42
1 အန့ၣ်ဒီး, သုးမုၢ်အခိၣ်အနၢ်ခဲလၢာ်, ဃုာ်ဒီးစီၤကါရ့ၤအဖိခွါ စီၤယိဃၤန့ၣ်, ဒီးစီၤဟိၤၡၤယၤအဖိခွါ စီၤယစါနယၤ
ဟဲဝဲဒီး ပှၤဂီၢ်မုၢ်စးထီၣ်လၢ အဆံးကတၢၢ်ပၢၢ်တုၤလၢအဒိၣ်ကတၢၢ်,
2 ဒီးစံးဘၣ်ယၤ, “ဝံသးစူၤမၤတၢ်လၢ ပမၢနၤန့ၣ်တက့ၢ်. ဃ့ထုကဖၣ်တၢ်လၢ ပဂီၢ်ဆူယွၤပကစၢ်အအိၣ်တက့ၢ်.
ဃ့ထုကဖၣ်တၢ်လၢ ပဝဲလၢ အအိၣ်လီၤတဲာ်ခဲလၢာ်အဂီၢ်တက့ၢ်.
တဘျီန့ၣ် ပအိၣ်အါဂၤလီၤ.ဒ်နထံၣ်နဲသ့အသိး, ခဲအံၤပအိၣ်လီၤတဲာ်ဒၣ်ထဲစှၤဂၤလီၤ.
3 ထုကဖၣ်လၢယွၤ, ပကစၢ်ယွၤကဒုးနဲၣ်ပှၤကျဲလၢပဂ့ၤပိာ်အီၤ, ဒီးတၢ်လၢပကြၢးမၤအီၤန့ၣ်ကက့ၢ်.”
4 ယစံးဆၢယဲ, “မ့မ့ၢ်ဒ်န့ၣ်ဒီး, ဂ့ၤလံ. ယကဃ့ထုကဖၣ်ဆူ ယွၤပကစၢ် ယွၤဒ်သုမၢတ့ၢ်ယၤအသိး, ဒီၤဖဲတၢ်လၢအဝဲစံးဝဲ တမံၤဂ့ၤတမံၤဂ့ၤန့ၣ်, ယကတဲဘၣ်သုလီၤ. ယတပာ်တဒၢ တၢ်လၢသုနီတမံၤဘၣ်.”
5 အန့ၣ်ဒီး, “အဝဲသ့ၣ်စံးဘၣ်ယၤ, ပမ့ၢ်တစူၢ်အဝဲအတၢ်မၤလိာ်ခဲလၢာ်လၢယွၤပကစၢ်ယွၤဟ့ၣ်လီၤနၤလၢ ပဂီၢ်ဘၣ်ဒီး, မ်ယွၤမ့ၢ်ပှၤအုၣ်အသးအတီဒီးအကလုၢ်တီတဂၤထီဒါပှၤန့ၣ် တက့ၢ်.
6 တၢ်ဘၣ်ပှၤမုာ်မ့ၢ်ဂ့ၤ, တမုာ်မ့ၢ်ဂ့ၤ ပကစူၢ်ယွၤပကစၢ် ယွၤလၢ ပမၢနဃ့ဘါထုကဖၣ်ဆူ အအိၣ်လၢပဂီၢ်န့ၣ်
လီၤ. ပမ့ၢ်စူၢ်အီၤဒီး, တၢ်ခဲလၢာ်ကလဲၤအသးဂ့ၤဂ့ၤဘၣ်
ဘၣ်လၢပဂီၢ်န့ၣ်လီၤ.”
7 အသီတဆံဝံၤအလီၢ်ခံဒီး, ယွၤကတိၤတၢ်ဒီးယၤလီၤ.
8 လၢတၢ်န့ၣ်အဃိ ယကိးဖှိၣ်စီၤယိဃၤနၣ်, ကယဲၢ်သုးမုၢ်သံၣ်ဘိ အခိၣ်အနၢ်လၢအအိၣ်ဒီးအီၤခဲလၢာ်, ဒီးပှၤဂီၢ်မုၢ်အဂၤခဲလၢာ်န့ၣ်လီၤ.
9 ဒီး ယစံးဘၣ်အဝဲသ့ၣ်, “ယွၤ, အံၣ်စရ့လး အကစၢ်ယွၤလၢ သုဆှၢယၤဆူ အအိၣ်ဒီး သုတၢ်သကွံၢ်ကညးန့ၣ်စံးဝဲဒၣ်,
10 ‘သုသးမ့ၢ်အိၣ်လၢ သုကအိၣ်ဆိးဘၣ်ဒံးလၢ ကီၢ်အံၤ အပူၤဒီး, ယကမၤထီၣ်သု, ဒီးတမၤလီၤပှီၢ်သုဘၣ်.
ယကသူၣ်လီၤဒီး ယတထဲးလီၤကွံာ်ဘၣ်သုဘၣ်.
တၢ်ဟးဂီၤလၢ ယဒုးဘၣ်သုန့ၣ် ဒုးသးအုးတ့ၢ်ယၤဒိၣ်မးလီၤ.
11 ဆိတ့ၢ်လၢ သုတၢ်ပျံၤဘၣ် ကီၢ်ဘၤဘူၤလိၣ်အစီၤပၤန့ၣ် တက့ၢ်. ယအိၣ်ဒီးသုဒီး ယကမၤပူၤဖျဲးသုလၢအဝဲအတၢ်
စိကမီၤအပူၤန့ၣ်လီၤ.
12 မ့ၢ်လၢယသးကညီၤတၢ်သ့အဃိ, ယကမၤဒ်သိးအဝဲကသးကညီၤ ဘၣ်သုဒီးပျဲသုကက့ၤကဒါက့ၤဆူ ဟံၣ်န့ၣ်လီၤ. ယၤ, ယွၤအံၤ, ယကတိၤလံတၢ်လံ.’
13 ဘၣ်ဆၣ်ဒီး သုဝဲပှၤဂီၢ်မုၢ်လၢ အအိၣ်လီၤတဲာ်ဒံးလၢ ကီၢ်ယူဒၤအပူၤတဖၣ်, သုတဘၣ်ဂ့ၢ်လိာ်စူၢ်ယွၤ,
သုကစၢ်ယွၤမ့ၢ်ဂ့ၤ, ဂ့ၢ်လိာ်လၢ သုတအိၣ်ဆိးလၢ
ကီၢ်အံၤအပူၤမ့ၢ်ဂ့ၤန့ၣ်ဘၣ်.
14 သုတဘၣ်စံးလၢ, ‘တမု့ၢ်ဘၣ်, ပကလဲၤဒီးအိၣ်ဆိးလၢ ကီၢ်အဲၤကူပတူးအပူၤ ဖဲပတကွၢ်ဆၢၣ်မဲာ်ဘၣ်လၢၤ
တၢ်ဒုးတၢ်ယၤမ့ၢ်ဂ့ၤ, နၢ်ဟူဘၣ်တၢ်ကိးထီၣ်လၢ
တၢ်ဒုးတၢ်ယၤအဂီၢ်မ့ၢ်ဂ့ၤ, ဖဲပတသၣ်ဝံၤလီၤဒိမ့ၢ်ဂ့ၤလီၤ,’
န့ၣ်ဘၣ်.
15 သုမ့ၢ်စံးဒ်အံၤဒီး, ‘သ့တၢ်လၢာ်ယွၤ, အံၣ်စရ့လးအကစၢ်ယွၤ စံးဘၣ်သုလၢ, သုမ့ၢ်ပာ်လီၤတ့ၢ်သုသးလၢ သုကလဲၤဒီး
အိၣ်ဆိးလၢကီၢ်အဲၤကူပတူးန့ၣ်,
16 တၢ်ဒုးတၢ်ယၤလၢ သုပျံၤအီၤန့ၣ် ကချုးန့ၢ်သု, ဒီးတၢ်သၣ်ဝံၤလီၤဒိလၢ သုဘၣ်ယိၣ်န့ၣ်ကလူၤပိာ်ထွဲသုခံ, ဒီးသုကသံဖဲန့ၣ်လၢ ကီၢ်အဲၤကူပတူးအပူၤန့ၣ်လီၤ.
17 ပှၤဂီၢ်မုၢ်လၢ အပာ်လီၤအသးလၢ ကလဲၤအိၣ်လဲၤဆိးလၢ ကီၢ်အဲၤကူပတူးအပူၤခဲလၢာ်န့ၣ်, ကသံဝဲလၢတၢ်ဒုးတၢ်ယၤအပူၤ မ့တမ့ၢ်တၢ်သၣ်ဝံလီၤဒိအဃိ, မ့တမ့ၢ်
လၢတၢ်ဆူးတၢ်ဆါအဃိန့ၣ်လီၤ. ပှၤတအိၣ်မူလီၤတဲာ်ဘၣ်
နီတဂၤဘၣ်, ဒီးတပူၤဖျဲးဒီး တၢ်တတၢးတနါလၢ ယကဒုးဘၣ်အဝဲ
သ့ၣ်န့ၣ်, နီတဂၤဘၣ်.’
18 ယွၤ, အံၣ်စရ့လး အကစၢ်ယွၤစံးဝဲ, ‘ဒ်ယတၢ်သးဒိၣ်ဒီး သးကဲၤထီၣ် တဖၣ်ဘၣ်တၢ်လူလီၤဂၢ်လီၤအီၤလၢဝ့ၢ်ယရူၤၡလ့ၣ်အပှၤဂီၢ်မုၢ်
အဖီခိၣ်အသိးန့ၣ်, သုမ့ၢ်လဲၤဆူ ကီၢ်အဲၤကူပတူးဒီး ယတၢ်သးကဲၤ
ထီၣ်ကဘၣ်တၢ်လူလီၤဂၢ်လီၤအီၤလၢ သုဖီခိၣ်န့ၣ်လီၤ. ပှၤကွၢ်သုဒီး သုကလီၤပျံၤလီၤဖုးဒိၣ်မးလီၤ. ပှၤဂီၢ်မုၢ်ကမၤ
သုကလိာ်ကလာ်ဒီး သုမံၤန့ၣ် ဒ်တၢ်ဘၣ်ဆိၣ်အၢတမံၤ
အသိးန့ၣ်လီၤ. သုတထံၣ်ဘၣ်က့ၤကဒီးတၢ်လီၢ်အံၤ
နီတစုလၢၤဘၣ်.’ ”
19 ဒီးယစံးအါထီၣ်ဒံးယဲ, “ယွၤစံးဘၣ်တ့ၢ်သုဝဲပှၢ်ဂီၢ်မုၢ်လၢ အအိၣ်လီၤတဲာ်လၢ ကီၢ်ယူဒၤအပူၤတဖၣ်လၢ သုတဘၣ်လဲၤဆူ
ကီၢ်အဲၤကူပတူးဘၣ်. လၢတၢ်န့ၣ်အဃိ,
ယဟ့ၣ်ပလီၢ်သုခဲအံၤလၢ,
20 သုမၤကမၣ်တၢ်ဖးဒိၣ်တမံၤလက အဒုးသံက့ၤသုသ့ ဝဲန့ၣ်လီၤ. သုမၢယဃ့ထုကဖၣ်တၢ်ဆူ ယွၤပကစၢ်ယွၤ
လၢ သုဂီၢ်, ဒီးသုအၢၣ်လီၤလၢ သုကမၤတၢ်ကိးမံၤဒဲးလၢ
အဝဲမၤလိာ်ဝဲန့ၣ်လီၤ.
21 ဒီးခဲအံၤယတဲဘၣ်သု, ဘၣ်ဆၣ်ဒီး တၢ်ကိးမံၤဒဲးလၢယွၤ ကစၢ်ယွၤမၢလီၤယၤလၢ ယကတဲဘၣ်သုန့ၣ် သုတစူၢ်အီၤဘၣ်.
22 လၢတၢ်န့ၣ်အဃိ, သ့ၣ်နီၣ်ထီၣ်တၢ်အံၤတက့ၢ်. သုကသံလၢ တၢ်ဒုးအပူၤ, မ့တမ့ၢ် လၢတၢ်သၣ်ဝံၤလီၤဒိအဃိ, မ့တမ့ၢ် လၢတၢ်ဆူးတၢ်ဆါအဃိလၢ ကီၢ်တဘ့ၣ်လၢ
သုသးအိၣ်လဲၤအိၣ်လဲၤဆိးလၢ အပူၤန့ၣ်လီၤ.”