စံးထီၣ်ပတြၢၤ 14
(စံး.၅၃)
1 ပှၤဟးဂီၤဖိစံးလၢအသးကံၢ်ပူၤ,
“ကစၢ်ယွၤတအိၣ်ဘၣ်.”
အဝဲသ့ၣ်ခဲလၢာ်ဟးဂီၤဝဲ
ဒီးမၤတၢ်လၢအလီၤသးဘၣ်အၢလီၤ.
ပှၤလၢအမၤတၢ်အဂ့ၤအဘၣ်တအိၣ်နီတဂၤဘၣ်.
2 ယွၤကွၢ်လီၤပှၤကညီလၢမူခိၣ် ဒ်သိး
ကထံၣ်ဝဲပှၤကူၣ်သ့ကူၣ်ဘၣ်,
ပှၤလၢအဘူၣ်ထီၣ်ဘါထီၣ်အီၤ
မ့ၢ်အအိၣ်တအိၣ်လဲၣ်အဂီၢ်န့ၣ်လီၤ.
3 ဘၣ်ဆၣ်အဝဲသ့ၣ်လဲၤကမၣ်တ့ၢ်လံခဲလၢာ်လံ.
အဝဲသ့ၣ်ခဲလၢာ်ဟးဂီၤဝဲဒ်သိးသိးလီၤ.
ပှၤလၢအမၤတၢ်အဂ့ၤအဘၣ်တအိၣ်နီတဂၤဘၣ်.
4 ယွၤစံးဝဲဒၣ်, “မ့ၢ်အဝဲသ့ၣ်တသ့ၣ်ညါဘၣ်ဧါ.
ကယဲၢ်ပှၤမၤတၢ်အၢခဲလၢာ်အံၤအသးတဆးဘၣ်ဧါ.
အဝဲသ့ၣ်အိၣ်မူလၢတၢ်ဟုၣ်ယပှၤဂီၢ်မုၢ်အပူၤဒီး
တဘါထုကဖၣ်တၢ်ဆူယၤနီတစုဘၣ်. ”
5 ဘၣ်ဆၣ်အဝဲသ့ၣ်ကအိၣ်လၢတၢ်ပျံၤတၢ်ဖုးဖးဒိၣ်အပူၤ,
အဂ့ၢ်မ့ၢ်လၢကစၢ်ယွၤအိၣ်ဒီး
ပှၤတီပှၤလိၤသ့ၣ်တဖၣ်အဃိန့ၣ်လီၤ.
6 ပှၤအၢပှၤသီမၤတံာ်တာ် ပှၤဖှီၣ်ဖိယာ်ဖိ
အတၢ်ကူၣ်ထီၣ်ဖးလီၤတဖၣ်လီၤ.
ဘၣ်ဆၣ်ယွၤမ့ၢ်ပှၤလၢ
အကဟုဘံၣ်ကယာ်ဘၢအီၤန့ၣ်လီၤ.
7 မ်အံၣ်စရ့လးအတၢ်ပူၤဖျဲး
ဟဲထီၣ်လၢစံယိၣ်န့ၣ်တက့ၢ်.
ဖဲယွၤဒုးဘီၣ်ထီၣ်ညီထီၣ်က့ၤအပှၤဂီၢ်မုၢ်ဒီး
ယၤကိာ်ကသူၣ်ဖှံသးညီ
ဒီးအံၣ်စရ့လးကသးခုဝဲဆံးဒိၣ်လဲၣ်.