စံးထီၣ်ပတြၢၤ 58
1 မ့ၢ်သုဝဲပှၤပၢတၢ်တဖၣ်ကတိၤတၢ်
မ့ၢ်တၢ်တီနီၢ်နီၢ်ကစီဒီဧါ.
မ့ၢ်သုစံၣ်ညီၣ်ပှၤကိးဂၤဒဲး
တီတီလိၤလိၤကစီစီဧါ.
2 တမ့ၢ်ဘၣ်, သုဆိကမိၣ်ထဲတၢ်အၢလၢသုသးကံၢ်ပူၤ,
သုစုဟ့ၣ်လီၤတၢ်မၤဆူၣ်လၢဟီၣ်ခိၣ်ချၢလီၤ.
3 ပှၤတတီတလိၤလဲၤကမၣ်တၢ်လၢအမိၢ်ဒၢလီၢ်အပူၤ,
အဝဲသ့ၣ်မၤကမၣ်တၢ်ဒီးကတိၤကဘျံးကဘျၣ်
တၢ်လၢအအိၣ်ဖျဲၣ်လံၤလံၤန့ၣ်လီၤ.
4 အဝဲသ့ၣ်အစုၣ်လီၤဂာ်ဒ် ဂုၢ်သ့ၣ်တဖၣ်လၢအအိၣ်ဒီးအစုၣ်
မၤအသးလီၤဂာ်ဒီးဂုၢ်သီ
လၢအနၢ်တအၢ, ဆွံတံာ်အနၢ်ပူၤ,
5 ဒ်သိးအသုတနၢ်ဟူပှၤသ့တၢ်အူသမူအတၢ်အူ,
မ့တမ့ၢ်ပှၤမၤကဒါပှၤအမဲာ်လၢ
အကူၣ်တၢ်သ့အတၢ်အုၣ်ထါတဂ့ၤန့ၣ်လီၤ.
6 ကစၢ်ယွၤဧၢ, မၤပိာ်အမဲလၢအကိာ်ပူၤန့ၣ်တက့ၢ်.
ယွၤဧၢ, မၤကၢ်ကွံာ်အမဲလၢအလီၤဂာ်ဒီးခ့ ယုၢ်ဖိအမဲထွံၣ်န့ၣ်တက့ၢ်.
7 မ်အဟါမၢ်ကွံာ်ဒ်ထံလၢအယွၤကွံာ်အသိး,
ဒီးနီၣ်လၢအဘၣ်တၢ်ယီၢ်တံၢ်ဒီး
ဃ့ထီၣ်ကွံာ်လၢကျဲအသိးန့ၣ်တက့ၢ်.
8 မ်အလီၤဂာ်ဒ်ချိၣ်လၢအပှံၢ်လီၤဝဲဒီးဟါမၢ်ကွံာ်အသိး,
ဒီးဒ်ဖိသၣ်လီၤလူးတဂၤအသိး
မ်အသုတထံၣ်ဘၣ်မုၢ်နီတစုတဂ့ၤ.
9 တချုးလၢအဝဲသ့ၣ် သ့ၣ်ညါဒံးတၢ်န့ၣ်ဘၣ်ဒီး,
ကဘၣ်တၢ်ကျီကွံာ်အီၤဒ်နီၣ်ဧိၤမံၤဧိၤအသိး,
လၢကစၢ်ယွၤအတၢ်သးကဲၤထီၣ်အပူၤန့ၣ်, အဝဲကအူဒံကွံာ်အဝဲသ့ၣ်ဖဲ အအိၣ်မူဒံးအခါ
ဒၣ်လဲာ်လီၤ.
10 ပှၤတီပှၤလိၤကသးခုဝဲဖဲ အထံၣ်တၢ်စံၣ်ညီၣ်ပှၤတၢ်ဒဲးဘးဖိတဖၣ်,
ဒီီးကသ့ကွံာ်အခီၣ်လၢပှၤတတီတလိၤအသွံၣ်အကျါန့ၣ်လီၤ.
11 ပှၤကစံးဝဲ, “မ့ၢ်မးခိၣ်ဖးအိၣ်လၢပှၤတီပှၤလိၤအဂီၢ်,
မ့ၢ်မးကစၢ်ယွၤအိၣ်ဝဲလၢအကစံၣ်ညီၣ်တၢ်လၢ
ဟီၣ်ခိၣ်ချၢန့ၣ်လီၤ.”