စံးထီၣ်ပတြၢၤ 56
1 ကစၢ်ယွၤဧၢ, သူၣ်ကညီၤသးကညီၤယၤတက့ၢ်.
အဂ့ၢ်ဒ်အံၤ ယဘၣ်တၢ်ဒုးထီဒါယၤ
ဒီးယဒုၣ်ယဒါတဖၣ် မၤနးမၤဖှီၣ်ယၤတထံၣ်ဃီလီၤ.
2 ယဒုၣ်ယဒါတဖၣ်ယီၢ်တံၢ်ယၤကိးမုၢ်နံၤမုၢ်နၤဒဲးလီၤ.
အဂ့ၢ်ဒ်အံၤ, ပှၤအါဂၤဒုးတၢ်ထီဒါယၤ
အိၣ်ဒီးတၢ်သးထီၣ်ထီလီၤ.
3 ယွၤသ့တၢ်လၢာ်ကစၢ်ဧၢ,
တုၤယပျံၤတၢ်ဒီး ယသန့ၤယသးလၢနၤလီၤ.
4 ယသန့ၤယသးလၢကစၢ်ယွၤအပူၤ
ယတအိၣ်ဘၣ်ဒီးတၢ်ပျံၤဘၣ်န့ၣ်လီၤ. ယစံးထီၣ်ပတြၢၤအီၤလၢ အတၢ်အၢၣ်လီၤအီလီၤအဃိ,
5 ယဒုၣ်ယဒါတဖၣ်ဃုမၤဆါယၤသ့သ့တနံၤလီၤ.
အတၢ်ဆိကမိၣ်ခဲလၢာ်ထီဒါယၤလၢ
တၢ်အၢအဂ့ၢ်လီၤ.
6 အဝဲသ့ၣ်အိၣ်ဖှိၣ်ရိဖှိၣ်တပူၤဃီ, လၢတၢ်ခူသူၣ်,
ဒီးကွၢ်ယခီၣ်ခါတဖၣ်
ဒ်အဝဲသ့ၣ်ခိးကွၢ်တ့ၢ်ယသးသမူအသိးန့ၣ်လီၤ.
7 ကစၢ်ယွၤဧၢ,
မ့ၢ်အဝဲသ့ၣ်ကပူၤဖျဲးလၢအတၢ်ကမၣ်အဃိန့ၣ်ဧါ,
လၢနတၢ်သးထီၣ်အပူၤမၤလီၤဃံၤကွံာ်
ပှၤဂီၢ်မုၢ်တဖၣ်န့ၣ်တက့ၢ်.
8 နသ့ၣ်ညါယဘၣ်ကိၢ်ဘၣ်ဂီၤဆံးအါလဲၣ်,
နပာ်ကီၤဃာ်ယမဲာ်ထံအတၢ်ကွဲးနီၣ်လီၤ.
အိၣ်ကွဲးအသးလၢနလံာ်ပူၤတမ့ၢ်ဘၣ်ဧါ.
9 မုၢ်တနံၤလၢယကိးထီၣ်နၤန့ၣ်,
ယဒုၣ်ယဒါသ့ၣ်တဖၣ်ကဃၣ်ကဒါက့ၤအသး
ဆူလီၢ်ခံန့ၣ်လီၤ.
တၢ်အံၤယသ့ၣ်ညါလၢကစၢ်ယွၤအိၣ်ဒီးယၤ,
10 ယွၤတဂၤလၢယစံးထီၣ်တြၢၤ
အတၢ်အၢၣ်လီၤအီလီၤတဖၣ်န့ၣ်လီၤ.
11 ယသန့ၤယသးလၢကစၢ်ယွၤအပူၤ,
ယတအိၣ်ဘၣ်ဒီးတၢ်ပျံၤဘၣ်န့ၣ်လီၤ.
12 ကစၢ်ယွၤဧၢ, တၢ်လၢယဆိၣ်တၢ်လၢနဂီၢ်သ့ၣ်တဖၣ်န့ၣ်,
ယကပာ်ဖျါထီၣ်အီၤ,
ယကဟ့ၣ်ထီၣ်တၢ်စံးထီၣ်ပတြၢၤ
အတၢ်မၤဘူၣ်သ့ၣ်တဖၣ်ဆူနၤလီၤ.
13 အဂ့ၢ်ဒ်အံၤ, နမၤပူၤဖျဲးယသးလၢတၢ်သံ,
ဒ်သိးယခီၣ်သုတလီၤတလံာ်တဂ့ၤ,
ဒ်သိးယကလဲၤတၢ်လၢကစၢ်ယွၤအမဲာ်ညါလၢ
ပှၤမူတဖၣ်အတၢ်ကပီၤအပူၤန့ၣ်လီၤ.