10
1 စီၤအၤဟရိၣ်အဖိခွါတဖၣ်လၢအမ့ၢ်စီၤနၤဒးဒီးစီၤအဘံဟူၤ, ဟံးန့ၢ်ဝဲသပၢၤမ့ၣ်အူတဂၤတဖျၢၣ်စုာ်စုာ်ဒီးဒၢနုာ်မ့ၣ်အူအ့ၣ် ဃုာ်ဒီးတၢ်နၢမူလၢအပူၤဒီးလုၢ်ထီၣ်ဝဲဆူယွၤအအိၣ်လီၤ. ဘၣ်ဆၣ်ဒီးမ့ၣ်အူအံၤတမ့ၢ်တၢ်လၢအကဆှီဘၣ်. မ့ၢ်လၢယွၤတမၤလိာ်အဝဲသ့ၣ်လၢကလုၢ်ထီၣ်ဝဲအဃိန့ၣ်လီၤ.
2 ဒီးမ့ၣ်အူဟဲလီၤလၢယွၤအအိၣ်သတူၢ်ကလာ်ဒီးအီၣ်ကွံာ်အဝဲ သ့ၣ်တုၤအသံဝဲဖဲန့ၣ်လၢယွၤအမဲာ်ညါန့ၣ်လီၤ.
3 တုၤနုၤတစု, စီၤမိၤၡ့စံးဘၣ်စီၤအၤဟရိၣ်, “အအံၤမ့ၢ်တၢ်လၢယွၤကတိၤတၢ်ဒီးစံး, ကယဲၢ်ပှၤခဲလၢာ်လၢအမၤယတၢ်မၤန့ၣ်ကဘၣ်ယူးယီၣ်ပာ်ကဲယတၢ်စီတၢ်ဆှံလီၤ. ဒီးယကလီၣ်ဖျါထီၣ်ယလၤကပီၤဆူယပှၤဂီၢ်မုၢ်အအိၣ်လီၤ.” မ့မ့ၢ်စီၤအၤဟရိၣ်အိၣ်ဘှီၣ်ကလာ်ဝဲဒၣ်လီၤ.
4 ဒီးစီၤမိၤၡ့ကိးဃီၤဝဲစီၤအၤဟရိၣ်အဖါတံၢ်စီၤဧူးစံၤအ့လးအဖိခွါ ခံဂၤလၢအမ့ၢ်စီၤမံၡအ့လးဒီးစီၤအ့လံစၤဖၣ်, ဒီးစံးဘၣ်အဝဲသ့ၣ်, “ဟဲလၢအံၤဒီးစိာ်ကွံာ်သုဘူးသုတံၢ်တဖၣ်အံၤအစိၣ်လၢတၢ် ဘူၣ်ထီၣ်ဘါထီၣ်ယွၤအဒဲစီဆှံအမဲာ်ညါဒီးပာ်အီၤလၢသူၣ်ဒဲ အလီၢ်အချၢန့ၣ်တက့ၢ်.”
5 ဒီးအဝဲသ့ၣ်ဟဲဒီးစှီၤထီၣ်ပှၤသံတဖၣ်အကူအသိးဒီး စိာ်ကွံာ်အစိၣ်ဆူသူၣ်ဒဲလီၢ်အချၢဒ်စီၤမိၤၡ့မၤလိာ်ဝဲအသိးန့ၣ်လီၤ.
6 အန့ၣ်ဝံၤဒီး, စီၤမိၤၡ့စံးဘၣ်စီၤအၤဟရိၣ်ဒီးအဖိခွါစီၤအလၤဧစၢ်, ဒီးစီၤအံသမၢ်, “ပာ်သုခိၣ်သူတဖုတရုဒီးဖှီသုဆ့တဖၣ်ဒ်သိးသုကပာ်ဖျါ သုတၢ်သးအုးန့ၣ်တဂ့ၤ. သုမ့ၢ်မၤဒ်န့ၣ်ဒီးသုကသံလီၤ. ဒီးယွၤကသးထီၣ်ဘၣ်ပှၤဂီၢ်မုၢ်ခဲလၢာ်လီၤ. မ့မ့ၢ်ပှၤအံၣ်စရ့လးဖိခဲလၢာ်ဟီၣ်ယၢၤဝဲသ့လၢတၢ်သံအံၤမၤအသးခီဖျိမ့ၣ်အူဟဲလၢယွၤအအိၣ် အဃိန့ၣ်လီၤ.
7 ဒီးတဘၣ်ဟးထီၣ်ကွံာ်လၢတၢ်ဘူၣ်ထီၣ်ဘါထီၣ်ယွၤအဒဲ အကျဲစၢၤန့ၣ်တဂ့ၤ. သုမ့ၢ်ဟးထီၣ်သုကသံလီၤ. မ့ၢ်လၢသုဘၣ်တၢ်ပာ်စီဆှံလံသုခီဖျိတၢ်ဖှူသုလၢယွၤအသိအဃိန့ၣ်လီၤ.” ဒီးအဝဲသ့ၣ်မၤဝဲဒ်စီၤမိၤၡ့စံးဝဲအသိးန့ၣ်လီၤ.
8-9 ဒီးယွၤစံးဘၣ်စီၤအၤဟရိၣ်, “နၤဒီးနဖိခွါတဖၣ်တဘၣ်လဲၤနုာ် လီၤဆူတၢ်ဘူၣ်ထီၣ်ဘါထီၣ်ယွၤအဒဲပူၤဖဲသုအီမူၤစပံးထံမ့ၢ်ဂ့ၤ, သံးမ့ၢ်ဂ့ၤန့ၣ်ဘၣ်. သုမ့ၢ်မၤဒီးသုကသံလီၤ. အအံၤမ့ၢ်တၢ်မၤလိာ်လၢသုစၢၤသုသွဲၣ်ကဘၣ်တိၢ်န့ၢ်အီၤအစိၤစိၤအဃၣ်ဃၣ်န့ၣ်လီၤ.
10 ဒီးသုကဘၣ်နီၤဖးတၢ်စီဆှံဒီးတၢ်တစီဆှံတဖၣ်, ဒီးတၢ်ကဆှီဒီးတၢ်တကဆှီတဖၣ်အဆၢဒ်တၢ်ဘူၣ် တၢ်ဘါအလုၢ်အလၢ်အိၣ်ဝဲအသိးစ့ၢ်ကီးန့ၣ်လီၤ.
11 ဒီးသုကဘၣ်သိၣ်လိသီလိပှၤအံၣ်စရ့လးဖိလၢကယဲၢ်တၢ်သိၣ်တၢ် သီလၢယဟ့ၣ်လီၤသုခီဖျိစီၤမိၤၡ့န့ၣ်လီၤ.”
12 ဒီးစီၤမိၤၡ့စံးဘၣ်စီၤအၤဟရိၣ်ဒီးအဖိခွါအိၣ်လီၤတဲာ်ခံဂၤလၢ အမ့ၢ်စီၤအလၤဧစၢ်ဒီးစီၤအံသမၢ်, “ဟံးန့ၢ်တၢ်လုၢ်ဘုဧိၤဟုဧိၤလၢအအိၣ်လီၤတဲာ်လၢတၢ်လုၢ်မၤ ဘူၣ်တၢ်အီၣ်ဆူယွၤအအိၣ်ဒီးမၤကိၣ်လၢကိၣ်မံၣ်တအိၣ်ဘၣ်. ဒီးအီၣ်အီဖဲတၢ်လုၢ်လီၢ်အကပၤန့ၣ်တက့ၢ်. မ့ၢ်လၢတၢ်လုၢ်အံၤစီဆှံဝဲဒိၣ်မးအဃိန့ၣ်လီၤ.
13 အီၣ်အီၤလၢတၢ်လီၢ်စီဆှံအပူၤတက့ၢ်ဒီးတၢ်အံၤမ့ၢ်ဝဲတၢ်နီၤ ဖးလၢအဘၣ်ဃးဒီးနၤဒီးနဖိခွါတဖၣ်, လၢတၢ်လုၢ်မၤဘူၣ်ဆူယွၤအအိၣ်န့ၣ်လီၤ. တၢ်န့ၣ်မ့ၢ်ယွၤမၤလိာ်ယၤန့ၣ်လီၤ.
14 မ့မ့ၢ်နၤဒီးနပှၤဟံၣ်ဖိဃီဖိကအီၣ်ဘၣ်တၢ်အသးနါပှၢ်, ဒီးတၢ်အကံၣ်ဒုၣ်လၢအဘၣ်တၢ်လုၢ်ထီၣ်အီၤဒ်တၢ်ဟ့ၣ်လီၤဆီ ဒီးတၢ်မၤဘူၣ်လီၤဆီဆူယွၤအအိၣ်လၢပှၤလုၢ်တၢ်အခိၣ်တဖၣ်အဂီၢ် လီၤ. သုအီၣ်အီၤသ့ဝဲလၢတၢ်လီၢ်လၢအစီအဆှံဒ်တၢ်ဘူၣ်တၢ်ဘါအလုၢ် အလၢ်အိၣ်ဝဲအသိးတပူၤလၢ်လၢ်န့ၣ်လီၤ. တၢ်လုၢ်မၤဘူၣ်တဖၣ်အံၤဘၣ်တၢ်ဟ့ၣ်လီၤနၤဒီးနဖိနလံၤတဖၣ်ဒ်တၢ် နီၤဖးဘၣ်ဃးဒီးနၤလၢပှၤအံၣ်စရ့လးဖိတဖၣ်အတၢ်လုၢ်မၤဃူမၤဖိးအကျါန့ၣ်လီၤ.
15 အဝဲသ့ၣ်ကဘၣ်ဟဲစိာ်တၢ်အကံၢ်ဒုၣ်ဒီးတၢ်အသးနါပှၢ်ဖဲတၢ် အသိဘၣ်တၢ်လုၢ်ထီၣ်အီၤဒ်တၢ်လုၢ်မၤဘူၣ်ဆူယွၤအအိၣ်အသိး အကတီၢ်န့ၣ်လီၤ. ဒီးတၢ်တဖၣ်အံၤဘၣ်ဃးဒီးနၤဒီးနဖိနလံၤအစိၤစိၤအဃၣ်ဃၣ်ဒ် ယွၤမၤလိာ်ဝဲအသိးန့ၣ်လီၤ.”
16 တုၤစီၤမိၤၡ့သံကွၢ်တၢ်ဘၣ်ဃးမဲာ်တဲးလဲးတဒုလၢ တၢ်လုၢ်တၢ်ပျၢ်တၢ်ဒဲးဘးအဂီၢ်အဂ့ၢ်ဒီးသ့ၣ်ညါဝဲလၢအဘၣ်တၢ် ဆိၣ်ကဲၤထီၣ်ကွံာ်လံအီၤန့ၣ်, အသးထီၣ်ဘၣ်စီၤအလၤဧစၢ်ဒီးစီၤအံသမၢ်လီၤ. ဒီးစီၤမိၤၡ့သံကွၢ်ဝဲ,
17 “ဘၣ်မနုၤလၢသုတအီၣ်တၢ်လုၢ်တၢ်ပျၢ်တၢ်ဒဲးဘးလၢတၢ်လီၢ်စီ ဆှံန့ၣ်လဲၣ်. တၢ်အံၤမ့ၢ်တၢ်လၢအစီဆှံဝဲဒိၣ်မးဒီးယွၤဟ့ၣ်လီၤသုဒ်သိး တၢ်ကစိာ်ကွံာ်ပှၤဂီၢ်မုၢ်အတၢ်ဒဲးဘးအဂီၢ်လီၤ.
18 မ့ၢ်လၢအသွံၣ်တဘၣ်တၢ်ဟဲစိာ်အီၤဆူဒဲစီဆှံအပူၤဘၣ်အဃိ, သုကဘၣ်အီၣ်တၢ်လုၢ်ဖဲန့ၣ်ဒ်ယမၤလိာ်တ့ၢ်အသိးန့ၣ်လီၤ.”
19 ဒီးစီၤအၤဟရိၣ်စံးဆၢဝဲ, “ယမ့ၢ်အီၣ်ကွံာ်တၢ်လုၢ်တၢ်ပျၢ်တၢ်ဒဲးဘးတနံၤအံၤဒီးမ့ၢ် အဘၣ်ယွၤအသးစ့ၢ်ကီးဧါ. ပှၤဂီၢ်မုၢ်လုၢ်ထီၣ်အတၢ်လုၢ်တၢ်ပျၢ်တၢ်ဒဲးဘးဆူယွၤအအိၣ်တနံၤအံၤ, ဒီးဟဲစိာ်ဝဲအတၢ်လုၢ်မ့ၣ်အူဘၣ်ဆၣ်, တၢ်လီၤပျံၤလီၤဖုးတဖၣ်အံၤဘၣ်ဒံးယၤလီၤ.”
20 ဒီးတုၤစီၤမိၤၡ့နၢ်ဟူတၢ်အံၤဒီးအသးမံဝဲလီၤ.