စံးထီၣ်ပတြၢၤ 129
1 အံၣ်စရ့လးဧၢ, တဲဘၣ်ပှၤလၢ
နဘၣ်တၢ်မၤနးမၤဖှီၣ်နၤလၢနဒုၣ်နဒါတဖၣ်, စးထီၣ်လၢ
နသးစၢ်လံၤလံၤဒ်လဲၣ်အဂ့ၢ်န့ၣ်တက့ၢ်.
2 “စးထီၣ်လၢယသးစၢ်လံၤလံၤန့ၣ် ယဒုၣ်ယဒါတဖၣ် မၤနးမၤဖှီၣ်ယၤ
နးနးကျံၤကျံၤ, ဘၣ်ဆၣ်အဝဲသ့ၣ်တမၤနၢၤယၤဘၣ်.
3 အဝဲသ့ၣ်ဂဲၤတၢ်လၢ ယချၢဃံဒီး အပူၤလီၢ်တဖၣ်
ယိာ်ဝဲဒ်သိးပှၤထဲၣ်တၢ်လၢ စံာ်ပျီပူၤန့ၣ်လီၤ.
4 ဘၣ်ဆၣ်တၢ်တီတၢ်လိၤအယွၤတဂၤန့ၣ်
မၤပူၤမၤဖျဲးယၤလၢ တၢ်ကဲကုၢ်အပူၤလံ.”
5 မ်ပှၤလၢအသးဟ့စံယိၣ်ခဲလၢာ်
ဘၣ်တၢ်မၤနၢၤမၤဃၣ်အီၤဒီး နီၣ်ကဒါက့ၤအီၤန့ၣ်တက့ၢ်.
6 မ်အမၤအသးဒ်တပံၢ်လၢအမဲထီၣ်လၢဟံၣ်ခိၣ်တဖၣ်
လၢအဃ့ထီကွံာ်ဝဲ
တချုးလၢအဒိၣ်ထီၣ်န့ၣ်တက့ၢ်.
7 ပှၤတပာ်ဖှိၣ်အီၤနီတဂၤဘၣ်.
ပှၤတစိာ်ထီၣ်ကွံာ်အီၤအိၣ်ဒီး
အကဒိၣ်တဖၣ်န့ၣ်နီတဂၤဘၣ်.
8 ပှၤလၢအလဲၤခီဂာ်တၢ်လၢကျဲတဖၣ်တစံးဝဲနီတဂၤလၢ,
“မ်ယွၤကဆိၣ်ဂ့ၤသုတက့ၢ်,
ပဆိၣ်ဂ့ၤသုလၢယွၤအမံၤလီၤ.” န့ၣ်ဘၣ်.