ဒ်စီၤမၢ်ကူး
ကွဲးဟ့ၣ်ယုၢ်လီၤဝဲအသိး
MARK
စီၤမၢ်ကူးအလံာ်တၢ်သးခုအကစီၣ်စးထီၣ်ဒီး တၢ်ကတိၤတထံၣ်လၢအစံးဝဲ, “တၢ်ကွဲးအံၤမ့ၢ်တၢ်သးခုအကစီၣ်ဘၣ်ဃးယ့ၣ်ၡူးခရံာ်, ယွၤအဖိခွါန့ၣ်လီၤ.” ကွဲးဖျါထီၣ်ဝဲလၢယ့ၣ်ၡူးမ့ၢ်ပှၤဖံးတၢ် မၤတၢ်အိၣ်ဒီးတၢ်စိကမီၤတဂၤန့ၣ်လီၤ. အတၢ်စိတၢ်ကမီၤ အံၤဖျါလၢအတၢ်သိၣ်လီၤသီလီၤတၢ်အပူၤ, လၢအမၤ နၢၤမၤဃၣ်ကွံာ်တၢ်နါတဖၣ်အပူၤ, ဒီးလၢအပျၢ်ပှၤကညီ အတၢ်ဒဲးဘးတဖၣ်အပူၤန့ၣ်လီၤ. ယ့ၣ်ၡူးတဲဖျါထီၣ်အသး လၢအမ့ၢ်ပှၤကညီဖိခွါ, လၢအဟဲဝဲလၢကဟ့ၣ်လီၤအသး သမူလၢကမၤထူၣ်ဖျဲးပှၤဟီၣ်ခိၣ်ဖိလၢတၢ်ဒဲးဘးအပူၤ အဂီၢ်န့ၣ်လီၤ.
လံာ်မၢ်ကူးပာ်ဖျါထီၣ်ယ့ၣ်ၡူးအဂ့ၢ်လၢတၢ်ကတိၤလိၤလိၤ ဒီးကျၢၤသူၣ်ကျၢၤသးမးအပူၤ, ဒီးတၢ်လၢယ့ၣ်ၡူးမၤဝဲန့ၣ်ကွဲးဖျါထီၣ်ဝဲအသယၢၢ်ဃၢန့ၢ်ဒံး တၢ်လၢယ့ၣ်ၡူးစံးကတိၤဝဲဒီးသိၣ်လီၤသီလီၤဝဲတဖၣ် တက့ၢ်န့ၣ်လီၤ. အတၢ်ကတိၤလၢညါကတၢၢ်လၢအဖုၣ်ဘၣ်ဃး ဘျၢတၢ်စီၤယိၤဟၣ်အဂ့ၢ်, ယ့ၣ်ၡူးအတၢ်ဒိးဘျၢအသးလၢထံ အဂ့ၢ်, ဒီးတၢ်လ့ပစီတဖၣ်ဘၣ်အီၤအဂ့ၢ်, ဝံၤအလီၢ်ခံတဘျီ ဃီကွဲးဖျါထီၣ်ဝဲယ့ၣ်ၡူးအတၢ်ဒိးသူအသးလၢတၢ်မၤဘျါက့ၤ ပှၤဆူးပှၤဆါတဖၣ်အဂီၢ်ဒီးလၢတၢ်သိၣ်လိသီလိပှၤအဂီၢ် န့ၣ်လီၤ. အဆၢကတီၢ်ယံာ်ထီၣ်ဒီးပှၤပိာ်ယ့ၣ်ၡူးအခံတဖၣ် နၢ်ပၢၢ်အီၤသ့အါထီၣ်, မ့မ့ၢ်ပှၤလၢအထီဒါအီၤတဖၣ် အတၢ်ထီဒါအီၤဆူၣ်ဒိၣ်ထီၣ်တက့ၢ်လီၤ. တၢ်ကွဲးအဆၢဒိၣ်တဖၣ်ဖဲလံာ်အံၤဘူးကကတၢၢ်န့ၣ် တဲဖျါတၢ်ဘၣ်ဃးတၢ်မၤအသးတဖၣ်လၢယ့ၣ်ၡူး အတၢ်အိၣ်မူအကတၢၢ်တနွံအပူၤအဂ့ၢ်, လီၤဆီဒၣ်တၢ်ဘၣ်ဃးအတၢ်ဒိးသံသးလၢထူၣ်စုညါ လိၤဒီးအတၢ်ဂဲၤဆၢထၢၣ်သမူထီၣ်က့ၤလၢတၢ်သံ အဂ့ၢ်န့ၣ်လီၤ.
1
(မး.၃:၁-၁၂; လူၤ.၃:၁-၁၈; ယိၤ.၁:၁၉-၂၈)
1 လံာ်တၢ်သးခုအကစီၣ်ဘၣ်ဃးယ့ၣ်ၡူးခရံာ်, ကစၢ်ယွၤအဖိခွါန့ၣ်အခီၣ်ထံးမ့ၢ်ဒ်အံၤလီၤ.
2 ဒ်တၢ်ကွဲးတ့ၢ်အသးလၢလံာ်ဝံယၡါယၤအပူၤအသိး,
“ကစၢ်ယွၤစံးဝဲဒၣ်, ကွၢ်ကွၢ်ယကဆှၢလီၤယပှၤစိာ်တၢ်ကစီၣ် လၢနမဲာ်ညါတဂၤ,
ဒီးအဝဲဒၣ်ကကတဲာ်ကတီၤန့ၢ်နကျဲလီၤ.
3 ပှၤတဂၤန့ၣ်ကိးသတြီထီၣ်လၢပှၢ်မုၢ်ကနၢဒီးစံးဝဲ,
ကတဲာ်ကတီၤဒီးမၤဘျၢပာ်ကျဲလၢကစၢ်အဂီၢ်တက့ၢ်.”
4 စီၤယိၤဟၣ်ဟဲဝဲဆူပှၢ်မုၢ်ကနၢဒီးဘျၢတၢ်ဒီးစံၣ်တဲၤတဲလီၤ တၢ်ဒီးစံးဝဲ, “ပီၢ်ယၢ်ဒီးဃၣ်လိၤက့ၤသုသးဒီးဒိးဘျၢသုသး လၢထံတက့ၢ်. ဒီးကစၢ်ယွၤကပျၢ်သုတၢ်ဒဲးဘးတဖၣ်န့ၣ်လီၤ.”
5 ပှၤအိၣ်လၢကီၢ်ယူဒၤဒီကီၢ်ညါဒီးပှၤလၢဝ့ၢ်ယရူၤၡလ့ၣ် အပူၤတဖၣ်လဲၤဒိကနၣ်စီၤယိၤဟၣ်အတၢ်စံၣ်တဲၤတဲလီၤ န့ၣ်လီၤ. အဝဲသ့ၣ်တဲလီၤကျဲၤလီၤအတၢ်ဒဲးဘးတဖၣ်ဒီးဘၣ် တၢ်ဘျၢအီၤလၢထံဖဲထံကျိယၢ်ဒ့ၣ်အပူၤန့ၣ်လီၤ.
6 စီၤယိၤဟၣ်ကူကၤဝဲတၢ်ကူတၢ်ကၤလၢပှၤထါအီၤလၢကီၤ လၤအူးအဆူၣ်ဒီးစၢဃာ်အယီၢ်ဒ့လၢယီၢ်တကိးတၢ်ဖံး တဘ့ၣ်လီၤ. အတၢ်အီၣ်တၢ်အီတခီမ့ၢ်ဒွဲၣ်ဧိၤတကံၤ ဧိၤဒီးကနဲမံၤအစီလီၤ.
7 အဝဲစံၣ်တဲၤတဲလီၤတၢ်ဒီးစံးဝဲ, “ပှၤလၢအကဟဲလၢယလီၢ်ခံတဂၤန့ၣ် မ့ၢ်ပှၤအိၣ်ဒီးအစိကမီၤဒိၣ်န့ၢ်ယၤတက့ၢ်လီၤ. ထဲယကသကူးလီၤယသးဒီးဃ့ၣ်လီၤအခီၣ်ဖံးအပျံၤဒၣ်လဲာ်န့ၣ် ယတကြၢးဘၣ်.
8 ယဲဒၣ်အံၤယဘျၢသုလၢထံလီၤ. မ့မ့ၢ်အဝဲဒၣ်ကဘျၢသုလၢသး စီဆှံလီၤ.”
(မး.၃:၁၃-၄:၁၁; လူၤ.၃:၂၁-၂၂; ၄:၁-၁၃)
9 တၢ်န့ၣ်ဝံၤအလီၢ်ခံတယံာ်တမီၢ်ဘၣ်န့ၣ်, ယ့ၣ်ၡူးဟဲဝဲလၢဝ့ၢ်နစၤရ့းဘၣ်ဃးဒီးကီၢ်ကၤလံၤလါဒီးဒိး ဘျၢအသးလၢစီၤယိၤဟၣ်အစုပူၤလၢထံကျိယၢ်ဒ့ၣ်အပူၤန့ၣ်လီၤ.
10 ယ့ၣ်ၡူးဟဲက့ၤထီၣ်က့ၤလၢထံကျါဝံၤတဘျီဃီအဝဲဒၣ်ထံၣ်မူ ခိၣ်အိးထီၣ်အသးဒီးယွၤအသးဟဲလီၤလၢအလိၤဒ်ထိၣ်လွံၢ် အသိးလီၤ.
11 ဒီးတၢ်ကလုၢ်သီၣ်ထီၣ်လၢမူခိၣ်လၢအစံးဝဲ, “နဲဒၣ်အံၤနမ့ၢ်ယဖိခွါလၢယအဲၣ်အီၤဒီးဘၣ်သူၣ်ဘၣ်သးယၤဒိၣ်မး တဂၤလီၤ.”
12 တဘျီဃီယွၤအသးမၢန့ၢ်ဆီၣ်ခံအီၤလၢအကလဲၤဆူပှၢ်မုၢ်ကနၢန့ၣ်လီၤ.
13 အဝဲဒၣ်အိၣ်ဖဲန့ၣ် အသီလွံၢ်ဆံဒီးဘၣ်တၢ်လ့ပစီအီၤလၢမုၣ်ကီၤလံၢ်လီၤ. ဆၣ်ဖိကီၢ်ဖိအမံၤတဖၣ်အိၣ်စ့ၢ်ကီးဖဲန့ၣ်, ဒီးမူခိၣ်ကလူးတဖၣ် ဟဲမၤတၢ်ခ့တၢ်ပှၤအတၢ်မၤလၢအဂီၢ်လီၤ.
(မး ၄:၁၂-၂၂; လူၤ ၄:၁၄-၁၅; ၅:၁-၁၁)
14 စီၤယိၤဟၣ်ဘၣ်တၢ်ဒၢနုာ်အီၤလၢဃိာ်ပူၤဝံၤအလီၢ်ခံ, ယ့ၣ်ၡူးဟဲဝဲဆူကီၢ်ကၤလံၤလါဒီးစံၣ်တဲၤတဲလီၤကစၢ်ယွၤ အတၢ်သးခုအကစီၣ်,
15 ဒီးစံးဝဲဒၣ်, “တၢ်ဆၢကတီၢ်ဘၣ်လံဒီးကစၢ်ယွၤအဘီအမုၢ်ဘူး ထီၣ်လံ. ပီၢ်ယၢ်ဒီးဃၣ်လိၤက့ၤသုသးဒီးစူၢ်က့ၤနာ်က့ၤတၢ်သးခု အကစီၣ်န့ၣ်တက့ၢ်.”
16 ဖဲယ့ၣ်ၡူးလဲၤတၢ်လၢပီၣ်လဲၣ်ကၤလံၤလါအနံၤအကတီၢ်န့ၣ်, အဝဲထံၣ်ဘၣ်စီၤၡံမိၣ်ဒီးအပုၢ်စီၤအၣ်ဒရ့းတ့ၢ်လီၤစၤလၢပီၣ် လဲၣ်ပူၤလီၤ. အဂ့ၢ်ဒ်အံၤအဝဲသ့ၣ်မ့ၢ်ပှၤမၤညၣ်ဖိတဖၣ်လီၤ.
17 ယ့ၣ်ၡူးစံးဘၣ်အဝဲသ့ၣ်, “ဟဲဒီးကဲဘၣ်ယပျဲၢ်ယဘီၣ်တက့ၢ်. ယကသိၣ်လိသုဒ်သိးသုကဒုးကဲထီၣ်ပှၤကညီလၢယပျဲၢ် ယဘီၣ်တဖၣ်လီၤ.”
18 တဘျီဃီအဝဲသ့ၣ်ပာ်တ့ၢ်ကွံာ်အစၤတဖၣ်ဒီးပိာ်ထီၣ်အခံလီၤ.
19 အဝဲလဲၤယံၤထီၣ်ကဒီးဆူညါတစဲးဒီးထံၣ်ဘၣ်စီၤစ့းဘ့းဒဲ အဖိခွါစီၤယၤကိာ်ဒီးအပုၢ်စီၤယိၤဟၣ်အိၣ်လၢချံပူၤဒီးဆးက့ၤ အစၤတဖၣ်လီၤ.
20 တဘျီဃီယ့ၣ်ၡူးကိးအဝဲသ့ၣ်, ဒီးအဝဲသ့ၣ်ပာ်တ့ၢ်အပၢ်စီၤစ့းဘ့းဒဲဒီးတၢ်ခ့တၢ်ပှၤ ဒိးလဲအသးတဖၣ်ဖဲချံပူၤန့ၣ်ဝံၤပိာ်ထီၣ်အခံလီၤ.
(လူၤ ၄:၃၁-၃၇)
21 ယ့ၣ်ၡူးဒီးအပျဲၢ်အဘီၣ်တဖၣ်လဲၤဝဲဆူဝ့ၢ်ကပ့းရနီၣ်, ဒီးပှၤယူဒၤဖိအမုၢ်အိၣ်ဘှံးနံၤတုၤဃီၤဝဲတဘျီဃီ, အဝဲဒၣ်လဲၤနုာ်ဆူဘူၣ်ဘျီၣ်လၢအမ့ၢ်တၢ်ဘါလီၢ်အပူၤဒီး သိၣ်လီၤသီလီၤတၢ်လီၤ.
22 ဒီးတုၤပှၤဂီၢ်မုၢ်တဖၣ်နၢ်ဟူအတၢ်သိၣ်လီၤသီလီၤဒီး, တၢ်လီၤကမၢကမၣ်ဘၣ်အဝဲသ့ၣ်လီၤ. အဂ့ၢ်ဒ်အံၤအဝဲဒၣ်သိၣ်လီၤသီလီၤတၢ်ဒ်ပှၤလၢအအိၣ်ဒီးတၢ်စိ တၢ်ကမီၤနီၢ်နီၢ်တဂၤအသိးဒီးတမ့ၢ်ဒ်ပှၤသ့တၢ်ဘူၣ်တၢ်ဘါ အတၢ်သိၣ်တၢ်သီတဖၣ်အသိးဘၣ်.
23 အကတီၢ်ဖဲန့ၣ်, ပှၤလၢတၢ်နါဒိးအီၤတဂၤဟဲနုာ်ဆူဘူၣ်ဘျီၣ်လၢ အမ့ၢ်တၢ်ဘါလီၢ်အပူၤန့ၣ်လီၤ.
24 အဝဲဒၣ်ကိးပသူထီၣ်ဒီးစံး, “ပှၤနစၤရ့းဖိယ့ၣ်ၡူးဧၢ, နတၢ်ဘၣ်ဃးဒီးပှၤအိၣ်မနုၤလဲၣ်. နဟဲလၢနကမၤဟးဂီၤကွံာ် ပှၤအဂီၢ်ဧါ. နမ့ၢ်မတၤတဂၤလဲၣ်န့ၣ်ယသ့ၣ်ညါနမ့ၢ်ပှၤစီဆှံ လၢကစၢ်ယွၤမၢလီၤအီၤတဂၤန့ၣ်လီၤ.”
25 ဘၣ်ဆၣ်ယ့ၣ်ၡူးဒူအလိၤဒီးစံး, “အိၣ်ဘှီၣ်ဒီးဟးထီၣ်ကွံာ်လၢပှၤတဂၤအံၤအပူၤတက့ၢ်.”
26 ဒီးတၢ်နါတရုၤဆှဲးဆှု ပှၤတဂၤန့ၣ်နးနးကလဲာ်ဝံၤ, ကိးပသူထီၣ်လၢအကလုၢ်ဖးဒိၣ်ဒီးဟးထီၣ်ကွံာ်လၢအပူၤလီၤ.
27 ပှၤလၢအထံၣ်ဘၣ်တၢ်မၤအသးတဖၣ်အံၤကမၢကမၣ်ဝဲဒိၣ်မးတုၤဒၣ် လဲာ်သံကွၢ်လိာ်အသးဒီးစံးဝဲ, “တၢ်အံၤမ့ၢ်တၢ်ဒ်လဲၣ်. တၢ်သိၣ်လီၤသီလီၤအံၤမ့ၢ်တၢ်အသီလီၤ. ပှၤတဂၤအံၤအိၣ်ဒီးအစိကမီၤလၢကဒူတၢ်နါတဖၣ်အလိၤတုၤဒၣ် လဲာ်အဝဲသ့ၣ်ဒိကနၣ်အီၤလီၤ.”
28 လၢတၢ်အံၤအဃိ, ယ့ၣ်ၡူးအကစီၣ်ဟူထီၣ်သါလီၤချ့မးသကုၤကီၢ်ကၤလံၤလါ အပူၤလီၤ.
(မး.၈:၁၄-၁၇; လူၤ.၄:၃၈-၄၁)
29 ယ့ၣ်ၡူးဒီးအပျဲၢ်အဘီၣ်တဖၣ်ဟးထီၣ်ကွံာ်လၢဘူၣ်ဘျီၣ်လၢ အမ့ၢ်တၢ်ဘါလီၢ်အပူၤအိၣ်ဃုာ်ဒီးစီၤယၤကိာ်ဒီး စီၤယိၤဟၣ် ဒီးလဲၤနုာ်ဆူစီၤၡံမိၣ်ဒီးစီၤအၣ်ဒရ့းအဟံၣ်ပူၤလီၤ.
30 အကတီၢ်ဖဲန့ၣ်စီၤၡံမိၣ်အမံၤပှၢ်ပိာ်မုၣ်အလိၤကိၢ်ဒီးဆိးက့မံနီၤ ဝဲဒၣ်လီၤ. ယ့ၣ်ၡူးဟဲတုၤတဘျီဃီဒီးပှၤတဲဘၣ်အီၤလၢအဝဲဒၣ် အဂ့ၢ်လီၤ.
31 ယ့ၣ်ၡူးလဲၤဃီၤဆူအအိၣ်, ဟံးထီၣ်အစုဒီးဝံၢ်ထီၣ်အီၤလီၤ. အတၢ်လိၤကိၢ်လီၤက့ၤတကီၢ်ခါဒီးအဝဲဒၣ်ဒုးအီၣ်ဒုးအီ အဝဲသ့ၣ်လီၤ.
32 ဒီးဟါအဝဲန့ၣ်ဖဲမုၢ်လီၤနုာ်ဝံၤအလီၢ်ခံ, ပှၤဟဲစိာ်ကယဲၢ်ပှၤဘၣ်ဆူးဘၣ်ဆါဒီးပှၤလၢတၢ်နါဒိးအီၤ တဖၣ်ဆူယ့ၣ်ၡူးအအိၣ်လီၤ.
33 ပှၤဝ့ၢ်ဖိအါဒံအါဂၤဟဲပာ်ဖှိၣ်ထီၣ်အသးလၢဟံၣ်မဲာ်ညါ အတြဲၤအခိၣ်အဃၢၤန့ၣ်လီၤ.
34 ဒီးအဝဲဒၣ်မၤဘျါက့ၤပှၤဆူးပှၤဆါလၢအဘၣ်န့ၢ်တၢ်ဆူးတၢ်ဆါ အကလုာ်ကလုာ်အါဒံအါဂၤလီၤ. ဟီထီၣ်ကွံာ်စ့ၢ်ကီးတၢ်နါအါဒုလီၤ. ဘၣ်ဆၣ်ဒီးတပျဲတၢ်နါတဖၣ်ကတိၤတၢ်နီတထံၣ်နီတဘီဘၣ်. မ့ၢ်လၢတၢ်နါတဖၣ်သ့ၣ်ညါဝဲလၢအမ့ၢ်မတၤတဂၤလဲၣ်အဃိလီၤ.
(လူၤ.၄:၄၂-၄၄)
35 လၢခံတဂီၤ, ဂီၤဂီၤကလဲာ်တချုးမုၢ်ဆ့ၣ်ထီၣ်န့ၣ်, ယ့ၣ်ၡူးဂဲၤဆၢထၢၣ်ဒီးဟးထီၣ်လၢဟံၣ်ပူၤဒီးလဲၤဝဲဆူတၢ် လီၢ်လၢပှၤတအိၣ်ဝဲနီတဂၤဘၣ်ဒီးဖဲန့ၣ်ဘါထုကဖၣ်တၢ်လီၤ.
36 စီၤၡံမိၣ်ဒီးအသကိးတဖၣ်ဟးထီၣ်လၢအလီၢ်ခံဒီးလူၤဃုက့ၤအီၤလီၤ.
37 တုၤအထံၣ်အီၤတစုဒီးအဝဲသ့ၣ်စံးဘၣ်အီၤ, “ပှၤကိးဂၤဒဲးဃုထံၣ်နၤလီၤ.”
38 အဝဲစံးဆၢတၢ်ဒီးစံး, “မ်ပလဲၤသကိးဆူဝ့ၢ်ဖိဝ့ၢ်ဆၣ်အဂုၤ အဂၤတက့ၢ်. ယကဘၣ်စံၣ်တဲၤတဲလီၤတၢ်လၢတၢ်လီၢ်တဖၣ်န့ၣ် အပူၤဒံး, အဂ့ၢ်ဒ်အံၤယဟဲလၢတၢ်န့ၣ်အဂီၢ်လီၤ.”
39 ဒီးလဲၤဝဲသကုၤကီၢ်ကၤလံၤလါ, စံၣ်တဲၤတဲလီၤတၢ်လၢဘူၣ်ဘျီၣ်လၢ အမ့ၢ်တၢ်ဘါလီၢ်တဖၣ်အပူၤဒီးဟီထီၣ်ကွံာ်တၢ်နါတဖၣ်လီၤ.
(မး.၈:၁-၄; လူၤ.၅:၁၂-၁၆)
40 ပှၤဘၣ်တၢ်ဆါအၢတဂၤဟဲဆူယ့ၣ်ၡူးအအိၣ်, ချံးခီၣ်တီၤလီၤလၢ အမဲာ်ညါ, ဒီးဃ့ကညးအီၤဒီးစံးဝဲဒၣ်, “နသးမ့ၢ်အိၣ်ဒီး, နမၤဘျါက့ၤယၤသ့လီၤ.”
41 ယ့ၣ်ၡူးသးကညီၤဘၣ်အီၤဒီးယူာ်ဃီၤအစုဒီးထိးဘၣ်အီၤဒီး စံးဝဲ, “ယသးအိၣ်နၤ, မ်နကဆှီထီၣ်က့ၤတက့ၢ်.”
42 တကီၢ်ခါဖဲန့ၣ်, အတၢ်ဆါလီၤမၢ်ကွံာ်ဒီးကဆှီထီၣ်က့ၤဝဲလီၤ.
43 အန့ၣ်တစုယ့ၣ်ၡူးမၢအဟးထီၣ်ဒီးမၤလိာ်အီၤဆူၣ်ဆူၣ် ကလဲာ်ဒီးစံးဝဲ,
44 “မ်နသုတစံးဘၣ်တဲဘၣ်တၢ်ဂ့ၢ်အံၤလၢပှၤနီတဂၤတဂ့ၤ. မ့မ့ၢ်လဲၤနဲတဘျီဃီဆူပှၤလုၢ်တၢ်အခိၣ်အအိၣ်ဒီးဒုးနဲၣ် နသးလၢအီၤတက့ၢ်. အန့ၣ်ဝံၤ, ဒ်သိးကကဲဒၣ်ဝဲတၢ်အုၣ်အသးလၢပှၤကိးဂၤဒဲးအမဲာ်ညါ လၢနဘျါက့ၤလံဒီး, လုၢ်ထီၣ်တၢ်လုၢ်ဒ်စီၤမိၤၡ့မၤလိာ် အသိးန့ၣ်တက့ၢ်.”
45 ဘၣ်ဆၣ်ဒီးပှၤအံၤဟးထီၣ်ဒီးရၤလီၤတၢ်ဂ့ၢ်အံၤသကုၤဆးဒး ဒီးတဲတၢ်အါဒိၣ်မးတုၤဒၣ်လဲာ်ယ့ၣ်ၡူးလဲၤနုာ်ဖျိဖျိဖျါဖျါ ဆူဝ့ၢ်ပူၤတသ့လၢၤဘၣ်. မ့မ့ၢ်ဘၣ်အိၣ်ဝဲလၢတၢ်လီၢ်လၢပှၤ တအိၣ်နီတဂၤ, ဒီးပှၤလၢတၢ်လီၢ်ကိးပူၤဒဲးဟဲဆူအအိၣ်လီၤ.