စီၤယိၤဟၣ်
အလံာ်ပရၢအခီၣ်ထံးတဘ့ၣ်
JOHN
စီၤယိၤဟၣ်အလံာ်ပရၢအခီၣ်ထံးတဘ့ၣ်အံၤအိၣ်ဒီးအတၢ် တိာ်မိၢ်ပှၢ်ခံမံၤန့ၣ်လီၤ. မ့ၢ်တၢ်ဟ့ၣ်ဆူၣ်ထီၣ်ပှၤဖးတၢ်ဖိတဖၣ်အဂံၢ်အဘါလၢ ကအိၣ်မူရ့လိာ်အသးဒီးကစၢ်ယွၤဒီးအဖိခွါယ့ၣ်ၡူးခရံာ်, ဒီးမ့ၢ်တၢ်ဒုးပလီၢ်အဝဲသ့ၣ်လၢအသုတပိာ်ထွဲတၢ်သိၣ်သီ ကမၣ်တဖၣ်အခံလၢအကမၤဟးဂီၤကွံာ်တၢ်ရ့လိာ်မုာ်လိာ်ဝဲ အံၤတဂ့ၤအဂီၢ်န့ၣ်လီၤ. တၢ်သိၣ်လိသီလိအဝဲအံၤ, သန့ၤထီၣ်အသးလၢတၢ်နာ်တမံၤလၢအစံးဝဲ, တၢ်အၢတၢ်သီဟဲအိၣ်ထီၣ်လၢတၢ်ဘၣ်ဒံးဘၣ်ဒွါဒီးဟီၣ်ခိၣ် သတးဒီး, ယ့ၣ်ၡူးလၢအမ့ၢ်ကစၢ်ယွၤအဖိခွါအံၤမ့ၢ်ပှၤဟီၣ်ခိၣ်ဖိ နီၢ်နီၢ်တဂၤတသ့လ့ၤတက့ၤဘၣ်န့ၣ်လီၤ. သရၣ်အဘျၣ် တဖၣ်အံၤစံးဝဲဒၣ်လၢ, ဒ်သိးပကန့ၢ်ဘၣ်တၢ်အုၣ်က့ၤခီၣ်က့ၤ ပှၤန့ၣ်, ပကဘၣ်ထူၣ်ဖျဲးထီၣ်ကွံာ်လၢတၢ်သးစၢၢ်ဆၢဒီး တၢ်အိၣ်မူလၢဟီၣ်ခိၣ်အံၤအပူၤန့ၣ်လီၤ. အဝဲသ့ၣ်သိၣ်လိစ့ၢ်ကီးဝဲလၢတၢ်အုၣ်က့ၤခီၣ်က့ၤန့ၣ်, တဘၣ်ဃးဒီးတၢ်အိၣ်မူအဂ့ၤဝါစီဆှံမ့ၢ်ဂ့ၤ, တၢ်အဲၣ်ပဒီပုၢ်ဝဲၢ်ကဒဲကဒဲမ့ၢ်ဂ့ၤန့ၣ်ဘၣ်.
လၢတၢ်ထီဒါတၢ်သိၣ်လိအံၤန့ၣ်, ပှၤကွဲးလံာ်ပာ်ဖျါဝဲဒၣ် ဆှံဆှံလၢယ့ၣ်ၡူးခရံာ်မ့ၢ်ပှၤကညီနီၢ်နီၢ်တဂၤန့ၣ်လီၤ. ဒီးအဝဲမၤဂၢၢ်ကျၢၤအါထီၣ်ဝဲလၢပှၤခဲလၢာ်လၢအစူၢ်က့ၤ နာ်က့ၤယ့ၣ်ၡူးဒီးအဲၣ်ကစၢ်ယွၤတဖၣ်န့ၣ်, ကဘၣ်အဲၣ်လိာ်ကွံလိာ်အသးတဂၤဒီးတဂၤစ့ၢ်ကီးန့ၣ်လီၤ.
1
1 ပကွဲးန့ၢ်သုတၢ်ဘၣ်ဃးဒီးတၢ်မူအကလုၢ်, လၢအအိၣ်ပာ်တ့ၢ်လံဝဲလၢတၢ်အခီၣ်ထံးလံၤလံၤ န့ၣ်လီၤ. ပနၢ်ဟူဘၣ်လံ, ဒီးပထံၣ်ဘၣ်လံအီၤလၢပမဲာ်ချံဒၣ်ပဝဲန့ၣ်လီၤ. ပကွၢ်ထံအီၤဒီးပဟံးဘၣ်ဖီၣ်ဘၣ်လံအီၤလၢပစု န့ၣ်လီၤ.
2 ဖဲတၢ်မူအံၤအိၣ်ဖျါထီၣ်ဝဲန့ၣ်, ပထံၣ်ဘၣ်အီၤသတးဒီးပကတိၤတၢ်လၢအဂ့ၢ် ဒီးစံးဘၣ်တဲဘၣ်သုဘၣ်ဃးတၢ်မူအထူအယိာ် လၢအအိၣ်ဒီးပၢ်, လၢအဘၣ်တၢ်ဒုးသ့ၣ်ညါပှၤအံၤန့ၣ်လီၤ.
3 တၢ်လၢပထံၣ်ဘၣ်ဒီးနၢ်ဟူဘၣ်တ့ၢ်လံန့ၣ်, ပစံးဘၣ်တဲဘၣ် စ့ၢ်ကီးသု, ဒ်သိးသုကရ့လိာ်မုာ်လိာ်သုသးဒီးပှၤန့ၣ်လီၤ. ပတၢ်ရ့လိာ်အံၤမ့ၢ်ပရ့လိာ်ပသးဒီးပၢ်, ဒီးအဖိခွါယ့ၣ်ၡူးခရံာ် န့ၣ်လီၤ.
4 ပကွဲးတၢ်အံၤမ့ၢ်ဒ်သိးပတၢ်သးခုကလၢထီၣ်ပှဲၤထီၣ်ဝဲ အဂီၢ်လီၤ.
5 တၢ်ကစီၣ်လၢပနၢ်ဟူဘၣ်တ့ၢ်လံလၢအဖိခွါအအိၣ်ဒီးစံးဘၣ် တဲဘၣ်တ့ၢ်လံသုမ့ၢ်အအံၤ, ကစၢ်ယွၤမ့ၢ်တၢ်ကပီၤ ဒီးတၢ်ခံးတၢ်နၤတအိၣ်လၢအပူၤလ့ၤတက့ၤဘၣ်.
6 ပမ့ၢ်စံးလၢပရ့လိာ်မုာ်လိာ်ပသးဒီးအီၤဒီးအိၣ်မူဒံးဒၣ်လၢတၢ်ခံးတၢ်နၤအပူၤန့ၣ်, မ့ၢ်ပလီတၢ်ဒီးပတမၤဘၣ်တၢ်မ့ၢ်တၢ်တီဘၣ်.
7 ဘၣ်ဆၣ်ပမ့ၢ်အိၣ်မူလၢတၢ်ကပီၤအပူၤ, ဒ်အဝဲဒၣ်အိၣ်လၢတၢ်ကပီၤအပူၤအသိးန့ၣ်ဒီး, မ့ၢ်ပရ့လိာ်မုာ်လိာ်ပသးတဂၤဒီးတဂၤဒီးကစၢ်ယွၤ အဖိခွါယ့ၣ်ၡူးခရံာ်အသွံၣ်သ့စီကွံာ်ပှၤလၢပတၢ် ဒဲးဘးခဲလၢာ်န့ၣ်လီၤ.
8 ပမ့ၢ်စံးလၢပတၢ်ဒဲးဘးတအိၣ်နီတမံၤဘၣ်ဒီး, မ့ၢ်ပလီလီၤပသးဒီးတၢ်မ့ၢ်တၢ်တီတအိၣ်လၢပပူၤဘၣ်.
9 ဘၣ်ဆၣ်ဒီး, ပမ့ၢ်တဲလီၤကျဲၤလီၤပတၢ်ဒဲးဘးတဖၣ်ဒီး, အဝဲဒၣ်ကတီဒီးအတၢ်အၢၣ်လီၤအီလီၤဒီးမၤတၢ်လၢအဘၣ် န့ၣ်လီၤ. အဝဲကပျၢ်ကွံာ်ပတၢ်ဒဲးဘးတဖၣ်ဒီး, မၤကဆှီထီၣ်ပှၤလၢပတၢ်ကမၣ်ခဲလၢာ်န့ၣ်လီၤ.
10 ပမ့ၢ်စံးလၢပတမၤဘၣ်တၢ်ဒဲးဘးန့ၣ်, ပဒုးကဲထီၣ်ကစၢ်ယွၤလၢ ပှၤလီတၢ်ဒီးအကလုၢ်ကထါတအိၣ်ဘၣ်လၢပပူၤဘၣ်.