စံးထီၣ်ပတြၢၤ 143
1 ယွၤဧၢ, နၢ်ဟူယတၢ်ထုကဖၣ်တက့ၢ်.
လၢနတၢ်တီတၢ်လိၤအပူၤန့ၣ်
ဒိကနၣ်လၢ်ယတၢ်ဃ့ကညး
ဒီးစံးဆၢလၢ်ယၤလၢနတၢ်သးတီအပူၤန့ၣ်တက့ၢ်.
2 ပျဲယၤ, နခ့နပှၤ
ဘၣ်တၢ်လိာ်ကွီၢ်တဂ့ၤ.
လၢနမဲာ်ညါပှၤလၢအတၢ်ကမၣ်တအိၣ်ဘၣ်န့ၣ်
3 ယဒုၣ်ယဒါတဖၣ်လူၤမၤလီၤဃံၤတ့ၢ်ယၤ
ဒီးမၤနၢၤကွံာ်တ့ၢ်လံယၤလၢာ်လၢာ်ဆ့ဆ့န့ၣ်လီၤ.
ပာ်ယၤလၢတၢ်ခံးတၢ်နၤအတၢ်စၢဃာ်အပူၤ
ဒီးယမၤယသးလီၤဂာ်ဒ်
ပှၤလၢအသံတ့ၢ်ဃဲးဃဲးအသိးန့ၣ်လီၤ.
4 ယအိၣ်လၢတၢ်သးဟးဂီၤဖးဒိၣ်အပူၤအဃိ,
ယအိၣ်ကတဲာ်ကတီၤလံယသးလၢ
ယကဟ့ၣ်လီၤကွံာ်ယသးန့ၣ်လီၤ.
5 ယသ့ၣ်နီၣ်ထီၣ်က့ၤမုၢ်နံၤမုၢ်သီလၢ
အပူၤကွံာ်သ့ၣ်တဖၣ်,
ယဆိကမိၣ်ထီၣ်က့ၤတၢ်ဂ့ၢ်လၢနမၤတ့ၢ်ခဲလၢာ်,
ယသးဆိကမိၣ်ထီၣ်က့ၤ
နတၢ်မၤခဲလၢာ်သ့ၣ်တဖၣ်န့ၣ်လီၤ.
6 ယယူာ်ထီၣ်ယစုဆူနအိၣ်လၢတၢ်ထုကဖၣ်အပူၤ,
ယသးအံၤသူအသးလၢနၤဒ်
ဟီၣ်ခိၣ်အဃ့အသိးန့ၣ်လီၤ. စ့လၤ
7 ယွၤဧၢ, မၤချ့ချ့လၢနကမၤစၢၤယၤန့ၣ်တက့ၢ်.
ယတၢ်မုၢ်လၢ်လၢာ်ကွံာ်လံ.
ဒ်သိးယသုတကဲထီၣ်ဒ်ပှၤလၢအလဲၤလီၤဆူ
တၢ်သံအကီၢ်ပူၤတဂ့ၤဒီး,
ပာ်တဒၢနမဲာ်ဒီးယၤတဂ့ၤ.
8 ဒုးသ့ၣ်နီၣ်ယၤလၢနတၢ်အဲၣ်ဂၢၢ်ကျၢၤကိးဂီၤဒဲးတက့ၢ်.
အဂ့ၢ်ဒ်အံၤ, ယသန့ၤယသးလၢနၤလီၤ.
သိၣ်လိယၤလၢကျဲလၢယဂ့ၤပိာ်တဘိန့ၣ်တက့ၢ်.
အဂ့ၢ်ဒ်အံၤ, ယစိာ်ထီၣ်ယသးဆူနအိၣ်လီၤ.
9 ယွၤဧၢ, မၤပူၤဖျဲးယၤလၢယဒုၣ်ယဒါတက့ၢ်.
ယဃ့ၢ်ဆူနအိၣ်လၢတၢ်ပူၤဖျဲးအဂီၢ်လီၤ.
10 သိၣ်လိယၤဒ်သိးယကမၤတၢ်ဘၣ်နသးတက့ၢ်.
အဂ့ၢ်ဒ်အံၤ, နမ့ၢ်ယကစၢ်ယွၤလီၤ.
မ်နသးလၢအဂ့ၤန့ၣ်ဆှၢယၤလၢကျဲလၢ
11 ယွၤဧၢ, ပာ်မူယသးလၢနမံၤအဃိန့ၣ်တက့ၢ်.
လၢနတၢ်တီတၢ်လိၤအပူၤန့ၣ်,
ထုးထီၣ်ကွံာ်ယၤလၢတၢ်ကီတၢ်ခဲ
တဖၣ်အပူၤန့ၣ်တက့ၢ်.
12 ဒီးလၢနတၢ်အဲၣ်ဂၢၢ်ကျၢၤအဃိန့ၣ်,
ဒီၣ်တဲာ်ကွံာ်ယဒုၣ်ယဒါတဖၣ်,
ဒီးမၤဟးဂီၤကွံာ်ကယဲၢ်ပှၤလၢအမၤအၢယၤ
ခဲလၢာ်န့ၣ်တက့ၢ်.
အဂ့ၢ်ဒ်အံၤ, ယမ့ၢ်နခ့နပှၤလီၤ.