စံးထီၣ်ပတြၢၤ 113
1 စံးထီၣ်ပတြၢၤယွၤတက့ၢ်.
ယွၤအခ့အပှၤသ့ၣ်ဧၢ, စံးထီၣ်ပတြၢၤတၢ်,
စံးထီၣ်ပတြၢၤယွၤအမံၤန့ၣ်တက့ၢ်.
2 မ်အမံၤဘၣ်တၢ်စံးထီၣ်ပတြၢၤအီၤခဲအံၤ
ဒီးအစိၤစိၤအဃၣ်ဃၣ်တက့ၢ်.
3 မ်ယွၤအမံၤဘၣ်တၢ်စံးထီၣ်ပတြၢၤအီၤ,
လၢမုၢ်ထီၣ်တုၤဆူမုၢ်နုာ်န့ၣ်တက့ၢ်.
4 ယွၤအိၣ်ထီၣ်ထီလၢပှၤကိးကလုာ်ဒဲးအဖီခိၣ်,
ဒီးအလၤကပီၤအိၣ်ဝဲလၢမူခိၣ်အဖီခိၣ်လီၤ.
5 မ့ၢ်မတၤလီၤဂာ်ဒ် ယွၤပကစၢ်ယွၤအသိး
လၢအအိၣ်ဝဲဆိးဝဲလၢ
တၢ်လီၢ်ထီၣ်ထီန့ၣ်တဂၤလဲၣ်.
6 ဘၣ်ဆၣ်အဝဲဆီၣ်လီၤအသး
ဒ်သိးကထံၣ်မူခိၣ်ဒီးဟီၣ်ခိၣ်န့ၣ်လီၤ.
7 အဝဲစိာ်ကဖီထီၣ်ပှၤဘၣ်ဖှီၣ်ဘၣ်ယာ်လၢ
ဟီၣ်ခိၣ်အကမူၣ်ပူၤ,
အဝဲစိာ်ထီၣ်ထီပှၤလိၣ်ဘၣ်တၢ်မၤစၢၤလၢ
အတၢ်သူၣ်ကိၢ်သးဂီၤအပူၤ
8 ဒ်သိးအကဒုးကဲထီၣ်အဝဲသ့ၣ်လၢစီၤပၤဖိခွါတဖၣ်,
ပှၤဂီၢ်မုၢ်အစီၤပၤဖိခွါတဖၣ် အတံၤသကိးန့ၣ်လီၤ.
9 အဝဲမၤလၤကပီၤပိာ်မုၣ်တူာ်ဖိတဖၣ်
လၢအဟံၣ်ပူၤ,
ဒုးသးခုအဝဲသ့ၣ်ခီဖျိဟ့ၣ်အီၤဖိတဖၣ်န့ၣ်လီၤ.
စံးထီၣ်ပတြၢၤယွၤတက့ၢ်.