3
1 တံၤသကိးသးဘိသ့ၣ်ဧၢ, အအံၤမ့ၢ်လံာ်ပရၢခံဘ့ၣ်တဘ့ၣ် လၢယကွဲးန့ၢ်သုလီၤ. လၢလံာ်ပရၢခံဘ့ၣ်လိာ်အပူၤန့ၣ်ယကျဲးစၢးထိၣ်ဂဲၤတ့ၢ်လံသုဒ်သိး
သုကဆိကမိၣ်တၢ်လၢအဂ့ၤအဘၣ်ခီဖျိယဒုးသ့ၣ်နီၣ်သုတၢ်သ့ၣ်
တဖၣ်အံၤန့ၣ်လီၤ.
2 ယသးအိၣ်လၢသုကသ့ၣ်နီၣ်ထီၣ်တၢ်ကတိၤတဖၣ်လၢဝံ စီဆှံတဖၣ်ကတိၤတ့ၢ်ဝဲလၢပျၢၤ, ဒီးကစၢ်ဒီးပှၤအုၣ်က့ၤခီၣ်က့ၤတၢ်အတၢ်မၤလိာ်လၢ
အဘၣ်တၢ်ဟ့ၣ်လီၤသုခီဖျိသုတၢ်မၢဖိတဖၣ်လီၤ.
3 အဆိကတၢၢ်န့ၣ်, သုကဘၣ်နၢ်ပၢၢ်လၢမုၢ်နံၤလၢခံကတၢၢ် တဖၣ်အပူၤပှၤကဟဲပၢၢ်ထီၣ်ဝဲတနီၤလၢအတၢ်အိၣ်မူတဖၣ်ဘၣ်
တၢ်ပၢအီၤလၢအတၢ်သူၣ်လီသးကွံဒၣ်ဝဲန့ၣ်လီၤ. အဝဲသ့ၣ်
ကကတိၤဒုၣ်ဒွဲၣ်သု,
4 ဒီးကသံကွၢ်သု, “အဝဲအၢၣ်လီၤလၢကဟဲဝဲတမ့ၢ်ဘၣ်ဧါ. အဝဲအိၣ်ဖဲလဲၣ်. ပပၢ်တဖၣ်သံတ့ၢ်လံ, ဘၣ်ဆၣ်တၢ်ခဲလၢာ်မ့ၢ်ဒံးဒၣ်ဒ်တၢ်တ့လီၤဟီၣ်ခိၣ်လၢ
အခီၣ်ထံးလံၤလံၤအသိးန့ၣ်လီၤ.”
5 အဝဲသ့ၣ်ပာ်သးပ့ၤနီၣ်စဲဃဲၤဒၣ်အသးလၢတၢ်မ့ၢ်တၢ်တီ တမံၤလၢအမ့ၢ်ဝဲလၢထံးလၢသီလံၤလံၤကစၢ်ယွၤခါလီၤ
အကလုၢ်ဒီးမူခိၣ်ဒီးဟီၣ်ခိၣ်ကဲထီၣ်ဝဲန့ၣ်လီၤ. ဟီၣ်ခိၣ်ဟဲကဲထီၣ်လၢထံကျါဒီးခီဖျိထံအံၤ,
6 ထံလၢအလုၣ်ဘၢဟီၣ်ခိၣ်အံၤန့ၣ်, ဟီၣ်ခိၣ်အလီၢ်လံၤဘၣ်တၢ်မၤဟးဂီၤကွံာ်အီၤလီၤ.
7 ဘၣ်ဆၣ်ဒီးဟီၣ်ခိၣ်ဒီးမူခိၣ်လၢအအိၣ်ခဲအံၤတဖၣ်ဘၣ် တၢ်ပာ်ကီၤအီၤလၢကစၢ်ယွၤအကလုၢ်တမံၤဃီ, ဒ်သိးတၢ်ကမၤဟးဂီၤအီၤလၢမ့ၣ်အူအဂီၢ်န့ၣ်လီၤ. တၢ်ပာ်ဃာ်ဒံးအီၤလၢမုၢ်စံၣ်ညီၣ်အနံၤအဂီၢ်, ဖဲပှၤ
တယူးတယီၣ်ယွၤတဖၣ်ကဘၣ်တၢ်စံၣ်ညီၣ်ဒီးမၤဟးဂီၤ
အီၤန့ၣ်လီၤ.
8 ယတံၤသကိးသးဘိသ့ၣ်ဧၢ, တဘၣ်သးပ့ၤနီၣ်တၢ်တမံၤ အံၤတဂ့ၤ. လၢကစၢ်အမဲာ်ညါန့ၣ်, မုၢ်တနံၤဒီးအနံၣ်
တကထိအဘၢၣ်စၢၤတၢ်လီၤဆီတအိၣ်ဘၣ်. လၢအဝဲအဂီၢ်တၢ်ခံမံၤအံၤမ့ၢ်ဒၣ်တၢ်ဒ်သိးသိးလီၤ.
9 ကစၢ်တမၤယံာ်မၤနီၢ်အသးလၢတၢ်လၢအစံးပာ်တ့ၢ်ဝဲ, ဒ်ပှၤတနီၤဆိကမိၣ်ဝဲအသိးန့ၣ်ဘၣ်. မ့မ့ၢ်တခီ, အဝဲဝံသးစူၤသုမ့ၢ်လၢအတသးအိၣ်လၢပှၤကတုၤ တၢ်ဟးဂီၤနီတဂၤဘၣ်, ဒီးသးအိၣ်ဝဲပှၤခဲလၢာ်ကဃၣ်ကွံာ်အသးလၢ
အတၢ်ဒဲးဘးတဖၣ်အဃိန့ၣ်လီၤ.
10 ဘၣ်ဆၣ်ဒီးကစၢ်အမုၢ်တနံၤကဟဲဝဲဒ်တၢ်ဘျၣ်တဂၤအသိး လီၤ. ဒီးလၢမုၢ်နံၤအဝဲန့ၣ်မူခိၣ်ကလီၤမၢ်ကွံာ်လၢတၢ်သီၣ်
ဖးဒိၣ်, တၢ်အမိၢ်ပှၢ်လၢမူခိၣ်တဖၣ်ကကဲၤထီၣ်ဒီးဟးဂီၤ
ကွံာ်, ဒီးဟီၣ်ခိၣ်ဒီးတၢ်အိၣ်လၢအပူၤခဲလၢာ်မ့ၣ်အူကအီၣ်
ကွံာ်အီၤန့ၣ်လီၤ.
11 မ့ၢ်လၢတၢ်သ့ၣ်တဖၣ်အံၤခဲလၢာ်ကဘၣ်တၢ်မၤဟးဂီၤကွံာ် အီၤလၢကျဲဒ်အံၤအဃိ, သုကြၢးမ့ၢ်ပှၤဒ်လဲၣ်,
သုတၢ်အိၣ်မူတဖၣ်ကြၢးစီဆှံဝဲဒီးကြၢးဘၣ်တၢ်ပာ်စီဆှံ
အီၤလၢကစၢ်ယွၤအဂီၢ်,
12 ဖဲသုအိၣ်ခိးကစၢ်ယွၤအမုၢ်နံၤအဖၢမုၢ်, ဒီးမၤတၢ်အဂ့ၤကတၢၢ်ဒ်သိးမုၢ်နံၤအံၤကတုၤချ့ချ့အဂီၢ်, မုၢ်တနံၤဖဲမူခိၣ်ကကဲၤထီၣ်ဒီးဟးဂီၤကွံာ်, ဒီးတၢ်အမိၢ်ပှၢ်လၢမူခိၣ်တဖၣ်ကပှံၢ်လီၤကွံာ်ဝဲလၢတၢ်ကိၢ် အဃိလီၤ.
13 ဘၣ်ဆၣ်ဒီး, ပအိၣ်ခိးကွၢ်လၢ်တၢ်လၢကစၢ်ယွၤစံးပာ်တ့ၢ်လံဝဲလၢ အမ့ၢ်မူခိၣ်အသီဒီးဟီၣ်ခိၣ်အသီဖဲတၢ်တီတၢ်လိၤကအိၣ်ဝဲ
ဆိးဝဲန့ၣ်လီၤ.
14 လၢတၢ်န့ၣ်အဃိယတံၤသကိးသ့ၣ်ဧၢ, ဖဲသုအိၣ်ခိးကွၢ်လၢ် မုၢ်နံၤအဝဲန့ၣ်န့ၣ်, ကျဲးစၢးအဂ့ၤကတၢၢ်ဒ်သိးလၢကစၢ်ယွၤ
အမဲာ်ညါန့ၣ်, သုကစီဆှံဒီးတၢ်ပာ်တၢ်ကမၣ်လၢသုလိၤအလီၢ်
တအိၣ်ဘၣ်ဒီး, သုကအိၣ်ဃူအိၣ်ဖိးဒီးအီၤအဂီၢ်န့ၣ်တက့ၢ်.
15 ပာ်ပကစၢ်အတၢ်ဝံသးစူၤဒ်အမ့ၢ်တၢ်ခွဲးတၢ်ယာ်လၢအဟ့ၣ် သုလၢသုကတုၤလၢတၢ်အုၣ်က့ၤခီၣ်က့ၤအဂီၢ်, ဒ်ပဒီပုၢ်ဝဲၢ်သးဘိစီၤပီလူးကွဲးန့ၢ်သုအိၣ်ဒီးတၢ်သူတၢ်
ကူၣ်သ့ကူၣ်ဘၣ်လၢကစၢ်ယွၤဟ့ၣ်အီၤအသိးန့ၣ်တက့ၢ်.
16 အဝဲကွဲးတၢ်ဒ်သိးအံၤထီဘိဖဲအကွဲးတၢ်ဘၣ်ဃးတၢ်ဂ့ၢ် အံၤန့ၣ်လီၤ. လၢအလံာ်ပရၢတဖၣ်အပူၤတၢ်အိၣ်ဝဲတနီၤလၢ
ပနၢ်ပၢၢ်အီၤကီဒီးပှၤလၢအတသ့လံာ်ဒီးအသးတဂၢၢ်တကျၢၤ
တဖၣ်ထုးထီၣ်ကမၣ်ဝဲအခီပညီဒ်အမၤဝဲလၢတၢ်ကွဲး
အသးစီဆှံအဂၤတဖၣ်အသိးလီၤ. သတးဒီး, အဝဲသ့ၣ်ဃုအတၢ်ဟးဂီၤဒၣ်ဝဲန့ၣ်လီၤ.
17 ဘၣ်ဆၣ်ဒီးသုဝဲလၢအမ့ၢ်ယတံၤသကိးတဖၣ်သ့ၣ်ညါ တ့ၢ်တၢ်အံၤလံ. လၢတၢ်န့ၣ်အဃိ, ပလီၢ်သုသးဒ်သိးသုသုတဘၣ်တၢ်ဆှၢကမၣ်သုလၢ
ပှၤလၢတၢ်သိၣ်တၢ်သီတအိၣ်ဘၣ်တဖၣ်အတၢ်ကမၣ်
တဂ့ၤ, ဒီးသုသုတလီၤတဲာ်ကွံာ်လၢသုတၢ်ဂၢၢ်တၢ်ကျၢၤဒၣ်
သုဝဲအပူၤတဂ့ၤ.
18 မ့မ့ၢ်ဒိၣ်ထီၣ်ဒံးသုဝဲလၢတၢ်ဘျုးတၢ်ဖှိၣ်ဒီးတၢ်သ့ၣ်ညါ ပကစၢ်ဒီးပှၤအုၣ်က့ၤခီၣ်က့ၤပှၤယ့ၣ်ၡူးခရံာ်အပူၤန့ၣ်
တက့ၢ်. မ်တၢ်လၤကပီၤဘၣ်လၢ်အီၤအခဲအံၤဒီးဆူညါ
အစိၤစိၤအဃၣ်ဃၣ်တက့ၢ်. အၤမ့ၣ်.