12
(မၢ်ကူး ၂:၂၃-၂၈; လူၤကၣ် ၆:၁-၅)
1 တယံာ်ဘၣ်အလီၢ်ခံယ့ၣ်ၡူးဒီးအပျဲၢ်အဘီၣ်တဖၣ်လဲၤခီဂာ်စံာ်ဧိၤ ပှဲၤဧိၤလၢပှၤယူဒၤဖိအမုၢ်အိၣ်ဘှံးအနံၤလီၤ. အပျဲၢ်အဘီၣ်တဖၣ်တၢ်သၣ် ဝံၤအသးဒီးဒဲးန့ၢ်ဘုစဲၤတဖၣ်ဒီးအီၣ်ဝဲလီၤ.
2 တုၤပှၤဖၤရံၤၡဲတဖၣ်ထံၣ်တၢ်အံၤဒီးအဝဲသ့ၣ်စံးဘၣ်ယ့ၣ်ၡူး, “ကွၢ်တက့ၢ်. နပျဲၢ်နဘီၣ်တဖၣ်မၤတၢ်အံၤလၢမုၢ်အိၣ်ဘှံးနံၤန့ၣ်မ့ၢ်တၢ်လၢ အထီဒါပတၢ်သိၣ်တၢ်သီလီၤ.”
3 ယ့ၣ်ၡူးစံးဆၢအဝဲသ့ၣ်, “မ့ၢ်သုတဖးဘၣ်တၢ်လၢစီၤဒၤဝံးမၤ တ့ၢ်ဝဲဖဲအဝဲဒီးပှၤအိၣ်ဒီးအီၤတဖၣ်သၣ်ဝံၤဝဲအကတီၢ်န့ၣ်ဘၣ်ဧါ.
4 အဝဲလဲၤနုာ်ဆူကစၢ်ယွၤအဟံၣ်ပူၤဒီးအဝဲသ့ၣ်အီၣ်ကိၣ်လၢ အဘၣ်တၢ်လုၢ်ထီၣ်အီၤဆူကစၢ်ယွၤတဖၣ်, လၢစီၤဒၤဝံးမ့ၢ်ဂ့ၤ, ပှၤလၢအအိၣ်ဒီးအီၤတဖၣ်မ့ၢ်ဂ့ၤ, တၢ်သိၣ်တၢ်သီတဟ့ၣ်အခွဲး လၢကအီၣ်ဝဲဘၣ်. တၢ်ဟ့ၣ်အခွဲးထဲပှၤလုၢ်တၢ်အခိၣ်တဖၣ်ကအီၣ်ဝဲ န့ၣ်လီၤ.
5 လၢမုၢ်အိၣ်ဘှံးအနံၤန့ၣ်, ပှၤလုၢ်တၢ်အဒိၣ်တဖၣ်လုၢ်ထီၣ်တၢ်ဒီး လုၣ်သ့ၣ်ခါပတာ်မုၢ်အိၣ်ဘှံးအနံၤအတၢ်သိၣ်တၢ်သီ, ဘၣ်ဆၣ်ဒီး အတၢ်ကမၣ်တအိၣ်ဘၣ်န့ၣ်မ့ၢ်သုတဖးဘၣ် လၢစီၤမိၤၡ့အတၢ်သိၣ်တၢ်သီအပူၤဘၣ်ဧါ.
6 ယတဲဘၣ်သု, တၢ်တမံၤလၢအကါဒိၣ်န့ၢ်ဒံးတၢ်လုၢ်ဟံၣ်န့ၣ်အိၣ်ဝဲ ဒၣ်ဖဲအံၤလီၤ.
7 တၢ်ကွဲးအသးစံးဝဲ, ‘ဘၣ်ယသးလၢတၢ်သူၣ်ကညီၤသးကညီၤ ဒီးတမ့ၢ်ဘၣ်တၢ်လုၢ်တၢ်ပာ်ဘၣ်’ (ဟိၤ.၆:၆). သုမ့ၢ်နၢ်ပၢၢ်တၢ် ကွဲးအသးအံၤအခီပညီနီၢ်နီၢ်ဒီးသုတစံၣ်ညီၣ်ဘၣ်ပှၤလၢအတၢ် ကမၣ်တအိၣ်တဖၣ်န့ၣ်ဘၣ်.
8 အဂ့ၢ်ဒ်အံၤ, ပှၤကညီအဖိခွါအံၤ မ့ၢ်မုၢ်အိၣ်ဘှံးနံၤအကစၢ်လီၤ.”
(မၢ်ကူး ၃:၁-၆; လူၤကၣ် ၆:၆-၁၁)
9 ယ့ၣ်ၡူးဟးထီၣ်ဖဲတၢ်လီၢ်န့ၣ်ဒီးလဲၤဝဲဆူအဝဲသ့ၣ်အဘူၣ်ဘျီၣ်လၢ အမ့ၢ်တၢ်ဘါလီၢ်,
10 ဖဲပှၤလၢအစုသံတခီပၤတဂၤအိၣ်ဝဲန့ၣ်လီၤ. ပှၤအိၣ်ဝဲဖဲန့ၣ်တနီၤလၢအသးအိၣ်ပာ်တၢ်ကမၣ်လၢယ့ၣ်ၡူး အလိၤအဃိသံကွၢ်အီၤဒီးစံး, “တၢ်မၤဘျါတၢ်လၢမုၢ်အိၣ်ဘှံးနံၤန့ၣ်, မ့ၢ်အထီဒါပတၢ်သိၣ်တၢ်သီဧါ.”
11 အဝဲစံးဘၣ်အဝဲသ့ၣ်, “ပှၤလၢသုကျါတဂၤအိၣ်ဒီးသိတဒုဒီး လၢမုၢ်အိၣ်ဘှံးအနံၤန့ၣ်, သိအံၤမ့ၢ်လီၤတဲာ်ဆူတၢ်ပူၤလၢအယိာ်မးတပူၤဒီးကမၤဝဲဒ် လဲၣ်. မ့ၢ်အဝဲတဟံးထီၣ်ဒီးထုးထီၣ်က့ၤဝဲဘၣ်ဧါ.
12 ပှၤကညီတဂၤအလုၢ်အပှ့ၤန့ၣ်, ဒိၣ်န့ၢ်အါန့ၢ်ဒံးသိတဒုတက့ၢ်လီၤ. လၢတၢ်န့ၣ်အဃိပတၢ်သိၣ်တၢ်သီဟ့ၣ်ပှၤအခွဲးလၢပကမၤစၢၤမၤဂ့ၤ တၢ်လၢမုၢ်အိၣ်ဘှံးနံၤကစီဒီလီၤ.”
13 တုၤနုၤတစုစံးဘၣ်ပှၤအစုသံတခီပၤတဂၤန့ၣ်, “ယူာ်ထီၣ်နစုတက့ၢ်.”
အဝဲယူာ်ထီၣ်အစုဒီးအစုန့ၣ်ဂ့ၤထီၣ်က့ၤဒ်လၢအတခီအသိးန့ၣ်လီၤ.
14 တၢ်န့ၣ်ဝံၤဒီးပှၤဖၤရံၤၡဲတဖၣ်ဟးထီၣ်ဒီးကူၣ်ထီၣ်ဖးလီၤ သကိးလၢအကမၤသံယ့ၣ်ၡူးအဂီၢ်လီၤ.
15 တုၤယ့ၣ်ၡူးနၢ်ဟူဝဲတၢ်ကူၣ်ထီၣ်ဖးလီၤထီဒါအီၤအံၤဒီး အဝဲဟးထီၣ်ကွံာ်လၢတၢ်လီၢ်န့ၣ်, ဒီးပှၤအါဒံအါဂၤပိာ်ထီၣ် အခံလီၤ. အဝဲမၤဘျါက့ၤပှၤဆူးပှၤဆါခဲလၢာ်,
16 ဒီးမၤလိာ်အဝဲသ့ၣ်လၢအသုတတဲဘၣ်ပှၤဂုၤပှၤဂၤလၢအဝဲအဂ့ၢ် တဂ့ၤလီၤ.
17 အဝဲမၤလိာ်တၢ်အံၤဒ်သိးအကဒုးလၢထီၣ်ပှဲၤထီၣ်တၢ်လၢ ကစၢ်ယွၤစံးတ့ၢ်ဝဲခီဖျိဝံယၡါယၤန့ၣ်လီၤ.
18 “အအံၤမ့ၢ်ယခ့ယပှၤလၢယဃုထၢထီၣ်အီၤ,
ပှၤတဂၤလၢယအဲၣ်, ဒီးဘၣ်ယသးလၢအီၤလီၤ.
ယကဟ့ၣ်လီၤအီၤလၢယသး,
ဒီးအဝဲကစံၣ်တဲၤတဲလီၤယတၢ်စံၣ်ညီၣ်ဆူ
ပှၤကလုာ်တဖၣ်အအိၣ်လီၤ.
19 အဝဲတအ့ၣ်လိာ်ဆိးက့လိာ်သးဒီးပှၤဂၤဒီး
တကိးပသူဘၣ်.
တကတိၤစ့ၢ်ကီးတၢ်လၢအကလုၢ်ဒိၣ်ဒိၣ်သွါသွါ လၢကျဲတဖၣ်အလိၤဘၣ်.
20 တပိၢ်တဘိလၢအသဘှံးန့ၣ်တမၤတဲာ်ကွံာ်ဘၣ်ဝဲဘၣ်.
ဒီးမ့ၣ်အူဒၢလၢအကပီၤပံာ်လ့ပံာ်လ့န့ၣ်
တမၤလီၤပံာ်ကွံာ်ဝဲဘၣ်,
ဒီးကကျဲးစၢးဝဲတုၤလီၤလၢတၢ်တီတၢ်လိၤ
မၤနၢၤတၢ်တစုလီၤ.
21 ဒီးပှၤကလုာ်တဖၣ်ကပာ်အတၢ်မုၢ်လၢ်လၢ
အမံၤအပူၤလီၤ” (ၡါ.၄၂:၁-၄).
(မၢ်ကူး ၃:၂၀-၃၀; လူၤကၣ် ၁၁:၁၄-၂၃)
22 ပှၤတနီၤဟဲကိးပှၤလၢတၢ်နါဒိးအီၤ, ဒီးအမဲာ်တထံၣ်တၢ်ဒီးအုးအးတဂၤ ဆူယ့ၣ်ၡူးအအိၣ်လီၤ. ယ့ၣ်ၡူးမၤဘျါက့ၤအီၤဒီးအဝဲဒၣ်ကတိၤထီၣ်တၢ်ဒီးထံၣ်ထီၣ်က့ၤတၢ်လီၤ.
23 ပှၤအိၣ်ဖဲန့ၣ်ခဲလၢာ်ကမၢကမၣ်ဝဲဒိၣ်ဒိၣ်ကလဲာ်လၢတၢ်လၢယ့ၣ်ၡူး မၤဝဲအဃိဒီးစံး, “ပှၤအံၤတမ့ၢ်စီၤဒၤဝံးအဖိခွါဘၣ်ဧါ.”
24 ဘၣ်ဆၣ်တုၤပှၤဖၤရံၤၡဲတဖၣ်နၢ်ဟူတၢ်အံၤဒီးအဝဲသ့ၣ်စံးဆၢ တၢ်ဒီးစံး, “အဝဲနီၣ်ထီၣ်ဟီထီၣ်ကွံာ်တၢ်နါမ့ၢ်ဒၣ်လၢတၢ်နါအခိၣ်ဘဧၤလးစဘူာ်ဟ့ၣ်အီၤတၢ်စိတၢ်ကမီၤအဃိလီၤ.”
25 ယ့ၣ်ၡူးသ့ၣ်ညါအဝဲသ့ၣ်အတၢ်ဆိကမိၣ်ဒီးစံးဘၣ်အဝဲသ့ၣ်, “ထံကီၢ်တဘ့ၣ်လၢအမၤလီၤဖးလီၤအသးဒီးအ့ၣ်လိာ်ဆိးက့လိာ်အသးန့ၣ်, အိၣ်ဂၢၢ်ဆိးကျၢၤယံာ်ယံာ်တသ့ဘၣ်. ခူဝ့ၢ်မ့ၢ်ဂ့ၤ, ဒူၣ်ဖိထၢဖိမ့ၢ်ဂ့ၤ, လၢအမၤလီၤဖးလီၤအသးန့ၣ်ကလီၤပှီၢ်ကွံာ်ဝဲလီၤ.
26 မုၣ်ကီၤလံၢ်မ့ၢ်နီၣ်ထီၣ်ဟီထီၣ်ကွံာ်မုၣ်ကီၤလံၢ်ဒီး, အဝဲလီၤဖးဒီးအကစၢ်ဒၣ်ဝဲလံ. မ့မ့ၢ်ဒ်န့ၣ်ဒီး, အဘီအမုၢ်ကအိၣ်ဂၢၢ်ကျၢၤဒ်လဲၣ်.
27 သုမ့ၢ်စံးလၢယနီၣ်ထီၣ်ဟီထီၣ်ကွံာ်တၢ်နါတဖၣ်ခီဖျိတၢ်စိကမီၤလၢ ဘဧၤလးစဘူာ်ဟ့ၣ်ယၤဒီး, သုပှၤတဖၣ်ဟီထီၣ်ကွံာ်တၢ်နါခီဖျိမတၤလဲၣ်. မၤသးဒ်န့ၣ်ဒီး, အဝဲသ့ၣ်ကကဲထီၣ်ပှၤစံၣ်ညီၣ်သုလီၤ.
28 ကစၢ်ယွၤအသးမ့ၢ်ဟ့ၣ်ယၤတၢ်စိတၢ်ကမီၤလၢယကနီၣ်ထီၣ်ဟီထီၣ်ကွံာ်တၢ် နါတဖၣ်ဒီး, အအံၤမ့ၢ်တၢ်လၢအဒုးနဲၣ်လၢကစၢ်ယွၤအဘီအမုၢ်န့ၣ်ဟဲတုၤအိၣ်သု လံ.
29 မ့တမ့ၢ်ဘၣ်လၢဟံၣ်ကစၢ်လၢအမ့ၢ်ပှၤအဂံၢ်ဆူၣ်ဘါဆူၣ်တဂၤ ဘၣ်တၢ်စၢဃာ်ဆိအီၤဘၣ်ဒီး, ပှၤလဲၤနုာ်ဆူအဟံၣ်ပူၤဒီးဂုာ် န့ၢ်အတၢ်ဖိတၢ်လံၤတသ့ဘၣ်နီတဂၤဘၣ်. ပှၤဂုာ်န့ၢ်အတၢ်ဖိတၢ်လံၤကသ့ဒၣ်ဖဲလၢပှၤ စၢဃာ်အီၤဝံၤအလီၢ်ခံန့ၣ်လီၤ.
30 ပှၤတဂၤလၢ်လၢ်လၢအတအိၣ်ဒီးယၤဘၣ်န့ၣ်, မ့ၢ်ပှၤလၢအထီဒါယၤလီၤ. ပှၤလၢအတမၤစၢၤယၤလၢတၢ်ထၢဖှိၣ်က့ၤတၢ်အပူၤန့ၣ်, မ့ၢ်ပှၤလၢအမၤလီၤပြံလီၤပြါတၢ်လီၤ.
31 လၢတၢ်န့ၣ်အဃိယစံးဘၣ်တဲဘၣ်သု, ကယဲၢ်တၢ်ဒဲးဘးဒီးတၢ်ကတိၤအၢကတိၤသီခဲလၢာ်န့ၣ်ယွၤ ကပျၢ်န့ၢ်ပှၤကညီလီၤ. မ့မ့ၢ်တၢ်ကတိၤအၢ, တၢ်ကတိၤကမၣ်ဘၣ်ယွၤအသးစီဆှံန့ၣ်, ယွၤတပျၢ်န့ၢ်ပှၤကညီဘၣ်.
32 ပှၤတဂၤလၢ်လၢ်လၢအကတိၤထီဒါပှၤကညီဖိခွါန့ၣ်, ယွၤပျၢ်အတၢ်ကမၣ်သ့လီၤ. မ့မ့ၢ်ပှၤတဂၤလၢ်လၢ်လၢအကတိၤထီဒါကစၢ်ယွၤအသးစီဆှံန့ၣ်, အအံၤတဃၣ်မ့ၢ်ဂ့ၤ, ခဲကိာ်တဃၣ်မ့ၢ်ဂ့ၤ, ယွၤတပျၢ်အတၢ်ကမၣ်ဘၣ်.
(လူၤကၣ် ၆:၄၃-၄၅)
33 ဒ်သိးနကန့ၢ်ဘၣ်သ့ၣ်သၣ်လၢအဂ့ၤန့ၣ်, နကဘၣ်အိၣ်ဒီးသ့ၣ်လၢ အဂ့ၤလီၤ. သ့ၣ်လၢအတဂ့ၤန့ၣ်ဟ့ၣ်ထီၣ်သ့ၣ်သၣ်လၢအတဂ့ၤလီၤ. အဂ့ၢ်ဒ်အံၤ, သ့ၣ်မ့ၢ်တၢ်ဒ်လဲၣ်န့ၣ်အသၣ်လီၣ်ဖျါထီၣ်အီၤလီၤ.
34 ဂုၢ်ဘီၣ်အီးသ့ၣ်ဧၢ, မ့ၢ်သုအၢသုသီသတးဒီးသုကတိၤတၢ်ကတိၤအဂ့ၤကသ့ဒ်လဲၣ်. အဂ့ၢ်ဒ်အံၤတၢ်လၢအအိၣ်ပှဲၤလၢသးအပူၤန့ၣ်, ထးခိၣ်ကတိၤထီၣ်ဖျဲးဝဲလီၤ.
35 ပှၤအဂ့ၤန့ၣ်ဟံးထီၣ်ဟ့ၣ်ထီၣ်တၢ်အဂ့ၤလၢအဝဲအတၢ်ဂ့ၤအတၢ်ပာ် ဖှိၣ်လီၢ်အပူၤန့ၣ်လီၤ. ဒီးပှၤအအၢန့ၣ်လၢအဝဲအတၢ်အၢအတၢ်ပာ်ဖှိၣ်လီၢ်အပူၤန့ၣ်ဟံး ထီၣ်ဟ့ၣ်ထီၣ်တၢ်အၢလီၤ.
36 နာ်ယၤတက့ၢ်. လၢတၢ်စံၣ်ညီၣ်အမုၢ်တနံၤန့ၣ်, ပှၤကိးဂၤဒဲးကဘၣ်စံးဆၢတၢ်လၢကယဲၢ်အတၢ်ကတိၤကလီ ကလီကိးဘီဒဲးအဂီၢ်လီၤ.
37 အဂ့ၢ်ဒ်အံၤ, နကဘၣ်တၢ်ပာ်တီပာ်လိၤနၤလၢနတၢ်ကတိၤအဃိ, ဒီးနကဘၣ် တၢ်စံၣ်ညီၣ်ဃၣ်နၤလၢနတၢ်ကတိၤအဃိလီၤ.”
(မၢ်ကူး ၈:၁၁-၁၂; လူၤကၣ် ၁၁:၂၉-၃၂)
38 တုၤနုၤတစု, ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတနီၤဒီးပှၤ ဖၤရံၤၡဲတနီၤစံးဘၣ်ယ့ၣ်ၡူး, “သရၣ်ဧၢ, ပအဲၣ်ဒိးထံၣ်ဘၣ်နမၤတၢ်လီၤလး တမံၤလီၤ.”
39 ဘၣ်ဆၣ်ဒီးယ့ၣ်ၡူးစံးဆၢဝဲ, “ပှၤတစိၤလၢအအၢအသီဒီး အသးတတီဒီးယွၤသ့ၣ်ဧၢ, သုဃုတၢ်လီၤလးဘၣ်ဆၣ်တၢ်လီၤလးအဂၤ တဘၣ်တၢ်ဟ့ၣ်လီၤသုဘၣ်. ကဘၣ်တၢ်ဟ့ၣ်လီၤသုထဲဒၣ်တၢ်လီၤလးလၢ အမၤအသးဒီးဝံယိၤနါတမံၤဧိၤန့ၣ်လီၤ.
40 အဂ့ၢ်ဒ်အံၤ, ဒ်စီၤယိၤနါအိၣ်လၢညၣ်ဖးဒိၣ်အဟၢဖၢပူၤသၢနံၤသၢနၤ အသိးန့ၣ်, ပှၤကညီဖိခွါအံၤကအိၣ်လၢဟီၣ်ခိၣ်အသးကံၢ်ပူၤသၢနံၤသၢနၤ စ့ၢ်ကီးလီၤ.
41 လၢမုၢ်စံၣ်ညီၣ်အနံၤန့ၣ်, ပှၤဝ့ၢ်နံၤနဝ့ဖိတဖၣ်ကဆၢထၢၣ်ဒီးပှၤတစိၤအံၤဒီး ကစံၣ်ညီၣ်ဃၣ်အီၤလီၤ. အဂ့ၢ်ဒ်အံၤ, အဝဲသ့ၣ်ပီၢ်ယၢ်လီၤက့ၤအသး ဒီးဃၣ်လိၤက့ၤအသးဖဲအနၢ်ဟူစီၤယိၤနါအတၢ်စံၣ်တဲၤတဲလီၤန့ၣ်လီၤ. ယစံးဘၣ်တဲဘၣ်သု, တၢ်တမံၤအဒိၣ်န့ၢ်ဒီးစီၤယိၤနါအိၣ်ဖဲအံၤလီၤ.
42 လၢမုၢ်စံၣ်ညီၣ်အနံၤန့ၣ်ၡဘၤ အနီၢ်ပၤမုၣ်ကဂဲၤဆၢထၢၣ်ဒီး ပှၤတစိၤအံၤဒီးကစံၣ်ညီၣ်ဃၣ်အီၤလီၤ. အဂ့ၢ်ဒ်အံၤအဝဲဟဲဝဲလၢတၢ်ဒ့ၣ်စၢၤဖးယံၤ, ဒ်သိးအကဒိကနၣ်စီၤၡလိၤမိၤအတၢ်ကူၣ်ဘၣ်ကူၣ်သ့အတၢ်သိၣ်လီၤသီ လီၤတဖၣ်လီၤ.ယစံးဘၣ်တဲဘၣ်သု, တၢ်တမံၤလၢအဒိၣ်န့ၢ်ဒံးစီၤၡလိၤမိၤအိၣ်ဖဲအံၤလီၤ.”
(လူၤကၣ် ၁၁:၂၄-၂၆)
43 တုၤတၢ်နါအၢဟးထီၣ်လၢပှၤတဂၤအပူၤဒီးဟးဝ့ၤဝီၤဝဲလၢတၢ် ဃ့စိၢ်ဃ့ထီအလီၢ်တဖၣ်ဒီးဃုဝဲတၢ်အိၣ်ဘှံးအလီၢ်လီၤ. ဘၣ်ဆၣ်တထံၣ်န့ၢ်ဝဲဘၣ်.
44 တုၤနုၤတစုစံးလီၤက့ၤအသး, ‘ယကက့ၤကဒါက့ၤဆူယဟံၣ်လီၤ.’ ဒီးက့ၤဝဲဒီးထံၣ်န့ၢ်ဝဲလၢအအိၣ်ကလီ, ကဆှဲကဆှီဒီးဘၣ်တၢ်ကတဲာ်ကတီၤအီၤဂ့ၤဂ့ၤဘၣ်ဘၣ်လီၤ.
45 တုၤနုၤတစုအဝဲလဲၤကိးန့ၢ်တၢ်နါအၢန့ၢ်အနီၢ်ကစၢ်ဒၣ်ဝဲနွံ ဒုဒီးဟဲက့ၤအိၣ်ဝဲဆိးဝဲဖဲန့ၣ်လီၤ. တၢ်လၢပှၤတဂၤန့ၣ်အတၢ်မ့ၢ်တၢ်လၢခံကတၢၢ်အၢန့ၢ်ဒံးလၢအခီၣ် ထံးတက့ၢ်လီၤ. လၢတၢ်န့ၣ်အဃိ, တၢ်ကမၤစ့ၢ်ကီးအသးဒီးပှၤအၢပှၤသီ တစိၤအံၤဒ်န့ၣ်အသိးလီၤ.”
(မၢ်ကူး ၃:၃၁-၃၅; လူၤကၣ် ၈:၁၉-၂၁)
46 ဖဲယ့ၣ်ၡူးကတိၤဒံးတၢ်ဒီးပှၤတဖၣ်အဖၢမုၢ်န့ၣ်, အမိၢ်ဒီးအဒီပုၢ်ဝဲၢ်တဖၣ်ဟဲတုၤဝဲလၢတၢ်ချၢဒီးဃ့ ကတိၤတၢ်ဒီးအီၤလီၤ.
47 ပှၤအိၣ်ဖဲပှၤတဖၣ်န့ၣ်အကျါတဂၤစံးဘၣ်အီၤ, “နမိၢ်ဒီးနဒီပုၢ်ဝဲၢ်တဖၣ် ဆၢထၢၣ်လၢတၢ်ချၢဒီးသးအိၣ်ကတိၤတၢ်ဒီးနၤလီၤ.”
48 ယ့ၣ်ၡူးစံးဆၢတၢ်ဒီးစံးဝဲ, “ယမိၢ်မ့ၢ်မတၤတဂၤလဲၣ်, ဒီးယဒီပုၢ်ဝဲၢ်မ့ၢ်မတၤတဖၣ်လဲၣ်.”
49 အဝဲယူာ်ဃီၤအစုဆူအပျဲၢ်အဘီၣ်တဖၣ်အအိၣ်ဒီးစံး, “ယမိၢ်ဒီးယဒီပုၢ်ဝဲၢ်တဖၣ်အိၣ်ဖဲအံၤလီၤ.
50 အဂ့ၢ်ဒ်အံၤ, ပှၤတဂၤလၢ်လၢ်လၢအမၤဖဲဒၣ်ယပၢ်အိၣ်လၢမူခိၣ် အတၢ်ဘၣ်အသးန့ၣ်, မ့ၢ်ယဒီပုၢ်ဝဲၢ်ခွါ, ယဒီပုၢ်ဝဲၢ်မုၣ်ဒီးယမိၢ်လီၤ.”