3
1 တၢ်စံၣ်ညီၣ်ဃါမနၤကလီၤဘၣ်ဝ့ၢ်လၢအလီတၢ်,
မၤသံမၤဝီတၢ်ဒီးအိၣ်ပှဲၤဝဲဒီးတၢ်ထူးတၢ်တီၤလၢကဘၣ်တၢ် ဂုာ်ဆူၣ်ပျီဆူၣ်အီၤဒီး မၤဟးဂီၤကွံာ်အီၤအဂီၢ်န့ၣ်လီၤ.
2 ဒိကနၣ်နီၣ်ဖျ့အသီၣ်ကြဲးကြီး,
လ့ၣ်ဖံဘၣ်တဖၣ်အသီၣ်ရဲာ်ရိာ်,
ကသ့ၣ်တဖၣ်အစံၣ်ကူၤကူၤ
ဒီးလ့ၣ်ကဟၣ်ဒုးသုးတဖၣ်အတၢ်ဆဲးထူဆဲးပျၤအသီၣ်န့ၣ်တက့ၢ်.
3 သုးမုၢ်ဒီးကသ့ၣ်ကလူၤဃီၤဒုးတၢ်,
နးတဖၣ်ကပီၤကပြုၢ်ထီၣ်, ဘီတဖၣ်ကပီၤလ့ၢ်လ့ၢ်,
ဒီးတၢ်သံစိၣ်အိၣ်အါအါကလဲာ်
ဒီးပှၤအစိၣ်တဖၣ်နဂံၢ်အီၤတဘၣ်ဘၣ်.
ဒီးအဝဲသ့ၣ်အခီၣ်ဘၣ်တိၢ်လၢ တၢ်အစိၣ်တဖၣ်န့ၣ်လီၤ.
4 ဝ့ၢ်နံၤနဝ့လၢအမ့ၢ်ဃဲသဲမုၣ်အံၤဘၣ်တၢ်စံၣ်ညီၣ်အီၤလံ.
အဝဲဒၣ်အိၣ်ဒီးတၢ်ဃံတၢ်လၤဒီးပှဲၤလၢ တၢ်ရဲၢ်သံတဖၣ်လီၤ.
အဝဲရဲၢ်သံန့ၢ်တ့ၢ်ပှၤကလုာ်တဖၣ်ဒီး မၢကဲကုၢ်တ့ၢ်အီၤန့ၣ်လီၤ.
5 ယွၤသ့တၢ်လၢာ်စံးဝဲဒၣ်,
“ဝ့ၢ်နံၤနဝ့ဧၢ, ယကစံၣ်ညီၣ်နၤလီၤ.
ယကမၤအိၣ်ဘ့ၣ်ဆ့နၤ
ဒီးပျဲပှၤကလုာ်တဖၣ်ကွၢ်နၤ
ဒီးထံၣ်နၤလၢနတၢ်မဲာ်ဆှးခဲလၢာ်အပူၤန့ၣ်လီၤ.
6 ယကပာ်နၤဒ်တၢ်လီၤသးဘၣ်အၢအသိး
ဒီးကးဘၢနၤလၢတၢ်ဘၣ်အၢဘၣ်သီလီၤ.
ပှၤဂီၢ်မုၢ်ကကွၢ်စူၣ်နၤလၢတၢ်ပျံၤတၢ်ဖုးအပူၤလီၤ.
7 ဒီးကယဲၢ်ပှၤလၢအထံၣ်နၤကသံးက့ၤအသး ဆူအလီၢ်ခံန့ၣ်လီၤ.
အဝဲသ့ၣ်ကစံးဝဲဒၣ်လၢ, ဝ့ၢ်နံၤနဝ့ဒါလီၤအသးလၢတၢ်ဟးဂီၤအပူၤလံ.
မ့ၢ်မတၤအိၣ်ဒံးဒီးတၢ်သးကညီၤလၢအဂီၢ်တဂၤလဲၣ်.
မ့ၢ်မတၤကသးအိၣ်မၤမုာ်အီၤတဂၤလဲၣ်.”
8 ဝ့ၢ်နံၤနဝ့ဧၢ, မ့ၢ်နဂ့ၤန့ၢ်ပှၤအဲၤကူပတဲးဖိအဝ့ၢ်ခိၣ်ဝ့ၢ်သံဘံးတက့ၢ်ဧါ. အဝဲစ့ၢ်ကီးအိၣ်ဒီးထံကျိတဘိလၢကဒီဒၣ်အီၤဒ်ဝ့ၢ်ခိၣ်ဒူတခါအသိး, ထံကျိနံၤလါမ့ၢ်အတိာ်အတာ်န့ၣ်လီၤ.
9 ကီၢ်ကူၤၡးဒီးကီၢ်အဲၤကူပတူးမ့ၢ်အဂံၢ်အဘါဒီး အတၢ်စိတၢ်ကမီၤန့ၣ်အကတၢၢ်ကတာ်တအိၣ်ဘၣ်. ပှၤပူၤတၤဖိဒီးပှၤလံးဘယၣ်ဖိမ့ၢ်အသိၣ်အမှံၤတဖၣ်လီၤ.
10 ဘၣ်ဆၣ်ဒီးပှၤဝ့ၢ်သံဘံးဖိတဖၣ်ဘၣ်တၢ်စိာ် ကွံာ်အီၤဆူတၢ်မၢကဲကုၢ်အလီၢ်န့ၣ်လီၤ. ဒီးလၢကျဲကိးဘိဒဲး အသနၢၣ်န့ၣ်အဖိသ့ၣ်တဖၣ်ဘၣ်တၢ်တီၢ်သံကွံာ်အီၤန့ၣ်လီၤ. အပှၤကဲခိၣ်ကဲနၢ်သ့ၣ်တဖၣ်ဘၣ်တၢ်စၢဃာ်ဒီးမိၤထီၣ်ကွံာ်အီၤလၢ ထးသွဲတဖၣ်, ဒီးဘၣ်တၢ်နီၤဖးလီၤအီၤဆူပှၤဖီၣ်န့ၢ်အီၤတဖၣ်အကျါလီၤ.
11 ဝ့ၢ်နံၤနဝ့ဧၢ, နဲဒၣ်စ့ၢ်ကီးနကလီၤဆူတၢ်မူၤသံမူၤဟါမၢ်တမံၤအပူၤလီၤ. နဲဒၣ်စ့ၢ်ကီးနကကျဲးစၢးဃ့ၢ်ပူၤဖျဲးလၢနဒုၣ်နဒါတဖၣ်အအိၣ်လီၤ.
12 ကယဲၢ်နတိာ်နတာ်ခဲလၢာ်ကလီၤဂာ်ဒီးချၢၣ်ဒၢအထူၣ်တဖၣ်လၢ အအိၣ်ဒီးချၢၣ်ဒၢသၣ်တဖၣ်လၢအမံဃ့ၣ်လီၤ. တြုၤသ့ၣ်အထူၣ်တဖၣ်န့ၣ်ဒီးအသၣ်ကလီၤတဲာ်လိၤလိၤဆူ နကိာ်ပူၤလီၤ.
13 နပှၤသုးမုၢ်သံၣ်ဘိလီၤဂာ်ဒ်ပိာ်မုၣ်ပိာ်မၢၤအသိး, ဒီးနထံနကီၢ်ကဆၢထၢၣ်လၢနဒုၣ်နဒါတဖၣ်အမဲာ်ညါတအိၣ်ဘၣ်ဒီးတၢ် ဒီသဒၢအီၤဘၣ်လီၤ. မ့ၣ်အူကမၤဟးဂီၤကွံာ်နတြဲၤတဖၣ်အနီၣ်ဘိ တဖၣ်န့ၣ်လီၤ.
14 ဒၢၣ်ဃာ်ထံဒီးအိၣ်ကတဲာ်ကတီၤနသးလၢဒုၣ်ဒါအတၢ်ကဝီၤ တံၢ်ဃာ်နၤအဂီၢ်, ဒီးမၤခၢၣ်သနၢၣ်နတိာ်နတာ်တက့ၢ်. ယီၢ်ကပံာ်လၢတၢ်မၤဒၢးခီတဖၣ်အဂီၢ်ဒီးကတဲာ်ကတီၤထီၣ် တၢ်သိဒၢးခီတဖၣ်တက့ၢ်.
15 နမၤဒ်လဲၣ်ဂ့ၤဒ်လဲၣ်ဂ့ၤန့ၣ်, မ့ၣ်အူကအီၣ်သံကွံာ်နၤမ့တမ့ၢ်တၢ်ကမၤသံနၤလၢတၢ်ဒုးအပူၤ န့ၣ်လီၤ. နကဘၣ်တၢ်တြုာ်ပျီကွံာ်နၤဒ်ဒွဲၣ်ဧိၤတြၤဧိၤအီၣ်ကွံာ် တၢ်မုၢ်တၢ်ဘိတဖၣ်အသိးလီၤ. နဂံၢ်အါထီၣ်တ့ၢ်နသးဒ်ဒွဲၣ် ဧိၤတြၤဧိၤအသိးလီၤ.
16 နဒုးအါထီၣ်တ့ၢ်ပှၤကၤတၢ်ဖိအါန့ၢ်ဒံးဆၣ် ဧိၤဖီဧိၤအိၣ်လၢမူခိၣ်တက့ၢ်လီၤ. ဘၣ်ဆၣ်ဒီးခဲကနံၣ်အံၤ, အဝဲသ့ၣ်ဟါမၢ်ကွံာ်ဝဲဒ်ဒွဲၣ်ဧိၤတြၤဧိၤသလၣ်ထီၣ်အဒံးတဖၣ်ဒီး ယူၤထီၣ်ကွံာ်အသိးန့ၣ်လီၤ.
17 နပှၤပၢၤတၢ်တဖၣ်န့ၣ်လီၤဂာ်ဒ်ဒွဲၣ် ဧိၤတြၤဧိၤတဖုတဂီၢ်အသိးလၢအအိၣ်လၢဝ့ၢ်ခိၣ်ဒူတဖၣ် အဖီခိၣ်ဖဲတၢ်ဂိၢ်အမုၢ်တနံၤန့ၣ်လီၤ. မ့မ့ၢ်တုၤမုၢ်ဟဲထီၣ်ဒီးအဝဲသ့ၣ်ယူၤထီၣ်ကွံာ်ဝဲ, ဒီးမ့ၢ်အလဲၤဆူလဲၣ်န့ၣ်, ပှၤတသ့ၣ်ညါဘၣ်နီတဂၤဘၣ်.
18 ကီၢ်အၤၡူၢ်အစီၤပၤဧၢ, နပဒိၣ်ဖးဒိၣ်တဖၣ်သံလံ, ဒီးနပှၤတူၢ်ဒိၣ်ကီၤဒိၣ်တဖၣ်မံမုာ်ဝဲလီၤထူလီၤယိာ်လံ. နပှၤဂီၢ်မုၢ်တဖၣ်လီၤပြံလီၤပြါလၢကစၢၢ်ခိၣ်ကလိ ကျါဒီးပှၤတအိၣ်ဘၣ်နီတဂၤလၢကကိးကဒါ က့ၤအဝဲသ့ၣ်ဆူဟံၣ်န့ၣ်ဘၣ်.
19 ကသံၣ်ဖီၣ်တအိၣ်ဘၣ်နီတမံၤလၢနတၢ်ဘၣ်ဒိဘၣ်ထံးတဖၣ် အဂီၢ်ဘၣ်. ဒီးနပူၤလီၢ်ပူၤကျဲတဖၣ်ဘျါက့ၤတသ့ဘၣ်. ကယဲၢ်ပှၤလၢအနၢ်ဟူနတၢ်ဟးဂီၤအကစီၣ်တဖၣ် န့ၣ်ဒဲအစုလၢတၢ်သူၣ်ဖှံသးညီအပူၤန့ၣ်လီၤ. အဂ့ၢ်ဒ်အံၤ, ပှၤကပူၤဖျဲးလၢနတၢ်မၤအၢမၤသီအကတၢၢ်တအိၣ်ဘၣ်န့ၣ်တ အိၣ်ဘၣ်တ့ၢ်နီတဂၤဘၣ်.