2
(မး.၉:၁-၈; လူၤ.၅:၁၇-၂၆)
1 စှၤနံၤစှၤသီပူၤကွံာ်ဝံၤအလီၢ်ခံဒီး, ယ့ၣ်ၡူးက့ၤကဒါက့ၤဝဲဆူဝ့ၢ် ကပ့းရနီၣ်ဒီးတၢ်ကစီၣ်ဟူထီၣ်သါလီၤလၢအဝဲဒၣ်အိၣ်လၢဟံၣ်ပူၤလီၤ.
2 ပှၤသ့ၣ်တဖၣ်ဟဲပာ်ဖှိၣ်ထီၣ်အသးအါမးတုၤဒၣ်လဲာ်ဖဲတြဲၤခီၣ် ထံးန့ၣ်တၢ်လီၢ်တအိၣ်လၢၤဘၣ်န့ၣ်လီၤ. ဒီးယ့ၣ်ၡူးစံၣ်တဲၤတဲလီၤယွၤကလုၢ်ကထါလၢအဝဲသ့ၣ်ကနၢ်ဟူဝဲ အဂီၢ်န့ၣ်လီၤ.
3 အကတီၢ်ဖဲန့ၣ်, ပှၤလွံၢ်ဂၤဟဲစိာ်ဃုာ်ဒီးပှၤသံတခီပၤတဂၤဆူ အအိၣ်လီၤ.
4 မ့ၢ်လၢပှၤဂီၢ်မုၢ်အါဒိၣ်မးဒီးအဝဲသ့ၣ်ကလဲၤစိာ်ဘူးထီၣ် ပှၤတဂၤန့ၣ်ဆူယ့ၣ်ၡူးအအိၣ်တသ့ဘၣ်အဃိ, ဘၢၣ်ဖျိကွံာ်ဟံၣ်ခိၣ်ဒုးလိၤလိၤဖဲယ့ၣ်ၡူးအိၣ်တၢ်အလီၢ် အဖီခိၣ်ဝံၤ, စဲၤလီၤလီၢ်မံလၢပှၤဆါမံနီၤဝဲလၢအပူၤန့ၣ်လီၤ.
5 တုၤယ့ၣ်ၡူးထံၣ်ဘၣ်အဝဲသ့ၣ်အတၢ်နာ်လၢအအါဝဲန့ၣ်ဒီး, စံးဘၣ်ပှၤသံတခီပၤတဂၤန့ၣ်, “ယဖိခွါဧၢ, နတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤလံ.”
6 အကတီၢ်ဖဲန့ၣ်ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်ဆ့ၣ်နီၤ ကနၣ်တၢ်ဒီးဆိကမိၣ်ထီၣ်ဝဲလၢအသးကံၢ်ပူၤ,
7 “ပှၤတဂၤအံၤကတိၤတၢ်ဒ်န့ၣ်ကသ့ဒ်လဲၣ်. မ့ၢ်တၢ်ကတိၤတရီတပါယွၤလီၤ. မ့တမ့ၢ်ဘၣ်ထဲကစၢ်ယွၤတဂၤဧိၤဒီးပှၤဂၤပျၢ်တၢ်ကမၣ်တသ့နီတဂၤဘၣ်.”
8 တဘျီဃီယ့ၣ်ၡူးသ့ၣ်ညါတၢ်လၢအဝဲသ့ၣ်ဆိကမိၣ်ဝဲလၢအသး ကံၢ်ပူၤဒီးစံးဘၣ်အဝဲသ့ၣ်, “ဘၣ်မနုၤသုဘၣ်အိၣ်ဒီးတၢ်ဆိကမိၣ်ဒ်သိးအံၤတဖၣ်လၢသုသး ကံၢ်ပူၤန့ၣ်လဲၣ်.
9 ယကစံးဘၣ်ပှၤသံတခီပၤတဂၤအံၤကညီဖဲလဲၣ်တမံၤလဲၣ်. ‘နတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤလံ’ န့ၣ်ဧါ. မ့တမ့ၢ်ဘၣ်ဒီး ‘ဂဲၤဆၢထၢၣ်စိာ်ထီၣ်နလီၢ်မံဒါဒီးဟးတက့ၢ်’ န့ၣ်ဧါ.
10 ဘၣ်ဆၣ်ဒီး, ဒ်သိးသုကသ့ၣ်ညါလၢပှၤကညီဖိခွါတဂၤအံၤအိၣ်ဒီး အစိကမီၤလၢဟီၣ်ခိၣ်ချၢလၢကပျၢ်ကွံာ်ပှၤအတၢ်ဒဲးဘးတဖၣ်န့ၣ်ဒီး, ယကဒုးနဲၣ်ဖျါထီၣ်အီၤလီၤ.” အန့ၣ်ဒီးအဝဲဒၣ်စံးဘၣ်ပှၤသံတခီပၤတဂၤန့ၣ်,
11 “ယမၤလိာ်နၤလီၤ. ဂဲၤဆၢထၢၣ်ဟံးထီၣ်နလီၢ်မံဒီးက့ၤဆူနဟံၣ်တက့ၢ်.”
12 ဖဲပှၤကိးဂၤဒဲးကွၢ်အီၤအခါ, ပှၤတဂၤန့ၣ်ဂဲၤဆၢထၢၣ်ဟံးထီၣ်အလီၢ်မံဒါ ဒီးဟးထီၣ်ကွံာ်ဝဲလီၤ. ပှၤသ့ၣ်တဖၣ်လၢအထံၣ်တၢ်မၤအသးအဝဲအံၤကိးဂၤဒဲးန့ၣ်, ကမၢကမၣ်ဝဲဒိၣ်မးဒီးစံးထီၣ်ပတြၢၤကစၢ်ယွၤဒီးစံးဝဲ, “တၢ်မၤအသးဒ်သိးအံၤပတထံၣ်ဘၣ်ဒံးနီတစုနီတခီၣ်ဘၣ်.”
(မး.၉:၉-၁၃; လူၤ.၅:၂၇-၃၂)
13 ယ့ၣ်ၡူးဟးထီၣ်ဒီးလဲၤကဒီးဝဲဆူပီၣ်လဲၣ်ကၤလံၤလါအနံၤဒီး ပှၤဂီၢ်မုၢ်တဖၣ်ဟဲဆူအအိၣ်ဒီးအဝဲဒၣ်သိၣ်က့ၤသီက့ၤအဝဲသ့ၣ်လီၤ.
14 ဖဲအလဲၤကဒီးဝဲဆူညါအခါန့ၣ်, ထံၣ်ပှၤဃ့သွဲတဂၤလၢအမ့ၢ်စီၤအၤလဖဲ အဖိခွါစီၤလ့ၤဝံဆ့ၣ်နီၤဝဲလၢအဝဲၤဒၢးပူၤန့ၣ်လီၤ. ယ့ၣ်ၡူးစံးဘၣ်အီၤ, ‘ဟဲဒီးကဲထီၣ်ဘၣ်ယပျဲၢ်ယဘီၣ်တက့ၢ်.’ အဝဲဒၣ်ဂဲၤဆၢထၢၣ်ဒီးပိာ်ထီၣ်အခံလီၤ.
15 လၢခံတယံာ်ဘၣ်ဒီးယ့ၣ်ၡူးဆ့ၣ်နီၤအီၣ်တၢ်အီၣ်လၢစီၤလ့ၤဝံအဟံၣ် ပူၤလီၤ. ပှၤဃ့သွဲဒီးပှၤတၢ်ဒဲးဘးဖိလၢ အဘၣ်တၢ်ဟီထီၣ်ကွံာ်အီၤဒီးပိာ်ထီၣ်အခံတဖၣ်န့ၣ် ဆ့ၣ်နီၤအီၣ်သကိးဃုာ်တၢ်ဒီးယ့ၣ်ၡူးဒီးအပျဲၢ်အဘီၣ်တဖၣ်ဖဲ စီၢ်နီၤခိၣ် န့ၣ်လီၤ.
16 တုၤပှၤသ့လံာ်တၢ်သိၣ်တၢ်သီတနီၤလၢအမ့ၢ်ပှၤဖၤရံၤၡဲတဖၣ် ထံၣ်ဘၣ်ယ့ၣ်ၡူးအီၣ်သကိးတၢ်ဒီးပှၤဘၣ်တၢ်ဟီထီၣ်ကွံာ်အီၤဒီး ပှၤဃ့သွဲတဖၣ်အံၤဒီး, အဝဲသ့ၣ်သံကွၢ်အပျဲၢ်အဘီၣ်တဖၣ်ဒီးစံး, “ဘၣ်မနုၤလၢအဝဲဒၣ်အီၣ်ဃုာ်အီဃုာ်သကိးတၢ်ဒီးပှၤဒ်သိး အံၤတဖၣ်န့ၣ်လဲၣ်.”
17 တုၤယ့ၣ်ၡူးနၢ်ဟူတၢ်အံၤဒီးစံးဘၣ်ပှၤတဖၣ်န့ၣ်, “ပှၤလၢအအိၣ်ဆူၣ်အိၣ်ချ့န့ၣ်တလိၣ်ဘၣ်ကသံၣ်သရၣ်ဘၣ်. မ့ၢ်ပှၤဆူးပှၤဆါတခီလီၤ. ယတဟဲယဲလၢယကကိးန့ၢ်ပှၤတီပှၤလိၤ အဂီၢ်ဘၣ်. ယဟဲလၢယကကိးန့ၢ်ပှၤတၢ်ဒဲးဘးဖိလၢအဘၣ် တၢ်ဟီထီၣ်ကွံာ်အီၤတဖၣ်အဂီၢ်လီၤ.”
(မး.၉:၁၄-၁၇; လူၤ.၅:၃၃-၃၉)
18 ဘၣ်တနံၤ, ဖဲစီၤယိၤဟၣ်အပျဲၢ်အဘီၣ်တဖၣ်ဒီးပှၤပိာ်ဖၤရံၤၡဲအခံ တဖၣ်ဒုၣ်တၢ်အီၣ်တၢ်အီအကတီၢ်န့ၣ်, ပှၤအိၣ်ဝဲတနီၤလၢအဟဲဆူယ့ၣ်ၡူးအအိၣ်ဒီးသံကွၢ်အီၤ, “ဘၣ်မနုၤစီၤယိၤဟၣ်အပျဲၢ်အဘီၣ်တဖၣ်ဒီး ပှၤပိာ်ဖၤရံၤၡဲအခံတဖၣ်ဒုၣ်တၢ်အီၣ်တၢ်အီ, မ့မ့ၢ်နပျဲၢ်နဘီၣ်တဖၣ်တဒုၣ်တၢ်အီၣ်တၢ်အီန့ၣ်လဲၣ်.”
19 ဒီးယ့ၣ်ၡူးစံးဆၢအဝဲသ့ၣ်, “ပှၤလၢအဘၣ်တၢ်ကွဲအီၤဆူတၢ်ဖျီ အမူးတဖၣ်, ဖဲတလးမူးပိာ်ခွါအိၣ်ဒံးလၢအဝဲသ့ၣ်အကျါအခါ ဒုၣ်တၢ်အီၣ်တၢ်အီဘၣ်ကသ့ဧါ. တလးမူးပိာ်ခွါတဂၤမ့ၢ်အိၣ်ဒံးလၢအဝဲသ့ၣ်အကျါဒီး, အဝဲသ့ၣ်ဒုၣ်တၢ်အီၣ်တၢ်အီတသ့ဘၣ်.
20 ဘၣ်ဆၣ်ဒီးမုၢ်ကအိၣ်ဝဲတနံၤလၢတလးမူးပိာ်ခွါန့ၣ်ကဘၣ် တၢ်ဟံးထီၣ်ကွံာ်အီၤလၢအဝဲသ့ၣ်အအိၣ်, ဒီးတုၤနုၤတစုအဝဲသ့ၣ်ကဒုၣ်တၢ်အီၣ်တၢ်အီန့ၣ်လီၤ.
21 ပှၤလၢအကဟံးန့ၢ်တၢ်ကံးယာ်အသီတဘ့ၣ်ဒီးဆးကျးထီၣ် က့ၤအီၤလၢဆ့ကၤလီၢ်လံၤဖီခိၣ်န့ၣ်တအိၣ်နီတဂၤဘၣ်. မ့ၢ်မၤဝဲဒ်န့ၣ်ဒီး, တၢ်ကံးယာ်အသီတက့အံၤကသံးအသးဒီးထုးယာ်ကွံာ်တၢ်လီၢ်လံၤ ဒီးတၢ်ယာ်တပူၤန့ၣ်ကလဲၢ်န့ၢ်ဒံးအလီၢ်တက့ၢ်လီၤ.
22 စပံးထံအသီစ့ၢ်ကီး, ပှၤတဒၢနုာ်အီၤလၢထံဒၢတၢ်ဖံးလီၢ်လံၤတဖၣ်အပူၤနီတဂၤဘၣ်. မ့ၢ်ဒၢနုာ်ဝဲဒီး, စပံးထံန့ၣ်ကမၤပိၢ်ဖးကွံာ်ထံဒၢတၢ်ဖံးတဖၣ်လီၤ. အန့ၣ်ဒီး, စပံးထံဒီးထံဒၢတၢ်ဖံးတဖၣ်ကဟးဂီၤကွံာ်ခံမံၤလၢာ်လီၤ. မ့မ့ၢ်တခီ, စပံးထံအသီန့ၣ်ပှၤဘၣ်ဒၢနုာ်အီၤလၢထံဒၢတၢ်ဖံးအသီတဖၣ် အပူၤလီၤ.”
(မး.၁၂:၁-၈; လူၤ.၆:၁-၅)
23 ဘၣ်ဖဲပှၤယူဒၤဖိအမုၢ်အိၣ်ဘှံးနံၤတနံၤန့ၣ်, ယ့ၣ်ၡူးလဲၤခီဖျိစံာ်ပျီတဘ့ၣ်ဃုာ်ဒီးအပျဲၢ်အဘီၣ်တဖၣ်လီၤ. ဖဲအလဲၤတၢ်အဖၢမုၢ်ဒီး, အပျဲၢ်အဘီၣ်တဖၣ်ဒဲးအီၣ်ဘုစဲၤတဖၣ်လီၤ.
24 အန့ၣ်ဒီး, ပှၤဖၤရံၤၡဲတဖၣ်စံးဘၣ်ယ့ၣ်ၡူး, “နပျဲၢ်နဘီၣ်တဖၣ်ဒဲးအီၣ်ဘုစဲၤလၢမုၢ်အိၣ်ဘှံးနံၤအံၤနတထံၣ် ဘၣ်ဧါ. တၢ်တမံၤအံၤထီဒါပဝဲပှၤယူဒၤဖိအတၢ်သိၣ်တၢ်သီဘၣ်ဃးမုၢ် အိၣ်ဘှံးနံၤန့ၣ်လီၤ.”
25 ယ့ၣ်ၡူးစံးဆၢအဝဲသ့ၣ်, “ဘၣ်တဘျီဖဲစီၤဒၤဝံးတၢ်သၣ်ဝံၤအသးဒီးမ့ၢ်အမၤတၢ်ဒ်လဲၣ် န့ၣ်, သုတဖးဘၣ်အဂ့ၢ်ဘၣ်ဧါ. အဘျီအဝဲန့ၣ်အိၣ်ဃုာ်ဒီးပှၤပိာ်အခံတဖၣ်လၢတၢ်သၣ်ဝံၤ အသးန့ၣ်လီၤ.
26 အဝဲဒၣ်လဲၤနုာ်ဆူကစၢ်ယွၤအဟံၣ်ပူၤဒီးအီၣ်ဝဲကိၣ်လၢတၢ်လုၢ် ထီၣ်အီၤဆူကစၢ်ယွၤအအိၣ်န့ၣ်လီၤ. တၢ်မၤအသးအံၤမ့ၢ်ဖဲစီၤအ့ဘယၤသၢ်ကဲပှၤလုၢ်တၢ်အခိၣ် အဒိၣ်ကတၢၢ်အခါန့ၣ်လီၤ. မ့မ့ၢ်ဒ်ပတၢ်သိၣ်တၢ်သီအိၣ်ဝဲအသိး, ကိၣ်အံၤပှၤအီၣ်သ့ဒၣ်ထဲပှၤလုၢ်တၢ်အခိၣ်တဖၣ်ဧိၤန့ၣ်လီၤ. ဘၣ်ဆၣ်ဒီးစီၤဒၤဝံးအီၣ်ဝဲဒီးဟ့ၣ်အီၣ်ဒၣ်လဲာ်ပှၤပိာ်အခံတဖၣ်လီၤ.”
27 လၢအကတၢၢ်ယ့ၣ်ၡူးစံးဘၣ်အဝဲသ့ၣ်, “တၢ်လၢမုၢ်အိၣ်ဘှံးနံၤန့ၣ် တၢ်မၤအီၤလၢပှၤကညီအတၢ်ဂ့ၤအဂီၢ်လီၤ. ဒီးတမ့ၢ်တၢ်တ့လီၤပှၤကညီလၢမုၢ်အိၣ်ဘှံးနံၤအဂီၢ်န့ၣ်ဘၣ်.
28 သတးဒီးပှၤကညီဖိခွါအံၤမ့ၢ်မုၢ်အိၣ်ဘှံးနံၤအကစၢ်ဒၣ်လဲာ်န့ၣ်လီၤ.”