စံးထီၣ်ပတြၢၤ 135
1 စံးထီၣ်ပတြၢၤယွၤတက့ၢ်.
စံးထီၣ်ပတြၢၤယွၤအမံၤတက့ၢ်,
ယွၤအခ့အပှၤ,
2 သုဝဲလၢအမၤတၢ်လၢယွၤအဟံၣ်ပူၤ,
လၢပကစၢ်အဟံၣ်အဂၢၤပူၤသ့ၣ်ဧၢ, ဟ့ၣ်အီၤလၢတၢ်စံးထီၣ်ပတြၢၤန့ၣ်တက့ၢ်.
3 စံးထီၣ်ပတြၢၤယွၤတက့ၢ်.
အဂ့ၢ်ဒ်အံၤ, ယွၤန့ၣ်ဂ့ၤဝဲလီၤ.
သးဝံၣ်ထီၣ်အမံၤတက့ၢ်.
အဂ့ၢ်ဒ်အံၤ, အဝဲဒၣ်န့ၣ်
သူၣ်ကညီၤသးကညီၤတၢ်န့ၣ်လီၤ.
4 အဂ့ၢ်ဒ်အံၤ, ယွၤဃုထၢတ့ၢ်လံဝဲ
ယၤကိာ်လၢအဂီၢ်ဒၣ်ဝဲ,
အံၣ်စရ့လးဒ်အတၢ်ဒၣ်ဝဲအသိးန့ၣ်လီၤ.
5 ယသ့ၣ်ညါလၢယွၤန့ၣ်ဒိၣ်ဝဲ
ဒိၣ်န့ၢ်ကစၢ်အဂၤခဲလၢာ်တက့ၢ်လီၤ.
6 ယွၤမၤဝဲကယဲၢ်တၢ်ဘၣ်အသး
လၢမူခိၣ်, ဒီးလၢဟီၣ်ခိၣ်ချၢ,
ဒီးလၢပီၣ်လဲၣ်ပူၤ, ဒီးလၢထံယိာ်ပူၤခဲလၢာ်န့ၣ်လီၤ.
7 အဝဲဒၣ်န့ၣ်ဒုးဟဲထီၣ်တၢ်စူၤအတၢ်အၢၣ်လၢဟီၣ်ခိၣ်အကတၢၢ်,
ဒီးတ့လီၤလီဝၢ်အဒံးလၢ ကလံၤမုၢ်အဂီၢ်,
ဒီးဒုးဟဲထီၣ်ကလံၤလၢ
အတၢ်ပာ်ဖှိၣ်အလီၢ်န့ၣ်လီၤ.
8 အဝဲဒၣ်န့ၣ်မ့ၢ်ပှၤလၢအကျီသံကွံာ်
ပှၤအဲၤကူပတူးအဖိဝဲၢ်ကိ,
ဒီးဆၣ်ဖိကီၢ်ဖိဝဲၢ်ကိစ့ၢ်ကီးန့ၣ်လီၤ.
9 ဖဲန့ၣ်, အဝဲဒၣ်မၤတၢ်တၢ်ပနီၣ်လီၤလးတဖၣ်ဒီးတၢ်လီၤလိၢ် လီၤလးတဖၣ်
လၢကစံၣ်ညီၣ်စီၤပၤဒီး အပဒိၣ်ပပှၢ်တဖၣ်အဂီၢ်လီၤ.
10 မၤသံကွံာ်ပှၤအါကလုာ်
ဒီးမၤသံစီၤပၤဂံၢ်ဆူၣ်ဘါဆူၣ်သ့ၣ်တဖၣ်,
11 ပှၤအမိၢ်ဖိအစီၤပၤစံဃိၣ်,
ဒီးဘၤၡၣ်အစီၤပၤဧိာ်,
ဒီးကနၤဧၣ်စီၤပၤတဖၣ်ခဲလၢာ်န့ၣ်လီၤ.
12 ဒီးဟ့ၣ်လီၤအထံအကီၢ်လၢတၢ်န့ၢ်သါ,
တၢ်န့ၢ်သါလၢအပှၤဂီၢ်မုၢ်
13 ယွၤဧၢ, နမံၤအိၣ်ဝဲလီၤစိၤလီၤထီလီၤ.
ယွၤဧၢ, နတၢ်မံၤဟူသၣ်ဖျါ
အိၣ်ဝဲအစိၤစိၤအဃၣ်ဃၣ်န့ၣ်လီၤ.
14 အဂ့ၢ်ဒ်အံၤ, ယွၤကစံၣ်ညီၣ်အိၣ်ပှိၤ
အပှၤဂီၢ်မုၢ်လၢအတၢ်ကမၣ်တအိၣ်,
ဒီးအိၣ်ဒီးတၢ်သးကညီၤအခ့အပှၤတဖၣ်န့ၣ်လီၤ.
15 ပှၤကလုာ်တဖၣ်အတၢ်ဂီၤတၢ်ဖီၣ်န့ၣ်မ့ၢ်ကျိၣ်ဧိၤစ့ဧိၤ,
ဒီးထူဧိၤလွဲဧိၤလၢပှၤကညီမၤအီၤ
လၢအစုန့ၣ်လီၤ.
16 အဝဲသ့ၣ်အိၣ်ဒီးအထးခိၣ်, ဘၣ်ဆၣ်
ကတိၤတၢ်တသ့ဘၣ်.
အဝဲသ့ၣ်အိၣ်ဒီးအမဲာ်ချံ, ဘၣ်ဆၣ်
ထံၣ်တၢ်တသ့ဘၣ်
17 အဝဲသ့ၣ်အိၣ်ဒီးအနၢ်, ဘၣ်ဆၣ် နၢ်ဟူတၢ်တသ့ဘၣ်
သါထီၣ်သါလီၤဒၣ်လဲာ်တသ့ဘၣ်.
18 ပှၤလၢအတ့အီၤတဖၣ်ဒီးကယဲၢ်ပှၤလၢ
အသန့ၤအသးလၢအီၤခဲလၢာ်န့ၣ်,
ကလီၤဂာ်ဒီးတၢ်ဂီၤတၢ်ဖီၣ်လၢအတ့ဝဲတဖၣ်လီၤ.
19 အံၣ်စရ့လးအပှၤဂီၢ်မုၢ်သ့ၣ်ဧၢ,
စံးထီၣ်ပတြၢၤယွၤတက့ၢ်.
စီၤအၤဟရိၣ်အပှၤဟံၣ်ဖိသ့ၣ်ဧၢ,
စံးထီၣ်ပတြၢၤယွၤတက့ၢ်.
20 စီၤလ့ၤဝံအပှၤဟံၣ်ဖိသ့ၣ်ဧၢ, စံးထီၣ်ပတြၢၤယွၤတက့ၢ်.
သုဝဲပှၤလၢအပျံၤယွၤသ့ၣ်ဧၢ,
စံးထီၣ်ပတြၢၤယွၤတက့ၢ်.
21 စံးထီၣ်ပတြၢၤယွၤလၢ စံယိၣ်အပူၤ,
လၢအဟံၣ်လၢ ယရူၤၡလ့ၣ်အပူၤန့ၣ်တက့ၢ်.
စံးထီၣ်ပတြၢၤယွၤတက့ၢ်.