကူပတူးအခါန့ၣ်လီၤ.
ယနၢ်ဟူတၢ်ကလုၢ်တမံၤလၢယတသ့ၣ်ညါဘၣ်စံးဝဲ,
6 “ယသုးကွံာ်နဖံဘၣ်ခိၣ်အတၢ်ဝံတၢ်ယိး,
ဒီးနစုတဖၣ်ထူၣ်ဖျဲးထီၣ်လၢတၢ်ဃၢတၢ်စုာ် အလိၤလံ.”
7 လၢသုဘၣ်တၢ်ကိၢ်တၢ်ဂီၤန့ၣ်သုကိးထီၣ်ယၤ,
ဒီးယမၤပူၤဖျဲးသုလီၤ.
ယစံးဆၢသုလၢလီသီၣ်အလီၢ်ခူသူၣ်,
ဒီးယမၤကွၢ်သုဖဲမရံၤဘါအထံထီၣ်ပၢၢ်လီၤ. စ့လၤ
8 ယပှၤဂီၢ်မုၢ်သ့ၣ်ဧၢ, ကနၣ်တၢ်,
ယတၢ်ဟ့ၣ်ပလီၢ်
အံၣ်စရ့လးဧၢ,
ယဆၢလၢနကဒိကနၣ်ယၤဆံးဒိၣ်လဲၣ်.
9 သုတဘၣ်ဘူၣ်ထီၣ်ဘါထီၣ်ကစၢ်အဂၤနီတစုဘၣ်.
10 ယဲဒၣ်အံၤယမ့ၢ်ယွၤသုကစၢ်ယွၤ လၢအဒုးဟးထီၣ်သု
လၢအဲၤကူပတူးအကီၢ်ပူၤလီၤ.
အဲးထီၣ်သုထးခိၣ်လဲၢ်လဲၢ်တက့ၢ်.
11 “ဘၣ်ဆၣ်ယပှၤဂီၢ်မုၢ်တဒိကနၣ်ယကလုၢ်ဘၣ်.
အံၣ်စရ့လးတစူၢ်ယၤဘၣ်.
12 အဃိ, ယပျဲလဲၤအဝဲသ့ၣ်ဆူအသးအၢအကျဲပူၤ
ဒီးဒုးမၤအီၤတၢ်လၢ
အအဲၣ်ဒိးဝဲန့ၣ်လီၤ.
13 ယဆၢလၢယပှၤဂီၢ်မုၢ်ကဒိကနၣ်ယၤဆံးဒိၣ်လဲၣ်.
ယဆၢလၢအဝဲသ့ၣ်ကစူၢ်ယၤဆံးဒိၣ်လဲၣ်.
14 ယကမၤဃၣ်ကွံာ်အဒုၣ်အဒါတဖၣ်ချ့သဒံး
ဒီးမၤနၢၤကွံာ်အဒုၣ်အဒါခဲလၢာ်န့ၣ်လီၤ.
15 ပှၤလၢအသးဟ့ယၤတဖၣ်ကဆုးလီၤအခိၣ်လၢ
ယမဲာ်ညါလၢတၢ်ပျံၤအပူၤ,
တၢ်သိၣ်ဃီၣ်လၢအဂီၢ်ကအိၣ်ဝဲလီၤစိၤလီၤထီလီၤ.
16 မ့မ့ၢ်ယဲၢအံၤယကဒုးအီၣ်နၤလၢဘုကၠူၣ်အဂ့ၤကတၢၢ်
ဒီးဒုးမံသူၣ်မံသးနၤလၢကနဲစီအမံၤန့ၣ်လီၤ.”