စံးထီၣ်ပတြၢၤ 68
1 မ်ကစၢ်ယွၤဂဲၤဆၢထၢၣ်တက့ၢ်.
မ်အဒုၣ်အဒါတဖၣ်လီၤပြံလီၤပြါတက့ၢ်.
မ်ပှၤလၢအသးဟ့အီၤတဖၣ်
ဃ့ၢ်ကွံာ်လၢအမဲာ်ညါန့ၣ်တက့ၢ်.
2 ဒ်မ့ၣ်အူလုၣ်ဒံကွံာ်အသိးန့ၣ်ဟီထီၣ်ကွံာ်အဝဲသ့ၣ်,
ဒီးဒ်ဃိးပှံၢ်ဝဲလၢမ့ၣ်အူအမဲာ်ညါအသိးန့ၣ်
မ်ပှၤတတီတလိၤဟးဂီၤကွံာ်လၢ
ကစၢ်ယွၤအမဲာ်ညါန့ၣ်တက့ၢ်.
3 မ့မ့ၢ်ပှၤတီပှၤလိၤန့ၣ်မ်အသးခုတက့ၢ်.
မ်အဝဲသ့ၣ်သူၣ်ဖှံသးညီလၢကစၢ်ယွၤ အမဲာ်ညါတက့ၢ်.
မ်အဝဲသ့ၣ်ကိးထီၣ်လၢတၢ်သးခုန့ၣ်တက့ၢ်.
4 သးဝံၣ်ထီၣ်ကစၢ်ယွၤ, သးဝံၣ်စံးထီၣ်ပတြၢၤအမံၤန့ၣ်တက့ၢ်.
ကတဲာ်ကတီၤကျဲတဘိလၢပှၤလၢလဲၤခီဂာ်တၢ်လၢ
ပှၢ်မုၢ်ကနၢတဂၤအဂီၢ်န့ၣ်တက့ၢ်.
အမံၤမ့ၢ်ယွၤလီၤ.
သူၣ်ဖှံသးညီလၢအမဲာ်ညါတက့ၢ်.
5 ကစၢ်ယွၤလၢအအိၣ်လၢအလီၢ်စီဆှံအပူၤန့ၣ်
မ့ၢ်ပှၤဖိၣ်ဃဲအပၢ်ဒီးပှၤလၢကဟုဘံၣ်ကယာ်ဘၢ
မုၣ်ကမဲသ့ၣ်တဖၣ်န့ၣ်လီၤ.
6 ပှၤလၢအအိၣ်သယုၢ်ထဲတဂၤဧိၤန့ၣ်
ယွၤဟ့ၣ်အီၤဟံၣ်လၢကအိၣ်ဝဲ,
အဝဲဆှၢဝဲပှၤဘၣ်တၢ်စၢဃာ်သ့ၣ်တဖၣ်ဆူ
တၢ်အီၣ်ကုာ်အီပှဲၤန့ၣ်လီၤ.
မ့မ့ၢ်ပှၤပူထီၣ်တၢ်ဖိသ့ၣ်တဖၣ်န့ၣ်
အိၣ်ဝဲဆိးဝဲလၢတၢ်လီၢ်အိၣ်သယုၢ်န့ၣ်လီၤ.
7 ကစၢ်ယွၤဧၢ, တုၤနလဲၤထီၣ်လၢနပှၤဂီၢ်မုၢ်အမဲာ်ညါ,
တုၤနလဲၤခီဂာ်ပှၢ်မုၢ်ကနၢန့ၣ်ဒီး, စ့လၤ
8 ဟီၣ်ခိၣ်ဆှဲးဆှိးဝဲဒီး မူခိၣ်ဒုးစူၤလီၤတၢ်, လၢကစၢ်ယွၤ
လၢအမ့ၢ်ကစၢၢ်စံၤနါအကစၢ်,
အကစၢ်ယွၤလၢအမ့ၢ်
အံၣ်စရ့လးအကစၢ်ယွၤအမဲာ်ညါန့ၣ်လီၤ.
9 ကစၢ်ယွၤဧၢ, နမၢတၢ်ဟဲစူၤအါအါကလဲာ်,
နမၤကျၢၤနတၢ်န့ၢ်သါဖဲတၢ်ဘှံးအသးအခါန့ၣ်လီၤ.
10 နပှၤဂီၢ်မုၢ်အိၣ်ဝဲဆိးဝဲလၢအပူၤ,
ယွၤဧၢ, နကတဲာ်ကတီၤန့ၢ်တၢ်လၢ
ပှၤဖှီၣ်န့ၢ်ယာ်ကဲအဂီၢ်
လၢနတၢ်ဂ့ၤတၢ်ဝါအပူၤန့ၣ်လီၤ.
11 ကစၢ်ဟ့ၣ်လီၤအကလုၢ်,
ဒီးပိာ်မုၣ်အါဂၤစိာ်တၢ်ကစီၣ်တဖၣ်န့ၣ်လီၤ.
12 “စီၤပၤတဖၣ်ဒီး အသုးမုၢ်တဖၣ်ဃ့ၢ်ကွံာ်ဝဲ, ဃ့ၢ်ကွံာ်ဝဲ,”
ဒီးပိာ်မုၣ်လၢအအိၣ်ဒၣ်တၢ်လၢဟံၣ်ပူၤန့ၣ်
နီၤဖးတၢ်ဂုာ်န့ၢ်,
13 လၢအမ့ၢ်, ထိၣ်လွံၢ်အဂီၤတဖၣ်လၢ တၢ်ကးဘၢအီၤဒီးစ့,
အိၣ်ဒီးအဒံးဆ့လၢ အကတြ့ၣ်ဒီးသူန့ၣ်လီၤ.
(လၢတၢ်ဒုးတၢ်ယၤအမုၢ်နံၤန့ၣ် ဘၣ်မနုၤသုဝဲတနီၤအိၣ်မံလီၤလၢသိကရၢၢ်ပူၤလဲၣ် )
14 တုၤတၢ်သ့တၢ်လၢာ်ကစၢ်ယွၤမၤလီၤပြံလီၤပြါ
စီၤပၤတဖၣ်လၢကစၢၢ်စၤလမိၣ်အလိၤန့ၣ်ဒီး
အဝဲဒုးဟဲစူၤလီၤမူခိၣ်ဖီဖဲန့ၣ်လီၤ.
15 ယွၤအကစၢၢ်ကလိ, မ့ၢ်ဘၤၡၣ်ကစၢၢ်တဖျၢၣ်လၢ အအိၣ်ဒီးတၢ်စိခိၣ်အါမးန့ၣ်လီး.
တၢ်ထီၣ်ထီတဖၣ်အကစၢၢ်, ဘၤၡၣ်အကစၢၢ်ဧၢ,
16 ဘၣ်မနုၤသုကွၢ်တၢ်လၢတၢ်စိခိၣ်
ဖးထီတဖၣ် လၢတၢ်သးက့ၣ်ဆူ ကစၢၢ်လၢ ကစၢ်ယွၤ
ဃုထၢအီၤလၢ ကအိၣ်ဆိးဝဲန့ၣ်လဲၣ်.
ယွၤကအိၣ်ဖဲန့ၣ်လီၤထူလီၤယိာ်လီၤ.
မ့ၢ်လံ, ယွၤကအိၣ်လၢအလိၤလီၤထူလီၤယိာ်လီၤ.
17 ယွၤဟဲလၢစံၤနါဆူတၢ်လီၢ်စီဆှံ
ဃုာ်ဒီးအလ့ၣ်ကဟၣ်လၢအအိၣ်ဒီး အစိကမီၤ
အကထိတဖၣ်အကထိန့ၣ်လီၤ.
18 အဝဲလဲၤထီၣ်လံဆူတၢ်ထီၣ်ထီတဖၣ်လံ.
ဖီၣ်န့ၢ်ကုၢ်တဖၣ်ဒီးဒိးန့ၢ်ဘၣ်
တၢ်ဟ့ၣ်တဖၣ်လၢပှၤကညီအကျါ,
လၢပှၤပူထီၣ်တၢ်သ့ၣ်တဖၣ်အကျါဒၣ်လဲာ်န့ၣ်လီၤ.
ယွၤကစၢ်ယွၤကအိၣ်ဝဲဆိးဝဲဖဲန့ၣ်လီၤ.
19 မ်ကစၢ်ယွၤလၢအဝံပတၢ်ဝံတၢ်ယိးတနံၤဘၣ်တနံၤန့ၣ်
ဘၣ်တၢ်စံးထီၣ်ပတြၢၤအီၤတက့ၢ်.
တၢ်အုၣ်က့ၤခီၣ်က့ၤပှၤန့ၣ်မ့ၢ်ကစၢ်ယွၤလီၤ. စ့လၤ
20 ပကစၢ်ယွၤန့ၣ်မ့ၢ်ကစၢ်ယွၤလၢ
အအုၣ်က့ၤခီၣ်က့ၤတၢ်လီၤ.
အဝဲမ့ၢ်ယွၤ, ပယွၤ
ပှၤလၢအအုၣ်က့ၤခီၣ်က့ၤပှၤလၢတၢ်သံန့ၣ်လီၤ.
21 မ့ၢ်မးကစၢ်ယွၤကမၤသဘှံးအဒုၣ်အဒါတဖၣ်အခိၣ်,
ပှၤတဖၣ်လၢ အလဲၤဒၣ်တၢ်တခီနၢ်လၢ
အတၢ်ဒဲးဘးအကျဲပူၤန့ၣ်လီၤ.
22 ယွၤစံးဝဲဒၣ်, “ယကဒုးဟဲက့ၤသုဒုၣ်သုဒါတဖၣ်လၢဘၤၡၣ်,
ယကဒုးဟဲက့ၤအဝဲသ့ၣ်လၢပီၣ်လဲၣ်အတၢ်ယိာ်ပူၤ,
23 ဒ်သိးသုကဘျၢလီၤသုခီၣ်လၢ အဝဲသ့ၣ်အသွံၣ်အပူၤဒီး
သုထွံၣ်တဖၣ်ကလ့ၣ်တၢ်ဖဲအဲၣ်ဒိးလ့ၣ်ဝဲန့ၣ်လီၤ.”
24 ကစၢ်ယွၤဧၢ, ပှၤကိးဂၤဒဲး ထံၣ်ဘၣ်နတၢ်မၤနၢၤအတၢ်လဲၤထီၣ်,
ယကစၢ်ယွၤ, ယစီၤပၤ အတၢ်လဲၤနုာ်ဆူ
အတၢ်လီၢ်စီဆှံအပူၤန့ၣ်လီၤ.
25 ပှၤသးဝံၣ်တၢ်ဖိလဲၤလၢညါ, ပှၤဒ့တၢ်ဖိလဲၤလၢခံ
ဒီးလၢအဘၢၣ်စၢၤန့ၣ်
ပှၤမုၣ်ကနီၤတဖၣ်လၢအပှီၢ်ဒၢတဖၣ်န့ၣ်လီၤ.
26 လၢပှၤဂီၢ်မုၢ်အကျါန့ၣ်စံးထီၣ်ပတြၢၤယွၤတက့ၢ်.
“စံးထီၣ်ပတြၢၤယွၤ,
သုဝဲစီၤယၤကိာ်အစၢၤအသွဲၣ်သ့ၣ်ဧၢ.”
27 ဒူၣ်အဆံးကတၢၢ်, ဘံၣ်ယၤမံၣ်ဟဲလၢညါ,
ဝံၤဒီးယူဒၤအခိၣ်အနၢ်တဖၣ်ဒီး အဝဲသ့ၣ်အကရူၢ်လၢ
စဘူလိၣ်ဒီးနးသၤလံ
အပှၤခိၣ်ပှၤနၢ်တဖၣ် ပိာ်ထွဲထီၣ်အခံန့ၣ်လီၤ.
28 ကစၢ်ယွၤဧၢ, နဲၣ်ဖျါထီၣ်နစိနကမီၤ,
နစိနကမီၤလၢနသူအီၤလၢပဂီၢ်,
29 လၢနတၢ်လုၢ်ဟံၣ်လၢယရူၤၡလ့ၣ်အပူၤ,
ဖဲစီၤပၤတဖၣ်ဟဲစိာ်တၢ်ဟ့ၣ်တဖၣ်ဆူ
နအိၣ်န့ၣ်တက့ၢ်.
30 သိၣ်ဃီၣ်အဲၤကူပတူး, ဆၣ်ဖိကီၢ်ဖိအဒူတဒုန့ၣ်
လၢအအိၣ်လၢတပိၢ်အကျါ, သိၣ်ဃီၣ်ထံကီၢ်တဖၣ်,
လၢအလီၢ်ဂာ်ဒီး ဂီၤဖံးဖါတဖုအိၣ်ဒီး
ဂီၤဖံးဖါဖိတဖၣ်,
တုၤလၢအဝဲသ့ၣ်ခဲလၢာ်တီၤလီၤ ကဒွံကျိာ်ဒီး
လုၢ်ထီၣ်နၤလၢ အစ့တဖၣ်တက့ၢ်.
မၤလီၤပြံလီၤပြါပှၤဂီၢ်မုၢ်လၢ အအဲၣ်တၢ်ဒုးတၢ်ယၤတက့ၢ်.
31 ပဒိၣ်တဖၣ်ကဟဲထီၣ်လၢအဲၤကူပတူးအပူၤ,
ကူၤၡးကယူာ်ထီၣ်အစုဆူယွၤအအိၣ်
လၢတၢ်ထုကဖၣ်န့ၣ်လီၤ.
32 ဟီၣ်ခိၣ်အဘီမုၢ်ဖိသ့ၣ်ဧၢ, သးဝံၣ်ထီၣ်ကစၢ်ယွၤတက့ၢ်.
သးဝံၣ်စံးထီၣ်ပတြၢၤယွၤ, စ့လၤ
33 ပှၤလၢအဒိးတၢ်လၢ တၢ်အၢၣ်အပူၤ,
တၢ်အၢၣ်လၢပျၢၤန့ၣ်တက့ၢ်
ကနၣ်အတၢ်ကိးထီၣ်
အသီၣ်ဖးဒိၣ်တက့ၢ်.
34 ဒုးဟူထီၣ်သါလီၤကစၢ်ယွၤအစိကမီၤ,
အလၤကပီၤလၢအံၣ်စရ့လးအဖီခိၣ်,
အတၢ်ဂံၢ်ဆူၣ်ဘါဆူၣ်လၢ အအိၣ်လၢမူကပိာ်လိၤန့ၣ်တက့ၢ်.
35 ကစၢ်ယွၤဧၢ, နမ့ၢ်တၢ်လီၤပျံၤအလီၢ်လၢ
နလီၢ်စီဆှံအပူၤလီၤ.
အံၣ်စရ့လးကစၢ်ယွၤ, မ့ၢ်ပှၤလၢ
အဟ့ၣ်အပှၤဂီၢ်မုၢ်လၢတၢ်စိတၢ်ကမီၤဒီး
စံးထီၣ်ပတြၢၤကစၢ်ယွၤတက့ၢ်.