စံးထီၣ်ပတြၢၤ 59
1 ကစၢ်ယွၤဧၢ,
မၤပူၤဖျဲးယၤလၢယဒုၣ်ယဒါတဖၣ်န့ၣ်တက့ၢ်.
ကဟုဘံၣ်ကယာ်ဘၢယၤလၢပှၤလၢ
အဂဲၤဆၢထၢၣ်ထီဒါယၤတဖၣ်န့ၣ်တက့ၢ်.
2 မၤပူၤဖျဲးယၤလၢပှၤလၢအမၤတၢ်အၢတဖၣ်,
ဒီးအုၣ်က့ၤခီၣ်က့ၤယၤလၢပှၤလၢ
အမၤသံတၢ်တဖၣ်အစုပူၤန့ၣ်တက့ၢ်.
3 အဂ့ၢ်ဒ်အံၤ, ကွၢ်ကွၢ်, အဝဲသ့ၣ်ခိးခူသူၣ်ယၤလၢ
ယသးသမူအဂီၢ်လီၤ.
ဒုၣ်ဒါလၢအဆူၣ်တဖၣ်အိၣ်ဖှိၣ်ထီဒါယၤ,
ယွၤဧၢ, တမ့ၢ်ဘၣ်လၢယမၤကမၣ်တၢ်အဃိ
မ့တမ့ၢ်ယတၢ်ဒဲးဘးအဃိန့ၣ်ဘၣ်.
4 ယွၤဧၢ, ဒီးယတၢ်ကမၣ်မ့ၢ်တအိၣ်ဒၣ်လဲာ်,
အဝဲသ့ၣ်ဃ့ၢ်ဝဲဒီးအိၣ်ကတဲာ်ကတီၤ အသးလၢကဒုးယၤအဂီၢ်လီၤ.
5 ဂဲၤဆၢထၢၣ်, ယွၤ, သ့တၢ်လၢာ်အကစၢ်ယွၤဧၢ,
ဟဲလၢတၢ်မၤစၢၤယၤအဂီၢ်တက့ၢ်.
အံၣ်စရ့လးအကစၢ်ယွၤဧၢ,
ဟဲကွၢ်လၢနကစၢ်ဒၣ်နဲတက့ၢ်.
ဖုသံနီၣ်ထီၣ်ဒီးစံၣ်ညီၣ်ပှၤလၢ တဘူၣ်ထီၣ်ဘါထီၣ်နၤတဖၣ်,
ဒုးနဲၣ်နတၢ်သးကညီၤဆူပှၤကူၣ်လီတၢ်တဖၣ် နီတစဲးတဂ့ၤ. စ့လၤ
6 အဝဲသ့ၣ်ဟဲက့ၤကဒါက့ၤဝဲကိးမုၢ်ဟါဒဲး,
မီၤတၢ်ဒ်ထွံၣ်တဖၣ်အသိးဒီးလဲၤတရံးဝ့ၢ်န့ၣ်လီၤ.
7 ကနၣ်အတၢ်ကတိၤတရီတပါဒီး အတၢ်မၤပျံၤမၤဖုးတဖၣ်တက့ၢ်.
အပျ့ၤတဖၣ်လီၤဂာ်ဒီး နးဧိၤဘီဧိၤအိၣ်လၢ
အကိာ်ပူၤဒီး ဆိကမိၣ်ဝဲလၢ
8 ဘၣ်ဆၣ်နဲဒၣ်ယွၤဧၢ, နနံၤဘၣ်အဝဲသ့ၣ်လီၤ.
ဒီးနနံၤဘၣ်ဖၣ်လဲပှၤတဘူၣ်ထီၣ်ဘါထီၣ်နၤ ခဲလၢာ်န့ၣ်လီၤ.
9 ယသန့ၤယသးလၢနဂံၢ်နဘါ
နမ့ၢ်ယတၢးထီၣ်ထီလီၤ, ယကစၢ်ယွၤဧၢ.
10 ယကစၢ်ယွၤအဲၣ်ယၤဒီး ကဟဲဆူယအိၣ်လီၤ.
အဝဲကဒုးထံၣ်ယၤလၢဒုၣ်ယဒါဘၣ်
11 မၤသံအဝဲသ့ၣ်တဂ့ၤ, ကစၢ်ယွၤဧၢ, မ့တမ့ၢ်ဘၣ်န့ၣ်
ယပှၤဂီၢ်မုၢ်ကသးပ့ၤနီၣ်ဘၣ်ဖုးတၢ်လီၤ.
ယွၤလၢအမ့ၢ်ပကတီၤတဘ့ၣ်ဧၢ,
လၢနဂံၢ်နဘါန့ၣ် မၤလီၤပြံလီၤပြါအီၤဒီး
မၤနၢၤကွံာ်အဝဲသ့ၣ်တက့ၢ်.
12 တၢ်ဒဲးဘးအိၣ်လၢအထးခိၣ်တဖၣ်အလိၤ,
အတၢ်ကတိၤခဲလၢာ်မ့ၢ်တၢ်ဒဲးဘးန့ၣ်လီၤ.
မ်အဝဲသ့ၣ်ဘၣ်တၢ်ဖီၣ်န့ၢ်အီၤလၢ
အတၢ်ပာ်ထီၣ်ထီအသးဒၣ်ဝဲအပူၤန့ၣ်တက့ၢ်.
အဂ့ၢ်ဒ်အံၤ, အဝဲသ့ၣ်ဆိၣ်တၢ်ဒီးလီတၢ်လီၤ.
13 မၤဟးဂီၤကွံာ်အီၤလၢနတၢ်သးထီၣ်အပူၤ,
မၤဟးဂီၤကွံာ်အီၤလၢာ်လၢာ်ဆ့ဆ့န့ၣ်တက့ၢ်.
အန့ၣ်ဒီးပှၤကိးဂၤဒဲးကသ့ၣ်ညါလၢ
ကစၢ်ယွၤပၢတၢ်လၢအံၣ်စရ့လးအပူၤန့ၣ်လီၤ.
အတၢ်ပၢအံၤကတုၤဃီၤဆူ
ဟီၣ်ခိၣ်ဒီဘ့ၣ်ညါန့ၣ်လီၤ. စ့လၤ
14 ယဒုၣ်ယဒါတဖၣ်ဟဲက့ၤကဒါက့ၤကိးမုၢ်ဟါဒဲး,
မီၤတၢ်ဒ်ထွံၣ်တဖၣ်အသိးဒီးလဲၤတရံးဝ့ၢ်န့ၣ်လီၤ.
15 ဒ်ထွံၣ်တဖၣ်အသိးဟးဝ့ၤဝီၤဃုတၢ်အီၣ်
ဒီးမ့ၢ်တဘျဲးအီၣ်ဘၣ်ဒီး ကညီၤထီၣ်တၢ်န့ၣ်လီၤ.
16 မ့မ့ၢ်ယဲဒၣ်အံၤ ယကသးဝံၣ်နတၢ်ဂံၢ်တၢ်ဘါအဂ့ၢ်,
ကိးမုၢ်ဂီၤဒဲးန့ၣ် ယကသးဝံၣ်တၢ်လၢ
နတၢ်အဲၣ်အဂၢၢ်အကျၢၤအဂ့ၢ်လၢ ယကလုၢ်ဖးဒိၣ်လီၤ.
အဂ့ၢ်ဒ်အံၤ, နမ့ၢ်တၢးထီၣ်ထီလၢယဂီၢ်
ဒီးတၢ်ပူၤဖျဲးအလီၢ်လၢ
ယတၢ်ကိၢ်တၢ်ဂီၤအမုၢ်တနံၤန့ၣ်လီၤ.
17 ယဂံၢ်ယဘါဧၢ, ယကသးဝံၣ်စံးထီၣ်ပတြၢၤနၤလီၤ.
နဲဒၣ်ကစၢ်ယွၤဧၢ, နမ့ၢ်ယတၢးထီၣ်ထီ,
ကစၢ်ယွၤလၢအအဲၣ်ယၤလီၤ.