21
1 လၢစီၤပၤအၤဃာ်အနီလၢဝ့ၢ်ယံးစရ့လးအကပၤန့ၣ်စီၤနၤဘိး အစပံးလီၢ်အိၣ်ဝဲဒၣ်န့ၣ်လီၤ.
2 ဘၣ်မုၢ်တနံၤစီၤအၤဃာ်စံးဘၣ်စီၤနၤဘိး, “ပျဲယဟံးန့ၢ် နစပံးလီၢ်န့ၣ်တက့ၢ်. အဂ့ၢ်ဒ်အံၤ, အိၣ်ဘူးဒီးယနီ, ဒီးယအဲၣ်ဒိးသူတၢ်လီၢ်န့ၣ်လၢတၢ်ဒိးတၢ်လၣ်အကရၢၢ်တခါန့ၣ် လီၤ. လၢတၢ်န့ၣ်အဂီၢ်, ယကဟ့ၣ်နၤစပံးလီၢ်အဂ့ၤဒိၣ်တက့ၢ်မ့တမ့ၢ်, နမ့ၢ်ဘၣ်နသးဒီးယကဟ့ၣ်နၤတၢ်အပှ့ၤတမံၤလၢအကြၢးဝဲ ဘၣ်ဝဲန့ၣ်လီၤ.”
3 စီၤနၤဘိးစံးဆၢဝဲ, “ယန့ၢ်သါဘၣ်စပံးလီၢ်အံၤလၢယမိၢ်ပၢ် ဖံဖုလၢပျၢၤတဖၣ်အအိၣ်န့ၣ်လီၤ. မ်ယွၤတြီယၤလၢယကပျဲနမၤန့ၢ်အီၤန့ၣ်တက့ၢ်.”
4 စီၤအၤဃာ်က့ၤကဒါက့ၤဆူဟံၣ်လၢတၢ်သူၣ်လီၤဘှံးသးလီၤတီၤ, ဒီးတၢ်သူၣ်ဒိၣ်သးဖျိးအပူၤလၢတၢ်လၢစီၤနၤဘိးစံးဘၣ်တ့ၢ် အီၤအဃိန့ၣ်လီၤ. အဝဲမံလီၤလၢအလီၢ်မံခိၣ်, ဃၣ်အမဲာ်ဆူတၢ်အဒူၣ်ဒီးတအီၣ်ဘၣ်တၢ်ဘၣ်န့ၣ်လီၤ.
5 အမါနီၢ်အံၤစ့ဘ့ၤလးလဲၤဆူအအိၣ်ဒီးသံကွၢ်ဝဲ, “ဘၣ်မနုၤလၢနသူၣ်လီၤဘှံးသးလီၤတီၤနးမးန့ၣ်လဲၣ်. ဘၣ်မနုၤအဃိနတအီၣ်တၢ်ဘၣ်န့ၣ်လဲၣ်.”
6 အဝဲစံးဆၢဝဲ, “မ့ၢ်လၢတၢ်လၢစီၤနၤဘိးစံးဘၣ်တ့ၢ်ယၤအဃိန့ၣ်လီၤ. ယပာ်ဖျါထီၣ်ယတၢ်သးအိၣ်လၢယကပှ့ၤအစပံးအလီၢ်မ့တမ့ၢ်အဝဲမ့ၢ် ဘၣ်အသးဒီးယကဟ့ၣ်အီၤလၢစပံးလီၢ်အဂၤတတီၤလၢအလီၢ်န့ၣ်လီၤ. ဘၣ်ဆၣ်အဝဲတဲဘၣ်ယၤလၢယမၤန့ၢ်အီၤတသ့ဘၣ်န့ၣ်လီၤ.”
7 နီၢ်အံၤစ့ဘ့ၤလးစံးဆၢဝဲ, “နမ့ၢ်စီၤပၤဧါမ့တမ့ၢ်နတမ့ၢ် စီၤပၤဘၣ်န့ၣ်ဧါ. ဂဲၤဆၢထၢၣ်လၢနလီၢ်မံခိၣ်, အိၣ်ဒီးတၢ်သးဖှံဒီးအီၣ်တၢ်တက့ၢ်. ယကမၤန့ၢ်နၤလၢစီၤနၤဘိးအစပံးလီၢ်န့ၣ်လီၤ.”
8 အန့ၣ်ဒီးအဝဲကွဲးလံာ်ပရၢတနီၤ, ဆဲးလီၤဝဲလၢစီၤအၤဃာ်အမံၤ, စဲပနီၣ်ဃာ်ဝဲလၢအတၢ်စဲပနီၣ်, ဒီးဆှၢလီၤဝဲဆူပဒိၣ်ပပှၢ် တဖၣ်ဒီးထံဖိကီၢ်ဖိလၢအဒိၣ်အထီလၢဝ့ၢ်ယံးစရ့လးအပူၤတဖၣ် အအိၣ်န့ၣ်လီၤ.
9 တၢ်ပရၢတဖၣ်စံးဝဲ, “ဘိးဘၣ်သ့ၣ်ညါထီၣ်တၢ်ဒုၣ်တၢ်အီၣ်အနံၤတ နံၤ, ကိးဖှိၣ်ကယဲၢ်ပှၤဂီၢ်မုၢ်တပူၤဃီ, ဒီးဒုးဆ့ၣ်နီၤစီၤနၤဘိးလၢတၢ်လၤကပီၤအလီၢ်န့ၣ်တက့ၢ်.
10 မၤန့ၢ်ပှၤအၢပှၤသီခံဂၤလၢအကအုၣ်အသးထီဒါမဲာ်ပူၤအီၤဒ် အမ့ၢ်ပှၤဆိၣ်အၢကစၢ်ယွၤဒီးစီၤပၤတက့ၢ်. ဝံၤဒီးထုးထီၣ်ကွံာ်အီၤလၢဝ့ၢ်ပူၤဒီးကွံာ်သံအီၤလၢလၢၢ်တ က့ၢ်.”
11 ပဒိၣ်ပပှၢ်တဖၣ်ဒီးဝ့ၢ်ယံးစရ့လးအထံဖိကီၢ်ဖိလၢအဒိၣ်အထီ တဖၣ်မၤဝဲဒ်နီၢ်အံၤစ့ဘ့ၤလးမၤလိာ်ဝဲအသိးန့ၣ်လီၤ.
12 အဝဲသ့ၣ်ဘိးဘၣ်သ့ၣ်ညါထီၣ်တၢ်ဒုၣ်တၢ်အီၣ်အနံၤတနံၤ, ကိးဖှိၣ်ပှၤဂီၢ်မုၢ်တပူၤဃီ, ဒီးဟ့ၣ်စီၤနၤဘိးလၢတၢ်လၤ ကပီၤအလီၢ်န့ၣ်လီၤ.
13 လၢကမျၢၢ်အမဲာ်ညါန့ၣ်ပှၤအၢပှၤသီခံဂၤအုၣ်အသးထီဒါစီၤနၤ ဘိးလၢအဆိၣ်အၢကစၢ်ယွၤဒီးစီၤပၤန့ၣ်လီၤ. ဒီးလၢတၢ်န့ၣ်အဃိအဝဲဘၣ်တၢ်ထုးထီၣ်ကွံာ်အီၤဆူ ဝ့ၢ်အချၢဒီးကွံာ်သံကွံာ်အီၤလၢလၢၢ်န့ၣ်လီၤ.
14 တၢ်ကစီၣ်ဘၣ်တၢ်ဆှၢအီၤဆူနီၢ်အံၤစ့ဘ့ၤလးအအိၣ်စံးဝဲ, “စီၤနၤဘိးဘၣ်တၢ်မၤသံကွံာ်အီၤလံ,” န့ၣ်လီၤ.
15 တစုဃီဖဲနီၢ်အံၤစ့ဘ့ၤလးဒိးန့ၢ်ဘၣ်တၢ်ကစီၣ်န့ၣ်, အဝဲစံးဘၣ်စီၤအၤဃာ်, “စီၤနၤဘိးသံလံ. ခဲကနံၣ်အံၤ, လဲၤဒီးဟံးန့ၢ်စပံးလီၢ်လၢအဝဲဂ့ၢ်လိာ်ဝဲလၢကဆါန့ၢ်နၤန့ၣ် တက့ၢ်.”
16 တဘျီဃီစီၤအၤဃာ်လဲၤဝဲဆူစပံးအလီၢ်, လၢကဟံးန့ၢ်ကွံာ်အီၤ အဂီၢ်န့ၣ်လီၤ.
17 တုၤနုၤတစု, ယွၤစံးဘၣ်စီၤအ့ၤလံယၤ, ဝံလၢဝ့ၢ်တံးၡဘး,
18 “လဲၤဆူကီၢ်ၡၤမရံအစီၤပၤအၤဃာ်အအိၣ်တက့ၢ်. နကထံၣ်ဘၣ်အီၤလၢစီၤနၤဘိးအစပံးလီၢ်အပူၤ, ဖဲအဝဲလဲၤလၢကဟံးန့ၢ်ကွံာ်ဝဲအဂီၢ်န့ၣ်လီၤ.
19 တဲဘၣ်အီၤလၢယၤ, ယွၤစံးဘၣ်အီၤ, ဖဲနမၤသံကွံာ်ပှၤတဂၤဝံၤ အလီၢ်ခံန့ၣ်, မ့ၢ်နကဟံးန့ၢ်ကွံာ်အတၢ်စုလီၢ်ခီၣ်ခိၣ်စ့ၢ်ကီးဧါ. တဲဘၣ်အီၤလၢအအံၤမ့ၢ်တၢ်လၢယစံးန့ၣ်တက့ၢ်. ဖဲတၢ်လီၢ်တတီၤဃီလၢထွံၣ်တဖၣ်လ့ၣ်ကွံာ်စီၤနၤဘိးအသွံၣ်န့ၣ် အဝဲသ့ၣ်ကလ့ၣ်ထီၣ်ကွံာ်နသွံၣ်စ့ၢ်ကီးန့ၣ်လီၤ.”
20 တုၤစီၤအၤဃာ်ထံၣ်ဘၣ်စီၤအ့ၤလံယၤန့ၣ်, အဝဲစံးဝဲ, “ယဒုၣ်ယဒါဧၢ, မ့ၢ်နချုးန့ၢ်ယၤလံဧါ.” စီၤအ့ၤလံယၤစံးဆၢဝဲ, “မ့ၢ်ယချုးန့ၢ်နၤလံ. နဟ့ၣ်လီၤတ့ၢ်လံနသးလၢာ်လၢာ်ဆ့ဆ့လၢနကမၤတၢ်လၢအကမၣ်လၢယွၤ အမဲာ်ညါန့ၣ်လီၤ.
21 လၢတၢ်န့ၣ်အဃိယွၤစံးဘၣ်နၤ, ယကဟဲစိာ်တၢ်တတၢးတနါလၢနဖီခိၣ်န့ၣ်လီၤ. ယကတၢၤကွံာ်နၤဒီးမၤလၢာ်ကွံာ်ကယဲၢ်နပှၤဟံၣ်ဖိဃီဖိပိာ်ခွါ လၢနဟံၣ်ဒူၣ်ဃီထၢအပူၤ, သးစၢ်မ့ၢ်ဂ့ၤ, သးပှၢ်မ့ၢ်ဂ့ၤဒ်သိးသိးန့ၣ်လီၤ.
22 နပှၤဟံၣ်ဖိဃီဖိကကဲထီၣ်ဒ်စီၤနဘးအဖိခွါစီၤပၤစီၤယၤရၤ ဘၣ်အဟံၣ်ဖိဃီဖိအသိးဒီးဒ်စီၤအဃံယၤအဖိခွါစီၤပၤစီၤဘါ ၡၤအဟံၣ်ဖိဃီဖိအသိး, မ့ၢ်လၢနထိၣ်ဂဲၤထီၣ်ယတၢ်သးဒိၣ်ထီၣ်ခီဖျိနဆှၢဃီၤပှၤအံၣ် စရ့လးဖိဆူတၢ်ဒဲးဘးအပူၤအဃိလီၤ.
23 ဒီးဖဲအဘၣ်ထွဲဒီးနီၢ်အံၤစ့ဘ့ၤလးန့ၣ်, ယွၤစံးဝဲဒၣ်လၢထွံၣ်တဖၣ်ကအီၣ်ကွံာ်အစိၣ်လၢဝ့ၢ်ယံးစရ့လး အပူၤန့ၣ်လီၤ.
24 ကယဲၢ်နဘူးနတံၢ်တဂၤလၢ်လၢ်လၢအသံလၢဝ့ၢ်ပူၤန့ၣ်ထွံၣ်တဖၣ်ကအီၣ် ကွံာ်အီၤဒီးပှၤတဂၤလၢ်လၢ်လၢအသံလၢတၢ်ပျီပူၤန့ၣ်လီတးတဖၣ် ကအီၣ်ကွံာ်အီၤန့ၣ်လီၤ.”
25 (ပှၤဒ်စီၤအၤဃာ်အသိးန့ၣ်တအိၣ်ဘၣ်နီတဂၤဂၤဘၣ်. အဝဲဟ့ၣ်လီၤအးလီၤအသးလၢာ်လၢာ်ဆ့ဆ့လၢကမၤတၢ်ကမၣ်လၢယွၤ အမဲာ်ညါ, ကယဲၢ်တၢ်လၢအမါနီၢ်အံၤစ့ဘ့ၤလးမၢဆူၣ်အီၤလၢကမၤဝဲန့ၣ်လီၤ.
26 အဝဲမၤတ့ၢ်တၢ်ဒဲးဘးတဖၣ်လၢအလီၤမဲာ်ဆှးအဒိၣ်ကတၢၢ်ခီဖျိတၢ် ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်ဒ်ပှၤအမိၢ်ဖိတဖၣ်လၢယွၤ ဟီထီၣ်ကွံာ်တ့ၢ်အီၤလၢကီၢ်ပူၤဖဲကီၢ်အံၣ်စရ့လးအပှၤဂီၢ်မုၢ်တဖၣ် ဟဲထီၣ်ဒုးတၢ်အခါမၤတ့ၢ်ဝဲအသိးန့ၣ်လီၤ.)
27 တုၤစီၤအ့ၤလံယၤကတိၤတၢ်ဝံၤန့ၣ်, စီၤအၤဃာ်ဖှီယာ်ကွံာ်အကူ အသိးတဖၣ်, ဘ့ၣ်လီၤကွံာ်အီၤဒီးကူထီၣ်ကၤထီၣ်ဆ့ကၤထၢၣ်တၢ်ကံးယာ်န့ၣ် လီၤ. အဝဲဂ့ၢ်လိာ်လၢကအီၣ်တၢ်, မံလီၤလၢထၢၣ်တၢ်ကံးယာ်အပူၤဒီးအိၣ် ဝဲဒၣ်လၢတၢ်သူၣ်အုးသးအုးဒီးတၢ်သူၣ်လီၤဘှံးသးလီၤတီၤ အပူၤန့ၣ်လီၤ.
28 ယွၤစံးဘၣ်ဝံအ့ၤလံယၤ,
29 “မ့ၢ်နပာ်သူၣ်ပာ်သးလၢ, စီၤအၤဃာ်ဆိၣ်လီၤတ့ၢ်အသးလၢယမဲာ် ညါဒ်လဲၣ်န့ၣ်ဧါ. မ့ၢ်လၢအဝဲမၤတ့ၢ်တၢ်အံၤအဃိ, ယတဟဲစိာ်တၢ်တတၢးတနါလၢအဖီခိၣ်ဖဲအဝဲအိၣ်မူဒံးဝဲ အဆၢကတီၢ်န့ၣ်ဘၣ်. တၢ်ဆၢကတီၢ်လၢယကဟဲစိာ်တၢ်တတၢးတနါဆူစီၤ အၤဃာ်အဟံၣ်ဒူၣ်ဃီထၢအဖီခိၣ်န့ၣ်ကမ့ၢ်ဖဲအဝဲအဖိပိာ်ခွါ အစိၤအဆၢကတီၢ်န့ၣ်လီၤ.”