လံာ်တၢ်ဂံၢ်
NUMBERS
လံာ်တၢ်ဂံၢ်တဲတၢ်ဘၣ်ဃးပှၤအံၣ်စရ့လးဖိအပူလၢအနံၣ်လွံၢ်ဆံ ဃၣ်ဃၣ်အတီၢ်ပူၤလၢ အစးထီၣ်ဖဲအဝဲသ့ၣ်ဟးထီၣ်လၢကစၢၢ်စံၤနါ ဒီးတုၤအတုၤလၢကီၢ်လၢကစၢ်ယွၤအၢၣ်လီၤလၢကဟ့ၣ်အဝဲ သ့ၣ်လၢအအိၣ်ဝဲဒၣ်လၢမုၢ်ထီၣ်ကီၢ်ဆၢန့ၣ်လီၤ. လံာ်အံၤအမံၤဒုးနဲၣ်ပှၤပူတယုၢ်အံၤအက့ၢ်အဂီၤလၢအအိၣ်ဖျါဝဲ ဂ့ၤဂ့ၤန့ၣ်လီၤ. ဒ်ပစံးတၢ်အသိး, မ့ၢ်ဝဲတၢ်ထၢဖှိၣ်ကွဲးနီၣ်ပှၤအနီၣ်ဂံၢ်လၢ စီၤမိၤၡ့ ဟံးန့ၢ်အီၤဖဲပှၤအံၣ်စရ့လးဖိတဖၣ်အိၣ်ဝဲဖဲကစၢၢ်စံၤနါ တချုးအဟးထီၣ်ကွံာ်ဒံးဘၣ်အကတီၢ်, ဒီးမၤကဒီးတဘျီ ဖဲအဝဲသ့ၣ်အိၣ်လၢကီၢ်မိၤအးလၢထံကျိယၢ်ဒ့ၣ်အမုၢ်ထီၣ်တခီ ဖဲပှၤတစိၤဝံၤအလီၢ်ခံန့ၣ်လီၤ. ဖဲတၢ်ထၢဖှိၣ်ကွဲးနီၣ်အနီၣ်ဂံၢ်ခံဘျီအံၤအဘၢၣ်စၢၤန့ၣ်ပှၤ အံၣ်စရ့လးဖိ တဖၣ်လဲၤဆူကၤဒ့ၣ်ဘၤနံးလၢအအိၣ်ဝဲဒၣ်ဖဲကီၢ်ကနၤဧၣ်ကလံၤ ထံးကီၢ်ဆၢတခီန့ၣ်လီၤ. ဘၣ်ဆၣ်ဒီးဖဲအဝဲသ့ၣ်အိၣ်ဝဲဒၣ်ဖဲန့ၣ်အခါန့ၣ်တလဲၤနုာ်ဘၣ်ဝဲ ဒၣ်ဆူကီၢ်တၢ်စံးပာ်အပူၤဘၣ်. ဖဲအဝဲသ့ၣ်အိၣ်ဝဲဖဲတၢ်လီၢ်န့ၣ်အါနံၣ်အါလါဝံၤအလီၢ်ခံ ဒီး, အဝဲသ့ၣ်လဲၤဆူတၢ်လီၢ်အိၣ်လၢထံကျိယၢ်ဒ့ၣ်အမုၢ်ထီၣ်တခီန့ၣ် လီၤ. ဖဲန့ၣ်ပှၤဂီၢ်မုၢ်အိၣ်တ့ၢ်သူၣ်လီၤဆီလီၤအသးတနီၤဒီးတနီၤ ကတဲာ်ကတီၤအသးလၢကခီထံကျိဒီးနုာ်လီၤဆူကီၢ် ကနၤဧၣ်အပူၤန့ၣ်လီၤ.
လံာ်တၢ်ဂံၢ်အံၤမ့ၢ်တၢ်ကွဲးနီၣ်ဘၣ်ဃးဒီးပှၤတဖုလၢအညီနုၢ် သးဟးဂီၤဒီးပျံၤတၢ်ဖဲဘၣ်ကွၢ်ဆၢၣ်မဲာ်ဒီးတၢ်ကီတၢ်ခဲ, ဒီးပူထီၣ်ထီဒါကစၢ်ယွၤဒီးစီၤမိၤၡ့ပှၤလၢကစၢ်ယွၤပာ်ထီၣ် အီၤဒ်သိးကဆှၢအဝဲသ့ၣ်အဂီၢ်န့ၣ်လီၤ. မ့ၢ်ပူတယုၢ်လၢအပာ်ဖျါထီၣ်ကစၢ်ယွၤအတၢ်သူၣ်တီသးလိၤ, အတၢ်အံးထွဲကွၢ်ထွဲအပှၤဂီၢ်မုၢ်လၢတၢ်ပာ်သးစွံကတုၤဖဲလၢ အဝဲသ့ၣ်လီၤတူာ်လီၤကာ်ဒီးတဒိကနၣ်ဘၣ်တၢ်ဒၣ်လဲာ်အကတီၢ်န့ၣ် လီၤ. ဒ်န့ၣ်အသိးမ့ၢ်တၢ်ပာ်ဖျါထီၣ်ဝဲစီၤမိၤၡ့အတၢ်ပာ်သူၣ်ပာ်သး ဂၢၢ်ဂၢၢ်ကျၢၤကျၢၤဖဲအဝဲတဘျီဘျီအသးတစူၤလၢတၢ်ဘူၣ်ထီၣ်ဘါ ထီၣ်ကစၢ်ယွၤဒီးတၢ်အဲၣ်အပှၤဂီၢ်မုၢ်အခါဒၣ်လဲာ်န့ၣ်လီၤ.
1
1 ဖဲကီၢ်အံၣ်စရ့လးအပှၤဂီၢ်မုၢ်ဟးထီၣ်ကွံာ်လၢကီၢ်အဲၤကူပတူး အပူၤ, ပူၤကွံာ်ခံနံၣ်တနံၣ်, လါခံလါတလါထီၣ်အခီၣ်ထံးကတၢၢ်တသီ န့ၣ်ယွၤကတိၤတၢ်ဒီးစီၤမိၤၡ့လၢယွၤအိၣ်ဝဲဆိးဝဲ အဒဲစီဆှံပူၤလၢကစၢၢ်စံၤနါအပှၢ်မုၢ်ကနၢပူၤန့ၣ်လီၤ. ယွၤစံးဝဲဒၣ်,
2 “နၤဒီးစီၤအၤဟရိၣ်ကဘၣ်ထၢဖှိၣ်ဂံၢ်နီၣ်ကီၢ်အံၣ်စရ့လးအပှၤ ဂီၢ်မုၢ်အနီၣ်ဂံၢ်တခါဒ်ဒူၣ်ထၢတဖၣ်ဒီးဟံၣ်ဒူၣ်ဃီထၢတဖၣ်စုာ် စုာ်န့ၣ်လီၤ. ကွဲးနီၣ်ကယဲၢ်ပိာ်ခွါကိးဂၤအမံၤ,
3 လၢအသးအိၣ်အနံၣ်ခံဆံဒီးဆူအဖီခိၣ်လၢအကြၢးဒီးတၢ်ဒုးသုး အဂီၢ်တက့ၢ်.
4 ဃ့တၢ်မၤစၢၤလၢဒူၣ်တဒူၣ်အခိၣ်လၢဒူၣ်ကိးဒူၣ်ဒဲးအပူၤလၢကမၤ စၢၤနၤအဂီၢ်တက့ၢ်.”
5-16 ဒီးအအံၤမ့ၢ်ပိာ်ခွါတဖၣ်, ခိၣ်နၢ်တဖၣ်လၢပှၤအဒူၣ်တဖၣ်အပူၤ, လၢအဘၣ်တၢ်ဃုထၢအီၤလၢကမျၢၢ်ဒူၣ်ထၢအကျါလၢတၢ်မၤအံၤ အဂီၢ်လီၤ.
17 လၢပှၤတဆံခံဂၤအံၤအတၢ်မၤစၢၤန့ၣ်စီၤမိၤၡ့ဒီးစီၤအၤဟရိၣ်
18 ကိးဖှိၣ်ပှၤဂီၢ်မုၢ်ဒီတဖုညါဖဲလါခံလါတလါထီၣ်အဆိကတၢၢ် တသီအနံၤန့ၣ်ဒီးဆဲးလီၤကွဲးနီၣ်ပှၤဂီၢ်မုၢ်ခဲလၢာ်ဒ်အဒူၣ် ထၢဒၣ်ဝဲဒီးအဟံၣ်ဖိဃီဖိဒၣ်ဝဲန့ၣ်လီၤ. ကယဲၢ်ပှၤပိာ်ခွါအသးအိၣ် အနံၣ်ခံဆံဒီးဆူအဖီခိၣ်တဖၣ်အမံၤန့ၣ်ဘၣ်တၢ်ကွဲးနီၣ်အီၤ ဒီးဂံၢ်နီၣ်အီၤခဲလၢာ်,
19 ဒ်ယွၤမၤလိာ်တ့ၢ်ဝဲအသိးန့ၣ်လီၤ. လၢကစၢၢ်စံၤနါအပှၢ်မုၢ် ကနၢအပူၤန့ၣ်စီၤမိၤၡ့ဆဲးလီၤကွဲးနီၣ်ပှၤဂီၢ်မုၢ်အမံၤန့ၣ်လီၤ.
20-46 ပှၤပိာ်ခွါအသးအိၣ်အနံၣ်ခံဆံမ့တမ့ၢ်ခံဆံဆူအဖီခိၣ်လၢအ ကြၢးဝဲဘၣ်ဝဲလၢတၢ်ဒုးသုးအဂီၢ်န့ၣ်ဘၣ်တၢ်ဆဲးလီၤကွဲးနီၣ် အမံၤဒ်အဒူၣ်ထၢဒီးအဟံၣ်ဖိဃီဖိအမံၤအိၣ်ဝဲဒၣ်အသိး, စးထီၣ်လၢစီၤရူၤဘ့ၣ်အဒူၣ်လၢအမ့ၢ်စီၤယၤကိာ်အဖိခွါအဒိၣ် ကတၢၢ်အဒူၣ်န့ၣ်လီၤ. အနီၣ်ဂံၢ်ခဲလၢာ်မ့ၢ်ဒ်အဖီလာ်အသိးန့ၣ်လီၤ.
လၢရူၤဘ့ၣ်အဒူၣ်န့ၣ် ပှၤလွံၢ်ကလးဃုကထိယဲၢ်ကယၤဂၤ. လၢစူၤမ့းအိၣ်အဒူၣ်န့ၣ် ပှၤယဲၢ်ကလးခွံကထိသၢကယၤဂၤ. လၢကးအဒူၣ်န့ၣ်ပှၤလွံၢ်ကလးယဲၢ်ကထိဃုကယၤယဲၢ်ဆံဂၤ. လၢယူဒၤအဒူၣ်န့ၣ်ပှၤနွံကလးလွံၢ်ကထိဃုကယၤဂၤ. လၢယံးစၣ်ကၢ်အဒူၣ်န့ၣ်ပှၤယဲၢ်ကလးလွံၢ်ကထိလွံၢ်ကယၤဂၤ. လၢစဘူလိၣ်အဒူၣ်န့ၣ်ပှၤယဲၢ်ကလးနွံကထိလွံၢ်ကယၤဂၤ. လၢအ့ဖရဲၣ်အဒူၣ်န့ၣ်ပှၤလွံၢ်ကလးယဲၢ်ကယၤဂၤ. လၢမနၤၡ့ၤအဒူၣ်န့ၣ်ပှၤသၢကလးခံကထိခံကယၤဂၤ. လၢဘံၣ်ယၤမံၣ်အဒူၣ်န့ၣ်ပှၤသၢကလးယဲၢ်ကထိလွံၢ်ကယၤဂၤ. လၢဒၣ်အဒူၣ်န့ၣ်ပှၤဃုကလးခံကထိနွံကယၤဂၤ. လၢအၤၡ့ၢ်အဒူၣ်န့ၣ်ပှၤလွံၢ်ကလးတကထိယဲၢ်ကယၤဂၤ. လၢနၤသးလံအဒူၣ်န့ၣ်ပှၤယဲၢ်ကလးသၢကထိလွံၢ်ကယၤဂၤ. ပှၤခဲလၢာ်ပာ်ဖှိၣ်မ့ၢ်ဝဲ, ဃုကလီၢ်သၢကထိယဲၢ်ကယၤယဲၢ်ဆံဂၤ.
47 ပှၤလ့ၤဝံဖိတဖၣ်န့ၣ်တဘၣ်တၢ်ဆဲးလီၤကွဲးနီၣ်အမံၤဃုာ်ဒီးပှၤ ဒူၣ်အဂၤတဖၣ်ဘၣ်.
48 အဂ့ၢ်ဒ်အံၤ, ယွၤစံးဘၣ်တ့ၢ်စီၤမိၤၡ့,
49 “ဖဲနထၢဖှိၣ်ဒီးကွဲးနီၣ်ပှၤပိာ်ခွါတဖၣ်လၢအကြၢးဝဲဘၣ်ဝဲ ဒီးသုးဧိၤသံၣ်ဧိၤအတၢ်မၤအခါန့ၣ်, ဒၢနုာ်ဃုာ်လ့ၤဝံအဒူၣ်တဂ့ၤ.
50 အခိၣ်တလိာ်, ပာ်ပှၤလ့ၤဝံဖိတဖၣ်ဒ်ပှၤအံးထွဲကွၢ်ထွဲ ယအိၣ်ဝဲဆိးဝဲအဒဲစီဆှံဒီးကယဲၢ်အတၢ်ပီးတၢ်လီခဲလၢာ်အသိး တက့ၢ်. အဝဲသ့ၣ်ကဘၣ်စိာ်အီၤဃုာ်ဒီးအတၢ်ပီးတၢ်လီတဖၣ်, မၤတၢ်လၢအပူၤဒီးသူၣ်ထီၣ်အဒဲဝးတရံးအီၤန့ၣ်လီၤ.
51 ဖဲသုသုးသုသူၣ်ဒဲအလီၢ်တဘျီလၢ်လၢ်န့ၣ်, ပှၤလ့ၤဝံဖိတဖၣ်ကရူၢ်လီၤဒဲစီဆှံဒီးသူၣ်ထီၣ်ကဒီးအီၤဖဲ တၢ်သူၣ်ထီၣ်ဒဲအလီၢ်အသီတတီၤကဒီးစုာ်စုာ်န့ၣ်လီၤ. ပှၤအဂၤတဂၤလၢ်လၢ်လၢအဟဲဘူးဒီးဒဲစီဆှံန့ၣ်ကဘၣ်တၢ်မၤသံ ကွံာ်အီၤန့ၣ်လီၤ.
52 ပှၤအံၣ်စရ့လးဖိအဂၤခဲလၢာ်ကသူၣ်ထီၣ်အဒဲတဖုဘၣ်တဖု, ပှၤတဂၤစုာ်စုာ်ဒီးအကရူၢ်ဒၣ်ဝဲလၢအနီၣ်တယၢ်ဒၣ်ဝဲအဖီလာ်န့ၣ် လီၤ.
53 မ့မ့ၢ်ပှၤလ့ၤဝံဖိတဖၣ်ကဘၣ်သူၣ်ဒဲဝးတရံးဒဲစီဆှံလၢကကဟု ကယာ်အီၤအဂီၢ်, ဒ်သိးပှၤသုတဟဲဘူးအီၤနီတဂၤဒီးထိၣ်ဂဲၤယတၢ်သးထီၣ်လၢ ယကကျီကွံာ်အံၣ်စရ့လးအဒူၣ်အထၢတဂ့ၤအဂီၢ်န့ၣ်လီၤ.”
54 မၤသးဒ်န့ၣ်ဒီးကီၢ်အံၣ်စရ့လးအပှၤဂီၢ်မုၢ်မၤကယဲၢ်တၢ်ကိးမံၤ ဒဲးလၢယွၤမၤလိာ်တ့ၢ်ဝဲစီၤမိၤၡ့န့ၣ်လီၤ.