2
1 ယဖိခွါဧၢ, မၤလိတၢ်လၢယသိၣ်လိနၤ, ဒီးတၢ်လၢယမၤလိာ်နၤဒ်သိး နကမၤန့ၣ်, သးပ့ၤနီၣ်အီၤနီတစုတဂ့ၤ.
2 ဒိကနၣ်တၢ်ကူၣ်သ့ဒီးကျဲးစၢးနၢ်ပၢၢ်အီၤတက့ၢ်.
3 မ့ၢ်ဝဲလီၤ. ဃ့န့ၢ်တၢ်သ့ၣ်ညါဒီးသကွံၢ်ကညးတၢ်လၢတၢ်ထံၣ်တၢ် လၢသးအမဲာ်အဂီၢ်တက့ၢ်.
4 ဃုအီၤဆူၣ်ဆူၣ်ဒ်နဃုစ့, မ့တမ့ၢ်ဒ်တၢ်လုၢ်ဒိၣ်ပှ့ၤဒိၣ်အိၣ်ခူ သူၣ်တနီၤနီၤအသိးတက့ၢ်.
5 နမ့ၢ်မၤဒ်န့ၣ်ဒီးနကသ့ၣ်ညါတၢ်ပျံၤယွၤအခီပညီမ့ၢ်တၢ်မနုၤ မနုၤလဲၣ်ဒီးနတၢ်မၤလိဘၣ်ဃးဒီးကစၢ်ယွၤကကဲထီၣ်လိၣ်ထီၣ် ဝဲလီၤ.
6 ယွၤမ့ၢ်ဝဲပှၤလၢအဟ့ၣ်တၢ်ကူၣ်သ့, ဒီးတၢ်သ့ၣ်ညါဒီး တၢ်သူၣ်ဆးသးဆးဟဲလၢအအိၣ်လီၤ.
7 အဝဲကတဲာ်ကတီၤန့ၢ်တၢ်မၤစၢၤဒီးတၢ်ဒီသဒၢလၢပှၤ အတီအလိၤဒီးပှၤလၢအကလုၢ်တီအဂီၢ်လီၤ.
8 အဝဲကဟုဘံၣ်ကယာ်ဘၢပှၤလၢအမၤပှၤဂၤတီတီလိၤလိၤ, ဒီးပၢၤဃးပှၤလၢအဟ့ၣ်လီၤအသးနီၢ်နီၢ်ဆူအီၤတဖၣ်န့ၣ်လီၤ.
9 နမ့ၢ်ဒိကနၣ်ယၤဒီးနကနၢ်ပၢၢ်တၢ်လၢအဘၣ်, တၢ်စံၣ်ညီၣ်တီ, ဒီးတၢ်လၢအကြၢးဝဲဘၣ်ဝဲန့ၣ်လီၤ.
10 နကကဲထီၣ်ပှၤကူၣ်တၢ်သ့ဒီးနတၢ်သ့ၣ်ညါကဟ့ၣ်နၤတၢ်သူၣ်မုာ်သး မုာ်လီၤ.
11 နတၢ်ထံၣ်တၢ်လၢသးအမဲာ်ဒီးနတၢ်သူၣ်ဆးသးဆးကအိၣ်ပှိၤနၤ,
12 ဒီးကတြီနၤလၢနသုတမၤကမၣ်တၢ်တဂ့ၤအဂီၢ်န့ၣ်လီၤ. အဝဲသ့ၣ်ကဟံးဃာ်နၤယံၤဒီးပှၤလၢအမၤတၢထီၣ်တၢလီၤတၢ်ခီဖျိ တၢ်လၢအစံးဝဲ,
13 ပှၤတဖၣ်လၢအညိကွံာ်တၢ်အိၣ်မူအတီအလိၤဒ်သိးကအိၣ်မူ လၢတၢ်ဒဲးဘးအတၢ်ခံးတၢ်နၤအပူၤ,
14 ပှၤတဖၣ်လၢအမုာ်လၤဝဲလၢတၢ်မၤကမၣ်တၢ်ဒီးသးခုဝဲလၢတၢ်အၢ တၢ်သီလၢအခီပညီတအိၣ်ဘၣ်အပူၤ,
15 ပှၤလၢပှၤသန့ၤအသးလၢအီၤဒီးနာ်န့ၢ်အီၤတသ့တဖၣ်န့ၣ်လီၤ.
16 နမၤပူၤဖျဲးနသးထီဒါပိာ်မုၣ်ဟးဂီၤလၢအကျဲးစၢးကလံာ်န့ၢ်နၤ ခီဖျိအတၢ်ကတိၤလၢအဘျ့ဝဲ,
17 လၢအတတီဒီးအဝၤဒၣ်ဝဲဒီးသးပ့ၤနီၣ်ကွံာ်အတၢ်အၢၣ်လီၤ အီလီၤစီဆှံတဖၣ်ကသ့ဝဲန့ၣ်လီၤ.
18 နမ့ၢ်လဲၤဆူအဟံၣ်ဒီး, နပိာ်ကျဲဆူတၢ်သံန့ၣ်လီၤ. တၢ်လဲၤဆူအဟံၣ်န့ၣ်, မ့ၢ်တၢ်သုးဘူးဃီၤသးဆူတၢ်သံ အကီၢ်န့ၣ်လီၤ.
19 ပှၤလၢအလဲၤဆူအအိၣ်တဟဲက့ၤလၢၤဘၣ်နီတဂၤဘၣ်. အဝဲတဟဲက့ၤကဒါက့ၤဆူတၢ်မူအကျဲနီတစုဘၣ်.
20 လၢတၢ်န့ၣ်အဃိ, နကဘၣ်ပိာ်ထွဲပှၤအဂ့ၤတဖၣ်အဒိဂ့ၤတဲာ်ဘၣ်, ဒီးအိၣ်မူတၢ်အိၣ်မူအတီအလိၤန့ၣ်လီၤ.
21 အဂ့ၢ်ဒ်အံၤ, ပှၤအတီအလိၤတဖၣ်, လၢအတၢ်အိၣ်မူလၢဝဲပှဲၤဝဲန့ၣ် ကအိၣ်ကဆိးလၢအထံဧိၤကီၢ်ဧိၤအပူၤလီၤ.
22 ဘၣ်ဆၣ်ဒီး, ကစၢ်ယွၤကဖ့ၣ်ထဲးထီၣ်ကွံာ်ပှၤတတီတလိၤတဖၣ်ဒီးထုး ထီၣ်ကွံာ်ပှၤတၢ်ဒဲးဘးဖိတဖၣ်လၢထံဧိၤကီၢ်ဧိၤအပူၤဒ်တၢ်မုၢ် တၢ်ဘိတဖၣ်လၢဟီၣ်ခိၣ်လိၤအသိးန့ၣ်လီၤ.