3
1 ပှၤတဂၤလၢ်လၢ်မ့ၢ်လုၢ်ထီၣ်အဂီၤဖံးဒ်တၢ်လုၢ်မၤဃူမၤဖိးအသိးန့ၣ်, ကဘၣ်မ့ၢ်ဂီၤဖံးအဖါတဒုမ့တမ့ၢ်အမိၢ်တဒုလၢအတအိၣ်ဒီးမဲၣ်သူ မဲၣ်ဂီၤဘၣ်န့ၣ်လီၤ.
2 ဒီးအဝဲကဘၣ်ပာ်အစုလၢဂီၤဖံးန့ၣ်အခိၣ်လိၤဒီးမၤသံအီၤဖဲ တၢ်ဘူၣ်ထီၣ်ဘါထီၣ်ယွၤအကျဲစၢၤန့ၣ်လီၤ. ဒီးပှၤလုၢ်တၢ်အခိၣ်လၢအလီၤစၢၤလၢစီၤအၤဟရိၣ်တဖၣ်ကဘၣ်လူလီၤ တၢ်သွံၣ်ဝးတရံးတၢ်လုၢ်လီၢ်န့ၣ်လီၤ.
3 ဒီးလုၢ်ထီၣ်တၢ်အသိလၢအအိၣ်လၢအပှံာ်ဒီးအကဖုအလိၤခဲလၢာ်,
4 အကလ့ၢ်ခံဖျၢၣ်ဒီးအသိအိၣ်လၢအလိၤ, ဒီးအသူၣ်အဂ့ၤက တၢၢ်တခီန့ၣ်လီၤ.
5 အန့ၣ်ဒီးပှၤလုၢ်တၢ်အခိၣ်တဖၣ်ကဆိၣ်ကဲၤထီၣ်ကွံာ်အီၤခဲလၢာ်ဃုာ် ဒီးတၢ်လုၢ်မ့ၣ်အူတဖၣ်လၢတၢ်လုၢ်လီၢ်အဖီခိၣ်န့ၣ်လီၤ. တၢ်လုၢ်အတၢ်နၢမူအံၤမၤမုာ်ယွၤအသးန့ၣ်လီၤ.
6 ဒီးတၢ်လုၢ်ထီၣ်သိမ့တမ့ၢ်မဲာ်တဲးလဲးလၢတၢ်လုၢ်မၤဃူမၤဖိး တၢ်အဂီၢ်န့ၣ်, ကဘၣ်မ့ၢ်အဖါမ့တမ့ၢ်အမိၢ်လၢအတအိၣ်ဒီး မဲၣ်သူမဲၣ်ဂီၤဘၣ်န့ၣ်လီၤ.
7 ဒီးပှၤတဂၤဂၤမ့ၢ်လုၢ်ထီၣ်အသိတဒုန့ၣ်,
8 အဝဲကဘၣ်ပာ်အစုလၢအသိအခိၣ်လိၤ, ဒီးမၤသံကွံာ်အီၤလၢတၢ်ဘူၣ် ထီၣ်ဘါထီၣ်ယွၤအဒဲအမဲာ်ညါဒီးပှၤလုၢ်တၢ်အခိၣ်တဖၣ် ကလူလီၤတၢ်သွံၣ်ဝးတရံးတၢ်လုၢ်လီၢ်န့ၣ်လီၤ.
9 ဒီးဘၣ်လုၢ်ထီၣ်အသိ, အမဲၢ်လၢအအိၣ်ဒီးအသိတဘိလၢတၢ်ဒီၣ်တဲာ် စဲဘူးဒီးအချၢဃံ, ဒီးတၢ်အသိလၢအအိၣ်လၢအပှံာ်ဒီးအကဖုတဖၣ်အလိၤခဲလၢာ်,
10 အကလ့ၢ်ခံဖျၢၣ်ဒီးအသိအိၣ်လၢအလိၤ, ဒီးအသူၣ်အဂ့ၤကတၢၢ် တခီန့ၣ်လီၤ.
11 ဒီးပှၤလုၢ်တၢ်အခိၣ်ကဆိၣ်ကဲၤထီၣ်ကွံာ်ခဲလၢာ်လၢတၢ်လုၢ်လီၢ် အဖီခိၣ်ဒ်တၢ်အီၣ်အတၢ်လုၢ်မၤဘူၣ်န့ၣ်လီၤ.
12-13 ဒီးပှၤတဂၤဂၤမ့ၢ်လုၢ်ထီၣ်မဲာ်တဲးလဲးတဒုန့ၣ်, အဝဲကဘၣ်ပာ်အစုလၢအမဲာ်တဲးလဲးအခိၣ်လိၤ, ဒီးမၤသံအီၤဖဲတၢ် ဘူၣ်ထီၣ်ဘါထီၣ်ယွၤအဒဲအမဲာ်ညါဒီးပှၤလုၢ်တၢ်အခိၣ်ကလူလီၤတၢ် သွံၣ်ဝးတရံးတၢ်လုၢ်လီၢ်န့ၣ်လီၤ.
14 ဒီးဘၣ်လုၢ်ထီၣ်တၢ်အသိလၢအအိၣ်လၢအပှံာ်ဒီးအကဖုတဖၣ်အလိၤခဲလၢာ်,
15 အကလ့ၢ်ခံဖျၢၣ်ဒီးတၢ်အသိအိၣ်လၢအလိၤ, ဒီးအသူၣ်အဂ့ၤကတၢၢ်တခီန့ၣ်လီၤ.
16 ဒီးပှၤလုၢ်တၢ်အခိၣ်ကဆိၣ်ကဲၤထီၣ်ကွံာ်ခဲလၢာ်လၢတၢ်လုၢ်လီၢ် အဖီခိၣ်ဒ်တၢ်အီၣ်အတၢ်လုၢ်မၤဘူၣ်လၢအမၤမုာ်ယွၤအသးအသိးန့ၣ်လီၤ. တၢ်အသိခဲလၢာ်န့ၣ်မ့ၢ်ယွၤအတၢ်န့ၣ်လီၤ.
17 တၢ်အသိမ့ၢ်ဂ့ၤ, တၢ်အသွံၣ်မ့ၢ်ဂ့ၤ, သုသုတအီၣ်အီၤတဂ့ၤ. အအံၤမ့ၢ်တၢ်မၤလိာ်လၢသုဘၣ်တိၢ်န့ၢ်အီၤအစိၤစိၤအဃၣ်ဃၣ်ဖဲ သုအိၣ်တပူၤလၢ်လၢ်န့ၣ်လီၤ.