စံးထီၣ်ပတြၢၤ 62
1 ယသးအိၣ်ခိးထဲကစၢ်ယွၤတဂၤဧိၤလၢတၢ်အိၣ်ဘှ့ၣ်အိၣ်ဘှီၣ်အပူၤန့ၣ်လီၤ.
တၢ်အုၣ်က့ၤခီၣ်က့ၤယၤန့ၣ်ဟဲဒၣ်ထဲလၢအအိၣ်လီၤ.
2 ယလၢၢ်ဒီးတၢ်အုၣ်က့ၤခီၣ်က့ၤယၤ,
ယတၢးထီၣ်ထီန့ၣ်မ့ၢ်ထဲအဝဲဒၣ်ဧိၤလီၤ.
3 သုဝဲခဲလၢာ်မ့ၢ်သုကထီဒါပှၤတဂၤ
လၢအတဆူၣ်န့ၢ်ဒံးကရၢၢ်လၢအလီၤပှီၢ်ဘၣ်န့ၣ်ဆံးယံာ်လဲၣ်.
4 သုသးအိၣ်ဒၣ်ထဲလၢသုကပာ်လီၤအီၤလၢ တၢ်လၤကပီၤအလီၢ်,
သုမုာ်လၤလၢတၢ်လီတၢ်ဝ့ၤတဖၣ်အပူၤလီၤ.
သုဆိၣ်ဂ့ၤတၢ်လၢသုတၢ်ကတိၤတဖၣ်,
ဘၣ်ဆၣ်သုဆိၣ်အၢအီၤလၢသုသးပူၤလီၤ. စ့လၤ
5 အဂ့ၢ်ဒ်အံၤယသးအိၣ်ခိးထဲကစၢ်ယွၤတဂၤဧိၤ လၢတၢ်အိၣ်ဘှ့ၣ်အိၣ်ဘှီၣ်အပူၤန့ၣ်လီၤ.
အဂ့ၢ်ဒ်အံၤယမုၢ်လၢ်တၢ်လၢအီၤလီၤ.
6 ယလၢၢ်ဒီးတၢ်အုၣ်က့ၤခီၣ်က့ၤယၤ,
ယတၢးထီၣ်ထီန့ၣ်မ့ၢ်ထဲအဝဲဒၣ်တဂၤဧိၤန့ၣ်လီၤ.
ယတဟူးတဝးဘၣ်.
7 တၢ်အုၣ်က့ၤခီၣ်က့ၤယၤ, ဒီးယလၤကပီၤန့ၣ် အိၣ်ဝဲဒီးကစၢ်ယွၤန့ၣ်လီၤ.
ယဂံၢ်ယဘါအလၢၢ်,
ယတၢ်ပူၤဖျဲးအလီၢ်န့ၣ်မ့ၢ်ကစၢ်ယွၤလီၤ.
8 ပှၤဂီၢ်မုၢ်သ့ၣ်ဧၢ, သန့ၤသုသးလၢအီၤကိးအကတီၢ်ဒဲး
ဒီးတဲအီၤလၢသုတၢ်ကိၢ်တၢ်ဂီၤခဲလၢာ်န့ၣ်တက့ၢ်.
ကစၢ်ယွၤမ့ၢ်တၢ်ပူၤဖျဲးအလီၢ်လၢပဂီၢ်လီၤ. စ့လၤ
9 ပှၤကညီခဲလၢာ်လီၤဂာ်ဒၣ်ဒီးတၢ်သါထီၣ်တဘီဖိ န့ၣ်လီၤ. ပှၤအဒိၣ်မ့ၢ်ဂ့ၤအဆံးမ့ၢ်ဂ့ၤ မ့ၢ်တၢ်ကလီကလီဒ်သိးသိးလီၤ.
တၢ်မ့ၢ်စီၤကွၢ်အီၤလၢစီၤပီၢ်ပူၤဒီး, တဃၢဘၣ်နီတစဲးဘၣ်.
တၢ်မ့ၢ်ပာ်အီၤလၢစီၤပီၢ်အပူၤဒီး,
အဝဲသ့ၣ်ဖှံဒိၣ်န့ၢ်ဒံးတၢ်သါတဘီဖိတက့ၢ်န့ၣ်လီၤ.
10 သန့ၤသုသးလၢတၢ်မၤအၢတၢ်တဂ့ၤ.
မုၢ်လၢ်ဒိးန့ၢ်တၢ်တမံၤမံၤလၢတၢ်မၤန့ၢ်ဆူၣ်ပှၤဂၤ အတၢ်န့ၣ်တဂ့ၤ.
သုတၢ်စုလီၢ်ခီၣ်ခိၣ်န့ၣ်မ့ၢ်အါထီၣ်ဒၣ်လဲာ်
11 ယနၢ်ဟူတ့ၢ်အါန့ၢ်တဘျီလၢ ကစၢ်ယွၤစံးဝဲလၢ
တၢ်စိတၢ်ကမီၤမ့ၢ် အတၢ်န့ၣ်လီၤ.
12 ဒီးအတၢ်အဲၣ်န့ၣ်ဂၢၢ်ကျၢၤဝဲဒၣ်န့ၣ်လီၤ.
ယွၤဧၢ, နနီၢ်ကစၢ်ဒၣ်နဲနဟ့ၣ်ဘျုးက့ၤ ပှၤကိးဂၤဒဲးဒ်အမၤတၢ်အသိးန့ၣ်လီၤ.