43
1 ယတဲဘၣ် ပှၤဂီၢ်မုၢ်တၢ်ကိးမံၤဒဲးလၢယွၤအဝဲသ့ၣ် အကစၢ်ယွၤ မၢလီၤယၤလၢယကတဲဘၣ်အဝဲသ့ၣ်န့ၣ်ဝံၤလံ.
2 အန့ၣ်ဒီး, စီၤဟိၤၡယၤအဖိခွါ စီၤဧစၤရယၤ, ဒီး စီၤကါရ့ၤ အဖိခွါစီၤယိဃၤနၣ်, ဒီးပှၤအဂၤလၢအပာ်ထီၣ်ထီ အသးခဲလၢာ်စံးဘၣ်ယၤ, “နလီတၢ်လီၤ. ယွၤ, ပကစၢ်ယွၤ တမၢလီၤနၤလၢနကတဲဘၣ်ပှၤလၢ ပသုတလဲၤဒီး အိၣ်ဆိးလၢ ကီၢ်အဲၤကူပတူးအပူၤတဂ့ၤန့ၣ်ဘၣ်.
3 စီၤန့ၤရံယၤ အဖိခွါ စီၤဘၤရူးထိၣ်ဂဲၤထီၣ်တ့ၢ်နၤထီဒါပှၤ, ဒ်သိးပှၤဘၤဘူၤလိၣ်ဖိတဖၣ် ကန့ၢ်ဘၣ်တၢ်စိတၢ်ကမီၤ လၢပဖီခိၣ်လၢ မၤသံပှၤမ့ၢ်ဂ့ၤ, စိာ်ကွံာ်ပှၤဆူကီၢ်ဘၤဘူၤ လိၣ်မ့ၢ်ဂ့ၤ, ကသ့အဂီၢ်န့ၣ်လီၤ.”
4 လၢတၢ်န့ၣ်အဃိ, စီၤယိဃၤနၣ်မ့ၢ်ဂ့ၤ, သုးမုၢ်အသုးခိၣ်သုး နၢ်တဖၣ်မ့ၢ်ဂ့ၤ, ပှၤဂီၢ်မုၢ်မ့ၢ်ဂ့ၤ, တစူၢ်ယွၤအတၢ်မၤလိာ်ဒ်သိး ကအိၣ်လီၤတဲာ်လၢ ကီၢ်ယူဒၤအပူၤ, နီတဂၤဘၣ်.
5 အန့ၣ်ဒီး, စီၤယိဃၤနၣ်ဒီၤ သုးခိၣ်သုးနၢ်ခဲလၢာ်လဲၤကိး ကွံာ်ပှၤကိးဂၤဒဲးလၢ အအိၣ်လီၤတဲာ်လၢ ကီၢ်ယူဒၤအပူၤ, ဃုာ်ဒီးပှၤဂီၢ်မုၢ်ခဲလၢာ်လၢ အဟဲက့ၤကဒါက့ၤလၢ ပှၤကလုာ်တဖၣ် အကျါဖဲအဝဲသ့ၣ်ဘၣ်တၢ်မၤလီၤပြံလီၤ ပြါတ့ၢ်အီၤန့ၣ်ဆူကီၢ်အဲၤကူပတူးလီၤ.
6 အဝဲသ့ၣ်လဲၤကိးစ့ၢ်ကီး ပိာ်ခွါတဖၣ်, ပိာ်မုၣ်တဖၣ်, ဖိသၣ်တဖၣ် ဒီးစီၤပၤအဖိမုၣ်တဖၣ်န့ၣ်လီၤ. အဝဲသ့ၣ်လဲၤကိးကွံာ် ပှၤကိးဂၤဒဲးလၢ သုးခိၣ်ဖးဒိၣ်စီၤနဘူစၢ်ရဒၣ်ပာ်လီၤတဲာ်တ့ၢ်ဝဲလၢ စီၤကဒါလယၤအတၢ်ပၢဆှၢကဟုကယာ်အပူၤ, ဃုာ်ဒီး စီၤဘၤရူးဒီၤယၤန့ၣ်လီၤ.
7 အဝဲသ့ၣ်တစူၢ်ယွၤအတၢ်မၤလိာ်ဘၣ်ဒီးလဲၤနုာ်ဆူကီၢ်အဲၤကူပတူးအပူၤ, ပၢၢ်တုၤလၢဝ့ၢ်တၤပါန့ၤန့ၣ်လီၤ.
8-9 ဖဲန့ၣ်ယွၤစံးဘၣ်ယၤ, “ဟံးန့ၢ်လၢၢ်ဖးဒိၣ်တနီၤဒီး ဘျၢလီၤလၢလၢၢ်ဘ့ၣ်ဘၣ်ဒါလီၤအသးတဖၣ် အဖီလာ်ဖဲကျဲစၢၤလဲၤနုာ်ဆူ ဝ့ၢ်အံၤအပူၤ ပဒိၣ်အတၢ်သူၣ်ထီၣ်အမဲာ်ညါဒီးပျဲပှၤအံၣ်စရ့လးဖိတနီၤ ထံၣ်ဘၣ်နမၤတၢ်အံၤန့ၣ်တက့ၢ်.
10 အန့ၣ်ဝံၤဒီး, တဲဘၣ်အဝဲသ့ၣ်လၢယၤ, ယွၤသ့တၢ်လၢာ်, အံၣ်စရ့လးအကစၢ်ယွၤအံၤ, ယကမၢယခ့ယပှၤ ကီၢ်ဘၤဘူၤလိၣ် အစီၤပၤစီၤနဘူၤကးန့စၢ်ဟဲဆူ တၢ်လီၢ်အံၤဒီး အဝဲကပာ် အလီၢ်ပစိာ် လၢလၢၢ်တဖၣ်လၢ သုဘျၢလီၤတ့ၢ်အီၤအဖီခိၣ်ဒီး ကသလၣ်လီၤ စီၤပၤအဒဲလၢ အဖီခိၣ်န့ၣ်လီၤ.
11 စီၤနဘူၤကးန့ စၢ်ကဟဲဒီး မၤနၢၤကီၢ်အဲၤကူပတူးန့ၣ်လီၤ. ပှၤဂီၢ်မုၢ်တဖၣ်လၢ ကဘၣ်တၢ်စံၣ်ညီၣ်ဃါ မနၤလၢ ကဘၣ်သံလၢ တၢ်ဆူးတၢ်ဆါအဃိန့ၣ် ကသံလၢ တၢ်ဆူးတၢ်ဆါ, ပှၤတဖၣ်လၢ ကဘၣ်တၢ်စံၣ်ညီၣ်ဃါ မနၤလၢ တၢ်စိာ်မၢကဲကုၢ်ကဘၣ် တၢ်စိာ်မၢကဲကုၢ်ကွံာ်အီၤ, ဒီး ပှၤတဖၣ်လၢ ကဘၣ်တၢ်စံၣ်ညီၣ်ဃါမနၤလၢ ကဘၣ်သံ လၢ တၢ်ဒုးအပူၤန့ၣ်, ကဘၣ်တၢ်မၤသံအီၤလၢ တၢ်ဒုးအပူၤန့ၣ်လီၤ.
12 ယကဒွဲၣ်အူထီၣ်ကီၢ်အဲၤကူပတူး အကစၢ်တဖၣ် အတၢ်လုၢ်ဟံၣ်တဖၣ်, ဒီးကီၢ်ဘၤဘူၤလိၣ် အစီၤပၤကဒွဲၣ်အူထီၣ်အဝဲသ့ၣ်အကစၢ်တဖၣ်မ့ၢ်ဂ့ၤ, ဒီး စိာ်ကွံာ်အီၤမ့ၢ်ဂ့ၤန့ၣ်လီၤ. ဒ်ပှၤကွၢ်သိတဂၤ မၤပျီကွံာ်သူၣ်လၢ အကူအကၤအလိၤအသိးန့ၣ်, ကီၢ်ဘၤဘူၤလိၣ်အစီၤပၤကဂုာ်န့ၢ်ကွံာ် ကီၢ်အဲၤကူပတူးခဲလၢာ်, ဒီးဟးထီၣ် ကွံာ်လၢ တၢ်မၤနၢၤဖးဒိၣ်အပူၤန့ၣ်လီၤ.
13 အဝဲကမၤဟးဂီၤကွံာ်တၢ်သ့ၣ်နီၣ် အလၢၢ်စီဆှံတဖၣ်လၢ အအိၣ်ဖဲ ဝ့ၢ်ဟဲလံအီၣ်ဖိလံာ်လၢ ကီၢ်အဲၤကူပတူးအပူၤဒီး ကဒွဲၣ်အူထီၣ်ကွံာ် ပှၤအဲၤကူပတူးဖိ အကစၢ်တဖၣ် အတၢ်လုၢ်လီၢ်တဖၣ်န့ၣ်လီၤ.”