စီၤဖံၤလ့မိၣ်အအိၣ်
PHILEMON
စီၤဖံၤလ့မိၣ်မ့ၢ်ပှၤခရံာ်ဖိတဂၤလၢအဘၣ်တၢ်သ့ၣ်ညါအီၤလၢ ပှၤအါဂၤဒီးဘၣ်တဘၣ်ကမ့ၢ်ဝ့ၢ်ကလီးစဲအတၢ်အိၣ်ဖှိၣ်ဖိတဂၤ သ့ၣ်သ့ၣ်လီၤ. အဝဲအိၣ်ဒီးအကုၢ်ပိာ်ခွါတဂၤလၢအမံၤမ့ၢ် စီၤအီးန့ၤစံမူးလီၤ. ကုၢ်အံၤဃ့ၢ်ထီၣ်ကွံာ်လၢအကစၢ်အဟံၣ်ဘၣ် ဆၣ်ဒီးထံၣ်လိာ်အသးဒီးစီၤပီလူးဖဲစီၤပီလူးအိၣ်လၢဃိာ်ပူၤ အခါန့ၣ်လီၤ. ခီဖျိလၢစီၤပီလူးန့ၣ်စီၤအီးန့ၤစံမူးကဲထီၣ်ပှၤခရံာ်ဖိ တဂၤလီၤ. လံာ်ပရၢအံၤမ့ၢ်တၢ်ကွဲးသကွံၢ်ကညးစီၤဖံၤလ့မိၣ်လၢ အကအိၣ်ဘၣ်လိာ်က့ၤဒီးအကုၢ်လၢစီၤပီလူးဆှၢကဒါက့ၤဆူ အအိၣ်န့ၣ်လီၤ. စီၤပီလူးဃ့ကညးအီၤလၢအကတူၢ်လိာ်က့ၤ စီၤအီးန့ၤစံမူးတမ့ၢ်ဘၣ်ဒ်ကုၢ်လၢအတၢ်ကမၣ်ဘၣ်တၢ်ပျၢ်အီၤ တဂၤအသိးဧိၤဘၣ်. မ့မ့ၢ်ဒ်ဒီပုၢ်ဝဲၢ်ခရံာ်ဖိတဂၤအသိးန့ၣ်လီၤ.
1
1 လၢစီၤပီလူး, ပှၤလီၤဘၣ်ဃိာ်လၢယ့ၣ်ၡူးခရံာ်အဃိ, ဒီးပဒီပုၢ်ဝဲၢ်စီၤတံၤမသ့း,
ဆူ, ပတံၤသကိး, ပှၤမၤသကိးတၢ်ဒီးပှၤစီၤဖံၤလ့မိၣ်,
2 ပဒီပုၢ်ဝဲၢ်မုၣ်နီၢ်အးဖံ, ပှၤသုးဖိသကိးဒီးပှၤစီၤအၢ်ဃံၤပူးဒီး တၢ်အိၣ်ဖှိၣ်လၢအပာ်ဖှိၣ်ထီၣ်အသးလၢစီၤဖံၤလ့မိၣ်အဟံၣ် အအိၣ်,
3 မ်ပပၢ်ကစၢ်ယွၤဒီးပကစၢ်ယ့ၣ်ၡူးခရံာ်ဟ့ၣ်လီၤသုတၢ်ဘျုးတၢ် ဖှိၣ်ဒီးတၢ်ဃူတၢ်ဖိးတက့ၢ်.
4 ဒီပုၢ်ဝဲၢ်စီၤဖံၤလ့မိၣ်ဧၢ, တဘျီလၢ်လၢ်ဖဲယဃ့ဘါထုကဖၣ် ယွၤန့ၣ်, ယသ့ၣ်နီၣ်ဘၣ်နၤဒီးစံးထီၣ်ပတြၢၤကစၢ်ယွၤလီၤ.
5 အဂ့ၢ်မ့ၢ်လၢယနၢ်ဟူဘၣ်တၢ်အဲၣ်တၢ်ကွံဒီးတၢ်စူၢ်တၢ်နာ်လၢ အအိၣ်ဒီးနၤလၢကစၢ်ယ့ၣ်ၡူးဒီးပှၤစီဆှံခဲလၢာ်တဖၣ်အဂီၢ် အဃိန့ၣ်လီၤ.
6 ယတၢ်ထုကဖၣ်မ့ၢ်ဝဲလၢပတၢ်ဘၣ်ထွဲဒီးနၤဒ်ပှၤစူၢ်က့ၤနာ်က့ၤ တၢ်တဂၤအသိးအံၤန့ၣ်, ကဒုးအါထီၣ်ယိာ်ထီၣ်တၢ်သ့ၣ်ညါနၢ်ပၢၢ်တၢ်ဆိၣ်ဂ့ၤခဲလၢာ်လၢ အအိၣ်ဒီးပှၤ, ခီဖျိတၢ်အိၣ်မူလၢခရံာ်အပူၤန့ၣ်လီၤ.
7 ယဒီပုၢ်ဝဲၢ်သးဘိဧၢ, နတၢ်အဲၣ်ဟဲစိာ်န့ၢ်ယၤတၢ်သးခုဒီးဟ့ၣ်ဆူၣ်ထီၣ်ယသးဒိၣ်ဒိၣ် အါအါလီၤ. အဂ့ၢ်ဒ်အံၤနမၤမုာ်တ့ၢ်လံပှၤစီဆှံခဲလၢာ်အသးလီၤ.
8 လၢတၢ်ဂ့ၢ်အံၤအဃိ, ဒ်နဒီပုၢ်ဝဲၢ်ခရံာ်ဖိတဂၤအသိးယအိၣ်ဒီးတၢ်သးဒူလၢ ယကဟ့ၣ်လီၤယကလုၢ်လၢနကမၤတၢ်လၢအဂ့ၤဘၣ်တၢ်မၤအီၤ န့ၣ်လီၤ.
9 ဘၣ်ဆၣ်ဒီးလၢတၢ်အဲၣ်တၢ်ကွံအပူၤန့ၣ်, ယၤ, စီၤပီလူး, ယမ့မ့ၢ်ခၢၣ်စးလၢအလီၤဘၣ်ဃိာ်လၢယ့ၣ်ၡူးခရံာ် အဃိနာ်သက့, ယဃ့ကညးနၤလီၤ.
10 ယဃ့ကညးနၤလၢစီၤအီးန့ၤစံမူးအခၢၣ်စးလီၤ. အဝဲမ့ၢ်ယဖိခွါဒၣ်ယဲလၢခရံာ်အပူၤလၢယထီၣ်ဖိန့ၢ်အီၤဒီးကဲ ထီၣ်အပၢ်လၢသူၣ်လၢသးဖဲယမ့ၢ်ယဲပှၤဃိာ်ဖိအခါန့ၣ်လီၤ.
11 လၢအပူၤကွံာ်န့ၣ်အဝဲတကဲဘျုးလၢနဂီၢ်ဘၣ်. ဘၣ်ဆၣ်ဒီးအခဲအံၤအဝဲကဲဘျုးနီၢ်နီၢ်လၢနဂီၢ်ဒီးလၢ ယဂီၢ်လီၤ.
12 အခဲအံၤယဆှၢက့ၤအီၤဆူနအိၣ်, ဒီးယသးလဲၤဃုာ်တၢ်ဒီးအီၤလီၤ.
13 ယသးအိၣ်ကိးဃာ်အီၤလၢယသကိးဖဲယလီၤဘၣ်ဃိာ်လၢတၢ်သးခု ကစီၣ်အဃိ, ဒ်သိးဒီးအကမၤစၢၤယၤလၢနလီၢ်န့ၣ်လီၤ.
14 ဘၣ်ဆၣ်ဒီး, ယတအဲၣ်ဒိးမၤတၢ်လၢနတသ့ၣ်ညါဒီးအၢၣ်လီၤ ထွဲဒံးဘၣ်နီတမံၤဘၣ်. အဂ့ၢ်ဒ်အံၤယတအဲၣ်ဒိးလၢနကမၤဂ့ၤမၤဘျုးယၤလၢတၢ်မၤဆူၣ် အဃိန့ၣ်ဘၣ်. မ့မ့ၢ်မ်အကမ့ၢ်ဒၣ်ဝဲဒ်နသးအတၢ်အဲၣ်ဒိးဒၣ်ဝဲ အသိးန့ၣ်တက့ၢ်.
15 ဘၣ်တဘၣ်အဝဲဟးဖးဒီးနၤတစိၢ်တလီၢ်မ့ၢ်ဒ်သိးနကမၤန့ၢ်က့ၤအီၤ ထီဘိတဘိယူၢ်ဃီ,
16 တမ့ၢ်လၢၤဒ်ကုၢ်တဂၤအသိးဘၣ်. မ့ၢ်ဒ်ဒီပုၢ်ဝဲၢ်လၢခရံာ်အပူၤလၢတၢ်အဲၣ်အီၤတဂၤအသိး, လီၤဆီဒၣ်တၢ်လၢယဂီၢ်ဒီးဒိၣ်ဒၣ်တၢ်တက့ၢ်လၢနဂီၢ်, အဂ့ၢ်မ့ၢ်လၢနဒိးန့ၢ်က့ၤအီၤလၢနီၢ်ခိနီၢ်ခီဒ်နကုၢ်တဂၤ အသိး, ဒီးလၢကစၢ်အပူၤဒ်ဒီပုၢ်ဝဲၢ်တဂၤအသိးအဃိန့ၣ်လီၤ.
17 လၢတၢ်န့ၣ်အဃိ, နမ့ၢ်ပာ်ယၤဒ်နပှၤမၤသကိးတၢ်တဂၤအသိး ဒီးတူၢ်လိာ်က့ၤအီၤဒ်နကတူၢ်လိာ်ဘၣ်ယၤအသိးန့ၣ်တက့ၢ်.
18 အဝဲမ့ၢ်မၤကမၣ်ဘၣ်နၤဒီးအကမၢ်မ့ၢ်အိၣ်လၢနအိၣ်ဒီးပာ်အီၤဒ် ယကမၢ်ဒၣ်ယဲအသိးန့ၣ်တက့ၢ်.
19 ယကွဲးတၢ်အံၤလၢယစုဒၣ်ယဲလီၤ. ယၤ, စီၤပီလူးကလိးက့ၤနၤလီၤ. (ဖဲလၢအဘၣ်ဃးဒီးနကမၢ်လၢအအိၣ်ဒီးယၤလၢအမ့ၢ်တၢ်လၢနကြၢးမၤဆၢက့ၤယၤန့ၣ်, ယတသးအိၣ်ယၢၤထီၣ်အီၤဘၣ်.)
20 မ့ၢ်လီၤ, ဒီပုၢ်ဝဲၢ်ဧၢ, ဝံသးစူၤမၤန့ၢ်ယၤလၢ တၢ်ဘျုးတမံၤအံၤလၢကစၢ်အဃိတက့ၢ်. ဒ်ဒီပုၢ်ဝဲၢ်လၢခရံာ်အပူၤတဂၤအသိး, မၤမုာ်ထီၣ်ယသးတက့ၢ်.
21 ယနာ်လၢနကစူၢ်ယကလုၢ်ဒီးယကွဲးလံာ်အံၤအဂ့ၢ်မ့ၢ်လၢယသ့ၣ်ညါ လၢနကမၤတၢ်အါန့ၢ်ယစံးဘၣ်တဲဘၣ်နၤတက့ၢ်လီၤ.
22 တဘျီဃီဝံသးစူၤကတဲာ်ကတီၤဆိပာ်စၢၤဒၢးတဖျၢၣ်လၢ ယဂီၢ်, အဂ့ၢ်ဒ်အံၤယမုၢ်လၢ်လၢကစၢ်ယွၤကစံးဆၢသုခဲလၢာ် အတၢ်ထုကဖၣ်ဒီးဆှၢက့ၤယၤဆူသုအိၣ်န့ၣ်လီၤ.
23 ပှၤလၢအလီၤဘၣ်ဃိာ်လၢယ့ၣ်ၡူးခရံာ်အဃိဒီးယၤ, စီၤအ့းပၤဖြါဆှၢလီၤအတၢ်ဆၢဂ့ၤဆၢဝါဆူသုအိၣ်လီၤ.
24 ဒ်န့ၣ်အသိးပှၤမၤသကိးတၢ်ဒီးယၤစီၤမၢ်ကူး, စီၤအရံစတၢ်ဃူး, စီၤဒ့မၤဒီးစီၤလူၤကၣ်သ့ၣ်တဖၣ်ဆှၢလီၤစ့ၢ်ကီးအတၢ်ဆၢဂ့ၤ ဆၢဝါသုလီၤ.
25 ကစၢ်ယ့ၣ်ၡူးခရံာ်အဘျုးအဖှိၣ်မ်အအိၣ်ဒီးသုခဲလၢာ်တက့ၢ်.