15
(၂ကွဲး.၁၃:၁-၁၄:၁)
1 လၢကီၢ်အံၣ်စရ့လးအစီၤပၤယၤရၤဘၣ်ပၢတၢ်တဆံဃိးနံၣ်တနံၣ် န့ၣ်စီၤအဘံယၣ်ကဲထီၣ်စီၤပၤလၢကီၢ်ယူဒၤအပူၤ,
2 ဒီးပၢတၢ်ဖဲဝ့ၢ်ယရူၤၡလ့ၣ်အပူၤသၢနံၣ်န့ၣ်လီၤ. အဝဲအမိၢ်မ့ၢ်ဝဲစီၤအးဘၡါလိၣ်အဖိမုၣ်နီၢ်မၤကၤန့ၣ်လီၤ.
3 အဝဲမၤတ့ၢ်တၢ်ဒဲးဘးတဖၣ်တမံၤဃီဒ်အပၢ်အသိး, ဒီးတသူၣ်တီသးရၤဘၣ်ဒီးယွၤ, အကစၢ်ယွၤလၢာ်လၢာ်ဆ့ဆ့ ဒ်အဖုဖးဒိၣ်စီၤဒၤဝံးအသိးန့ၣ်ဘၣ်.
4 ဘၣ်ဆၣ်လၢတၢ်ကွၢ်မဲာ်စီၤဒၤဝံးအဃိန့ၣ်ယွၤ, အကစၢ်ယွၤဟ့ၣ်လီၤစီၤအဘံယၣ်လၢအဖိခွါတဂၤဒ်သိးကပၢတၢ်လၢ အဝဲအလီၢ်ခံလၢဝ့ၢ်ယရူၤၡလ့ၣ်အပူၤဒီးဒ်သိးကမၤဂၢၢ်မၤကျၢၤဝ့ၢ် ယရူၤၡလ့ၣ်အဂီၢ်န့ၣ်လီၤ.
5 ယွၤမၤတ့ၢ်တၢ်အံၤမ့ၢ်လၢစီၤဒၤဝံးမၤတ့ၢ်တၢ်လၢအမၤမုာ်ယွၤ အသးဒီးစူၢ်အဝဲအတၢ်မၤလိာ်တဖၣ်ထီဘိ, မ့တမ့ၢ်ဘၣ်ထဲလၢတၢ်ဂ့ၢ်တမံၤလၢအဘၣ်ထွဲဒီးပှၤဃ့ၤသးဖိစီၤ အူၤရံယၤဘၣ်န့ၣ်လီၤ.
6 တၢ်ဒုးတၢ်ယၤအိၣ်ဝဲတလီၢ်လီၢ်လၢစီၤအဘံယၣ်ဒီးစီၤယၤရၤဘၣ် အဘၢၣ်စၢၤလၢစီၤအဘံယၣ်အတၢ်ပၢဒီတစိၤညါန့ၣ်လီၤ.
7 ဒီးကယဲၢ်တၢ်အိၣ်လီၤတဲာ်တမံၤလၢ်လၢ်လၢစီၤအဘံယၣ်မၤတ့ၢ်ဝဲ န့ၣ်, ဘၣ်တၢ်ကွဲးနီၣ်ကွဲးဃါအီၤလၢကီၢ်ယူဒၤအစီၤပၤတဖၣ်အလံာ်တၢ် စံၣ်စိၤတဲစိၤအပူၤန့ၣ်လီၤ.
8 စီၤအဘံယၣ်သံဝဲ, ဒီးဘၣ်တၢ်ခူၣ်လီၤကွံာ်အီၤလၢစီၤဒၤဝံး အဝ့ၢ်ပူၤဒီးအဖိခွါစီၤအၤစါကဲထီၣ်စီၤပၤလၢအလီၢ်န့ၣ်လီၤ.
(၂ကွဲး.၁၅:၁၆-၁၆:၆)
9 လၢကီၢ်အံၣ်စရ့လးအစီၤပၤစီၤယၤရၤဘၣ်ပၢတၢ်ပှဲၤထီၣ်ခံဆံ နံၣ်, အနံၣ်န့ၣ်စီၤအၤစါကဲထီၣ်စီၤပၤလၢကီၢ်ယူဒၤအပူၤ,
10 ဒီးအဝဲပၢတ့ၢ်တၢ်လၢဝ့ၢ်ယရူၤၡလ့ၣ်အပူၤလွံၢ်ဆံတနံၣ်န့ၣ် လီၤ. အဝဲအဖံမ့ၢ်ဝဲစီၤအးဘၡါလိၣ်အဖိမုၣ်နီၢ်မၤကၤန့ၣ်လီၤ.
11 စီၤအၤစါမၤတ့ၢ်တၢ်လၢအမၤမုာ်ယွၤအသးဒ်အပၢ်ဖးဒိၣ်လၢပျၢၤ စီၤဒၤဝံးမၤတ့ၢ်ဝဲအသိးန့ၣ်လီၤ.
12 လၢထံကီၢ်အပူၤန့ၣ်အဝဲဟီထီၣ်ကွံာ်ကယဲၢ်ပှၤဃဲသဲမုၣ်ပိာ်ခွါ ဒီးပိာ်မုၣ်တဖၣ်လၢအမၤတၢ်ဖဲပှၤတစူၢ်တနာ်ယွၤအတၢ်ဘါလီၢ်တဖၣ် ဒီးအဝဲသုးကွံာ်ကယဲၢ်တၢ်ဂီၤတၢ်ဖီၣ်တဖၣ်လၢပှၤလၢအဝဲအမဲာ်ညါ တဖၣ်မၤထီၣ်တ့ၢ်ဝဲန့ၣ်လီၤ.
13 အဝဲသုးကွံာ်အဖံနီၢ်မၤကၤလၢနီၢ်ပၤမုၣ်အမိၢ်အလီၢ်အလၤ, မ့ၢ်လၢနီၢ်မၤကၤမၤထီၣ်ဟီၣ်ခိၣ်ညၣ်ထ့ၣ်အကစၢ်မုၣ်နီၢ်အၡ့ရၤ အဂီၤတခါလၢအထိၣ်ဂဲၤထီၣ်တၢ်သးကတၢအဃိန့ၣ်လီၤ. စီၤအၤစါမၤဟးဂီၤကွံာ်တၢ်ဂီၤန့ၣ်ဒီးဒွဲၣ်အူကွံာ်အီၤလၢ ကံဒြိၣ်တၢ်တြီၤအပူၤန့ၣ်လီၤ.
14 စီၤအၤစါမ့ၢ်တမၤဟးဂီၤကွံာ်ပှၤတစူၢ်တနာ်ယွၤအတၢ်ဘူၣ်ထီၣ်ဘါ ထီၣ်အလီၢ်ခဲလၢာ်ဒၣ်လဲာ်, အဝဲအိၣ်ဒံးဒီးတၢ်သးတီဒီးယွၤလၢအသးသမူဒီစိၤန့ၣ်လီၤ.
15 ကယဲၢ်တၢ်ပီးတၢ်လီလၢအပၢ်ပာ်စီဆှံတ့ၢ်အီၤဆူကစၢ်ယွၤအအိၣ်, ဒီးဒ်န့ၣ်အသိးတၢ်ပီးတၢ်လီတဖၣ်လၢတၢ်မၤအီၤလၢထူဒီးစ့ လၢအဝဲအကစၢ်ဒၣ်ဝဲပာ်စီဆှံထီၣ်န့ၣ်, အဝဲဒၢနုာ်ဝဲဆူယွၤအတၢ်လုၢ်ဟံၣ်အပူၤခဲလၢာ်န့ၣ်လီၤ.
16 ဖဲအဝဲသ့ၣ်အိၣ်ဒီးတၢ်စိတၢ်ကမီၤအကတီၢ်န့ၣ်ကီၢ်ယူဒၤအစီၤပၤ အၤစါဒီးကီၢ်အံၣ်စရ့လးအစီၤပၤဘါၡၤဒုးလိာ်အသးတလီၢ်လီၢ် တဂၤဒီးတဂၤန့ၣ်လီၤ.
17 စီၤဘါၡၤ, လဲၤနုာ်ဒုးကီၢ်ယူဒၤ, ဒီးစးထီၣ်မၤကျၢၤထီၣ်ဝ့ၢ် ရၤမါအတိာ်အတာ်, လၢကဒီၣ်တဲာ်ကွံာ်တၢ်လဲၤထီၣ်က့ၤလီၤ, လၢတၢ်လဲၤနုာ်ဒီးဟးထီၣ်လၢကီၢ်ယူဒၤအပူၤအဂီၢ်န့ၣ်လီၤ.
18 လၢတၢ်န့ၣ်အဃိစီၤအၤစါဟံးထီၣ်ကယဲၢ်စ့ဒီးထူလၢအအိၣ်လီၤ တဲာ်လၢယွၤအတၢ်လုၢ်ဟံၣ်အပူၤဒီးနီအပူၤ, ဒီးဆှၢလီၤဝဲဆူဒၤမ့ၤစ့း, ဆူကီၢ်စူၤရံအစီၤပၤဘ့ၣ် ဟဒးအအိၣ်ခီဖျိပဒိၣ်ပပှၢ်တနီၤဃုာ်ဒီးတၢ်ကစီၣ်အံၤန့ၣ်လီၤ. စီၤပၤဘ့ၤဟဒးမ့ၢ်စီၤတၤဘြံမိၣ်အဖိခွါ, ဒီးစီၤဃ့စိၣ်အလံၤန့ၣ်လီၤ.
19 တၢ်ကစီၣ်မ့ၢ်ဝဲ, “မ်ပဒီသိၣ်ဒီမှံၤလိာ်ပသးဒ်ပပၢ်သ့ၣ်တဖၣ် အသိးန့ၣ်တက့ၢ်. စ့ဒီးထူတဖၣ်အံၤမ့ၢ်တၢ်ဟ့ၣ်ကနၢၤလၢနဂီၢ်န့ၣ်လီၤ. ခဲကနံၣ်အံၤမၤဟးဂီၤကွံာ်နတၢ်ဒီသိၣ်ဒီမှံၤဒီးကီၢ်အံၣ်စရ့လး အစီၤပၤဘါၡၤ, ဒ်သိးအဝဲကဘၣ်ထုးက့ၤအသုးဖိတဖၣ်လၢယတၢ်လီၢ်ကဝီၤအပူၤန့ၣ် တက့ၢ်.”
20 စီၤပၤဘ့ၤဟဒးအၢၣ်လီၤထွဲစီၤအၤစါအတၢ်ဟ့ၣ်ကူၣ်ဒီးဆှၢလီၤ အသုးခိၣ်သုးနၢ်တဖၣ်ဒီးအသုးမုၢ်တဖၣ်လၢကလဲၤထီၣ်ဒုးကီၢ်အံၣ် စရ့လးအဝ့ၢ်တဖၣ်န့ၣ်အဂီၢ်လီၤ. အဝဲသ့ၣ်မၤန့ၢ်ဝဲဝ့ၢ်တဖၣ်လၢအမ့ၢ်ဧံၤယိၣ်, ဒၣ်, အၤဘ့ၤလးဘ့ၤသမၤကၤ, ဒီးလီၢ်ကဝီၤလၢအအိၣ်ဘူးဒီးပီၣ် လဲၣ်ကၤလံၤလါဒီးကီၢ်နးသၤလံဒီဘ့ၣ်ညါန့ၣ်လီၤ.
21 တုၤစီၤပၤဘါၡၤနၢ်ဟူတၢ်လၢအမၤတ့ၢ်အသးန့ၣ်အဝဲဆိကတီၢ်တၢ် မၤကျၢၤထီၣ်ဝ့ၢ်ရၤမါအတိာ်ဧိၤတာ်ဧိၤဒီးလဲၤဝဲဆူဝ့ၢ်တံးရစၢ်န့ၣ်လီၤ.
22 အန့ၣ်ဝံၤဒီး, စီၤပၤအၤစါဟ့ၣ်လီၤတၢ်ကလုၢ်တမံၤဆူ ကီၢ်ယူဒၤဒီဘ့ၣ်ညါ, ဃ့ဝဲပှၤခဲလၢာ်, ပှၤသုတအိၣ်လီၤတဲာ်နီ တဂၤတဂ့ၤ, လၢကမၤစၢၤတၢ်စိာ်ထီၣ်ကွံာ်လၢၢ်တဖၣ်ဒီးသ့ၣ်တဖၣ်လၢဝ့ၢ်ရၤမါ အပူၤလီၤ. တၢ်ပီးတၢ်လီတဖၣ်အံၤစီၤဘါၡၤသူတ့ၢ်အီၤလၢကမၤကျၢၤထီၣ် ဝ့ၢ်ရၤမါအတိာ်ဧိၤတာ်ဧိၤန့ၣ်လီၤ. စီၤအၤစါသူတၢ်ပီးတၢ်လီတဖၣ်လၢကမၤကျၢၤထီၣ်ဝ့ၢ်မံးစပၤ အတိာ်ဧိၤတာ်ဧိၤဒီးဝ့ၢ်က့ဘၤ, ဝ့ၢ်တဖျၢၣ်လၢအအိၣ်လၢကီၢ်ဘံၣ်ယၤမံၣ်အလီၢ်ကဝီၤ, အတိာ်ဧိၤတာ်ဧိၤန့ၣ်လီၤ.
23 ကယဲၢ်တၢ်အိၣ်လီၤတဲာ်တမံၤလၢ်လၢ်လၢစီၤပၤအၤစါမၤတ့ၢ်ဝဲ, အတၢ်သးဒူအတၢ်မၤတဖၣ်ဒီးဝ့ၢ်တဖၣ်လၢအဝဲမၤကျၢၤထီၣ်က့ၤဝဲ အတိာ်ဧိၤတာ်ဧိၤအဂ့ၢ်ခဲလၢာ်န့ၣ်, ဘၣ်တၢ်ကွဲးနီၣ်ကွဲးဃါအီၤလၢကီၢ်ယူဒၤအစီၤပၤတဖၣ်အတၢ်စံၣ် စိၤတဲစိၤအပူၤန့ၣ်လီၤ. ဘၣ်ဆၣ်လၢအဝဲအတၢ်သးပှၢ်အကတီၢ်န့ၣ်, အဝဲဟးတသ့ဘၣ်လၢအခီၣ်အတၢ်ဆါတမံၤအဃိလီၤ.
24 စီၤအၤစါသံဝဲ, ဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ် သွၣ်ခိၣ်လၢစီၤဒၤဝံးအဝ့ၢ်ပူၤ, ဒီးအဖိခွါစီၤယဟိၡၤဖးကဲထီၣ်စီၤပၤလၢအလီၢ်န့ၣ်လီၤ.
25 လၢကီၢ်ယူဒၤအစီၤပၤအၤစါကဲစီၤပၤပှဲၤထီၣ်ခံနံၣ်တနံၣ်န့ၣ် စီၤပၤယၤရၤဘၣ်အဖိခွါစီၤနၤဒးကဲထီၣ်စီၤပၤလၢကီၢ်အံၣ် စရ့လးအပူၤဒီးအဝဲပၢတၢ်ခံနံၣ်န့ၣ်လီၤ.
26 ဒ်အပၢ်လၢအမဲာ်ညါအသိး, အဝဲမၤတ့ၢ်တၢ်ဒဲးဘးထီဒါယွၤဒီး ဆှၢဃီၤပှၤအံၣ်စရ့လးဖိတဖၣ်ဆူတၢ်ဒဲးဘးအပူၤန့ၣ်လီၤ.
27 စီၤအဃံယၤအဖိခွါစီၤဘါၡၤလၢပှၤယံးစၣ်ကၢ်အဒူၣ်ပူၤပူထီၣ် တၢ်ထီဒါစီၤနၤဒးဒီးမၤသံကွံာ်အီၤဖဲစီၤနၤဒးဒီးအသုးမုၢ်လဲၤ ကဝီၤဃာ်ဝ့ၢ်ကံးဘသိၣ်လၢကီၢ်ဖလ့ၡသးအခါန့ၣ်လီၤ.
28 တၢ်အံၤမၤအသးဖဲကီၢ်ယူဒၤအစီၤပၤအၤစါပၢတၢ်သၢနံၣ်တနံၣ် အပူၤန့ၣ်လီၤ. ဒီးလၢတၢ်န့ၣ်အဃိစီၤဘါၡၤကဲထီၣ်ကီၢ်အံၣ်စရ့လး အစီၤပၤလၢစီၤနၤဒးအလီၢ်န့ၣ်လီၤ.
29 တဘျီဃီန့ၣ်, အဝဲစးထီၣ်တၢ်မၤသံကွံာ်ကယဲၢ်စီၤယၤရၤဘၣ်အပှၤ ဟံၣ်ဖိဃီဖိခဲလၢာ်န့ၣ်လီၤ. ဒ်တၢ်လၢယွၤစံးတ့ၢ်ဝဲခီဖျိ အခ့အပှၤ, ပှၤၡံလိၤဖိဝံအဃံယၤအသိးန့ၣ်, ကယဲၢ်စီၤယၤရၤဘၣ်အပှၤဟံၣ်ဖိဃီဖိခဲလၢာ်ဘၣ်တၢ်မၤသံကွံာ် အီၤန့ၣ်လီၤ. ပှၤတအိၣ်လီၤတဲာ်တ့ၢ်နီတဂၤဘၣ်.
30 တၢ်အံၤမၤအသးမ့ၢ်လၢစီၤယၤရၤဘၣ်ထိၣ်ဂဲၤယွၤ, ကီၢ်အံၣ်စရ့လးအကစၢ်ယွၤအတၢ်သးထီၣ်, ခီဖျိတၢ်ဒဲးဘးတဖၣ်လၢအမၤတ့ၢ်ဝဲ, ဒီးဒုးမၤပှၤအံၣ်စရ့လးဖိတဖၣ်အဃိန့ၣ်လီၤ.
31 ကယဲၢ်တၢ်တမံၤလၢ်လၢ်လၢအအိၣ်လီၤတဲာ်လၢစီၤနၤဒးမၤတ့ၢ်ဝဲ န့ၣ်ဘၣ်တၢ်ကွဲးနီၣ်ကွဲးဃါအီၤလၢကီၢ်အံၣ်စရ့လးအစီၤပၤတဖၣ် အလံာ်တၢ်စံၣ်စိၤတဲစိၤအပူၤန့ၣ်လီၤ.
32 ဖဲအဝဲသ့ၣ်အိၣ်ဒီးတၢ်စိတၢ်ကမီၤအကတီၢ်န့ၣ်, ကီၢ်ယူဒၤအစီၤပၤအၤစါဒီးကီၢ်အံၣ်စရ့လးအစီၤပၤဘါၡၤ, ဒုးလိာ်အသးတလီၢ်လီၢ်, တဂၤဒီးတဂၤန့ၣ်လီၤ.
33 လၢကီၢ်ယူဒၤအစီၤပၤအၤစါပၢတၢ်သၢနံၣ်တနံၣ်န့ၣ်စီၤအဃံယၤ အဖိခွါစီၤဘါၡၤကဲထီၣ်စီၤပၤလၢကယဲၢ်အံၣ်စရ့လးခဲလၢာ် အဖီခိၣ်, ဒီးပၢတၢ်ဖဲဝ့ၢ်တံးရစၢ်အပူၤခံဆံလွံၢ်နံၣ်န့ၣ်လီၤ.
34 ဒ်စီၤပၤယၤရၤဘၣ်လၢအဝဲအမဲာ်ညါအသိးန့ၣ်အဝဲမၤတ့ၢ်တၢ်ဒဲး ဘးထီဒါယွၤဒီးဆှၢဃီၤပှၤအံၣ်စရ့လးဖိတဖၣ်လၢကမၤတၢ်ဒဲး ဘးန့ၣ်လီၤ.