17
1 ဝံတဂၤလၢအမံၤမ့ၢ်စီၤအ့ၤလံယၤ, လၢဝ့ၢ်တံးၡဘး, ကီၢ်ကံးလဧးအပူၤန့ၣ်စံးဘၣ်စီၤပၤအၤဃာ်, “လၢယွၤ, ကီၢ်အံၣ်စရ့လးအကစၢ်ယွၤလၢအမူဝဲလၢယမၤအတၢ်တဂၤ
အမံၤအပူၤန့ၣ်, ယတဲဘၣ်နၤလၢမ့တမ့ၢ်လၢယစံးတၢ်တမံၤမံၤဒံးဘၣ်န့ၣ်, ပစီၤထံမ့ၢ်ဂ့ၤတၢ်စူၤထံမ့ၢ်ဂ့ၤတအိၣ်ဘၣ်နီတစဲးလၢဆူညါ
ခံနံၣ်မ့တမ့ၢ်သၢနံၣ်အတီၢ်ပူၤဘၣ်လီၤ.”
2 အန့ၣ်ဒီးယွၤစံးဘၣ်စီၤအ့ၤလံယၤ,
3 “ဟးထီၣ်ကွံာ်လၢတၢ်လီၢ်အံၤဒီးလဲၤဆူမုၢ်ထီၣ်ဒီးပာ်တဒၢ နသးဘူးဒီးထံကျိဖိကရံသးအနံၤလၢထံကျိယၢ်ဒ့ၣ်အမုၢ်ထီၣ်
န့ၣ်တက့ၢ်.
4 ထံကျိဖိကဟ့ၣ်ထီၣ်နၤလၢထံလၢနကအီအဂီၢ်ဒီးယမၤလိာ်တ့ၢ်စိး ဝၣ်ဃးတဖၣ်လၢကဟဲစိာ်န့ၢ်နၤတၢ်အီၣ်ဖဲန့ၣ်လီၤ.”
5 စီၤအ့ၤလံယၤစူၢ်ဝဲယွၤအတၢ်မၤလိာ်ဒီးလဲၤအိၣ်ဝဲဖဲထံကျိ ဖိကရံသးအကပၤန့ၣ်လီၤ.
6 အဝဲအီထံလၢထံကျိဖိအပူၤဒီးစိးဝၣ်ဃးတဖၣ်ဟဲစိာ်န့ၢ်အီၤ ကိၣ်ဒီးတၢ်ညၣ်ကိးမုၢ်ဂီၤဒီးကိးမုၢ်ဟါဒဲးန့ၣ်လီၤ.
7 တယံာ်ဘၣ်အလီၢ်ခံန့ၣ်ထံကျိဖိလီၤသံးကွံာ်ဝဲမ့ၢ်လၢတၢ်တဟဲ စူၤဘၣ်အဃိန့ၣ်လီၤ.
8 အန့ၣ်ဒီး, ယွၤစံးဘၣ်စီၤအ့ၤလံယၤ,
9 “ခဲကနံၣ်အံၤ, လဲၤဆူဝ့ၢ်စၤရဖၤသးဘူးဒီးဝ့ၢ်စံဒိၣ်ဒီး အိၣ်ဖဲန့ၣ်တက့ၢ်. ယမၤလိာ်တ့ၢ်လံမုၣ်ကမဲတဂၤလၢအအိၣ်ဖဲန့ၣ်ဒ်သိးကလုၢ်အီၣ်နၤ
လီၤ.”
10 လၢတၢ်န့ၣ်အဃိစီၤအ့ၤလံယၤလဲၤဃီၤဆူဝ့ၢ်စၤရဖၤသး, ဒီးတုၤအဟဲဝဲဆူဝ့ၢ်အတြဲၤဖးဒိၣ်န့ၣ်အဝဲထံၣ်ဃီၤမုၣ်ကမဲ
တဂၤထၢဖှိၣ်သ့ၣ်မုၣ်ဒ့လီၤ. အဝဲစံးဘၣ်အီၤ, “ဝံသးစူၤဟဲစိာ်န့ၢ်ယၤထံအီတခွးတက့ၢ်.”
11 ဒီးဖဲအလဲၤဝဲဒ်သိးအကဟံးန့ၢ်ထံအီန့ၣ်, အဝဲကိးဃီၤဝဲ, “ဝံသးစူၤဟဲစိာ်န့ၢ်ယၤကိၣ်တစဲးစ့ၢ်ကီးတက့ၢ်.”
12 မုၣ်ကမဲစံးဆၢအီၤ, “ယဆိၣ်လီၤယသးလၢယွၤ, နကစၢ်လၢအမူဝဲတဂၤအမံၤအပူၤလၢယတအိၣ်ဒီးကိၣ်နီတစဲးဘၣ်. တၢ်လၢအအိၣ်ဒီးယၤခဲလၢာ်န့ၣ်မ့ၢ်ဒၣ်ကိၣ်ကမူၣ်တစှီၤလၢလီခီ
တဖျၢၣ်အပူၤဒီးသ့ၣ်စၤယံးအသိတစဲးဖိလၢကိတဖျၢၣ်အပူၤန့ၣ်
လီၤ. ယဟဲတ့ၢ်ဖဲအံၤဒ်သိးယကထၢဖှိၣ်သ့ၣ်မုၣ်တနီၤလၢယကက့ၤစိာ်ဆူ
ဟံၣ်ဒီးကတဲာ်ကတီၤတၢ်လၢအအိၣ်ဒီးယၤတစဲးဖိအံၤလၢယဖိခွါ
ဒီးယၤအဂီၢ်န့ၣ်လီၤ.
တၢ်န့ၣ်မ့ၢ်ပတၢ်အီၣ်လၢခံကတၢၢ်ဝံၤဒီးပကလီၤဒိသံကွံာ်န့ၣ်လီၤ.”
13 စီၤအ့ၤလံယၤစံးဘၣ်အီၤ, “ကိၢ်တၢ်တဂ့ၤ. လဲၤဒီးကတဲာ်ကတီၤသုတၢ်အီၣ်တက့ၢ်.
ဘၣ်ဆၣ်မၤဆိကိၣ်အဆံးဖိတလိၣ်လၢတၢ်လၢအအိၣ်ဒီးနၤအပူၤဒီး
ဟဲစိာ်တၢ်န့ၣ်ဆူယအိၣ်, ဝံၤဒီးကတဲာ်ကတီၤတၢ်လၢအအိၣ်တီၢ်န့ၣ်လၢနဂီၢ်ဒီးနဖိခွါအဂီၢ်န့ၣ်တက့ၢ်.
14 အဂ့ၢ်ဒ်အံၤ, တၢ်အံၤမ့ၢ်တၢ်လၢယွၤကီၢ်အံၣ်စရ့လးအကစၢ်ယွၤ စံးဝဲန့ၣ်လီၤ. တချုးဒံးလၢမုၢ်တနံၤလၢယၤ, ယွၤ,
မၢလီၤတၢ်ဟဲစူၤဒံးဘၣ်န့ၣ်, နလီခီအပူၤကိၣ်ကမူၣ်တလၢာ်မ့ၢ်ဂ့ၤ,
နကိအပူၤသိတလၢာ်မ့ၢ်ဂ့ၤန့ၣ်ဘၣ်.”
15 မုၣ်ကမဲန့ၣ်လဲၤဃီၤဒီးမၤဝဲဒ်စီၤအ့ၤလံယၤတဲဘၣ်တ့ၢ်အီၤ အသိးဒီးအဝဲသ့ၣ်ခဲလၢာ်အဂီၢ်ကိၣ်အိၣ်ဝဲလၢလၢလီၣ်လီၣ်လၢအါ
နံၤအါသီအတီၢ်ပူၤန့ၣ်လီၤ.
16 ဒ်ယွၤအၢၣ်လီၤတ့ၢ်တၢ်ခီဖျိစီၤအ့ၤလံယၤအသိးန့ၣ်, လၢလီခီပူၤကိၣ်ကမူၣ်တလၢာ်မ့ၢ်ဂ့ၤလၢကိအပူၤသိတလၢာ်မ့ၢ်
ဂ့ၤဘၣ်န့ၣ်လီၤ.
17 လၢခံ, တယံာ်ဘၣ်အတီၢ်ပူၤန့ၣ်, မုၣ်ကမဲအဖိခွါဆါထီၣ်ဝဲဒီး အတၢ်ဆါနးထီၣ်နးထီၣ်ဝဲဒီးလၢခံကတၢၢ်သံဝဲဒၣ်န့ၣ်လီၤ.
18 အဝဲစံးဘၣ်စီၤအ့ၤလံယၤ, “ကစၢ်ယွၤအပှၤကညီတဂၤဧၢ, နမၤဘၣ်ယၤတၢ်အံၤဘၣ်မနုၤအဃိလဲၣ်. မ့ၢ်နဟဲဖဲအံၤဒ်သိး
နကဒုးသ့ၣ်နီၣ်ကစၢ်ယွၤလၢယတၢ်ဒဲးဘးတဖၣ်ဒီးလၢတၢ်န့ၣ်အဃိ
ကဒုးအိၣ်ထီၣ်ယဖိခွါအတၢ်သံန့ၣ်ဧါ.”
19 စီၤအ့ၤလံယၤစံးဝဲ, “ဟ့ၣ်ဃီၤယၤလၢဖိသၣ်ပိာ်ခွါတ က့ၢ်.” အဝဲဟံးထီၣ်ဖိသၣ်ပိာ်ခွါလၢအမိၢ်အစုတီၤလိၤဒီးလဲၤစိာ်ဝဲဆူ
ဒၢးလၢထးခီဖဲအအိၣ်ဝဲအလီၢ်ဒီးပာ်လီၤအီၤလၢလီၢ်မံအဖီ
ခိၣ်န့ၣ်လီၤ.
20 အန့ၣ်ဝံၤဒီးအဝဲဘါထုကဖၣ်တၢ်လၢအကလုၢ်ဖးဒိၣ်, “အိယွၤ, ယကစၢ်ယွၤဧၢ, ဘၣ်မနုၤအဃိလၢနမၤဘၣ်တၢ်နးနးကလဲာ်
တမံၤအံၤဆူမုၣ်ကမဲတဂၤအံၤန့ၣ်လဲၣ်. အဝဲသးကညီၤတၢ်တုၤဒၣ်လဲာ်လၢအအံးထွဲကွၢ်ထွဲယၤ,
ဒီးခဲအံၤနမၤသံအဖိခွါလီၤဧါ.”
21 အန့ၣ်ဒီး, စီၤအ့ၤလံယၤစူၣ်မံလီၤအသးလၢဖိသၣ်အဖီခိၣ်သၢ ဘျီဒီးဘါထုကဖၣ်ဝဲ, “အိယွၤ, ယကစၢ်ယွၤဧၢ, ဟ့ၣ်ကဒါက့ၤဖိသၣ်အံၤအသးသမူတက့ၢ်.”
22 ယွၤစံးဆၢစီၤအ့ၤလံယၤအတၢ်ထုကဖၣ်, ဒီးဖိသၣ်စးထီၣ်သါကဒါက့ၤဒီးမူက့ၤဝဲန့ၣ်လီၤ.
23 စီၤအ့ၤလံယၤဟဲက့ၤစိာ်လီၤဖိသၣ်ဆူဟံၣ်အဖီလာ်တတီၤဆူ အမိၢ်အအိၣ်ဒီးစံးဘၣ်အီၤ, “ကွၢ်တက့ၢ်. နဖိခွါမူဝဲလီၤ.”
24 မုၣ်ကမဲစံးဆၢအီၤ, “ဒီးခဲကနံၣ်အံၤ, ယသ့ၣ်ညါလၢနမ့ၢ်ကစၢ် ယွၤအပှၤကညီတဂၤဒီးလၢယွၤကတိၤတၢ်နီၢ်နီၢ်ခီဖျိနၤလီၤ.”