စံးထီၣ်ပတြၢၤ 70
(စံး.၄၀:၁၃-၁၇)
1 ကစၢ်ယွၤဧၢ, မၤပူၤဖျဲးယၤတက့ၢ်.
ယွၤဧၢ, မၤချ့ချ့လၢနကမၤစၢၤယၤတက့ၢ်.
2 ပှၤလၢအဃုယသးသမူတဖၣ်န့ၣ်
မ်အဘၣ်တၢ်မၤမဲာ်ဆှးဒီး
ဘၣ်တၢ်မၤကဒံကဒါအီၤန့ၣ်တက့ၢ်.
ပှၤလၢအဆၢမၤဆါယၤန့ၣ်
မ်အဝဲသ့ၣ်ဂုၤက့ၤဆူအလီၢ်ခံဒီး
ဘၣ်တၢ်မၤဟးဂီၤအလၤကပီၤန့ၣ်တက့ၢ်.
3 ပှၤလၢအစံး, အၣ်ဟါ, အၣ်ဟါန့ၣ်
မ်အဘၣ်တၢ်မၤပျံၤမၤဖုးအီၤလၢ
4 ပှၤလၢအဃုနၤခဲလၢာ်န့ၣ်
မ်အသူၣ်ဖှံသးညီဒီးသူၣ်ခုသးခုလၢနပူၤတက့ၢ်.
မ်ပှၤလၢအအဲၣ်နတၢ်အုၣ်က့ၤခီၣ်က့ၤတဖၣ်န့ၣ်
စံးဝဲထီဘိ “ကစၢ်ယွၤန့ၣ်ဒိၣ်ဝဲ” န့ၣ်တက့ၢ်.
5 ယမ့ၢ်ပှၤဖှီၣ်ဖိယာ်ဖိဒီး
ပှၤလိၣ်ဘၣ်တၢ်မၤစၢၤန့ၣ်လီၤ.
ကစၢ်ယွၤဧၢ, မၤချ့ချ့လၢယဂီၢ်န့ၣ်တက့ၢ်.
နမ့ၢ်ယတၢ်မၤစၢၤဒီးပှၤမၤပူၤဖျဲးယၤလီၤ.
ယွၤဧၢ, မၤယံာ်မၤနီၢ်နသးတဂ့ၤ.