22
(၂ကွဲး.၁၈:၂-၂၇)
1 လၢခံ, ခံနံၣ်အတီၢ်ပူၤန့ၣ်တၢ်ဃူတၢ်ဖိးအိၣ်ဝဲဒၣ်လၢကီၢ်အံၣ် စရ့လးဒီးကီၢ်စူၤရံအဘၢၣ်စၢၤန့ၣ်လီၤ.
2 ဘၣ်ဆၣ်လၢသၢနံၣ်တနံၣ်န့ၣ်, ကီၢ်ယူဒၤအစီၤပၤစီၤယဟိၡၤဖး လဲၤဝဲလၢကထံၣ်လိာ်အသးဒီးကီၢ်အံၣ်စရ့လးအစီၤပၤအၤဃာ်န့ၣ်
လီၤ.
3 စီၤအၤဃာ်သံကွၢ်အပဒိၣ်ပပှၢ်တဖၣ်, “ဘၣ်မနုၤပတမၤတၢ်နီတမံၤမံၤ, လၢပကဒိးန့ၢ်ဘၣ်က့ၤဝ့ၢ်ရၤ
မိးလၢကီၢ်ကံးလဧးအပူၤ, လၢကီၢ်စူၤရံအစီၤပၤအစုပူၤန့ၣ်လဲၣ်. တၢ်န့ၣ်မ့ၢ်တၢ်လၢအဘၣ်ဃးဒီးပှၤလီၤ.”
4 ဒီးစီၤအၤဃာ်သံကွၢ်စီၤယဟိၡၤဖး, “မ့ၢ်နကလဲၤဒီးယၤလၢ ပကထီၣ်ဒုးဝ့ၢ်ရၤမိးန့ၣ်ဧါ.” စီၤယဟိၡၤဖးစံးဆၢဝဲ, “ဖဲနအိၣ်ကတဲာ်ကတီၤနသးန့ၣ်, ယအိၣ်ကတဲာ်ကတီၤယသးလီၤ. ဒီးဒ်န့ၣ်အသိးယပှၤသုးဖိတဖၣ်ဒီးယပှၤဒိးကသ့ၣ်သုးဖိတဖၣ်စ့ၢ်
ကီးန့ၣ်လီၤ.
5 ဘၣ်ဆၣ်ဒီးအဆိကတၢၢ်မ်ပကသံကွၢ်သကိးတၢ်ဒီးယွၤန့ၣ်တက့ၢ်.”
6 လၢတၢ်န့ၣ်အဃိစီၤအၤဃာ်ကိးနုာ်ဝံတဖၣ်ခဲလၢာ်ပှၤအဂၤလွံၢ် ကယၤဃၣ်ဃၣ်ဒီးသံကွၢ်အဝဲသ့ၣ်, “မ့ၢ်ယကဘၣ်လဲၤထီၣ်ဒုးဝ့ၢ်ရၤမိး, မ့တမ့ၢ်ယတဘၣ်လဲၤဘၣ်ဧါ.” အဝဲသ့ၣ်စံးဆၢဝဲ,
“လဲၤထီၣ်ဒုးအီၤတက့ၢ်. ယွၤကဟ့ၣ်နၤတၢ်မၤနၢၤလီၤ.”
7 ဘၣ်ဆၣ်စီၤယဟိၡၤဖးသံကွၢ်ဝဲ, “မ့ၢ်ယွၤအဝံတအိၣ်ဘၣ်ဖဲအံၤ တဂၤလၢပကသံကွၢ်သံဒိးတၢ်ဒီးယွၤန့ၣ်ဘၣ်ဧါ.”
8 စီၤအၤဃာ်စံးဆၢဝဲ, “ဝံအိၣ်ဒံးဝဲတဂၤ, လၢအမ့ၢ်စီၤယံးမလၤအဖိခွါစီၤမံၤကါယၤန့ၣ်လီၤ.
ဘၣ်ဆၣ်ယသးဟ့အီၤ, မ့ၢ်လၢအဝဲတကတိၤတၢ်လၢဝံအကျိာ်အဂ့ၤနီ
တမံၤလၢယဂီၢ်ဘၣ်. မ့မ့ၢ်,
ထီဘိမ့ၢ်ထဲတၢ်အၢတမံၤမံၤအဃိန့ၣ်လီၤ.”
စီၤယဟိၡၤဖးစံးဆၢဝဲ, “နတကြၢးစံးကတိၤတၢ်ဒ်န့ၣ်ဘၣ်.”
9 အန့ၣ်ဒီး, စီၤအၤဃာ်ကိးနုာ်ကွီၢ်ဘျီၣ်အပဒိၣ်တဂၤဒီးတဲအီၤ လၢကလဲၤကိးန့ၢ်စီၤမံၤကါယၤတဘျီဃီန့ၣ်လီၤ.
10 စီၤပၤခံဂၤကူသိးဝဲဒီးစီၤပၤအဆ့ကၤဒိၣ်တဖၣ်, ဆ့ၣ်နီၤလၢအ ဝဲသ့ၣ်အလီၢ်ပစိာ်တဖၣ်အဖီခိၣ်, ဖဲပှၤကြဲၢ်တၢ်အလီၢ်လၢအအိၣ်ဝဲ
ဖဲဝ့ၢ်ၡၤမရံအတြဲၤဖးဒိၣ်အချၢတစဲး,
ဒီးကယဲၢ်ဝံတဖၣ်ကတိၤတၢ်လၢဝံအကျိာ်ဖဲအဝဲသ့ၣ်အမဲာ်ညါန့ၣ်
လီၤ.
11 ဝံအကျါတဂၤလၢအမ့ၢ်စီၤကနၤနါအဖိခွါစီၤစံးဒကံယၤပိာ်တၢ် အနၢၤတဖၣ်လၢထးဒီးစံးဘၣ်စီၤအၤဃာ်,
“တၢ်အံၤမ့ၢ်တၢ်လၢယွၤစံးဝဲ, လၢတၢ်သ့ၣ်တဖၣ်အံၤန့ၣ်,
နကဒုးပှၤစူၤရံဖိတဖၣ်ဒီးမၤနၢၤမၤဃၣ်ကွံာ်အဝဲသ့ၣ်လၢာ်လၢာ်
ဆ့ဆ့န့ၣ်လီၤ.”
12 ကယဲၢ်ဝံအဂၤတဖၣ်စံးတၢ်တမံၤဃီန့ၣ်လီၤ. လဲၤထီၣ်ဒုးတၢ်ထီဒါဝ့ၢ်ရၤမိးဒီးနကမၤနၢၤတၢ်န့ၣ်လီၤ.
ယွၤကဟ့ၣ်နၤတၢ်မၤနၢၤန့ၣ်လီၤ.
13 အကတီၢ်ဖဲန့ၣ်ပဒိၣ်လၢအလဲၤကိးန့ၢ်စီၤမံၤကါယၤစံးဘၣ်အီၤ, “ကယဲၢ်ဝံအဂၤတဖၣ်ခဲလၢာ်ကတိၤဆိပာ်ဝဲလၢစီၤပၤကမၤနၢၤ တၢ်, ဒီးနဲဒၣ်စ့ၢ်ကီးနကြၢးတဲတၢ်တမံၤဃီန့ၣ်လီၤ.”
14 ဘၣ်ဆၣ်စီၤမံၤကါယၤစံးဆၢဝဲ, “လၢယွၤလၢအမူဝဲတဂၤအမံၤ အပူၤန့ၣ်ယအၢၣ်လီၤလၢယကစံးတၢ်လၢအမၢယတဲန့ၣ်လီၤ.”
15 ဖဲအဝဲဟဲပာ်ဖျါထီၣ်အသးလၢစီၤပၤအၤဃာ်အမဲာ်ညါန့ၣ်စီၤပၤ သံကွၢ်အီၤ, “စီၤမံၤကါယၤဧၢ, မ့ၢ်စီၤပၤယဟိၡၤဖးဒီးယၤပကြၢးလဲၤ
ထီၣ်ဒုးဝ့ၢ်ရၤမိးဧါ. မ့တမ့ၢ်ပတကြၢးလဲၤဘၣ်န့ၣ်လဲၣ်.” စီၤမံၤကါယၤစံးဆၢဝဲ, “လဲၤထီၣ်ဒုးတက့ၢ်. သပှၢ်ကတၢၢ်သုကမၤနၢၤတၢ်လီၤ. ယွၤကဟ့ၣ်သုတၢ်မၤနၢၤန့ၣ်လီၤ.”
16 ဘၣ်ဆၣ်စီၤအၤဃာ်စံးဆၢဝဲ, “ဖဲနကတိၤတၢ်ဒီးယၤလၢယွၤအမံၤ အပူၤန့ၣ်, တဲတၢ်မ့ၢ်တၢ်တီတက့ၢ်. ယကဘၣ်တဲနၤတၢ်အံၤပှံၤဘျီလဲၣ်.”
17 စီၤမံၤကါယၤစံးဆၢဝဲ, “ယထံၣ်ဘၣ်ကီၢ်အံၣ်စရ့လးအသုးမုၢ် လီၤပြံလီၤပြါလၢကစၢၢ်ကလိအလိၤဒ်သိးလၢအပှၤကွၢ်သိ
တအိၣ်ဘၣ်အသိန့ၣ်လီၤ. ဒီးယွၤစံးဝဲ,
ပှၤတဖၣ်အံၤအခိၣ်အနၢ်တအိၣ်နီတဂၤဘၣ်.
မ်အဝဲသ့ၣ်က့ၤကဒါက့ၤမုာ်မုာ်ဆူအဟံၣ်တက့ၢ်.”
18 စီၤအၤဃာ်စံးဘၣ်စီၤယဟိၡၤဖး, “မ့ၢ်ယတတဲဘၣ်နၤလၢ, အဝဲတကတိၤတၢ်အဂ့ၤနီတမံၤလၢဝံအကျိာ်လၢယဂီၢ်န့ၣ်ဧါ.
ထီဘိမ့ၢ်ထဲတၢ်လၢအတဂ့ၤန့ၣ်လီၤ.”
19 စီၤမံၤကါယၤစံးအါထီၣ်ကဒီးဝဲ, “ခဲအံၤဒိကနၣ်တၢ်လၢယွၤ စံးဝဲန့ၣ်တက့ၢ်. ယထံၣ်တ့ၢ်ယွၤဆ့ၣ်နီၤဝဲလၢအလီၢ်ပစိာ်အဖီခိၣ်လၢမူခိၣ်, အိၣ်ဒီးကယဲၢ်ကလူးခဲလၢာ်ဆၢထၢၣ်လၢအကပၤလီၤ.
20 ယွၤသံကွၢ်ဝဲ, မ့ၢ်မတၤကလီန့ၢ်စီၤအၤဃာ်ဒ်သိးကလဲၤဒုးတၢ် ဒီးဘၣ်တၢ်မၤသံကွံာ်အီၤလၢဝ့ၢ်ရၤမိးန့ၣ်လဲၣ်.
ကလူးတနီၤစံးတၢ်တမံၤဒီးအဂၤတနီၤစံးတၢ်အဂၤတမံၤဒၣ်လီၤ.
21 လၢခံကတၢၢ်တၢ်အသးတဂၤဟဲထီၣ်ဆူတၢ်မဲာ်ညါ, သုးဘူးအသးဆူယွၤအအိၣ်ဒီးစံးဝဲ, ယကလီန့ၢ်အီၤလီၤ.
22 ယွၤသံကွၢ်ဝဲ, နကလီန့ၢ်အီၤဒ်လဲၣ်, သးန့ၣ်စံးဆၢဝဲ, ယကလဲၤဒီးမၤဒ်သိးကယဲၢ်စီၤအၤဃာ်အဝံခဲလၢာ်လၢကလီတၢ်ဝ့ၤ
တၢ်န့ၣ်လီၤ. ယွၤစံးဝဲဒၣ်, လဲၤဒီးလီန့ၢ်အီၤတက့ၢ်.
နကမၤနၢၤတၢ်လီၤ.”
23 ဒီးစီၤမံၤကါယၤမၤကတၢၢ်အတၢ်ကတိၤစံးဝဲ, “တၢ်အံၤမ့ၢ်တၢ်လၢအမၤတ့ၢ်အသးန့ၣ်လီၤ. ယွၤမၤလိာ်ဒ်သိးနဝံတဖၣ်အံၤကကတိၤလီန့ၢ်နၤလီၤ. ဘၣ်ဆၣ်အဝဲအနီၢ်ကစၢ်ဒၣ်ဝဲခါလီၤတ့ၢ်အကလုၢ်လၢနကထံၣ်ဘၣ်တၢ်
တတၢးတနါန့ၣ်လီၤ.”
24 တုၤနုၤတစုဝံစံးဒကံယၤလဲၤဃီၤဆူစီၤမံၤကါယၤအအိၣ်, လၤဝဲအမဲာ်ဒီးသံကွၢ်ဝဲ, “ယွၤအသးဟးဖးကွံာ်ဒီးယၤဒီး
စံးကတိၤတၢ်ဒီးနၤအခါခဲလဲၣ်.”
25 စီၤမံၤကါယၤစံးဆၢဝဲ, “နကထံၣ်သ့ၣ်ညါဘၣ်ဖဲနလဲၤနုာ်ဆူ ဒၢးလၢတၢ်လီၢ်ခံတနီၤလၢနကအိၣ်ခူသူၣ်အဂီၢ်န့ၣ်လီၤ.”
26 အန့ၣ်ဒီး, စီၤပၤအၤဃာ်ဟ့ၣ်လီၤအကလုၢ်ဆူအပဒိၣ်ကျါတဂၤစံး ဝဲ, “ဖီၣ်န့ၢ်စီၤမံၤကါယၤဒီးလဲၤဆှၢအီၤဆူဝ့ၢ်ပဒိၣ်စီၤအၤ
မိၣ်ဒီးစီၤပၤဖိခွါစီၤယိၤအာ်အအိၣ်န့ၣ်တက့ၢ်.
27 တဲဘၣ်အဝဲသ့ၣ်လၢကဒၢနုာ်အီၤဆူဃိာ်ပူၤဒီးလုၢ်အီၣ်လုၢ်အီ လၢကိၣ်ဒီးထံတုၤလၢယဟဲက့ၤတုၤမုာ်မုာ်န့ၣ်တက့ၢ်.”
28 စီၤမံၤကါယၤစံးဝဲ, “နမ့ၢ်ဟဲက့ၤမုာ်မုာ်န့ၣ်ဒီးယွၤတကတိၤဘၣ်တၢ်ခီဖျိယၤန့ၣ်ဘၣ်.” ဒီးစံးအါထီၣ်ဝဲ, “ပှၤကိးဂၤဒဲးဧၢ,
ဒိကနၣ်တၢ်လၢယစံးတ့ၢ်န့ၣ်တက့ၢ်.”
(၂ကွဲး.၁၈:၂၈-၃၄)
29 အန့ၣ်ဒီး, ကီၢ်အံၣ်စရ့လးအစီၤပၤအၤဃာ်ဒီးကီၢ်ယူဒၤအစီၤပၤ စီၤယဟိၡၤဖးလဲၤထီၣ်ဒီးဒုးဝ့ၢ်ရၤမိးလၢကီၢ်ကံးလဧးအပူၤန့ၣ်လီၤ.
30 စီၤအၤဃာ်စံးဘၣ်စီၤယဟိၡၤဖး, “တုၤပလဲၤဆူတၢ်ဒုးအပူၤန့ၣ်, ယကပျိာ်လီၤဆီယသး, မ့မ့ၢ်နဲဒၣ်, ကူကၤစီၤပၤအကူအသိးတဖၣ်န့ၣ်တက့ၢ်.” လၢတၢ်န့ၣ်အဃိကီၢ်အံၣ်စရ့လးအစီၤပၤလဲၤဆူတၢ်ဒုးအပူၤအိၣ် ဒီးတၢ်ပျိာ်လီၤဆီအသးန့ၣ်လီၤ.
31 ကီၢ်စူၤရံအစီၤပၤဟ့ၣ်လီၤအကလုၢ်ဆူပှၤအခိၣ်သၢဆံခံဂၤလၢ လ့ၣ်ကဟၣ်ဒုးသုးအဂီၢ်လၢ,
မ့တမ့ၢ်ဘၣ်လၢကီၢ်အံၣ်စရ့လးအစီၤပၤဘၣ်န့ၣ်, အဝဲသ့ၣ်သုတဒုးပှၤအဂၤနီတဂၤတဂ့ၤန့ၣ်လီၤ.
32 အဃိဒီး, တုၤအဝဲသ့ၣ်ထံၣ်စီၤပၤယဟိၡၤဖးန့ၣ်အဝဲသ့ၣ်ခဲလၢာ် ဆိကမိၣ်ဝဲလၢအဝဲမ့ၢ်ကီၢ်အံၣ်စရ့လးအစီၤပၤ,
ဒီးအဝဲသ့ၣ်ဃၣ်အသးလၢကဒုးအီၤအဂီၢ်န့ၣ်လီၤ.
ဘၣ်ဆၣ်ဖဲအဝဲကိးထီၣ်ဝဲန့ၣ်,
33 အဝဲသ့ၣ်, သ့ၣ်ညါက့ၤဝဲဒၣ်လၢအဝဲတမ့ၢ်ဘၣ်ကီၢ်အံၣ်စရ့လးအစီၤ ပၤဘၣ်အဃိ, အဝဲသ့ၣ်ဆိကတီၢ်အတၢ်ဒုးအီၤလီၤ.
34 ဘၣ်ဆၣ်, လၢတၢ်ဘၣ်ဆၢၣ်ဘၣ်တီၤအဃိ, စူၤရံအသုးဖိတဂၤခးပျၢ်တဘ့ၣ်လၢအမၤဘၣ်ဒိစီၤပၤအၤဃာ်ဖဲ အသဃိးအဆၢန့ၣ်လီၤ. အဝဲကိးထီၣ်ဆူအပှၤနီၣ်လ့ၣ်ကဟၣ်စံးဝဲ,
“ယဘၣ်ဒိလံ. နီၣ်ဟးထီၣ်ကွံာ်နလ့ၣ်ကဟၣ်လၢတၢ်ဒုးပျီပူၤတက့ၢ်.”
35 ဖဲတၢ်ဒုးဆူၣ်ဒံးဝဲအကတီၢ်န့ၣ်, စီၤပၤအၤဃာ်အိၣ်ပိာ်ဆၢထၢၣ် တ့ၢ်ဒံးအသးလၢအလ့ၣ်ကဟၣ်အပူၤဒီးကွၢ်ဆၢညါပှၤစူၤရံဖိ
တဖၣ်န့ၣ်လီၤ. အဝဲအပူၤလီၢ်အသွံၣ်တဖၣ်ယွၤလီၤဝဲ,
ဒီးကးဘၢလ့ၣ်ကဟၣ်အဒါန့ၣ်လီၤ. ဒီးလၢဟါခီန့ၣ်အဝဲသံဝဲ
ဒၣ်န့ၣ်လီၤ.
36 ဘူးလၢမုၢ်ကလီၤနုာ်အကတီၢ်န့ၣ်, တၢ်ကလုၢ်တမံၤဘၣ်တၢ်ဟ့ၣ်လီၤ အီၤဆူပှၤအံၣ်စရ့လးဖိအသုးမုၢ်သံၣ်ဘိအကျါစံးဝဲ, “မ်ပှၤကိးဂၤဒဲးက့ၤကဒါက့ၤဆူအထံအကီၢ်ဒီးအဝ့ၢ်ဒၣ်ဝဲတက့ၢ်.”
37 အအံၤမ့ၢ်စီၤပၤအၤဃာ်အတၢ်သံန့ၣ်လီၤ. အဝဲအစိၣ်ဘၣ်တၢ်စိာ်အီၤဆူဝ့ၢ်ၡၤမရံဒီးဘၣ်တၢ်ခူၣ်လီၤကွံာ်
အီၤဖဲန့ၣ်လီၤ.
38 အဝဲအလ့ၣ်ကဟၣ်ဘၣ်တၢ်သ့ကဆှီကွံာ်အီၤလၢဝ့ၢ်ၡၤမရံ အနိၣ် (တၢ်လီၢ်ဖဲပှၤဃဲသဲမုၣ်တဖၣ်လုၢ်ထံ)
ဒီးဖဲန့ၣ်ထွံၣ်တဖၣ်လ့ၣ်ကွံာ်အဝဲအသွံၣ်ဒ်ယွၤစံးတ့ၢ်ဝဲလၢ
တၢ်ကမၤအသးအသိးန့ၣ်လီၤ.
39 ကယဲၢ်တၢ်အဂုၤအဂၤတမံၤလၢ်လၢ်လၢစီၤပၤအၤဃာ်မၤတ့ၢ်ဝဲ, ဃုာ်ဒီးတၢ်ကွဲးနီၣ်ဘၣ်ထွဲဒီးအဝဲအနီလၢအဘၣ်တၢ်ကယၢကယဲ
အီၤလၢကဆီမဲဒီးကယဲၢ်ဝ့ၢ်တဖၣ်လၢအဝဲသူၣ်ထီၣ်တ့ၢ်ဝဲ
အဂ့ၢ်န့ၣ်, ဘၣ်တၢ်ကွဲးနီၣ်ကွဲးဃါအီၤလၢကီၢ်အံၣ်စရ့လးအစီၤ
ပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.
40 တုၤအဝဲသံန့ၣ်အဖိခွါစီၤအဃၤစယၤကဲထီၣ်စီၤပၤလၢအလီၢ်န့ၣ် လီၤ.
(၂ကွဲး.၂၀:၃၁-၂၁:၁)
41 လၢကီၢ်အံၣ်စရ့လးအစီၤပၤအၤဃာ်ပၢတၢ်လွံၢ်နံၣ်တနံၤအပူၤ န့ၣ်, စီၤအၤစါအဖိခွါစီၤယဟိၡၤဖးကဲထီၣ်ကီၢ်ယူဒၤအစီၤပၤ,
42 ဖဲအသးအိၣ်သၢဆံယဲၢ်နံၣ်, ဒီးအဝဲပၢတၢ်လၢဝ့ၢ်ယရူၤၡလ့ၣ် အပူၤခံဆံယဲၢ်နံၣ်န့ၣ်လီၤ. အဝဲအမိၢ်မ့ၢ်စီၤၡံးလဃံအဖိမုၣ်နီၢ်ဧစူဘၤန့ၣ်လီၤ.
43 ဒ်အပၢ်စီၤအၤစါလၢအဝဲအမဲာ်ညါအသိးန့ၣ်, အဝဲမၤတ့ၢ်တၢ်အဘၣ်လၢယွၤအမဲာ်ညါန့ၣ်လီၤ.
ဘၣ်ဆၣ်ပှၤဘါတၢ်ဂီၤတၢ်ဖီၣ်အတၢ်ဘူၣ်တၢ်ဘါအလီၢ်တဖၣ်တဘၣ်တၢ်မၤ
ဟးဂီၤအီၤဘၣ်. ဒီးပှၤဂီၢ်မုၢ်လုၢ်ထီၣ်ပာ်ထီၣ်ဒံးတၢ်ဒီးဆူးကဲၤဒံးတၢ်နၢ
မူဖဲန့ၣ်လီၤ.
44 စီၤယဟိၡၤဖးမၤတၢ်ဃူတၢ်ဖိးဒီးကီၢ်အံၣ်စရ့လးအစီၤပၤန့ၣ် လီၤ.
45 ကယဲၢ်တၢ်အဂုၤအဂၤတမံၤလၢ်လၢ်လၢစီၤယဟိၡၤဖးမၤတ့ၢ်ဝဲ, ကယဲၢ်အဝဲအတၢ်သူၣ်ဒူသးဒူတဖၣ်ဒီးအတၢ်ဒုးတၢ်ယၤတဖၣ်အဂ့ၢ်
န့ၣ်, ဘၣ်တၢ်ကွဲးနီၣ်ကွဲးဃါအီၤလၢကီၢ်ယူဒၤအစီၤပၤတဖၣ်အလံာ်တၢ်
စံၣ်စိၤတဲစိၤအပူၤန့ၣ်လီၤ.
46 ကယဲၢ်ပှၤပိာ်ခွါဒီးပှၤပိာ်မုၣ်လၢအမၤတၢ်ဒ်ပှၤဃဲသဲမုၣ်တဖၣ် အသိးလၢပှၤဘါတၢ်ဂီၤတၢ်ဖီၣ်အတၢ်လုၢ်လီၢ်တဖၣ်,
လၢအအိၣ်လီၤတဲာ်တ့ၢ်ဒံးလၢအဝဲအပၢ်စီၤအၤစါအမုၢ်နံၤတဖၣ်
န့ၣ်, အဝဲနီၣ်ထီၣ်ကွံာ်ဝဲခဲလၢာ်န့ၣ်လီၤ.
47 ကီၢ်အဒိၣ်တအိၣ်ဘၣ်ဒီးအစီၤပၤနီတဂၤဘၣ်. ဘၣ်တၢ်ပၢအီၤဒၣ်လၢခၢၣ်စးတဂၤလၢကီၢ်ယူဒၤအစီၤပၤဃုထၢပာ် လီၤအီၤန့ၣ်လီၤ.
48 စီၤပၤယဟိၡၤဖးအိၣ်ဒီးအကဘီတဖၣ်လၢအလဲၤတၢ်လၢပီၣ်လဲၣ်ပူၤ လၢကလဲၤတၢ်ဆူကီၢ်အိဖ့ၢ်လၢတၢ်မၤန့ၢ်ထူအဂီၢ်န့ၣ်လီၤ.
ဘၣ်ဆၣ်အဝဲသ့ၣ်ဟးဂီၤကွံာ်ဝဲဖဲဝ့ၢ်ဧးစယိၣ်က့ဘ့ၢ်ဒီးတလဲၤ
တၢ်နီတစုလၢၤဘၣ်.
49 အန့ၣ်ဒီးကီၢ်အံၣ်စရ့လးအစီၤပၤစီၤအဃၤစယၤအဲၣ်ဒိးပျဲလီၤ အပှၤတဖၣ်လၢကလဲၤဃုာ်တၢ်ဒီးစီၤယဟိၡၤဖးအပှၤတဖၣ်,
ဘၣ်ဆၣ်ဒီးစီၤယဟိၡၤဖးတတူၢ်လိာ်ဘၣ်တၢ်သးအိၣ်န့ၣ်ဘၣ်လီၤ.
50 စီၤယဟိၡၤဖးသံဝဲဒီးဘၣ်တၢ်ခူၣ်လီၤကွံာ်အီၤဖဲစီၤပၤအတၢ် သွၣ်ခိၣ်လၢစီၤဒၤဝံးအဝ့ၢ်ပူၤန့ၣ်လီၤ. ဒီးအဝဲအဖိခွါစီၤယဟိရၣ်ကဲထီၣ်စီၤပၤလၢအလီၢ်န့ၣ်လီၤ.
51 လၢကီၢ်ယူဒၤအစီၤပၤစီၤယဟိၡၤဖးပၢတၢ်တဆံနွံနံၣ်တနံၣ် အပူၤန့ၣ်စီၤအၤဃာ်အဖိခွါစီၤအဃၤစယၤကဲထီၣ်ကီၢ်အံၣ်စရ့လး
အစီၤပၤ, ဒီးအဝဲပၢတၢ်လၢဝ့ၢ်ၡၤမရံခံနံၣ်န့ၣ်လီၤ.
52 အဝဲမၤတ့ၢ်တၢ်ဒဲးဘးထီဒါယွၤ, ပိာ်ထွဲထီၣ်အပၢ်စီၤအၤဃာ်, ဒီးအမိၢ်နီၢ်အံၤစ့ဘ့ၤလး, ဒီးစီၤပၤယၤရၤဘၣ်တဖၣ်အဒိအတဲာ်
လၢအအၢအသီအခံ, လၢအဆှၢဃီၤတ့ၢ်ကီၢ်အံၣ်စရ့လးဆူ
တၢ်ဒဲးဘးအပူၤန့ၣ်လီၤ.
53 အဝဲဘူၣ်ထီၣ်ဘါထီၣ်တ့ၢ်ဒီးမၤတ့ၢ်ဘဧၤလးအတၢ်, ဒီးဒ်အဝဲအပၢ်လၢအမဲာ်ညါအသိးန့ၣ်, အဝဲထိၣ်ဂဲၤထီၣ်ဘၣ်တ့ၢ် ယွၤ, ကီၢ်အံၣ်စရ့လးအကစၢ်ယွၤအတၢ်သးဒိၣ်န့ၣ်လီၤ.