ပှၤဧ့ၤဘြံၤဖိတဖၣ်အအိၣ်
HEBREWS
လံာ်ပရၢအံၤဘၣ်တၢ်ကွဲးအီၤဆူပှၤခရံာ်ဖိတဖုလၢအဘၣ် ကွၢ်ဆၢၣ်မဲာ်ဒီးတၢ်ထီဒုၣ်ထီဒါအါထီၣ်အါထီၣ်ပၢၢ်တုၤလၢတၢ် ဘၣ်ယိၣ်အလီၢ်အိၣ်ဝဲလၢအဝဲသ့ၣ်ကစူးကွံာ်ညိကွံာ်ဒၣ်လဲာ်အတၢ်စူၢ်တၢ်နာ် န့ၣ်လီၤ. ပှၤကွဲးလံာ်ဟ့ၣ်ဆူၣ်ထီၣ်အဝဲသ့ၣ်လၢအတၢ်စူၢ်တၢ်နာ် အပူၤလီၤဆီဒၣ်တၢ်ခီဖျိတၢ်ဒုးနဲၣ်အဝဲသ့ၣ်လၢယ့ၣ်ၡူးခရံာ်မ့ၢ် ကစၢ်ယွၤအတၢ်လီၣ်ဖျါသးအမ့ၢ်အတီဒီးလၢခံကတၢၢ် န့ၣ်လီၤ. အဝဲဒုးနဲၣ်တၢ်အံၤခီဖျိတၢ်မ့ၢ်တၢ်တီသၢမံၤလီၤ. (၁) ယ့ၣ်ၡူးမ့ၢ်ကစၢ်ယွၤအဖိခွါလၢအမူဝဲလီၤထူလီၤယိာ်လၢ အမၤလိတၢ်စူၢ်ပၢ်အကလုၢ်ခီဖျိအဒိးတၢ်နးတၢ်ဖှီၣ်လီၤ. ဒ်ကစၢ်ယွၤအဖိခွါတဂၤအသိး, ယ့ၣ်ၡူးဒိၣ်န့ၢ်ထီန့ၢ်ဝံလၢလံာ်တၢ်အၢၣ်လီၤအီလီၤအလီၢ်လံၤ တဘ့ၣ်အပူၤဒီးကလူးတဖၣ်ဒီးစီၤမိၤၡ့အနီၢ်ကစၢ်ဒၣ်ဝဲန့ၣ် လီၤ. (၂) ကစၢ်ယွၤပာ်ဒီးဘိးဘၣ်သ့ၣ်ညါတ့ၢ်ယ့ၣ်ၡူးဒ် ပှၤလုၢ်တၢ်အခိၣ်လၢအမူဝဲလီၤထူလီၤယိာ်လၢအဒိၣ်န့ၢ်ထီ န့ၢ်ဒံးလံာ်တၢ်အၢၣ်လီၤအီလီၤအလီၢ်လံၤတကတြူၢ် အပှၤလုၢ်တၢ်အခိၣ်တဖၣ်တက့ၢ်န့ၣ်လီၤ. (၃) ခီဖျိယ့ၣ်ၡူးန့ၣ် ပှၤစူၢ်က့ၤနာ်က့ၤအီၤတဖၣ်ထူၣ်ဖျဲးထီၣ်လၢတၢ်ဒဲးဘး, တၢ်ပျံၤဒီးတၢ်သံလီၤ. ယ့ၣ်ၡူးဒ်အမ့ၢ်ပှၤလုၢ်တၢ်အခိၣ်အဒိၣ်ကတၢၢ်တဂၤအသိးန့ၣ်, ဟ့ၣ်ပှၤလၢတၢ်အုၣ်က့ၤခီၣ်က့ၤအမ့ၢ်အတီလီၤ. ပှၤဧ့ၤဘြံၤဖိအတၢ်ဘူၣ်တၢ်ဘါအလုၢ်အလၢ်ဒီးတၢ်လုၢ် တၢ်ပာ်ဆၣ်ဖိကီၢ်ဖိတဖၣ်မ့ၢ်တၢ်အုၣ်က့ၤခီၣ်က့ၤအမ့ၢ် အတီအံၤအကဒုလၢအပာ်ဖျါဆိပာ်အသးန့ၣ်လီၤ.
ဧ့ၤဘြံၤအဆၢဒိၣ် (၁၁) ပာ်ဖျါထီၣ်ပှၤအမံၤဟူသၣ်ဖျါလၢအံၣ်စရ့လးအတၢ်စံၣ်စိၤတဲ စိၤတဖၣ်အတၢ်စူၢ်တၢ်နာ်, ဒီးလၢကျဲဒ်အံၤပှၤကွဲးလံာ်သကွံၢ်ကညးပှၤဖးတၢ်ဖိတဖၣ်လၢ ကအိၣ်ဂၢၢ်ဆိးကျၢၤလၢတၢ်စူၢ်တၢ်နာ်အပူၤန့ၣ်လီၤ. အဆၢဒိၣ် (၁၂) မၢန့ၢ်ဆီၣ်ခံပှၤဖးတၢ်ဖိတဖၣ်လၢအကအိၣ်ဆိးလၢတၢ်စူၢ် တၢ်နာ်အပူၤတုၤလၢအကတၢၢ်ခီဖျိအကွၢ်စူၣ်ယ့ၣ်ၡူးဒီးတူၢ် တၢ်နးတၢ်ဖှီၣ်လၢအကဟဲသဂၢၢ်အဝဲသ့ၣ်တမံၤလၢ်လၢ်န့ၣ်လီၤ. လံာ်ပရၢအံၤဘၣ်တၢ်ကွဲးကတၢၢ်က့ၤအီၤလၢတၢ်ကတိၤ ဟ့ၣ်ကူၣ်ဒီးဟ့ၣ်ပလီၢ်တၢ်တဖၣ်လီၤ.
1
1 လၢပျၢၤန့ၣ်, ကစၢ်ယွၤကတိၤတ့ၢ်တၢ်ဒီးပမိၢ်ပၢ်ဖံဖုလၢပျၢၤ တဖၣ်ဘၣ်ထွဲတၢ်အါမံၤအါကလုာ်ဒီးအါဘျီခီဖျိဝံတဖၣ်လီၤ.
2 ဘၣ်ဆၣ်ဒီးလၢခံကတၢၢ်လၢပဆၢပကတီၢ်အံၤကစၢ်ယွၤ ကတိၤတၢ်ဒီးပှၤခီဖျိအဖိခွါလီၤ. အဝဲမ့ၢ်ပှၤလၢကစၢ်ယွၤဃုထၢတ့ၢ်လံလၢအကန့ၢ်သါဘၣ် တၢ်ခဲလၢာ်ဒီးခီဖျိအီၤန့ၣ်, ကစၢ်ယွၤတ့လီၤတ့ၢ်လံဟီၣ်ခိၣ်မူခိၣ်ဒီးတၢ်ခဲလၢာ်န့ၣ်လီၤ.
3 အဝဲလီၣ်ဖျါထီၣ်န့ၢ်ပှၤလၢကစၢ်ယွၤအလၤကပီၤဒီးစိာ်မူ ဝဲကစၢ်ယွၤအက့ၢ်အဂီၤအန့ဆၢၣ်လီၤတံၢ်လီၤဆဲးဒီးဟံး ဃာ်ပၢၤဃာ်ဟီၣ်ခိၣ်မူခိၣ်လၢအကလုၢ်အစိအကမီၤလီၤ. တုၤအမၤကဆှီထီၣ်ပှၤလၢပတၢ်ဒဲးဘးလၢအကစၢ် ဒၣ်ဝဲဝံၤဒီး, ဆ့ၣ်နီၤဝဲလၢတၢ်စိဒိၣ်ကမီၤထီကစၢ်ယွၤ အစုထွဲတခီလီၤ.
4 ဒ်အမံၤလၢကစၢ်ယွၤဟ့ၣ်အီၤအံၤဒိၣ်န့ၢ်ထီန့ၢ်ကလူး တဖၣ်အမံၤတက့ၢ်အသိးန့ၣ်, ဖိခွါအံၤဒိၣ်န့ၢ်ထီန့ၢ်ကလူး တဖၣ်တက့ၢ်လီၤ.
5 အဂ့ၢ်ဒ်အံၤ, ကစၢ်ယွၤတစံးဘၣ်အကလူးနီတဂၤလၢ
“နမ့ၢ်ယဖိခွါလီၤ.
တနံၤအံၤယထီၣ်ဖိလံနၤလံ.” န့ၣ်ဘၣ်.
မ့တမ့ၢ်,
ကစၢ်ယွၤစံးဘၣ်ကလူးတဂၤဂၤလၢ,
ယကကဲထီၣ်နပၢ်ဒီးနကမၤယဖိခွါလီၤ”
န့ၣ်ဧါ.
6 မ့မ့ၢ်ဖဲကစၢ်ယွၤကဆှၢလီၤအဖိဝဲၢ်ကိဆူဟီၣ်ခိၣ်န့ၣ် စံးဝဲ,
“မ်ကစၢ်ယွၤအကလူးခဲလၢာ်တီၤလီၤဘါအီၤတက့ၢ်.”
7 ဘၣ်ဃးဒီးကလူးတဖၣ်န့ၣ်ကစၢ်ယွၤစံးဝဲ,
“ကစၢ်ယွၤဒုးကဲထီၣ်အကလူးတဖၣ်လၢကလံၤ,
ဒီးအခ့အပှၤလၢမ့ၣ်အူလၣ်တဖၣ်လီၤ.”
8 ဘၣ်ဆၣ်ဒီးဖဲအဘၣ်ဃးဒီးဖိခွါန့ၣ်စံးဝဲ,
“ကစၢ်ယွၤဧၢ, နဘီနမုၢ်အိၣ်ဝဲအစိၤစိၤအဃၣ်ဃၣ်,
နပၢတၢ်ဒီးတၢ်တီတၢ်လိၤလီၤ.
9 နအဲၣ်တၢ်လၢအဘၣ်ဒီး
နသးဟ့တၢ်လၢအတဘၣ်ဘၣ်န့ၣ်လီၤ.
လၢတၢ်န့ၣ်အဃိကစၢ်ယွၤ, နကစၢ်ယွၤဃုထၢထီၣ်
ဒီးဖှူနၤလၢတၢ်သးခုအသိ
အါန့ၢ်ဒိၣ်န့ၢ်ဒံးနတံၤသကိးတဖၣ်တက့ၢ်လီၤ.”
10 အဝဲစံးစ့ၢ်ကီးဝဲ,
“ကစၢ်ဧၢ, လၢထံးလၢသီန့ၣ်နတ့လီၤဟီၣ်ခိၣ်
ဒီးလၢနစုဒၣ်နဲနဒုးအိၣ်ထီၣ်မူခိၣ်တဖၣ်န့ၣ်လီၤ.
11 အဝဲသ့ၣ်ကဟးဂီၤဒီးဟါမၢ်ကွံာ်လီၤ.
မ့မ့ၢ်နဲဒၣ်နကအိၣ်ကဆိးနဲလီၤ.
အဝဲသ့ၣ်ခဲလၢာ်ကယာ်ပြဲးကွံာ်ဒ်
တၢ်ကူတၢ်ကၤအသိးလီၤ.
12 ဒီးနကချံးထီၣ်အီၤဒ်တၢ်ကူတၢ်ကၤအသိးန့ၣ်လီၤ.
အဝဲသ့ၣ်ကဘၣ်တၢ်လဲလိာ်ကွံာ်အီၤဒ်
တၢ်ကူတၢ်ကၤအသိး
ဘၣ်ဆၣ်ဒီးနဲနကမ့ၢ်တၢ်ဒ်လီၢ်လီၢ်
ဒီးနနံၣ်နလါတဖၣ်အကတၢၢ်တအိၣ်ဘၣ်.”
13 ကစၢ်ယွၤတစံးဘၣ်အကလူးနီတဂၤနီတဘျီလၢ
“ဆ့ၣ်နီၤဖဲအံၤလၢယစုထွဲတခီ
တုၤယပာ်လီၤနဒုၣ်နဒါခဲလၢာ်
ဒ်နခီၣ်ယီၢ်အသိးလၢနခီၣ်အဖီလာ်” န့ၣ်ဘၣ်.
14 မ့မ့ၢ်ဒ်န့ၣ်ဒီးကလူးတဖၣ်မ့ၢ်တၢ်မနုၤလဲၣ်. အဝဲသ့ၣ်မ့ၢ်ဒၣ်သးတဖၣ်လၢအမၤကစၢ်ယွၤအတၢ် လၢယွၤဆှၢလီၤဒ်သိးအကမၤစၢၤပှၤဟီၣ်ခိၣ်ဖိတဖၣ်လၢ အကဒိးန့ၢ်ဘၣ်တၢ်အုၣ်က့ၤခီၣ်က့ၤအဂီၢ်န့ၣ်လီၤ.