စံးထီၣ်ပတြၢၤ 22
1 ယကစၢ်ယွၤဧၢ, ယကစၢ်ယွၤဧၢ,
ဘၣ်မနုၤလၢနလဲၤသဒၣ်တ့ၢ်ယၤလဲၣ်.
ဘၣ်မနုၤလၢနအိၣ်ယံၤလၢတၢ်မၤစၢၤယၤအဂီၢ်,
နယံၤဒီးယတၢ်ကအုကစွါအတၢ်ကတိၤ
တဖၣ်န့ၣ်လဲၣ်.
2 ယကစၢ်ယွၤဧၢ, ယကိးထီၣ်နၤလၢမုၢ်ဆါ,
ဘၣ်ဆၣ်နတစံးဆၢယၤဘၣ်.
ဒီးယကိးထီၣ်လၢမုၢ်နၤ,
ဘၣ်ဆၣ်ယတဒိးန့ၢ်ဘၣ်တၢ်မၤမုာ်ယၤဘၣ်.
3 ဘၣ်ဆၣ်နမ့ၢ်ကစၢ်လၢအစီအဆှံ
ဒီးဆ့ၣ်နီၤလၢပှၤအံၣ်စရ့လးဖိသ့ၣ်တဖၣ်အတၢ်စံးထီၣ်ပ တြၢၤအလီၢ်ပစိာ်အဖီခိၣ်န့ၣ်လီၤ.
4 ပပၢ်သ့ၣ်လၢပျၢၤသန့ၤအသးလၢနၤ
အဝဲသ့ၣ်နာ်နၤ, ဒီးနမၤပူၤဖျဲးအဝဲသ့ၣ်လီၤ.
5 အဝဲသ့ၣ်ကိးထီၣ်နၤဒီးနမၤပူၤဖျဲးအဝဲသ့ၣ်န့ၣ်လီၤ.
အဝဲသ့ၣ်နာ်နၤ, ဒီးအသးတဟးဂီၤဘၣ်ဝဲဘၣ်.
6 မ့မ့ၢ်ယဲဒၣ်အံၤယတမ့ၢ်လၢၤပှၤကညီလၢၤဘၣ်.
ယမ့ၢ်ဒၣ်ထိးကလဲာ်တဘိလၢ
အဘၣ်တၢ်သးဘၣ်အၢအီၤ
ဒီးဘၣ်တၢ်ဒုၣ်ဒွဲၣ်လၢပှၤကိးဂၤဒဲးန့ၣ်လီၤ.
7 ပှၤလၢအထံၣ်ယၤခဲလၢာ်ဒုၣ်ဒွဲၣ်ယၤ,
အဝဲသ့ၣ်လ့ၣ်အပျ့ၤလၢယၤဒီးကျၢၢ်ကျာ်အခိၣ်လီၤ.
8 အဝဲသ့ၣ်စံးဝဲ, “နသန့ၤနသးလၢယွၤလီၤ.
ဘၣ်မနုၤလၢအဝဲတမၤပူၤဖျဲးနၤလဲၣ်.
ယွၤမ့ၢ်ဘၣ်သူၣ်ဘၣ်သးလၢနၤဒီး
ဘၣ်မနုၤလၢအဝဲတမၤစၢၤနၤန့ၣ်လဲၣ်.”
9 နမ့ၢ်ပှၤလၢအဟံးထီၣ်ယၤလၢယမိၢ်အဒၢလီၢ်အပူၤ,
ဒီးဖဲယအီယမိၢ်အနုၢ်ထံအခါ,
နကဟုဘံၣ်ကယာ်ဘၢယၤလီၤ.
10 ယသန့ၤတ့ၢ်ယသးလၢနၤ
စးထီၣ်မုၢ်တနံၤလၢယအိၣ်ဖျဲၣ်ထီၣ်လံၤလံၤ,
ဒီးထီဘိနမ့ၢ်တ့ၢ်ယကစၢ်ယွၤလီၤ.
11 အိၣ်ယံၤဒီးယၤတဂ့ၤ,
တၢ်ကိၢ်တၢ်ဂီၤအိၣ်ဘူးဒီးယၤလီၤ,
ဒီးပှၤလၢကမၤစၢၤယၤတအိၣ်နီတဂၤဘၣ်.
12 ဒုၣ်ဒါအါဂၤကဝီၤဃာ်ယၤဒ်ဂီၤဖံးဖါတဖၣ်အသိး,
အဝဲသ့ၣ်အိၣ်ဝးတရံးယၤဒ်ဂီၤဖံးဖါလၢအအၢ
လၢအအိၣ်လၢကီၢ်ဘၤၡၣ်အသိးန့ၣ်လီၤ.
13 အဝဲသ့ၣ်အိးထီၣ်အထးခိၣ်ဒ်ခ့ယုၢ်တဖၣ်လၢ
အကညီၤထီၣ်ဒီးအ့ၣ်ဖှီယၤအသိးန့ၣ်လီၤ.
14 ယဂံၢ်ယဘါလၢာ်တ့ၢ်လံ,
လၢာ်ကွံာ်ဒ်ထံလၢအလီၤဂၢ်လၢ
ဟီၣ်ခိၣ်လိၤအသိးန့ၣ်လီၤ.
ယဃံခဲလၢာ်လီၤဖျုကွံာ်ဝဲ, ယသးမၤအသးဒ်
ဃိးလၢအပှံၢ်လီၤကွံာ်ဝဲအသိးန့ၣ်လီၤ.
15 ယဂံၢ်ယဘါဃ့ထီကွံာ်ဝဲဒ်သပၢၤတက့အသိး,
ဒီးယပျုၤစဲဘူးဒီးယခၣ်ခိၣ်န့ၣ်လီၤ.
နဒုးမံလီၤယၤလၢတၢ်သံအဟီၣ်ခိၣ်အကမူၣ်
16 ပှၤအၢပှၤသီတဖုကဝီၤဃာ်ယၤ,
ဖှိၣ်အသးဆူယအိၣ်ဒ်ထွံၣ်တဖၣ်အသိး,
အ့ၣ်ဖှီယစုဒီးယခီၣ်လီၤ.
17 ယဃံယကွဲအိၣ်ဖျါကိးဘိဒဲး
ယဒုၣ်ယဒါတဖၣ်ကွၢ်ယၤဒီးကွၢ်စူၣ်ယၤလီၤ.
18 အဝဲသ့ၣ်နီၤဖးယကူယသိးလၢအသိးအကျါ,
ဒီးဖီၣ်တၢ်ဖးလၢယကူယသိးအဂီၢ်န့ၣ်လီၤ.
19 ယွၤဧၢ, အိၣ်ယံၤဒီးယၤတဂ့ၤ,
ဟဲချ့ချ့လၢတၢ်မၤစၢၤယၤအဂီၢ်တက့ၢ်.
20 မၤပူၤဖျဲးယၤလၢနး,
မၤပူၤဖျဲးယသးသမူလၢထွံၣ်တဖၣ်အံၤတက့ၢ်.
21 မၤပူၤဖျဲးယၤလၢခ့ယုၢ်သ့ၣ်တဖၣ်အံၤ,
လၢဂီၤဖံးဖါအအၢသ့ၣ်တဖၣ်အံၤအမဲာ်ညါန့ၣ်,
22 ယကတဲယပှၤကလုာ်တဖၣ်တၢ်လၢနမၤတ့ၢ်,
ယကစံးထီၣ်ပတြၢၤနၤလၢပှၤဂီၢ်မုၢ်အကျါန့ၣ်လီၤ.
23 “စံးထီၣ်ပတြၢၤအီၤ,
သုဝဲပှၤလၢအမ့ၢ်ယွၤအခ့အပှၤသ့ၣ်ဧၢ,
မၤလၤကပီၤအီၤ, သုဝဲပှၤလၢ
အလီၤစၢၤလၢစီၤယၤကိာ်သ့ၣ်ဧၢ,
ဘူၣ်ထီၣ်ဘါထီၣ်အီၤ, သုဝဲပှၤအံၣ်စရ့လးဖိသ့ၣ်ဧၢ,
24 အဝဲတမ့ၢ်ပှၤလၢအကွၢ်ယပာ်ကွံာ်ပှၤဖှီၣ်ဖိယာ်ဖိ
မ့တမ့ၢ်တပာ်သ့ၣ်ညါအသးလၢအဝဲသ့ၣ်
အတၢ်နးတၢ်ဖှီၣ်န့ၣ်ဘၣ်.
အဝဲတဃၣ်ဒူချၢအသးလၢအဝဲသ့ၣ်ဘၣ်,
ဘၣ်ဆၣ်ဖဲအဝဲသ့ၣ်ကိးထီၣ်လၢ
တၢ်မၤစၢၤအဂီၢ်န့ၣ်, အဝဲစံးဆၢဝဲဒၣ်လီၤ.”
25 ယကစံးထီၣ်ပတြၢၤနၤလၢတၢ်လၢနမၤတ့ၢ် သ့ၣ်တဖၣ်အဃိ
လၢပှၤလၢအဘူၣ်ထီၣ်ဘါထီၣ်နၤသ့ၣ်တဖၣ်
အမဲာ်ညါန့ၣ်လီၤ.
ယကလုၢ်ထီၣ်တၢ်လုၢ်တဖၣ်
ဒ်ယအၢၣ်လီၤတ့ၢ်အသိးန့ၣ်လီၤ.
26 ပှၤဖှီၣ်ဖိယာ်ဖိတဖၣ်ကအီၣ်တၢ်ဒ်
အဝဲသ့ၣ်ဆၢအီၣ်ဘၣ်ဝဲအသိး,
ပှၤလၢအဟဲဆူယွၤအအိၣ်တဖၣ်
ကစံးထီၣ်ပတြၢၤအီၤလီၤ.
မ်အဝဲသ့ၣ်ဘီၣ်ထီၣ်ညီထီၣ်ထီဘိတထံၣ်ဃီတက့ၢ်.
27 ပှၤကိးကလုာ်ဒဲးကသ့ၣ်နီၣ်ထီၣ်ယွၤလီၤ.
ပှၤလၢအအိၣ်လၢဟီၣ်ခိၣ်ချၢခဲလၢာ်
ကဃၣ်က့ၤအသးဆူအအိၣ်လီၤ.
ဒူၣ်ထၢခဲလၢာ်ကဘူၣ်ထီၣ်ဘါထီၣ်အီၤလီၤ.
28 ယွၤမ့ၢ်စီၤပၤ
ဒီးပၢပှၤကိးကလုာ်ဒဲးန့ၣ်လီၤ.
29 ပှၤလၢအပာ်ထီၣ်ထီအသးခဲလၢာ်
ဒီးပှၤလၢအသံသ့ခဲလၢာ်
ကတီၤလီၤလၢအမဲာ်ညါန့ၣ်လီၤ.
30 ပှၤလၢစိၤလၢအကဟဲသ့ၣ်တဖၣ်ကမၤအတၢ်,
ပှၤကစံးဘၣ်တဲဘၣ်ပှၤလၢခံတစိၤ
လၢယွၤအဂ့ၢ်န့ၣ်လီၤ.
31 ပှၤလၢအတအိၣ်ဖျဲၣ်ထီၣ်ဒံးဘၣ်သ့ၣ်တဖၣ်
ကဘၣ်တၢ်စံးဘၣ်တဲဘၣ်အီၤလၢ,
“ယွၤမၤပူၤဖျဲးအပှၤဂီၢ်မုၢ်န့ၣ်လီၤ.”