လံာ်စီၤနဃ့မယၤ
NEHEMIAH
လံာ်စီၤနဃ့မယၤဘၣ်တၢ်နီၤဖးအီၤသ့ဝဲလွံၢ်ပတီၢ်န့ၣ်လီၤ. (၁) စီၤနဃ့မယၤအတၢ်ဟဲက့ၤဆူဝ့ၢ်ယရူၤၡလ့ၣ်, ဖဲအဘၣ်တၢ်ဆှၢလီၤအီၤလၢကီၢ်ပၤရၣ်အစီၤပၤဒ်သိးကပၢကီၢ်ယူ ဒၤ. (၂) တၢ်ဘှီထီၣ်ကဒါက့ၤဝ့ၢ်ယရူၤၡလ့ၣ်အဝ့ၢ်ခိၣ်ဒူ (၃) စီၤဧ့စြၤ အတၢ်ဖးဖျါထီၣ်ကစၢ်ယွၤအတၢ်သိၣ်တၢ်သီဒီးပှၤ ဂီၢ်မုၢ်အတၢ်တဲလီၤကျဲၤလီၤအတၢ်ဒဲးတူၢ်ဒဲးဘး. (၄) စီၤနဃ့မယၤ ဒ်ကီၢ်ယူဒၤအပဒိၣ်တဂၤအသိးအတၢ်ဖံးတၢ်မၤ အဂုၤအဂၤတဖၣ်.
လံာ်စီၤနဃ့မယၤအတၢ်လီၤတိၢ်လီၤဆီမ့ၢ်ဝဲတၢ်ကွဲးနီၣ်ဘၣ်ထွဲ ဒီးစီၤနဃ့မယၤအတၢ်သန့ၤအသးလၢာ်လၢာ်ဆ့ဆ့လၢကစၢ်ယွၤအပူၤ ဒီးအတၢ်ထုကဖၣ်ဆူကစၢ်ယွၤအအိၣ်တလီၢ်လီၢ်န့ၣ်လီၤ.
1
1 ဒီးအအံၤမ့ၢ်စီၤဃကါလယၤအဖိခွါစီၤနဃ့မယၤအတၢ်ကတိၤတဖၣ်န့ၣ်လီၤ.
ဒီးလၢကီၢ်ပၤရၣ်အစီၤပၤဖးဒိၣ်အၢ်တၤၡါၡတၤပၢတၢ်ပှဲၤထီၣ် အနံၣ်ခံဆံ, လါကံးစလ့ၤအပူၤန့ၣ်, ယအိၣ်လၢဝ့ၢ်ၡူၡၣ်လၢအမ့ၢ်ဝ့ၢ်ခိၣ်အပူၤ န့ၣ်လီၤ.
2 ဒီးစီၤဃနၤနံလၢအမ့ၢ်ယဒီပုၢ်ဝဲၢ်ခွါတဂၤဟဲလၢကီၢ်ယူဒၤ ဃုာ်ဒီးပှၤအဂၤတဖၣ်န့ၣ်, ဒီးယသံကွၢ်အီၤဘၣ်ဃးဒီးဝ့ၢ်ယရူၤၡလ့ၣ်ဒီးပပှၤယူဒၤဖိလၢ အဟဲက့ၤလၢတၢ်စိာ်မၢကဲကုၢ်လၢကီၢ်ဘၤဘူၤလိၣ်တဖၣ်အဂ့ၢ် အကျိၤန့ၣ်လီၤ.
3 ဒီးအဝဲသ့ၣ်တဲဘၣ်ယၤလၢပှၤလၢအိၣ်လီၤတဲာ်ဒီးဟဲက့ၤတုၤဆူ အထံဧိၤကီၢ်ဧိၤဒၣ်ဝဲန့ၣ်အိၣ်လၢတၢ်ကီတၢ်ခဲနးမးအပူၤဒီး ပှၤတခီဘီမုၢ်ဖိလၢအအိၣ်ဘူးတဖၣ်န့ၣ်ကွၢ်တလီၤအဝဲသ့ၣ်န့ၣ် လီၤ. အဝဲသ့ၣ်တဲဘၣ်စ့ၢ်ကီးယၤလၢဝ့ၢ်ယရူၤၡလ့ၣ်အဝ့ၢ်ခိၣ်ဒူတဖၣ် န့ၣ်စးထီၣ်လၢအဘၣ်တၢ်ဒွဲၣ်ကွံာ်အီၤန့ၣ်တဘၣ်တၢ်ဘှီထီၣ်က့ၤ ဒံးအီၤဘၣ်န့ၣ်လီၤ.
4 ဒီးတုၤယနၢ်ဟူတၢ်သ့ၣ်တဖၣ်အံၤခဲလၢာ်ဝံၤန့ၣ်ဒီးယဆ့ၣ်နီၤ ဟီၣ်ယဲလီၤ.
ယဟီၣ်ဒီးယတအီၣ်တအီတၢ်နီတမံၤတဘျုးသီန့ၣ်လီၤ. ဒီးယဃ့ဘါထုကဖၣ်ဆူကစၢ်ယွၤအအိၣ်လီၤ.
5 ဒီးယစံး, ယွၤ, မူခိၣ်အကစၢ်ယွၤဧၢ, နဒိၣ်ဝဲနီၢ်မးလီၤ. ဒီးပဆၢထၢၣ်လၢတၢ်ပျံၤတၢ်ဖုးအပူၤလၢနခီၣ်ထံးမဲာ်ညါလီၤ. နဟံးဃာ်ဂၢၢ်ကျၢၤနတၢ်အၢၣ်ဒီးလၢပှၤလၢအအဲၣ်နၤဒီးပှၤလၢအလူၤ ထွဲနတၢ်မၤလိာ်န့ၣ်လီၤ.
6 ယွၤဧၢ, ကွၢ်ယၤ, ဒ်ယဃ့တၢ်လၢနခ့နပှၤပှၤအံၣ်စရ့လးဖိ တဖၣ်အဂီၢ်လၢနံၤဒီးနၤန့ၣ်ဒိကနၣ်လၢ်ဘၣ်ယတၢ်ထုကဖၣ် န့ၣ်တက့ၢ်. ယအၢၣ်လီၤလၢပဝဲ, ပှၤအံၣ်စရ့လးဖိတဖၣ်ပအိၣ်ဒီးတၢ်ကမၣ်လီၤ. ယၤဒီးယမိၢ်ယပၢ်ယဖံယဖုတဖၣ်ပမၤတ့ၢ်တၢ်ဒဲးတူၢ်ဒဲးဘးလီၤ.
7 ပမၤတ့ၢ်တၢ်အၢတၢ်သီထီဒါနၤဒီးတမၤတၢ်လၢနမၤလိာ်ပှၤန့ၣ် ဘၣ်. ပတတိၢ်န့ၢ်တၢ်သိၣ်တၢ်သီလၢနဟ့ၣ်လီၤခီဖျိနခ့နပှၤစီၤမိၤၡ့ န့ၣ်ဘၣ်.
8 ဒီးခဲကနံၣ်အံၤသ့ၣ်နီၣ်ထီၣ်က့ၤတၢ်လၢနတဲဘၣ်စီၤမိၤၡ့န့ၣ် တက့ၢ်. “သုဝဲပှၤအံၣ်စရ့လးဖိတဖၣ်မ့ၢ်တတီဒီးယၤန့ၣ်ဘၣ်ဒီးယကမၤ လီၤပြံလီၤပြါသုလၢပှၤကလုာ်အဂၤတဖၣ်အကျါန့ၣ်လီၤ.
9 ဘၣ်ဆၣ်ဒီးသုမ့ၢ်ဃၣ်ကဒါက့ၤသုသးဆူယအိၣ်ဒီးမၤတၢ်လၢယမၤ လိာ်တ့ၢ်လံသုန့ၣ်, သုမ့ၢ်လီၤပြံလီၤပြါဆူဟီၣ်ခိၣ်အက တၢၢ်ဒၣ်လဲာ်ယကဟဲက့ၤစိာ်ကဒါက့ၤသုဆူတၢ်လီၢ်လၢယဃုထၢအီၤ လၢယကဘၣ်တၢ်ဘူၣ်ထီၣ်ဘါထီၣ်ယၤအဂီၢ်န့ၣ်လီၤ.
10 ယွၤဧၢ, ပှၤသ့ၣ်တဖၣ်အံၤမ့ၢ်ဝဲနခ့နပှၤဒီးနပှၤကလုာ်ဒၣ်နဲန့ၣ် လီၤ. နမၤပူၤဖျဲးအဝဲသ့ၣ်လၢနစိဒိၣ်ကမီၤထီဒီးနဂံၢ်နဘါန့ၣ်လီၤ.
11 ဒီးခဲကနံၣ်အံၤဒိကနၣ်လၢ်ယတၢ်ထုကဖၣ်ဒီးကယဲၢ်နခ့နပှၤခဲလၢာ် လၢအသးအိၣ်ပာ်ထီၣ်ထီနၤအတၢ်ထုကဖၣ်န့ၣ်တက့ၢ်. တနံၤအံၤဟ့ၣ်လၢ်ယၤတၢ်မၤနၢၤဒီးမၢစီၤပၤသးကညီၤယၤတက့ၢ်.
ဒီးလၢမုၢ်နံၤတဖၣ်အံၤန့ၣ်ယမ့ၢ်ပှၤစိာ်စီၤပၤဖးဒိၣ်အလီခီအီတၢ်န့ၣ်လီၤ.