8
1 ဒီးတုၤလီၤလၢလါနွံလါတလါန့ၣ်ကီၢ်အံၣ်စရ့လးအပှၤဂီၢ်မုၢ် တဖၣ်ခဲလၢာ်သူၣ်လီၤဆီလီၤအတၢ်အိၣ်တၢ်ဆိးအလီၢ်လၢအဝ့ၢ်ဒၣ်ဝဲ တဖၣ်အပူၤန့ၣ်လီၤ. ဒီးလၢလါန့ၣ်ထီၣ်တသီအနံၤန့ၣ်အဝဲသ့ၣ်ခဲလၢာ်အိၣ်ဖှိၣ်ရိ ဖှိၣ်လၢဝ့ၢ်ယရူၤၡလ့ၣ်အပူၤ, ဖဲပဲတြီထံအမဲာ်ညါတၢ်လီၢ်လီၤ ပျီန့ၣ်လီၤ. ဒီးအဝဲသ့ၣ်တဲဘၣ်ပှၤလုၢ်တၢ်အခိၣ်ဒီးပှၤသ့ယူဒၤအတၢ်သိၣ်တၢ် သီလၢယွၤဟ့ၣ်လီၤပှၤအံၣ်စရ့လးဖိခီဖျိစီၤမိၤၡ့, လၢအမ့ၢ်စီၤဧ့စြၤဒ်သိးအကဟဲစိာ်ယူဒၤအတၢ်သိၣ်တၢ်သီ အလံာ်န့ၣ်လီၤ.
2 ဒီးလၢတၢ်န့ၣ်အဃိစီၤဧ့စြၤဟဲစိာ်ယူဒၤတၢ်သိၣ်တၢ်သီအလံာ် ဆူတၢ်လီၢ်ဖဲပှၤဂီၢ်မုၢ်လၢအမ့ၢ်, ပှၤပိာ်ခွါတဖၣ်, ပှၤပိာ်မုၣ်တဖၣ်ဒီးဖိသၣ်တဖၣ်လၢအနၢ်ပၢၢ်တၢ်သ့လံဝဲပာ်ဖှိၣ် အသးန့ၣ်လီၤ.
3 ဒီးလၢတၢ်လီၢ်ပဲတရီထံအမဲာ်ညါန့ၣ်စီၤဧ့စြၤဖးန့ၢ်အဝဲ သ့ၣ်လၢယူဒၤအလံာ်တၢ်သိၣ်တၢ်သီစးထီၣ်လၢမုၢ်ဂီၤပၢၢ်လၢမုၢ် ထူၣ်ဒီးအဝဲသ့ၣ်ကနၣ်ဝဲလၢတၢ်သးစၢၢ်ဆၢအပူၤန့ၣ်လီၤ.
4 စီၤဧ့စြၤဆၢထၢၣ်ဝဲလၢစိၤမိၤသ့ၣ်အလိၤ, လၢအဘၣ်တၢ်မၤအီၤလၢမူးလီၤဆီအဂီၢ်န့ၣ်လီၤ. ဒီးစီၤမၤတံးသယၤ, စီၤၡမၤ, စီၤဧနၤယၤ, စီၤအူၤရံယၤ, စီၤဃံးလကံယၤ, စီၤမၤစ့ယၤတဖၣ်ဆၢထၢၣ်လၢအစုထွဲ, ဒီးစီၤပဒါယၤ, စီၤမံၤၡအ့လး, စီၤမၤလကံယၤ, စီၤဃၤၡူာ်, စီၤဃၤၡဘးဒနၤ, စီၤစကၤရယၤဒီးစီၤမၡူလၣ်တဖၣ် ဆၢထၢၣ်လၢအစုစ့ၣ်န့ၣ်လီၤ.
5 ဖဲစီၤဧ့စြၤဆၢထၢၣ်လၢစိၤမိၤအဖီခိၣ်, အိၣ်ထီၣ်ထီဝဲလၢပှၤ ဂီၢ်မုၢ်အဖီခိၣ်န့ၣ်, အဝဲသ့ၣ်ခဲလၢာ်ကွၢ်ဃီၤအီၤထံထံန့ၣ် လီၤ. တုၤအဝဲအိးထီၣ်လံာ်န့ၣ်တဘျီဃီဒီး, ပှၤခဲလၢာ်ဂဲၤဆၢထၢၣ်ဝဲ ဒၣ်န့ၣ်လီၤ.
6 စီၤဧ့စြၤစံးဝဲဒၣ်, “စံးထီၣ်ပတြၢၤယွၤ, ကစၢ်ဖးဒိၣ်န့ၣ်တက့ၢ်.”
ဒီးကယဲၢ်ပှၤဂီၢ်မုၢ်ခဲလၢာ်ယူာ်ထီၣ်အစုဆူထးခီဒီးစံးဆၢဝဲ, “အၤမ့ၣ်, အၤမ့ၣ်” န့ၣ်လီၤ. ဒီးအဝဲသ့ၣ်ချံးခီၣ်တီၤလီၤလၢတၢ်ဘူၣ်ထီၣ်ဘါထီၣ်အပူၤအိၣ် ဒီးအမဲာ်သၣ်အိၣ်ကျးလီၤအသးလၢဟီၣ်ခိၣ်လိၤန့ၣ်လီၤ.
7 အန့ၣ်ဝံၤဒီးအဝဲသ့ၣ်ဆၢထၢၣ်လၢအလီၢ်တဖၣ်, ဒီးပှၤလ့ၤဝံဖိ လၢလာ်တဖၣ်အံၤတဲနၢ်ပၢၢ်အဝဲသ့ၣ်လၢယူဒၤအတၢ်သိၣ်တၢ်သီန့ၣ် လီၤ. စီၤယ့ၤၡူ, စီၤဘၤနံ, စီၤၡ့ရ့ဘယၤ, စီၤယၤမံၣ်, စီၤဧးကူာ်, စီၤၡံၤဘသဲၤ, စီၤဟိၤဒံယၤ, စီၤမၤစ့ယၤ, စီၤက့လံတၤ, စီၤဧစၤရယၤ, စီၤယိစဘး, စီၤဃၤနၣ်, စီၤပလါယၤသ့ၣ်တဖၣ်န့ၣ်လီၤ.
8 အဝဲသ့ၣ်ကတိၤကျိာ်ထံက့ၤကစၢ်ယွၤအတၢ်သိၣ်တၢ်သီလၢပှၤယူဒၤ ဖိအဂီၢ်ဒီးတဲနၢ်ပၢၢ်ဝဲဒ်သိးပှၤဂီၢ်မုၢ်ကနၢ်ပၢၢ်အီၤန့ၣ်လီၤ.
9 တုၤပှၤဂီၢ်မုၢ်နၢ်ဟူဘၣ်တၢ်လၢယူဒၤအတၢ်သိၣ်တၢ်သီဃ့ဝဲန့ၣ်, အဝဲသ့ၣ်အသးဘၣ်ဒိတုၤအစးထီၣ်ဟီၣ်ဝဲလီၤ. လၢတၢ်န့ၣ်အဃိ, ပဒိၣ်ဖးဒိၣ်စီၤနဃ့မယၤ, ပှၤလုၢ်တၢ်အခိၣ်ဒီးပှၤသ့ပှၤဘၣ်လၢယူဒၤအတၢ်သိၣ်တၢ်သီအဂ့ၢ် စီၤဧ့စြၤ, ဒီးပှၤလ့ၤဝံဖိတဖၣ်လၢအတဲနၢ်ပၢၢ်တ့ၢ်ယူဒၤအတၢ်သိၣ်တၢ်သီ န့ၣ်စံးဘၣ်ပှၤဂီၢ်မုၢ်ခဲလၢာ် “မုၢ်တနံၤအံၤမ့ၢ်မုၢ်နံၤစီဆှံလၢယွၤသုကစၢ်ယွၤအဂီၢ်အဃိသူၣ် အုးသးအုးတဂ့ၤဒီးဟီၣ်တဂ့ၤ.
10 ခဲကနံၣ်အံၤက့ၤဆူသုဟံၣ်ဒီးမၤတၢ်အီၣ်တၢ်အီတက့ၢ်. နီၤလိာ်သုကိၣ်ဒီးစပံးထံလၢပှၤလၢအတၢ်တလၢတလီၣ်အဂီၢ်န့ၣ်တ က့ၢ်. မုၢ်တနံၤအံၤမ့ၢ်မုၢ်နံၤစီဆှံလၢပယွၤအဂီၢ်အဃိသူၣ်အုးသးအုးတဂ့ၤ. တၢ်သူၣ်ခုသးခုလၢယွၤဟ့ၣ်သုန့ၣ်ကမၤဆူၣ်ထီၣ်သုဂံၢ် သုဘါလီၤ.”
11 ပှၤလ့ၤဝံဖိတဖၣ်မၤဘှ့ၣ်မၤဘှီၣ်က့ၤပှၤဂီၢ်မုၢ်ဒီးတဲဘၣ် အဝဲသ့ၣ်လၢအသုတသူၣ်အုးသးအုးလၢမုၢ်နံၤစီၤဆှံတနံၤအံၤ တဂ့ၤန့ၣ်လီၤ.
12 လၢတၢ်န့ၣ်အဃိ, ကယဲၢ်ပှၤဂီၢ်မုၢ်ခဲလၢာ်က့ၤဆူအဟံၣ်ဒၣ်ဝဲ, ဒီးအီၣ်တၢ်အီတၢ်လၢတၢ်သူၣ်ခုသးခုအပူၤဒီးနီၤလိာ်အသးဒီး တၢ်လၢအအိၣ်ဒီးအီၤန့ၣ်လီၤ. အဂ့ၢ်ဒ်အံၤ, အဝဲသ့ၣ်နၢ်ပၢၢ်တၢ်လၢအဘၣ်တၢ်ဖးဖျါန့ၢ်အီၤန့ၣ်လီၤ.
13 လၢခံတနံၤန့ၣ်ဒူၣ်ထၢအခိၣ်တဖၣ်ဃုာ်ဒီးပှၤလုၢ်တၢ်အခိၣ်တဖၣ် ဒီးပှၤလ့ၤဝံဖိသ့ၣ်တဖၣ်လဲၤဆူစီၤဧ့စြၤအအိၣ်လၢတၢ်ကမၤလိ ယူဒၤအတၢ်သိၣ်တၢ်သီအတၢ်သိၣ်လိသီလိတဖၣ်အဂီၢ်န့ၣ်လီၤ.
14 အဝဲသ့ၣ်ထံၣ်သ့ၣ်ညါဝဲလၢယူဒၤအတၢ်သိၣ်တၢ်သီလၢ ယွၤဟ့ၣ်လီၤခီဖျိစီၤမိၤၡ့န့ၣ်မၤလိာ်အံၣ်စရ့လးအပှၤဂီၢ်မုၢ်လၢ ကအိၣ်ဝဲဆိးဝဲလၢဒဲတစိၢ်တလီၢ်တဖၣ်အပူၤဖဲဘူၣ်ဒဲအဆၢ ကတီၢ်အပူၤအတ့ၤန့ၣ်လီၤ.
15 လၢတၢ်န့ၣ်အဃိအဝဲသ့ၣ်ဟ့ၣ်လီၤတၢ်သိၣ်လိနဲၣ်ယုၤလၢလာ်တဖၣ် အံၤဒီးဆှၢလီၤဝဲဆူဝ့ၢ်ယရူၤၡလ့ၣ်ဒီဝ့ၢ်ဒီးဆူဝ့ၢ်အဂုၤအဂၤတဖၣ်န့ၣ်လီၤ. “လဲၤဆူကစၢၢ်ကလိဒီးဟဲက့ၤစိာ်သ့ၣ်စၤယံး, သ့ၣ်စၤယံးအမံၤ, သ့ၣ်သမ့ၤဟးဒး, သ့ၣ်စူၣ်ပလိၣ်, ဒီးသ့ၣ်အဂၤအဒ့တဖၣ်လၢတၢ်ကမၤဒဲဒ်တၢ်သိၣ်လိ နဲၣ်ယုၤအိၣ်ကွဲးအသးလၢလံာ်ယူဒၤအတၢ်သိၣ်တၢ်သီ အပူၤအသိးတက့ၢ်.”
16 လၢတၢ်န့ၣ်အဃိပှၤဂီၢ်မုၢ်မၤန့ၢ်သ့ၣ်အဒ့တဖၣ်ဒီးမၤထီၣ်ဒဲ တဖၣ်လၢအဟံၣ်ခိၣ်တဖၣ်အခိၣ်ဒုးလိၤ, လၢအဂၢၤဒၣ်ဝဲအပူၤ, လၢတၢ်လုၢ်ဟံၣ်အဂၢၤပူၤဒီးလၢပဲတရီထံအဂၢၤဒီးအ့ဖရဲၣ်အပဲ တရီအဂၢၤပူၤတၢ်လီၢ်လီၤပျီန့ၣ်လီၤ.
17 ကယဲၢ်ပှၤဂီၢ်မုၢ်လၢအဟဲက့ၤလၢတၢ်စိာ်မၢကဲကုၢ်အလီၢ်တဖၣ်န့ၣ် ဘှီထီၣ်ဒဲတဖၣ်ဒီးအိၣ်ဝဲလၢအပူၤန့ၣ်လီၤ. တၢ်အံၤမ့ၢ်အဆိကတၢၢ်တဘျီလၢတၢ်မၤအီၤစးထီၣ်ဖဲ စီၤနိၣ်အဖိခွါစီၤယိၤၡူအမုၢ်နံၤတဖၣ်ဝံၤအလီၢ်ခံန့ၣ်လီၤ. ကယဲၢ်ပှၤခဲလၢာ်အသူၣ်ပိၢ်အသးဝးဒီးသူၣ်ဖှံသးညီဝဲဒၣ်န့ၣ်လီၤ.
18 စးထီၣ်လၢမူးအခီၣ်ထံးတနံၤတုၤလီၤလၢအကတၢၢ်တနံၤန့ၣ်, ကိးနံၤဒဲးအဝဲသ့ၣ်ဖးကစၢ်ယွၤအတၢ်သိၣ်တၢ်သီလၢပှၤယူဒၤဖိ အဂီၢ်တပတီၢ်ဘၣ်တပတီၢ်န့ၣ်လီၤ. အဝဲသ့ၣ်မၤမူးန့ၣ်နွံသီဒီးလၢဃိးသီတသီန့ၣ်မ့ၢ်ဝဲတၢ်မၤ ကတၢၢ်ကွံာ်မူးဒ်ယူဒၤအတၢ်သိၣ်တၢ်သီပာ်ဖျါဝဲအသိးန့ၣ်လီၤ.