လံာ်ဃဘးကူာ်
HABAKKUK
ဝံဃဘးကူာ်အတၢ်ကတိၤတဖၣ်ဟဲဝဲဖဲပှၤဘၤဘူၤ လိၣ်ဖိဒိၣ်စိဒိၣ်ကမီၤအကတီၢ်လၢချ.ခ.န. နံၣ်ကယၤ နွံဘျီတဘျီဘူးအကတၢၢ်န့ၣ်လီၤ. အဝဲအသးဘၣ်တံာ်တာ်ဒိၣ်မးလၢပှၤအၢပှၤသီ တဖၣ်အံၤအတၢ်အၢအတၢ်သီအဃိဒီးသံကွၢ်တ့ၢ်ယွၤ, “မ်ဒ်န့ၣ်ဒီး, ဘၣ်မနုၤအဃိနအိၣ်ဘှီၣ်နဲဖဲအဝဲသ့ၣ် မၤဟးဂီၤပှၤဂီၢ်မုၢ်လၢအကတီန့ၢ်လိၤန့ၢ်ဒံးအဝဲသ့ၣ်န့ၣ်လဲၣ်” (၁:၁၃). ယွၤအတၢ်စံးဆၢမ့ၢ်တ့ၢ်ဝဲလၢအကမၤတၢ်လၢအ ဆၢဂ့ၤကတီၢ်ဘၣ်ဝဲ, ဒီးလၢဆၢကတီၢ်အပူၤအတ့ၤန့ၣ်, “ပှၤတီပှၤလိၤတဖၣ်ကမူဝဲလီၤ. အဂ့ၢ်ဒ်အံၤ, အသူၣ်တီအသးလိၤဒီးကစၢ်ယွၤလီၤ.” (၂:၄).
တၢ်ဂ့ၢ်လၢအအိၣ်လီၤတဲာ်လၢလံာ်ပူၤမ့ၢ်ဝံအတၢ်ကတိၤ တထံၣ်ဘၣ်ဃးဒီးတၢ်စံၣ်ညီၣ်ဃါမနၤလၢပှၤတတီတလိၤဘၣ် အဖီခိၣ်, အိၣ်ဒီးတၢ်ကတိၤလၢခံကတၢၢ်ဒ်ထါစံးထီၣ်ပတြၢၤ တယုၢ်လၢအမၤလၤကပီၤကစၢ်ယွၤအတၢ်ဒိၣ်တၢ်မုၢ်, ဒီးတၢ်ပာ်ဖျါထီၣ်ပှၤကွဲးထါအတၢ်စူၢ်တၢ်နာ်လၢအသံတ သ့ဘၣ်န့ၣ်လီၤ.
1
1 အအံၤမ့ၢ်တၢ်ကစီၣ်လၢယွၤလီၣ်ဖျါတ့ၢ်ဆူဝံဃဘးကူာ်န့ၣ်လီၤ.
2 ယွၤဧၢ, တချုးလၢနဒိကနၣ်တၢ်, ဒီးတချုးလၢနမၤပူၤဖျဲးပှၤလၢတၢ်မၤအၢမၤသီဘၣ်န့ၣ်မ့ၢ် ယကဘၣ်ကိးထီၣ်နၤဆံးယံာ်ဒံးလဲၣ်.
3 ဘၣ်မနုၤနဒုးထံၣ်ယၤလၢတၢ်ကိၢ်တၢ်ဂီၤဒ်အံၤန့ၣ်လဲၣ်. တၢ်မၤကမၣ်တၢ်ဒ်သိးအံၤန့ၣ်နကွၢ်တမိာ်အီၤကဲမးဒ်လဲၣ်. တၢ်မၤဟးဂူာ်ဟးဂီၤဒီးတၢ်မၤအၢမၤသီအိၣ်ဝးတရံးယၤ, ဒီးတၢ်ဒုးလိာ်ယၤလိာ်သးဒီးတၢ်အ့ၣ်လိာ်ဆိးက့လိာ် အိၣ်လၢတၢ်လီၢ်ကိးပူၤဒဲးန့ၣ်လီၤ.
4 တၢ်သိၣ်တၢ်သီစၢ်လီၤဝဲဒီးတဂိာ်တသီၣ်လၢၤဘၣ်. ဒီးတၢ်စံၣ်ညီၣ်တီတမၤလၢၤအသးနီတစုဘၣ်. ပှၤတတီတလိၤ တဖၣ်မၤနၢၤပှၤတီပှၤလိၤတဖၣ်ဒီးတၢ်စံၣ်ညီၣ် တီဘၣ်တၢ်ဘိးကဒါကွံာ်အီၤလီၤ.
5 တုၤနုၤတစု, ယွၤစံးဘၣ်အပှၤဂီၢ်မုၢ်, “ခိးကွၢ်ပှၤကလုာ်တဖၣ်လၢအအိၣ်ဝးတရံးနၤဒီးနကကမၢက မၣ်လၢတၢ်လၢနထံၣ်ဘၣ်န့ၣ်လီၤ. ယကမၤတၢ်တမံၤလၢနတနာ်ဘၣ်အီၤဖဲနနၢ်ဟူလၢအဂ့ၢ်န့ၣ်လီၤ.
6 ပှၤဘၤဘူၤလိၣ်ဖိ, ပှၤလၢအလီၤပျံၤလီၤဖုး, ပှၤလၢအမၤတၢ်ဆူၣ်ဆူၣ်ချ့ချ့တဖၣ်န့ၣ်ယဒုးဆူၣ်ထီၣ်အီၤလၢတၢ် စိတၢ်ကမီၤန့ၣ်လီၤ. အဝဲသ့ၣ်လဲၤထီၣ်ကြူးကြူးသကုၤဟီၣ်ခိၣ်ဒီ ဘ့ၣ်ဒ်သိးကမၤနၢၤကွံာ်ထံဂုၤကီၢ်ဂၤတဖၣ်လီၤ.
7 အဝဲသ့ၣ်ရၤလီၤတၢ်ပျံၤတၢ်ဖုးဒီးတၢ်မၤပျံၤမၤဖုး ဒီးလၢတၢ်ပာ်ထီၣ်ထီသးအပူၤန့ၣ်အဝဲသ့ၣ်မၤဒ် အသးဒၣ်ဝဲအသိးန့ၣ်လီၤ.
8 အကသ့ၣ်တဖၣ်ချ့န့ၢ်ဒံးခ့စံၣ်ပိၣ်တဖၣ်ဒီး လီၤပျံၤဒိၣ်န့ၢ်ဒံးထွံၣ်မံၤတဖၣ်လၢအသၣ်ဝံၤန့ၣ်လီၤ. အပှၤဒိးကသ့ၣ်တဖၣ်ဟဲဒိးကသ့ၣ်လၢကီၢ်အယံၤတဖၣ်, ဒီးအကသ့ၣ်တဖၣ်လဲၤသဖှိတၢ်လၢတၢ်ပာ်ကဖိအသးပူၤလီၤ. အဝဲသ့ၣ်လဲၤသဖှိဃီၤဒ်လံာ်ကြီကြာ်တဖၣ်ယူၤလီၤချ့ သဒံးဒီးစှီၤန့ၢ်အဆၣ်အီၣ်အသိးန့ၣ်လီၤ.
9 အသုးမုၢ်သံၣ်ဘိတဖၣ်ထီၣ်ဆူညါရုၢ်ရုၢ်ဒီးမၤနၢၤ တၢ်လၢတၢ်စုဆူၣ်ခီၣ်တကးအပူၤဒီးတုၤအဝဲသ့ၣ်ဟဲဘူးထီၣ် န့ၣ်ပှၤကိးဂၤဒဲးပျံၤတၢ်လီၤ. ပှၤလၢဖီၣ်န့ၢ်ဝဲတဖၣ်န့ၣ်အါဒ်မဲး ဧိၤဟီၣ်ဧိၤအသိးန့ၣ်လီၤ.
10 မၤတရီတပါစီၤလိၣ်စီၤပၤတဖၣ်ဒီးနံၤဘၣ်ဖၣ်လဲပှၤခိၣ်ပှၤနၢ် အဒိၣ်အထီတဖၣ်လီၤ. တိာ်ဧိၤတာ်ဧိၤတြီအီၤတန့ၢ်ဘၣ်. အဂ့ၢ်ဒ်အံၤ, ဖှိၣ်ထီၣ်ထီဟီၣ်ခိၣ်, ထီဒါတိာ်ဧိၤတာ်ဧိၤဒီးမၤန့ၢ်အီၤလီၤ.
11 တုၤနုၤတစု, ပှၤလၢအပာ်ထီၣ်အတၢ်စိတၢ် ကမီၤဒ်အကစၢ်အသိးတဖၣ်န့ၣ်လဲၤခီဂာ်တၢ်ဒ်ကလံၤ အသိးဒီးဟါမၢ်ကွံာ်ဝဲလီၤ.”
12 ယွၤဧၢ, လၢထံးလၢမကိာ်လံၤလံၤန့ၣ်နမ့ၢ်ကစၢ်ယွၤလီၤ. နမ့ၢ်ကစၢ်ယွၤ, တၢ်စီတၢ်ဆှံဒီးတၢ်လီၤထူလီၤယိာ်လီၤ. ယွၤ, ယကစၢ်ယွၤဒီးပှၤလၢအကဟုဘံၣ်ကယာ်ဘၢယၤဧၢ, နဃုထၢတ့ၢ်ပှၤဘၤဘူၤလိၣ်ဖိတဖၣ်ဒီးဒုးမၤထီၣ်အ ဂံၢ်အဘါဒ်သိးစံၣ်ညီၣ်ပှၤကသ့အဂီၢ်လီၤ.
13 ဘၣ်ဆၣ်ဒီးပှၤလီတၢ်ဝ့ၤတၢ်, ပှၤအၢပှၤသီတဖၣ်အံၤ, နဝံသးစူၤအီၤကဲဒ်လဲၣ်. နမဲာ်ချံတဖၣ်စီဆှံဒိၣ်မးလၢ နကကွၢ်ဃီၤတၢ်အၢတၢ်သီ,ဒီးနကွၢ်ပှၤဂီၢ်မုၢ်လၢ အမၤကမၣ်တၢ်န့ၣ်တကဲဘၣ်. မၤသးဒ်န့ၣ်ဒီးဘၣ်မနုၤလၢ နအိၣ်ဘှီၣ်ကလာ်ဖဲအဝဲသ့ၣ်မၤဟးဂီၤပှၤဂီၢ်မုၢ်လၢ အတီန့ၢ်လိၤန့ၢ်ဒံးအဝဲသ့ၣ်တဖၣ်အခါန့ၣ်လဲၣ်.
14 နမၤပှၤဂီၢ်မုၢ်ဒ်ညၣ်မ့တမ့ၢ်ဒ်တၢ်ဖိဃၢ်အဖုအဂီၢ် လၢပှၤပၢအီၤဆှၢအီၤတအိၣ်ဘၣ်နီတဂၤအသိးန့ၣ်ကသ့ဒ်လဲၣ်.
15 ပှၤဘၤဘူၤလိၣ်ဖိတဖၣ်ဖီၣ်န့ၢ်ပှၤဂီၢ်မုၢ်လၢ တခွဲတဖၣ်ဒ်အဝဲသ့ၣ်မ့ၢ်ညၣ်တဖၣ်အသိးန့ၣ်လီၤ. ထုးထီၣ်အီၤလၢပှာ်တဖၣ်အပူၤဒီးကိးထီၣ်လၢတၢ်သးခုလၢအဖီၣ် န့ၢ်တၢ်အဃိန့ၣ်လီၤ.
16 အဝဲသ့ၣ်ဘူၣ်ထီၣ်ဘါထီၣ်ဒၣ်အပှာ်ဧိၤစၤဧိၤတဖၣ်, ဒီးလုၢ်ထီၣ်တၢ်လုၢ်တၢ်ပာ်တဖၣ်ဆူအအိၣ်လီၤ. အဂ့ၢ်ဒ်အံၤ, အပှာ်ဧိၤစၤဧိၤတဖၣ်လုၢ်အီၣ်အဝဲသ့ၣ်ဒီးတၢ် အဂ့ၤကတၢၢ်လၢတၢ်ကိးမံၤဒဲးအကျါန့ၣ်လီၤ.
17 မ့ၢ်အဝဲသ့ၣ်အကသူအနးတဖၣ်တထံၣ်ဃီဒီး မၤဟးဂီၤပှၤကလုာ်တဖၣ်လၢတၢ်သူၣ်ကညီၤသးကညီၤတအိၣ် အပူၤန့ၣ်တဘိယူာ်ဃီဧါ.