5
1 ဒီးတစိၢ်ဖိဝံၤအလီၢ်ခံပှၤအါဂၤ, ပှၤပိာ်ခွါဒီးပှၤပိာ်မုၣ် တဖၣ်စးထီၣ်ပာ်ဒ့ၣ်ပာ်ကမၣ်ပှၤယူဒၤဖိကဒဲကဒဲန့ၣ်လီၤ.
2 ဒီးပှၤတနီၤစံးဝဲ, “ပဟံၣ်ဖိဃီဖိအါဝဲဒီးပလိၣ်ဘၣ်ဘု ဧိၤဟုဧိၤလၢပကမူဒံးအဂီၢ်န့ၣ်လီၤ.”
3 ဒီးပှၤအဂၤတဖၣ်စံးဝဲ, “ပဘၣ်ဟ့ၣ်ကီၤတ့ၢ်လံပစံာ်ဧိၤပှဲၤ ဧိၤ, စပံးလီၢ်တဖၣ်, ဒီးဟံၣ်ဃီတဖၣ်လၢပကဒိးန့ၢ်ဘၣ်ဘုဧိၤဟုဧိၤ လၢကလၢဝဲဒ်သိးပကပူၤဖျဲးဒီးတၢ်သၣ်ဝံၤလီၤဒိန့ၣ်လီၤ.”
4 ဒီးပှၤအဂၤစံးဒံးဝဲ, “လၢပကဟ့ၣ်စီၤပၤအတၢ်ခိတၢ်သွဲလၢ ပစံာ်ပျီတဖၣ်ဒီးပစပံးလီၢ်တဖၣ်အဂီၢ်ပဘၣ်ဃ့လိၢ်ကျိၣ်စ့န့ၣ်လီၤ.
5 ပမ့ၢ်ပှၤတကလုာ်ဃီဒီးပဒီပုၢ်ဝဲၢ်ပှၤယူဒၤဖိသ့ၣ်တဖၣ်န့ၣ် လီၤ. မ့ၢ်ပဖိပလံၤသ့ၣ်တဖၣ်တဂ့ၤထဲသိးအဝဲသ့ၣ်န့ၣ်ဘၣ်ဧါ. ဘၣ်ဆၣ်ပဘၣ်ဒုးကဲကုၢ်ပဖိပလံၤသ့ၣ်တဖၣ်န့ၣ်လီၤ. ပဖိမုၣ်တနီၤဘၣ်တၢ်ဆါတ့ၢ်လံအီၤလၢကုၢ်အလီၢ်န့ၣ်လီၤ. မ့ၢ်လၢပစံာ်ပျီတဖၣ်ဒီးပစပံးလီၢ်သ့ၣ်တဖၣ်ဘၣ်တၢ်ဟံးထီၣ်ကွံာ် လၢပအိၣ်အဃိတၢ်မၤစၢၤပှၤတအိၣ်ဘၣ်န့ၣ်လီၤ.”
6 ဒီးတုၤယနၢ်ဟူအဝဲသ့ၣ်အတၢ်ပာ်ဒ့ၣ်ပာ်ကမၣ်သ့ၣ်တဖၣ်န့ၣ်ဒီး ယသးဒိၣ်ထီၣ်လီၤ.
7 ဒီးယပာ်လီၤယသးလၢယကမၤတၢ်န့ၣ်လီၤ. ယသိၣ်ဃီၣ်ပှၤခိၣ်ပှၤနၢ်တဖၣ်ဒီးပှၤကလုာ်အပဒိၣ်တဖၣ်ဒီးတဲဘၣ် အဝဲသ့ၣ်, “သုဆီၣ်ဘံၣ်ဆီၣ်ဘၢသုဒီပုၢ်ဝဲၢ်တဖၣ်န့ၣ်လီၤ.” ယကိးဖှိၣ်ပှၤဂီၢ်မုၢ်လၢတၢ်ဂ့ၢ်အံၤအဂီၢ်လီၤ.
8 ဒီးယစံးဘၣ်အဝဲသ့ၣ် “ဖဲပမၤသ့ဝဲအသိးန့ၣ်ပပှ့ၤက့ၤလံ ပဒီပုၢ်ဝဲၢ်သ့ၣ်တဖၣ်လၢအဆါလီၤအသးဆူပှၤကလုာ်ဂၤန့ၣ်လီၤ. ဒီးခဲကနံၣ်အံၤသုမၤဆူၣ်သုဒီပုၢ်ဝဲၢ်သ့ၣ်တဖၣ်လၢကဆါလီၤ အသးလၢသုပှၤယူဒၤဖိကဒဲကဒဲန့ၣ်လီၤ.” ဒီးပှၤခိၣ်ပှၤနၢ်တဖၣ်အိၣ်ဘှီၣ်ဝဲဒီးစံးတၢ်တသ့နီတမံၤဘၣ်န့ၣ်လီၤ.
9 တုၤနုၤတစုယစံးဘၣ်အဝဲသ့ၣ် “တၢ်လၢသုမၤန့ၣ်မ့ၢ်တၢ်လၢအကမၣ် လီၤ. သုကဘၣ်ပာ်ကဲကစၢ်ယွၤဒီးမၤတၢ်လၢအဘၣ်န့ၣ်လီၤ. ဒီးသုတဘၣ်ဟ့ၣ်ပဒုၣ်ပဒါတဖၣ်, ပှၤကလုာ်ဂၤတဖၣ်လၢတၢ်ဂ့ၢ်လၢ ကနံၤဘၣ်ဖၣ်လဲပှၤန့ၣ်ဘၣ်.
10 ယပျဲပှၤဂီၢ်မုၢ်လိၢ်ကျိၣ်ဧိၤစ့ဧိၤဒီးဘုဧိၤဟုဧိၤလၢ ယအိၣ်ဒီးလၢယတံၤသကိးတဖၣ်ဒီးပှၤလၢအမၤတၢ်လၢယဂီၢ် တဖၣ်အအိၣ်န့ၣ်လီၤ. ဒီးခဲကနံၣ်အံၤမ်ပကစံးလၢအဝဲသ့ၣ်သုတဟ့ၣ်က့ၤပှၤလၢၤတဂ့ၤ န့ၣ်တက့ၢ်.
11 တြုာ်ကွံာ်ကယဲၢ်ဒ့ၣ်ကမၣ်ခဲလၢာ်လၢအကဘၣ်ဟ့ၣ်သု, ကျိၣ်ဧိၤစ့ဧိၤမ့ၢ်ဂ့ၤ, ဘုဧိၤဟုဧိၤမ့ၢ်ဂ့ၤ, စပံးထံမ့ၢ်ဂ့ၤသိမ့ၢ်ဂ့ၤန့ၣ်တက့ၢ်. ဒီးဟ့ၣ်ကဒါက့ၤအစံာ် ပျီတဖၣ်, အစပံးလီၢ်တဖၣ်, အသ့ၣ်စၤယံးအလီၢ်တဖၣ်ဒီးအဟံၣ်အဃီခဲကနံၣ်အံၤတက့ၢ်.”
12 ဒီးပှၤခိၣ်ပှၤနၢ်တဖၣ်စံးဆၢဝဲ “ပကမၤဒ်နစံးအသိးလီၤ. ပကဟ့ၣ်က့ၤအတၢ်ဖိတၢ်လံၤဒီးပတပာ်ဖှိၣ်က့ၤအဒ့ၣ်ကမၢ်တဖၣ်လၢၤ န့ၣ်ဘၣ်.” ဒီးယကိးပှၤလုၢ်တၢ်အခိၣ်တဖၣ်ဒီးမၢပှၤခိၣ်ပှၤနၢ်တဖၣ်ဆိၣ်လီၤ အသးလၢအဝဲသ့ၣ်အမဲာ်ညါလၢကပၢၤဃာ်တၢ်အၢၣ်လီၤလၢအဝဲသ့ၣ်မၤ တ့ၢ်ဝဲဒၣ်န့ၣ်လီၤ.
13 ဒီးယထုးထီၣ်ယကူယသိးလၢယကူအီၤလၢယယီၢ်ဒ့ဒီးတြုၤအီၤန့ၣ် လီၤ. ဒီးယစံး “အအံၤကစၢ်ယွၤကတြုၤသု ဒ်သိးအံၤလၢပှၤလၢအတပၢၤဃးအတၢ်အၢၣ်လီၤဘၣ်န့ၣ်လီၤ. ကစၢ်ယွၤကဟံးထီၣ်ကွံာ်သုဟံၣ်သုဃီတဖၣ်ဒီးကယဲၢ်တၢ်အိၣ်ဒီး သုခဲလၢာ်, ဒီးတပာ်တီၢ်န့ၢ်သုတၢ်နီတမံၤလၢၤဘၣ်န့ၣ်လီၤ.”
ဒီးပှၤအိၣ်ဝဲဖဲန့ၣ်ခဲလၢာ်စံးဝဲ, “အၤမ့ၣ်” ဒီးစံးထီၣ်ပတြၢၤယွၤလီၤ. ဒီးပှၤခိၣ်ပှၤနၢ်တဖၣ်ပၢၤဃးအတၢ်အၢၣ်လီၤန့ၣ်လီၤ.
14 ဒီးဖဲယမ့ၢ်ကီၢ်ယူဒၤအပဒိၣ်ဖးဒိၣ်လၢတဆံခံနံၣ်အဆၢကတီၢ်, လၢစီၤပၤဖးဒိၣ်အၢ်တၤၡါၡတၤပၢတၢ်အနံၣ်ခံဆံတုၤလၢသၢဆံ ခံနံၣ်အတီၢ်ပူၤန့ၣ်ယၤမ့ၢ်ဂ့ၤယဘူးယတံၢ်သ့ၣ်တဖၣ်မ့ၢ်ဂ့ၤပတအီၣ် တၢ်အီၣ်လၢယမၤန့ၢ်အီၤပၢဝဲဒ်ပဒိၣ်ဖးဒိၣ်အသိးန့ၣ်ဘၣ်.
15 ကယဲၢ်ပဒိၣ်ဖးဒိၣ်ခဲလၢာ်လၢအမၤတ့ၢ်လံတၢ်လၢယမဲာ်ညါန့ၣ်ကဲ ထီၣ်တၢ်ဝံတၢ်ယိးလၢပှၤဂီၢ်မုၢ်အဂီၢ်ဒီးလၢတနံၤအတီၢ်ပူၤန့ၣ်, လၢတၢ်အီၣ်တၢ်အီဒီးစပံးထံအမဲာ်ညါဃ့ဝဲစ့ညၣ်အဘ့ၣ်လွံၢ်ဆံ န့ၣ်လီၤ. အဝဲသ့ၣ်အခ့အပှၤသ့ၣ်တဖၣ်ဒၣ်လဲာ်မၤနးမၤဖှီၣ်ပှၤဂီၢ်မုၢ်န့ၣ် လီၤ. ဘၣ်ဆၣ်မ့ၢ်လၢယပာ်ကဲကစၢ်ယွၤအဃိ ယတမၤတၢ်ဒ်အဝဲသ့ၣ်အသိးန့ၣ်ဘၣ်.
16 ယဟ့ၣ်လီၤယဂံၢ်ယဘါလၢာ်လၢာ်ဆ့ဆ့လၢတၢ်သူၣ်ထီၣ်ကဒါက့ၤဝ့ၢ် ခိၣ်ဒူအပူၤဒီးယတဃ့တၢ်နီတမံၤဘၣ်. ကယဲၢ်ပှၤမၤတၢ်လၢယဂီၢ်မၤသကိးတၢ်လၢတၢ်သူၣ်ထီၣ်ကဒါက့ၤတၢ် န့ၣ်လီၤ.
17 လၢယစီၢ်နီၤခိၣ်န့ၣ်ထီဘိယဒုးအီၣ်ပှၤယူဒၤဖိဒီးအခိၣ်အနၢ် တဖၣ်တကယၤယဲၢ်ဆံဂၤအတၢ်အီၣ်ဒီးပှၤလၢအဟဲလၢထံကီၢ်လၢ ယကပိာ်ကပၤသ့ၣ်တဖၣ်ဒၣ်လဲာ်န့ၣ်လီၤ.
18 ကိးမုၢ်နံၤဒဲးတၢ်လၢအကတဲာ်ကတီၤအသးလၢယဂီၢ်မ့ၢ်ဂီၤဖံးတ ဒု, သိဃုဒုလၢအဂ့ၤကတၢၢ်, ဒီးဆီတဖၣ်, ဒီးဆံဆဲၣ်သီတဘျီကိးစုဒဲးန့ၣ်ယဘၣ်တၢ်ဟ့ၣ်ယၤစပံးထံ အသီန့ၣ်လီၤ. ဘၣ်ဆၣ်ယသ့ၣ်ညါလၢပှၤဂီၢ်မုၢ်ဘၣ်ဝံတၢ်ယိးတၢ်ဃၢ ဝဲဒီးလၢတၢ်န့ၣ်အဃိယတဃ့တၢ်လၢပဒိၣ်ဖးဒိၣ်ကြၢးဒိးန့ၢ်ဘၣ် ဝဲန့ၣ်ဘၣ်.
19 ကစၢ်ယွၤဧၢ, ယဃ့ထီၣ်နၤလၢနကသ့ၣ်နီၣ်ယတၢ်ဂ့ၤခဲလၢာ်လၢယမၤဘၣ် အီၤလၢပှၤဂီၢ်မုၢ်အဂီၢ်န့ၣ်လီၤ.