4
1 စီၤၡလိၤမိၤမ့ၢ်စီၤပၤလၢအံၣ်စရ့လးဒီကီၢ်ညါအဖီခိၣ်
2 ဒီးအအံၤမ့ၢ်အဝဲအပဒိၣ်ဖးဒိၣ်တဖၣ်န့ၣ်လီၤ. ပှၤလုၢ်တၢ်အခိၣ်မ့ၢ်ဝဲစီၤစၤဒိးအဖိခွါစီၤဧစၤရယၤ,
3 ကွီၢ်အပှၤကွဲးလံာ်ဒိၣ်တဖၣ်မ့ၢ်ဝဲစီၤၡံၡၤအဖိခွါခံဂၤလၢ အမ့ၢ်စီၤအလံၤဃိရ့ာ်ဒီးစီၤအဃံယၤလီၤ. ပှၤကွၢ်ထွဲတၢ်ကွဲးနီၣ်တဖၣ်အခိၣ်မ့ၢ်ဝဲစီၤအဃံလူးအဖိခွါ စီၤယဟိၡၤဖး,
4 ပှၤသုးမုၢ်အသုးခိၣ်ကျၢၢ်မ့ၢ်ဝဲစီၤယဟိၤယဒါအဖိခွါစီၤဘနါ ယၤ, ပှၤလုၢ်တၢ်အခိၣ်တဖၣ်န့ၣ်မ့ၢ်ဝဲစီၤစၤဒိးဒီးစီၤအ့ဘယၤသၢ် န့ၣ်လီၤ.
5 ကီၢ်ဆၣ်တဖၣ်အပဒိၣ်အဒိၣ်ကတၢၢ်မ့ၢ်ဝဲစီၤနၤသၣ်အဖိခွါစီၤဧစၤ ရယၤ, စီၤပၤအပှၤဟ့ၣ်ကူၣ်တၢ်မ့ၢ်ဝဲစီၤနၤသၣ်အဖိခွါပှၤလုၢ်တၢ် အခိၣ်စီၤစၤဘူးလီၤ.
6 ပှၤကွၢ်ထွဲနီအတၢ်ခ့တၢ်ပှၤတဖၣ်မ့ၢ်ဝဲစီၤအဃံၡၢ်ဒီးပှၤကွၢ် ထွဲပှၤလၢအဘၣ်တၢ်မၤဆူၣ်အီၤတဖၣ်မ့ၢ်ဝဲစီၤဧၤဘဒါအဖိခွါစီၤ အဒိၤနံရၣ်န့ၣ်လီၤ.
7 စီၤၡလိၤမိၤဃုထၢပာ်လီၤပှၤတဆံခံဂၤဒ်ကီၢ်ဆၣ်အပဒိၣ်ဖးဒိၣ် တဖၣ်အသိးလၢကီၢ်အံၣ်စရ့လးအပူၤန့ၣ်လီၤ. အဝဲသ့ၣ်ကဘၣ်ဟ့ၣ်ထီၣ်တၢ်အီၣ်တၢ်အီလၢအကီၢ်ဆၣ်ဒၣ်ဝဲလၢစီၤပၤ ဒီးပှၤအိၣ်လၢနီပူၤခဲလၢာ်အဂီၢ်န့ၣ်လီၤ. လၢတနံၣ်အတီၢ်ပူၤန့ၣ်အဝဲသ့ၣ်တဂၤစုာ်စုာ်အိၣ်ဒီးမူဒါလၢ တၢ်အီၣ်တလါအဂီၢ်န့ၣ်လီၤ.
8 ပဒိၣ်ဖးဒိၣ်တဆံခံဂၤဒီးကီၢ်ဆၣ်တဖၣ်လၢအဝဲသ့ၣ်ဘၣ်ကွၢ်ထွဲ ဝဲအမံၤတဖၣ်မ့ၢ်ဒ်လာ်အံၤလီၤ. စီၤဃူၢ်အဖိခွါလၢကစၢၢ်အ့ဖရဲၣ်အလိၤ,
9 စီၤဒ့က့ၢ်အဖိခွါလၢဝ့ၢ်တဖၣ်လၢအမ့ၢ်ဝဲ, မၤကး, ၡၤလးဘံၣ်, ဘ့ၤသၡ့မ့ၣ်, အ့လိၣ်ဒီးဘ့ၤသဃၤနၣ်အပူၤ,
10 စီၤဃ့စ့းအဖိခွါလၢဝ့ၢ်တဖၣ်လၢအမ့ၢ်ဝဲ, အရူဘိး, စိကိၤ, ဒီးကယဲၢ်လီၢ်ကဝီၤအိၣ်လၢကီၢ်ဃ့ဖ့ၢ်အပူၤတဖၣ်,
11 စီၤဘံနဒာ်အဖိခွါလၢအဒိးတ့ဒိးဖျီအသးဒီးစီၤၡလိၤမိၤ အဖိမုၣ်နီၢ်တၤဖး, လၢကီၢ်ဒိၢ်, ဒီတကီၢ်အပူၤ,
12 စီၤအဃံလူးအဖိခွါစီၤဘၤနါလၢဝ့ၢ်တဖၣ်လၢအမ့ၢ်ဝဲ, တၤနး, မကံးဒိၤဒီးကယဲၢ်တၢ်လီၢ်အိၣ်ဘူးဒီးဘ့ၤသၡၣ်, လၢအအိၣ်ဖဲဝ့ၢ်စၤရတါအကပၤဖဲဝ့ၢ်ယံးစရ့လးအကလံၤထံး, ဒီးယံၤတုၤလီၤလၢဝ့ၢ်အၤဘ့လးမဃိလးဒီးဝ့ၢ်ယၤကမၣ်,
13 စီၤက့ဘ့ၢ်အဖိခွါလၢဝ့ၢ်ရၤမိးလၢကီၢ်ကံးလဧးအပူၤ, ဒီးသဝီတဖၣ်လၢကီၢ်ကံးလဧးအပူၤလၢအဘၣ်ဃးဒီးစီၤယၤအံၢ်, ပှၤတဂၤလၢအလီၤစၢၤလၢစီၤမနၤၡ့ၤအဒူၣ်ထၢ, ဒီးတၢ်လီၢ်အိၣ်လၢအၢ်ကိးလၢအအိၣ်လၢကီၢ်ဘၤၡၣ်အပူၤ, ဝ့ၢ်ဖးဒိၣ်အဖျၢၣ်ဃုဆံလၢအဘၣ်တၢ်မၤကျၢၤအီၤဒီးဝ့ၢ်ခိၣ်ဒူ တဖၣ်ဒီးတြဲၤဖးဒိၣ်တဖၣ်လၢအအိၣ်ဒီးတိၢ်ဘီနီၣ်တြီတဖၣ်လၢအ လိၤ,
14 စီၤဧံးဒိၤအဖိခွါစီၤအဃံနဒာ်လၢမၤဃန့ၤအကီၢ်ဆၣ်,
15 စီၤအဃံမ့ၤဧးလၢအဟံးန့ၢ်စီၤၡလိၤမိၤအဖိမုၣ်အဂၤတဂၤလၢ အမ့ၢ်နီၢ်ဘၤစမးလၢနးသၤလံအဒူၣ်အလီၢ်ကဝီၤ
16 စီၤဃူၡဲၤအဖိခွါစီၤဘၤနါလၢတၢ်လီၢ်လၢအၤၡ့ၢ်အဒူၣ်အိၣ်ဝဲ ဒီးဝ့ၢ်ဘဧၤလိး,
17 စီၤပၤရူၤအဖိခွါစီၤယဟိၡၤဖးလၢလီၢ်ကဝီၤဖဲယံးစၣ်ကၢ် အဒူၣ်အိၣ်ဝဲ,
18 စီၤအ့လၤအဖိခွါစီၤၡံးမံၤလၢလီၢ်ကဝီၤဖဲဘံၣ်ယၤမံၣ်အဒူၣ် အိၣ်ဝဲ
19 စီၤအူရံၤယၤအဖိခွါစီၤက့ဘ့ၢ်လၢကီၢ်ကံးလဧး, လၢအဘၣ်တၢ်ပၢအီၤလၢပှၤအမိၢ်ဖိအစီၤပၤစံဃိၣ်ဒီးဘၤၡၣ်အစီၤ ပၤဧိာ်တဖၣ်န့ၣ်လီၤ. လၢပှၤတဆံခံဂၤအံၤအမဲာ်ညါပဒိၣ်ဖးဒိၣ်အဒိၣ်ကတၢၢ်အိၣ်ဝဲ တဂၤလၢကီၢ်ဒီတဘ့ၣ်ညါအဖီခိၣ်န့ၣ်လီၤ.
20 ကီၢ်ယူဒၤဒီးကီၢ်အံၣ်စရ့လးအပှၤဂီၢ်မုၢ်အနီၣ်ဂံၢ်အါဝဲဒ်မဲး ဧိၤဟီၣ်ဧိၤလၢပီၣ်လဲၣ်နံၤအသိးဒီးအဝဲသ့ၣ်အီၣ်တၢ်, အီတၢ်ဒီးသူၣ်ဖှံသးညီဝဲန့ၣ်လီၤ.
21 စီၤၡလိၤမိၤအဘီအမုၢ်တုၤဝဲဆူကယဲၢ်ပှၤကလုာ်, လၢအအိၣ်လၢထံကျိဖရၤသးအကီၢ်ဒီးတုၤဆူကီၢ်အဲၤကူပတူး အကီၢ်ဆၢန့ၣ်လီၤ. ဒီးအဝဲသ့ၣ်ဟ့ၣ်အီၤတၢ်ခိတၢ်သွဲတဖၣ်ဒီးအိၣ်လၢအဝဲအတၢ်ပၢ အဖီလာ်တစိၤဒၣ်အီၤန့ၣ်လီၤ.
22 တၢ်အီၣ်တၢ်အီလၢစီၤၡလိၤမိၤလိၣ်ဘၣ်ဝဲလၢတနံၤအဂီၢ်တနံၤ အဂီၢ်န့ၣ်မ့ၢ်ဝဲဘုကၠူၣ်ကမူၣ်အဂ့ၤကဆှဲကဆှီအနာ်တကယၤယဲၢ်ဆံ, ဒီးဘုမုယီၤကမူၣ်အနာ်သၢကယၤ,
23 ဂီၤဖံးဘီၣ်လၢတၢ်ဘုၣ်အီၤလၢကရၢၢ်ပူၤဆံဆဲၣ်ဒု, ဂီၤဖံးလၢအအီၣ်တၢ်လၢအီၣ်ဆၣ်လီၢ်တဖၣ်အဒုခံဆံ, ဒီးသိအဒုတကယၤလီၤ. လၢန့ၣ်အမဲာ်ညါအိၣ်စ့ၢ်ကီးဒီးတၤယုၢ်တဖၣ်, တၤဟိစဘံတဖၣ်တၤယုၢ်ယးပမိၢ်တဖၣ်ဒီးထိၣ်ဖိဆီဖိတဖၣ်န့ၣ် လီၤ.
24 စီၤၡလိၤမိၤပၢဘၣ်ထံကီၢ်ခဲလၢာ်လၢအအိၣ်လၢထံကျိဖရၤသး အမုၢ်နုာ်, စးထီၣ်လၢဝ့ၢ်တံပစၤလၢအအိၣ်ထံကျိဖရၤသးအကၢၢ်ခိၣ် ဒီးယံၤဝဲလၢမုၢ်နုာ်, တုၤဆူဝ့ၢ်ဂါစၤန့ၣ်လီၤ. ကယဲၢ်စီၤပၤလၢအအိၣ်လၢထံကျိဖရၤသးအမုၢ်နုာ်တဖၣ်အိၣ်လၢအဝဲ အတၢ်ပၢအဖီလာ်ဒီးအဝဲအိၣ်ဃူအိၣ်ဖိးဒီးထံကီၢ်အိၣ်ဘူးအိၣ် တံၢ်ခဲလၢာ်န့ၣ်လီၤ.
25 ဖဲစီၤၡလိၤမိၤအိၣ်မူသးဝးဝဲအဆၢကတီၢ်န့ၣ်, ပှၤဂီၢ်မုၢ်လၢကီၢ်ယူဒၤဒီးကီၢ်အံၣ်စရ့လးသကုၤဆးဒးအိၣ်ဝဲ ဆိးဝဲလၢတၢ်ဘံၣ်တၢ်ဘၢအပူၤ, ဟံၣ်ဖိဃီဖိတဒူၣ်ဘၣ်တဒူၣ်အိၣ်ဒီးအစပံးအမုၢ်တဖၣ်ဒီးအချၢၣ် ဒၢအထူၣ်တဖၣ်ဒၣ်ဝဲန့ၣ်လီၤ.
26 စီၤၡလိၤမိၤအိၣ်ဒီးတၢ်ဘုၣ်ကသ့ၣ်အလီၢ်လွံၢ်ကထိလၢအလ့ၣ်ကဟၣ် ကသ့ၣ်တဖၣ်အဂီၢ်, ဒီးကသ့ၣ်ဒုးသုးတကလးခံကထိန့ၣ်လီၤ.
27 လၢလါတလါဘၣ်တလါလၢတၢ်ဟ့ၣ်မူဟ့ၣ်ဒါအီၤအပူၤန့ၣ်, အဝဲအပဒိၣ်ဖးဒိၣ်တဆံခံဂၤ, တဂၤဘၣ်တဂၤစုာ်စုာ်ဟ့ၣ်ထီၣ်တၢ် အီၣ်လၢစီၤပၤၡလိၤမိၤလိၣ်ဘၣ်ဝဲလၢအဂီၢ်ဒီးလၢပှၤခဲလၢာ်လၢ အအီၣ်ဃုာ်တၢ်ဒီးအီၤလၢနီပူၤအဂီၢ်န့ၣ်လီၤ. ထီဘိအဝဲသ့ၣ်ဟ့ၣ်ထီၣ်တၢ်ခဲလၢာ်လၢတၢ်လိၣ်ဘၣ်အီၤန့ၣ်လီၤ.
28 ပဒိၣ်ဖးဒိၣ်တဂၤဘၣ်တဂၤစုာ်စုာ်ဟ့ၣ်ထီၣ်စ့ၢ်ကီးဘုမုယီၤ, ဒီးလီၢ်ဧိၤဒံးဧိၤလၢကဘၣ်ဟ့ၣ်ဝဲဒ်တၢ်ဃ့အီၤအသိး, ဖဲတၢ်လိၣ်ဘၣ်အီၤတပူၤလၢ်လၢ်လၢလ့ၣ်ကဟၣ်အကသ့ၣ်တဖၣ်အဂီၢ်ဒီးလၢ ဆၣ်ဖိကီၢ်ဖိလၢတၢ်မၢအီၤတဖၣ်အဂီၢ်န့ၣ်လီၤ.
29 ကစၢ်ယွၤဟ့ၣ်လီၤစီၤၡလိၤမိၤလၢတၢ်ကူၣ်သ့ဒီးတၢ်နၢ်ပၢၢ်လီၤ တံၢ်လီၤဆဲးလၢပှၤတညီနုၢ်မၤန့ၢ်ဘၣ်, ဒီးတၢ်သ့ၣ်ညါလၢအဒိၣ်တုၤတၢ်ထိၣ်အီၤတဲာ်အီၤတသ့ဘၣ်န့ၣ်လီၤ.
30 စီၤၡလိၤမိၤကူၣ်သ့န့ၢ်ဒံးပှၤကူၣ်ဘၣ်ကူၣ်သ့တဖၣ်လၢကီၢ်မုၢ် ထီၣ်အပူၤမ့ၢ်ဂ့ၤ, ပှၤကူၣ်ဘၣ်ကူၣ်သ့တဖၣ်လၢကီၢ်အဲၤကူပတူးအပူၤမ့ၢ်ဂ့ၤန့ၣ်လီၤ.
31 အဝဲမ့ၢ်ပှၤကူၣ်ဘၣ်ကူၣ်သ့အဒိၣ်ကတၢၢ်လၢပှၤခဲလၢာ်အကျါ, ကူၣ်သ့ဒိၣ်န့ၢ်ဒံးပှၤအ့စရၤဃးဖိစီၤအ့သၣ်, ဒီးစီၤမၤဃိလးအဖိခွါတဖၣ်လၢအမ့ၢ်ဝဲစီၤဟ့မၣ်, စီၤကးလကိးလး, စီၤဒၢ်ဒၤန့ၣ်လီၤ. ဒီးအဝဲအတၢ်မံၤဟူသၣ်ဖျါရၤလီၤအသး သကုၤကယဲၢ်ထံကီၢ်အိၣ်ဘူးအိၣ်တံၢ်တဖၣ်န့ၣ်လီၤ.
32 အဝဲကျဲၤအိၣ်ထီၣ်ပှၤကူၣ်ဘၣ်ကူၢ်သ့အတၢ်ကတိၤအထံၣ်သၢကထိ ဒီးတၢ်သးဝံၣ်အါန့ၢ်ဒံးအယုၢ်တကထိန့ၣ်လီၤ.
33 အဝဲကတိၤတၢ်ဘၣ်ထွဲဒီးသ့ၣ်အထူၣ်တဖၣ်ဒီးတၢ်မုၢ်တၢ်ဘိတဖၣ်, စးထီၣ်လၢသ့ၣ်ဆှိအ့ရ့းတဖၣ်လၢကီၢ်လဘၤနိၣ် တုၤလၢကဖျီၣ်အ့စိးလၢအမဲထီၣ်လၢတၢ်ဒူၣ်အလိၤအဂ့ၢ်န့ၣ်လီၤ. အဝဲကတိၤစ့ၢ်ကီးတၢ်ဘၣ်ဃးဒီးဆၣ်ဖိကီၢ်ဖိတဖၣ်, ထိၣ်ဧိၤလံာ်ဧိၤတဖၣ်, တၢ်အစွါအစွဲတဖၣ်ဒီးဒ့ၣ်ဧိၤညၣ်ဧိၤ တဖၣ်အဂ့ၢ်အကျိၤန့ၣ်လီၤ.
34 စီၤပၤတဖၣ်လၢဟီၣ်ခိၣ်ဒီဘ့ၣ်ညါနၢ်ဟူတ့ၢ်အဝဲအတၢ်ကူၣ်သ့ အဂ့ၢ်ဒီးဆှၢလီၤပှၤဂီၢ်မုၢ်လၢကလဲၤဒိကနၣ်အီၤအဂီၢ်န့ၣ်လီၤ.