စံးထီၣ်ပတြၢၤ 48
1 ယွၤန့ၣ်ဒိၣ်ဝဲ,
ဒီးကဘၣ်တၢ်စံးထီၣ်ပတြၢၤအီၤအဒိၣ်အအါ
လၢပကစၢ်ယွၤအဝ့ၢ်ပူၤ,
လၢအကစၢၢ်စီဆှံအလိၤန့ၣ်လီၤ.
2 စံယိၣ်, ကစၢ်ယွၤအကစၢၢ်အံၤထီဝဲဒီးဃံလၤဝဲန့ၣ်လီၤ.
စီၤပၤဖးဒိၣ်အဝ့ၢ်ဟဲစိာ်န့ၢ်တၢ်သူၣ်ဖှံသးညီဆူ
ဟီၣ်ခိၣ်ဒီဘ့ၣ်ညါန့ၣ်လီၤ.
3 ကစၢ်ယွၤပာ်ဖျါတ့ၢ်ဝဲလၢတၢ်ပူၤဖျဲးအလီၢ်အိၣ်ဒီးအီၤလၢ
ဝ့ၢ်အတိာ်ဧိၤတာ်ဧိၤအပူၤန့ၣ်လီၤ.
4 စီၤပၤသ့ၣ်တဖၣ်ပာ်ဖှိၣ်ထီၣ်အသးတပူၤဃီ
ဒီးဟဲဝဲလၢကဒုးကစၢၢ်စံယိၣ်အဂီၢ်န့ၣ်လီၤ.
5 ဘၣ်ဆၣ်တုၤအဝဲသ့ၣ်ထံၣ်ကစၢၢ်စံယိၣ်န့ၣ်ဒီး
အဝဲသ့ၣ်ကမၢကမၣ်ဝဲ,
ပျံၤတၢ်ဒီးဃ့ၢ်ကွံာ်ဝဲန့ၣ်လီၤ.
6 ဖဲန့ၣ်တၢ်ပျံၤတၢ်ဖုးဒီးတၢ်သူၣ်ကိၢ်သးဂီၤ
လီၤဘၣ်အဝဲသ့ၣ်ဒ်ပိာ်မုၣ်လၢ
အကဆံးစၢ်ထီၣ်အဖိတဂၤအသိး,
7 ဒ်တၢ်ၡံၣ်အကဘီတဖၣ်လၢအဘၣ်တၢ်မၤဟးဂီၤ
ကွံာ်အီၤလၢကလံၤလၢမုၢ်ထီၣ်အသိးန့ၣ်လီၤ.
8 ပနၢ်ဟူတ့ၢ်တၢ်လၢကစၢ်ယွၤမၤဝဲ, ဒီးပထံၣ်တ့ၢ်တၢ်အံၤ
လၢယွၤလၢအအိၣ်ဒီးတၢ်စိတၢ်ကမီၤ,
ပကစၢ်ယွၤအဝ့ၢ်ပူၤန့ၣ်လီၤ.
ယွၤကပၢၤဃာ်ဝ့ၢ်အံၤလၢတၢ်ပူၤဖျဲးထီဘိန့ၣ်လီၤ. စ့လၤ
9 ကစၢ်ယွၤဧၢ, လၢနတၢ်လုၢ်ဟံၣ်အပူၤန့ၣ်
ပဆိကမိၣ်ထီၣ်နတၢ်အဲၣ်အဂၢၢ်အကျၢၤန့ၣ်လီၤ.
10 နဘၣ်တၢ်စံးထီၣ်ပတြၢၤနၤလၢပှၤဂီၢ်မုၢ်
လၢလီၢ်ကိးပူၤဒဲး
ဒီးနတၢ်မံၤဟူထီၣ်သါလီၤရၤလီၤအသးဆူ
ဟီၣ်ခိၣ်ဒီဘ့ၣ်ညါန့ၣ်လီၤ.
နပၢတၢ်လၢတၢ်တီတၢ်လိၤအပူၤ,
11 မ်စံယိၣ်အပှၤဂီၢ်မုၢ်တဖၣ်ကသးခုဝဲဒၣ်န့ၣ်တက့ၢ်.
နဟ့ၣ်တၢ်စံၣ်ညီၣ်တီလီၤ.
မ်တၢ်သးခုကအိၣ်ဝဲဒၣ်လၢယူဒၤအဝ့ၢ်
တဖၣ်အပူၤန့ၣ်တက့ၢ်.
12 ကစၢ်ယွၤအပှၤဂီၢ်မုၢ်တဖၣ်ဟးတရံးစံယိၣ်
ဒီးဂံၢ်တၢးထီခၢၣ်သနၢၣ်တဖၣ်,
13 တိၢ်နီၣ်တၢ်ဒူၣ်တဖၣ်ဒီးဃုသ့ၣ်ညါတိာ်တဖၣ်
ဒ်သိးနကစံးဘၣ်ပှၤလၢခံတစိၤ,
14 ကစၢ်ယွၤအံၤမ့ၢ်ပကစၢ်ယွၤအစိၤစိၤအဃၣ်ဃၣ်,
ဒီးကဆှၢပှၤလၢဆၢကတီၢ်လၢကဟဲန့ၣ်လီၤ.