13
(မၢ်ကူး ၄:၁-၉; လူၤကၣ် ၈:၄-၈)
1 တနံၤဃီန့ၣ်, ယ့ၣ်ၡူးဟးထီၣ်ဝဲလၢဟံၣ်ပူၤဒီးလဲၤဝဲဆူပီၣ်လဲၣ်ကၢၢ်နံၤ ဒီးဆ့ၣ်နီၤဝဲဒ်သိးအကသိၣ်လီၤသီလီၤတၢ်အဂီၢ်လီၤ.
2 ပှၤဂီၢ်မုၢ်ဖးဒိၣ်ပာ်ဖှိၣ်ထီၣ်အသးဝးတရံးအီၤသတးဒီး, အဝဲလဲၤနုာ်ဆ့ၣ်နီၤဝဲလၢချံတဘ့ၣ်အပူၤဒီးပှၤဂီၢ်မုၢ် တခီအိၣ်ဆၢထၢၣ်လၢကၢၢ်ပၤနံၤန့ၣ်လီၤ.
3 အဝဲစံးဘၣ်တဲဘၣ်အဝဲသ့ၣ်လၢတၢ်အါမံၤခီဖျိတၢ်ကတိၤဒိ တဖၣ်ဒီးစံးဝဲ,
“တဘျီပှၤဖှံတၢ်ချံတဂၤလဲၤဒီးဖှံတၢ်ချံလီၤ.
4 ဖဲအဝဲဖှံလီၤတၢ်ချံန့ၣ်, တၢ်ချံတနီၤလီၤဘၣ်လၢကျဲသရ့ၤထံးဒီး ထိၣ်တဖၣ်ဟဲထၢအီၣ်ကွံာ်ဝဲလီၤ.
5 တၢ်ချံတနီၤလီၤဘၣ်လၢဟီၣ်ခိၣ်လၢလၢၢ်အိၣ်ဝဲအါမးဒီးဟီၣ်ခိၣ် တအိၣ်အါအါဘၣ်အလီၢ်လီၤ. မ့ၢ်လၢဟီၣ်ခိၣ်အိၣ်ဘူတလါအဃိ, တၢ်ချံတဖၣ်အံၤမဲထီၣ်ချ့မးလီၤ.
6 ဘၣ်ဆၣ်တုၤမုၢ်ဟဲထီၣ်ဒီးဆဲးလီၤဘၣ်လၢတၢ်အမုၢ်အဘိတဖၣ် အလိၤန့ၣ်, မ့ၢ်လၢအဂံၢ်တယိာ်ဘၣ်အဃိဒီးဃ့ထီကွံာ်ဝဲလီၤ.
7 တၢ်ချံအဂၤတနီၤလီၤဘၣ်လၢတၤဆှုၣ်တၤမဲအကျါဒီးတၤဆှုၣ် တၤမဲတဖၣ်ဒိၣ်ထီၣ်ဒီးခဲဘၢကွံာ်တၢ်မုၢ်ဖိတဖၣ်န့ၣ်လီၤ.
8 ဘၣ်ဆၣ်ဒီးတၢ်ချံတနီၤလီၤဘၣ်လၢဟီၣ်ခိၣ်လၢအဂ့ၤဒီးတၢ် အမုၢ်တဖၣ်ဒိၣ်ထီၣ်ဒီးသၣ်ထီၣ်ဝဲလီၤ. တၢ်အမုၢ်တနီၤသၣ်ထီၣ်တကယၤ, တနီၤဃုဆံဒီးတနီၤသၢဆံလီၤ.”
9 ယ့ၣ်ၡူးမၤကတၢၢ်က့ၤအတၢ်သိၣ်လီၤသီလီၤဒီးစံး, “ပှၤအိၣ်ဒီးအနၢ်လၢအနၢ်ဟူတၢ်သ့န့ၣ် မ်အဒိကနၣ်တၢ်တက့ၢ်.”
(မၢ်ကူး ၄:၁၀-၁၂; လူၤကၣ် ၈:၉-၁၀)
10 တုၤနုၤတစုအပျဲၢ်အဘီၣ်တဖၣ်ဟဲဆူယ့ၣ်ၡူးအအိၣ်ဒီးသံကွၢ်အီၤ, “နမ့ၢ်ကတိၤတၢ်ဒီးပှၤတဖၣ်န့ၣ်, ဘၣ်မနုၤလၢနသူတၢ်ကတိၤဒိတဖၣ်လဲၣ်.”
11 ယ့ၣ်ၡူးစံးဆၢဝဲ, “ယွၤဟ့ၣ်ဒုးသ့ၣ်ညါသုလၢတၢ်မ့ၢ်တၢ်တီ အတၢ်ခူသူၣ်ဘၣ်ဃးဒီးမူခိၣ်အဘီအမုၢ်, ဘၣ်ဆၣ်အဝဲသ့ၣ်တဘၣ်တၢ်ဟ့ၣ်ဒုးသ့ၣ်ညါအီၤဘၣ်.
12 အဂ့ၢ်ဒ်အံၤ, ပှၤလၢတၢ်အိၣ်ဒီးအီၤန့ၣ်, ယွၤကဟ့ၣ်အါထီၣ်အီၤဒီးကအိၣ်ဒီးအီၤအါအါကလဲာ်လီၤ. မ့မ့ၢ်ပှၤလၢအတၢ်တအိၣ်ဘၣ်န့ၣ်, တၢ်တစဲးဖိလၢအအိၣ်ဒီးအီၤဒၣ်လဲာ်ယွၤကဟံးထီၣ်ကွံာ်လၢ အအိၣ်လီၤ.
13 လၢတၢ်န့ၣ်အဃိယသိၣ်လီၤသီလီၤအဝဲသ့ၣ်လၢတၢ် ကတိၤဒိတဖၣ်လီၤ. အဂ့ၢ်ဒ်အံၤ, အဝဲသ့ၣ်ကွၢ်တၢ်ဘၣ်ဆၣ် တထံၣ်တၢ်ဘၣ်. ကနၣ်တၢ်ဘၣ်ဆၣ်တနၢ်ဟူဝဲဘၣ်. တနၢ်ပၢၢ်စ့ၢ်ကီးဝဲဘၣ်.
14 အဝဲသ့ၣ်မၤလၢထီၣ်ပှဲၤထီၣ်တၢ်လၢဝံယၡါယၤစံးတ့ၢ်ဝဲ,
‘ပှၤတကလုာ်အံၤကနၣ်ဝံၤကနၣ်က့ၤတၢ်
ဘၣ်ဆၣ်ဒီးတနၢ်ပၢၢ်ဝဲဘၣ်.
ကကွၢ်ဝံၤကွၢ်က့ၤတၢ်ဘၣ်ဆၣ်တထံၣ်ဘၣ်ဝဲဘၣ်.
15 အဂ့ၢ်ဒ်အံၤ, ပှၤတဖၣ်အံၤအသူၣ်ဃၢအသးဃၢဝဲ,
အနၢ်တဖၣ်ဃၢဝဲလၢကနၢ်ဟူတၢ်အဂီၢ်,
ဒီးဘံၣ်ဃာ်အမဲာ်ချံဒ်သိးအသုတထံၣ်တၢ်
လၢအမဲာ်ချံတဂ့ၤအဂီၢ်လီၤ.
မ့တမ့ၢ်ဘၣ်ဒီးကနၢ်ဟူတၢ်လၢအနၢ်
ဒီးကနၢ်ပၢၢ်တၢ်လၢအသးဒီး
ကဃၣ်ကဒါက့ၤအသးဆူယအိၣ်, ကစၢ်ယွၤစံးဝဲဒၣ်,
ဒီးယကမၤဘျါက့ၤအဝဲသ့ၣ်လီၤ’ (ၡါ.၆:၉-၁၀).
16 မ့မ့ၢ်သုဘၣ်ဆိၣ်ဂ့ၤနီၢ်နီၢ်လီၤ. အဂ့ၢ်ဒ်အံၤ, သုမဲာ်ထံၣ်တၢ်ဒီးသုနၢ်နၢ်ဟူတၢ်လီၤ.
17 ယစံးဘၣ်သုတၢ်မ့ၢ်တၢ်တီ, ဝံအါဂၤဒီးပှၤအဲၣ်ထူအဲၣ်ယွၤအါဒံအါဂၤ ဆၢထံၣ်ဘၣ်တၢ်လၢသုထံၣ်, ဘၣ်ဆၣ်ဒီးတထံၣ်ဘၣ်ဝဲဘၣ်. ဒီးဆၢနၢ်ဟူတၢ်လၢသုနၢ်ဟူဘၣ်ဆၣ်တနၢ်ဟူဘၣ်ဝဲဘၣ်.”
(မၢ်ကူး ၄:၁၃-၂၀; လူၤကၣ် ၈:၁၁-၁၅)
18 “ဒိကနၣ်ဒီးမၤလိန့ၢ်တၢ်ကတိၤဒိဘၣ်ဃးပှၤဖှံတၢ်ချံအခီ ပညီတက့ၢ်.
19 ပှၤလၢအနၢ်ဟူတၢ်ကစီၣ်ဘၣ်ဃးဒီးဘီမုၢ်ဘၣ်ဆၣ်တနၢ်ပၢၢ်ဝဲ တဖၣ်န့ၣ်, လီၤဂာ်ဒီးတၢ်ချံလၢအလီၤဘၣ်လၢကျဲအသရ့ၤထံးလီၤ. တၢ်အၢတၢ်သီတဂၤန့ၣ်ဟဲဒီးဂုာ်န့ၢ်ကွံာ်တၢ်လၢအဘၣ်တၢ်ဖှံလီၤလၢ အဝဲသ့ၣ်အသးပူၤလီၤ.
20 တၢ်ချံလၢအလီၤဘၣ်လၢဟီၣ်ခိၣ်လၢလၢၢ်အိၣ်ဝဲအါမးအလီၢ် တဖၣ်န့ၣ်, မ့ၢ်ပှၤလၢအနၢ်ဟူတၢ်ကစီၣ် ဒီးတဘျီဃီတူၢ်လိာ်ဝဲလၢ တၢ်သူၣ်ဖှံသးညီအပူၤန့ၣ်လီၤ.
21 ဘၣ်ဆၣ်ဒီး, အဂံၢ်တယိာ်ဘၣ်သတးဒီး, တမူယံာ်ယံာ်ဘၣ်. တုၤတၢ်နးတၢ်ဖှီၣ်ဒီး တၢ်မၤအၢမၤနးအိၣ်ထီၣ်လၢတၢ်ကစီၣ် အဃိဒီး, အဝဲသ့ၣ်အသးဟးဂီၤတဘျီဃီလီၤ.
22 တၢ်ချံလၢအဘၣ်တၢ်ဖှံလီၤအီၤလၢတၤဆှုၣ်တၤမဲအကျါတဖၣ်, မ့ၢ်ပှၤလၢအနၢ်ဟူတၢ်ကစီၣ်, ဘၣ်ဆၣ်တၢ်ဘၣ်ယိၣ်ဘၣ်ဘီဘၣ်ဃးဒီးဟီၣ်ခိၣ် ဒီးတၢ်အဲၣ်တၢ်ထူးတၢ်တီၤတဖၣ်ခဲဘၢကွံာ်တၢ်ကစီၣ်သတးဒီး တသၣ်ထီၣ်ဘၣ်ဝဲဘၣ်.
23 တၢ်ချံလၢအဘၣ်တၢ်ဖှံလီၤအီၤလၢဟီၣ်ခိၣ်လၢအဂ့ၤတဖၣ်, မ့ၢ်ပှၤလၢအနၢ်ဟူတၢ်ကစီၣ်ဒီးနၢ်ပၢၢ်ဝဲလီၤ. အဝဲသ့ၣ်သၣ်ထီၣ်ဝဲ, တနီၤအါန့ၢ်အလီၢ်အစးတကယၤ, တနီၤဃုဆံဒီးတနီၤသၢဆံလီၤ.”
24 ယ့ၣ်ၡူးတဲကဒီးတၢ်ကတိၤဒိအဂၤတခါဒီးစံး, “မူခိၣ်အဘီအမုၢ်လီၤဂာ်ဒီးပှၤလၢအဖှံလီၤတၢ်ချံလၢအ ဂ့ၤလၢအစံာ်ပျီပူၤလီၤ.
25 တနၤဖဲပှၤကိးဂၤဒဲးမံဘၣ်အသးအခါ, အဒုၣ်အဒါတဂၤဟဲဒီးဖှံလီၤနီၣ်စံစၣ်လၢဘုအကျါ ဒီးက့ၤက့ၤဝဲလီၤ.
26 တုၤဘုအမုၢ်တဖၣ်ဒိၣ်ထီၣ်, ပျိာ်ထီၣ်သၣ်ထီၣ်ဒီး နီၣ်စံစၣ်အိၣ်ဖျါထီၣ်စ့ၢ်ကီးဝဲလီၤ.
27 ဒီးဟံၣ်ကစၢ်အကုၢ်အပှၤတဖၣ်ဟဲဆူအအိၣ်ဒီးစံးဘၣ်အီၤ, ‘တၢ်ဒိၣ်ဧၢ, နဖှံလီၤတၢ်ချံလၢအဂ့ၤလၢနစံာ်ပျီပူၤတမ့ၢ်ဘၣ်ဧါ. နစံာ်ပူၤအိၣ်ဒီးနီၣ်စံစၣ်ဒ်လဲၣ်.’
28 အဝဲစံးဆၢအဝဲသ့ၣ်, ‘ဒုၣ်ဒါတဂၤမၤတ့ၢ်တၢ်အံၤလီၤ.’ အကုၢ်တဖၣ်စံးဘၣ်အီၤ, ‘မ့ၢ်နအဲၣ်ဒိးလၢပကလဲၤထဲးထီၣ်ကွံာ်နီၣ်စံစၣ်န့ၣ်ဧါ.’
29 အဝဲစံးဝဲ, ‘တဘၣ်မၤတဂ့ၤ. သုထဲးထီၣ်နီၣ်စံစၣ်အဖၢမုၢ်ဒီး သုကထဲးထီၣ်ကွံာ်ဘၣ်ဖုးဘုန့ၣ်လီၤ.
30 ပျဲအဝဲသ့ၣ်ခံကလုာ်လၢာ်ဒိၣ်ထီၣ်တပူၤဃီတက့ၢ်. တုၤကူးဘုအကတီၢ်ဘၣ်ဒီးယကစံးဘၣ်ပှၤကူးဘုဖိတဖၣ်လၢ အကထဲးထီၣ်ဆိနီၣ်စံစၣ်, စၢကဒိၣ်အီၤတကဒိၣ်ဘၣ်တကဒိၣ် ဒီးဆူးထီၣ်ကွံာ်အီၤလၢမ့ၣ်အူအပူၤလီၤ. မ့မ့ၢ်ဘုဧိၤဟုဧိၤန့ၣ်ယကမၢအထၢဖှိၣ်ဝဲဒီးဂၢ်ဖှိၣ်လၢယဖီပူၤလီၤ.’ ”
(မၢ်ကူး ၄:၃၀-၃၂; လူၤကၣ် ၁၃:၁၈-၁၉)
31 ယ့ၣ်ၡူးတဲတၢ်ကတိၤဒိအဂၤတခါဒီးစံး, “မူခိၣ်အဘီအမုၢ်လီၤဂာ်ဒီးသဘၣ်ချံဖိတဖျၢၣ် လၢပှၤတဂၤဟံးန့ၢ်ဒီးဖှံလီၤအီၤလၢစံာ်ပျီပူၤလီၤ.
32 လၢတၢ်ချံခဲလၢာ်အကျါအဝဲမ့ၢ်တၢ်ချံအဆံးကတၢၢ်လီၤ. ဘၣ်ဆၣ်တုၤအဝဲမဲထီၣ်ဒီးဒိၣ်ထီၣ်န့ၣ်ကဲထီၣ်တၢ်အမုၢ်ဒိၣ် ကတၢၢ်တမုၢ်ဒီးဒိၣ်ထီၣ်ဒီးကဲထီၣ်သ့ၣ်ဖိတထူၣ်ဒီးထိၣ်တဖၣ်ဟဲဒီး ဘှီထီၣ်အသွံတဖၣ်လၢအဒ့တဖၣ်အလိၤလီၤ.”
(လူၤကၣ် ၁၃:၂၀-၂၁)
33 အဝဲစံးဘၣ်တဲဘၣ်အဝဲသ့ၣ်လၢတၢ်ကတိၤဒိအဂၤတခါ, “မူခိၣ်အဘီမုၢ်န့ၣ်လီၤဂာ်ဒီးကိၣ်မံၣ်တနီၤလၢပိာ်မုၣ်တဂၤ ဟံးန့ၢ်ဒီးစံၢ်ကျဲၣ်ကျီအီၤလၢကိၣ်ကမူၣ်သၢသလိးအကျါတုၤ ကိၣ်ဖးထီၣ်ဝဲခဲလၢာ်န့ၣ်လီၤ.”
(မၢ်ကူး ၄:၃၃-၃၄)
34 ယ့ၣ်ၡူးစံးဘၣ်ပှၤဂီၢ်မုၢ်လၢတၢ်သ့ၣ်တဖၣ်အံၤခီဖျိတၢ် ကတိၤဒိတဖၣ်, ဒီးမ့တမ့ၢ်ဘၣ်လၢတၢ်ကတိၤဒိဘၣ်ဒီး တသိၣ်လီၤသီလီၤတၢ်နီတမံၤဘၣ်.
35 အဝဲမၤတၢ်အံၤမ့ၢ်ဒ်သိးဒီး တၢ်လၢဝံတဂၤစံးတ့ၢ်ဝဲ ကလၢထီၣ်ပှဲၤထီၣ်အဂီၢ်လီၤ.
“ယကကတိၤတၢ်လၢတၢ်ကတိၤဒိ,
တၢ်လၢအအိၣ်လီၤဘၢလၢဟီၣ်ခိၣ်
အိၣ်ထီၣ်လံၤလံၤတဖၣ်န့ၣ်,
ယကတဲဖျါထီၣ်န့ၢ်အဝဲသ့ၣ်လီၤ” (စံး.၇၈:၂).
36 တုၤနုၤတစုယ့ၣ်ၡူးဟးဖးဒီးပှၤဂီၢ်မုၢ်ဒီးက့ၤဝဲဆူဟံၣ်ပူၤန့ၣ်လီၤ. အပျဲၢ်အဘီၣ်တဖၣ်လဲၤဆူအအိၣ် ဒီးစံးဘၣ်အီၤ, “တဲဖျါန့ၢ်ပှၤလၢတၢ်ကတိၤဒိဘၣ်ဃးဒီး နီၣ်စံစၣ်လၢပျီပူၤအခီပညီတက့ၢ်.”
37 ယ့ၣ်ၡူးစံးဆၢဝဲ, “ပှၤလၢအဖှံတၢ်ချံလၢအဂ့ၤန့ၣ်မ့ၢ်ပှၤကညီအဖိခွါလီၤ.
38 စံာ်ဧိၤပျီဧိၤမ့ၢ်ဟီၣ်ခိၣ်ချၢလီၤ. ဒီးတၢ်ချံလၢအဂ့ၤမ့ၢ်ပှၤဘီဖိမုၢ်ဖိတဖၣ်, ဒီးနီၣ်စံစၣ်မ့ၢ်မုၣ်ကီၤလံၢ်အဖိအလံၤတဖၣ်လီၤ.
39 ဒီးဒုၣ်ဒါလၢအဖှံလီၤအဝဲသ့ၣ်န့ၣ်, မ့ၢ်မုၣ်ကီၤလံၢ်လီၤ. ကူးဘုအဆၢကတီၢ် မ့ၢ်မုၢ်နံၤခံကတၢၢ်အကတီၢ်, ဒီးပှၤကူးဘုဖိတဖၣ် မ့ၢ်ကလူးတဖၣ်လီၤ.
40 ဒ်နီၣ်စံစၣ်ဘၣ်တၢ်ထၢဖှိၣ်ဒီးဆူးကဲၤထီၣ်ကွံာ်အီၤလၢမ့ၣ်အူအသိးန့ၣ်, တၢ်ကမၤအသးလၢမုၢ်နံၤခံကတၢၢ်ဒ်န့ၣ်အသိးလီၤ.
41 ပှၤကညီအဖိခွါကဆှၢလီၤအကလူးတဖၣ်, ဒ်သိးအဝဲသ့ၣ်ကထၢဖှိၣ်ပှၤလၢအဒုးမၤပှၤဂၤလၢတၢ်ဒဲးဘး ဒီးပှၤလၢအမၤတၢ်အၢတၢ်သီတဖၣ်ခဲလၢာ် ဒီးထုးထီၣ်ကွံာ်အီၤလၢအဘီအမုၢ်အပူၤလီၤ.
42 ဒီးကလူးတဖၣ်ကတ့ၢ်လီၤကွံာ်အဝဲသ့ၣ်ဆူမ့ၣ်အူအဖၣ်ကပူၤ, ဖဲအဝဲသ့ၣ်ကဟီၣ်တၢ်ယၢၤတၢ်ဒီးကအ့ၣ်စဃံးအမဲန့ၣ်လီၤ.
43 တုၤနုၤတဘျီပှၤတီပှၤလိၤတဖၣ်ကကပီၤထီၣ်ဒ်မုၢ်အသိးလၢ အပၢ်အဘီအမုၢ်အပူၤလီၤ. ပှၤအိၣ်ဒီးအနၢ်လၢအနၢ်ဟူတၢ်သ့န့ၣ်, မ်အဒိကနၣ်တၢ်တက့ၢ်.
44 မူခိၣ်အဘီအမုၢ်န့ၣ်လီၤဂာ်ဒီးတၢ်လုၢ်ဒိၣ်ပှ့ၤဒိၣ်လၢ အဘၣ်တၢ်ပာ်ခူသူၣ်အီၤလၢစံာ်ပျီတဘ့ၣ်အပူၤလီၤ. ပှၤလၢအထံၣ်န့ၢ်ဝဲတဂၤန့ၣ်, မၤဘံၣ်မၤဘၢအီၤဝံၤဒီး လၢတၢ်သးခုအပူၤ, လဲၤဒီးဆါကွံာ်တၢ်လၢအအိၣ်ဒီးအီၤခဲ လၢာ်, ဒီးဟဲက့ၤပှ့ၤစံာ်ပျီအဝဲန့ၣ်လီၤ.
45 မၤကဒီးတစု, မူခိၣ်အဘီအမုၢ်န့ၣ်လီၤဂာ်ဒီးပှၤကၤတၢ်ဖိလၢ အဃုထံၣ်န့ၢ်တၢ်မျၢ်ပလဲလၢအဂ့ၤတဖၣ်လီၤ.
46 ဒီးတုၤအထံၣ်န့ၢ်တၢ်မျၢ်ပလဲလၢအလုၢ်ဒိၣ်ပှ့ၤဒိၣ်မးတဖျၢၣ် ဒီးအဝဲလဲၤဆါလီၤကွံာ်တၢ်ခဲလၢာ်လၢအအိၣ်ဒီးအီၤဒီးဟဲက့ၤ ပှ့ၤန့ၢ်တၢ်မျၢ်ပလဲအဝဲန့ၣ်လီၤ.
47 မၤကဒီးတစုမူခိၣ်အဘီအမုၢ်န့ၣ်လီၤဂာ်ဒီးစၤလၢ အဘၣ်တၢ်တ့ၢ်လီၤအီၤလၢပီၣ်လဲၣ်အပူၤဒီးဖီၣ်န့ၢ်ညၣ်ကိး ကလုာ်ဒဲးန့ၣ်လီၤ.
48 တုၤစၤအံၤပှဲၤဝဲဒီးညၣ်န့ၣ်ပှၤထုးထီၣ်အီၤဆူကၢၢ်ပၤနံၤ, ဝံၤပှၤဆ့ၣ်နီၤဒီးနီၤဖးလီၤညၣ်တဖၣ်လီၤ. ညၣ်လၢအဂ့ၤတဖၣ်န့ၣ်ဒၢနုာ်ဝဲလၢကုပူၤ, မ့မ့ၢ်ညၣ်လၢအတဂ့ၤတဖၣ်န့ၣ် ဘၣ်တၢ်စူးကွံာ်အီၤန့ၣ်လီၤ.
49 တုၤမုၢ်နံၤခံကတၢၢ်ဘၣ်န့ၣ်, တၢ်ကမၤအသးဒ်သိးအံၤလီၤ. ကလူးတဖၣ်ကဟဲဒီးနီၤဖးကွံာ်ပှၤအၢပှၤသီတဖၣ်လၢ ပှၤတီပှၤလိၤအကျါ,
50 ဒီးတ့ၢ်လီၤကွံာ်အဝဲသ့ၣ်ဆူမ့ၣ်အူအဖၣ်ကပူၤ, ဖဲအဝဲသ့ၣ်ကဟီၣ်တၢ်ယၢၤတၢ်ဒီးကအ့ၣ်စဃံးအမဲန့ၣ်လီၤ.”
51 ယ့ၣ်ၡူးသံကွၢ်အပျဲၢ်အဘီၣ်တဖၣ်ဒီးစံး, “မ့ၢ်သုနၢ်ပၢၢ်တၢ်တဖၣ်အံၤလံဧါ.” အဝဲသ့ၣ်စံးဆၢအီၤ,
“မ့ၢ်, ပနၢ်ပၢၢ်လံ.”
52 အဝဲစံးဆၢတၢ်ဒီးစံး, “လၢတၢ်န့ၣ်အဃိ ပှၤသ့တၢ်ဘူၣ်တၢ်ဘါအတၢ်သိၣ်တၢ်သီကိးဂၤဒဲးလၢအကဲထီၣ် အပျဲၢ်အဘီၣ်လၢမူခိၣ်အဘီအမုၢ်အပူၤန့ၣ်, မၤအသးဒ်ဟံၣ်ကစၢ်လၢ အထုးထီၣ်တၢ်အသီဒီးတၢ်အလီၢ်လံၤလၢအတၢ်ထူးတၢ်တီၤ အတၢ်ပာ်ဖှိၣ်လီၢ်အပူၤအသိးန့ၣ်လီၤ.”
(မၢ်ကူး ၆:၁-၆; လူၤကၣ် ၄:၁၆-၃၀)
53 ဒီးတုၤယ့ၣ်ၡူးကတိၤတၢ်ကတိၤဒိတဖၣ်အံၤဝံၤဒီး အဝဲဟးထီၣ်ကွံာ်ဖဲတၢ်လီၢ်အဝဲန့ၣ်လီၤ.
54 အဝဲက့ၤကဒါဝဲဆူဝ့ၢ်နစၤရ့း, ဒီးသိၣ်လီၤသီလီၤတၢ်လၢဘူၣ်ဘျီၣ်လၢအမ့ၢ် တၢ်ဘါလီၢ်တဖၣ်အပူၤလီၤ. ပှၤလၢအနၢ်ဟူအတၢ်သိၣ်လီၤသီလီၤတဖၣ် ကမၢကမၣ်ဝဲဒီးစံး, “ပှၤအံၤလဲၤမၤန့ၢ်အတၢ်ကူၣ်ဘၣ်ကူၣ်သ့ ဒီးတၢ်စိတၢ်ကမီၤလၢအကမၤတၢ်လီၤလးတဖၣ်အံၤဖဲလဲၣ်.
55 အဝဲဒၣ်အံၤတမ့ၢ်ပှၤစုသ့အဖိခွါဘၣ်ဧါ. အမိၢ်န့ၣ်တမ့ၢ်နီၢ်မၤရံဘၣ်ဧါ. ဒီးအဒီပုၢ်ဝဲၢ်တဖၣ်န့ၣ် တမ့ၢ်ဘၣ်စီၤယၤကိာ်, စီၤယိၤသး, ဒီးစီၤၡံမိၣ်ဒီးစီၤယူဒၤတဖၣ်န့ၣ်ဘၣ်ဧါ.
56 ဒီးအဒီပုၢ်ဝဲၢ်မုၣ်တဖၣ်န့ၣ်အိၣ်ဒီးပှၤဖဲအံၤခဲလၢာ်တမ့ၢ် ဘၣ်ဧါ. အဝဲလဲၤမၤန့ၢ်တၢ်ကူၣ်ဘၣ်ကူၣ်သ့ဒီးတၢ်စိတၢ်ကမီၤလၢ ကမၤတၢ်လီၤလးတဖၣ်အံၤဖဲလဲၣ်.”
57 ဒီးအဝဲသ့ၣ်အသးက့ၣ်ယ့ၣ်ၡူးဒီး တပာ်ကဲလၢၤအီၤဘၣ်.
ယ့ၣ်ၡူးစံးဘၣ်အဝဲသ့ၣ်, “တၢ်လၢဝံန့ၣ်, မ့တမ့ၢ်ဘၣ်လၢအထံအကီၢ်ဒၣ်ဝဲဒီးအဟံၣ်အဃီဒၣ်ဝဲအပူၤဘၣ်ဒီး, တၢ်ပာ်ဒိၣ်ပာ်ကဲအီၤလၢတၢ်လီၢ်အဂုၤအဂၤကိးပူၤဒဲးန့ၣ်လီၤ.”
58 ယ့ၣ်ၡူးတမၤတၢ်လီၤလးအါအါဖဲန့ၣ်ဘၣ်, မ့ၢ်လၢအဝဲသ့ၣ်အတၢ်နာ်အီၤတအိၣ်ဘၣ်အဃိလီၤ.