4
1 တၢ်ဒုးလိာ်ယၤလိာ်သး, ဒီးတၢ်အ့ၣ်လိာ်ဆိးက့လိာ်သးတဖၣ်, လၢသုကျါန့ၣ်ဟဲလၢလဲၣ်ခီလဲၣ်. ဟဲအသးလၢသုတၢ်အဲၣ်ဒိးဟီၣ်ခိၣ်အတၢ်မုာ်လၤသးဖှံလၢ အဂဲၤလိာ်ဒုးတၢ်လၢသုပူၤတထံၣ်ဃီအဃိန့ၣ်လီၤ.
2 သုအဲၣ်ဒိးတၢ်ဘၣ်ဆၣ်သုမၤအီၤတန့ၢ်ဘၣ်. အဃိသုအိၣ်ကတဲာ်ကတီၤသုသးလၢသုကမၤသံတၢ်လီၤ. သုသူၣ်လီသးကွံတၢ်ဒီးသုမၤအီၤတန့ၢ်ဘၣ်အဃိ သုအ့ၣ်လိာ်ဆိးက့လိာ်ဒီးဒုးလိာ်ယၤလိာ်သုသးန့ၣ်လီၤ. တၢ်လၢသုအဲၣ်ဒိးန့ၣ်သုမၤအီၤတန့ၢ်ဘၣ်, အဂ့ၢ်မ့ၢ်လၢသုတဃ့အီၤလၢကစၢ်ယွၤအဃိန့ၣ်လီၤ.
3 ဒီးဖဲသုဃ့တၢ်န့ၣ်သုတဒိးန့ၢ်အီၤဘၣ်, အဂ့ၢ်မ့ၢ်လၢသုတၢ်တိာ်တဖၣ်အၢဝဲသီဝဲအဃိလီၤ. သုဃ့တၢ်လၢသုကသူအီၤလၢသုတၢ်မုာ်လၤသးဖှံဒၣ်ဝဲ အဂီၢ်အဃိန့ၣ်လီၤ.
4 ပှၤလၢအသးတတီဒီးကစၢ်ယွၤသ့ၣ်ဧၢ, မ့ၢ်သုတသ့ၣ်ညါဘၣ်လၢတၢ်ကဲဟီၣ်ခိၣ်အတံၤသကိး န့ၣ်အခီပညီမ့ၢ်တၢ်ကဲကစၢ်ယွၤအဒုၣ်အဒါန့ၣ်ဘၣ်ဧါ. ပှၤတဂၤဂ့ၤတဂၤဂ့ၤလၢသးအိၣ်ကဲဟီၣ်ခိၣ်အတံၤ သကိးန့ၣ်, ဒုးကဲထီၣ်အသးလၢကစၢ်ယွၤအဒုၣ်အဒါ တဖၣ်န့ၣ်လီၤ.
5 တဘၣ်ဆိကမိၣ်လၢတၢ်မ့ၢ်တၢ်တီတအိၣ်ဘၣ်လၢတၢ်ကွဲး အသးအပူၤလၢအစံးဝဲ, “သးလၢကစၢ်ယွၤဒၢနုာ်လီၤဆူပပူၤအံၤပှဲၤဝဲဒီးတၢ်သးကွံ တဖၣ်လၢအဂံၢ်ဆူၣ်ဝဲလီၤ” န့ၣ်တဂ့ၤ.
6 ဘၣ်ဆၣ်ဒီး, တၢ်ဘျုးတၢ်ဖှိၣ်လၢကစၢ်ယွၤဟ့ၣ်လီၤအံၤ အဂံၢ်အဘါဆူၣ်ဒိၣ်ဒၣ်တၢ်တက့ၢ်လီၤ. ဒ်တၢ်ကွဲးအသးစံးဝဲ အသိး, “ယွၤထီဒါပှၤပာ်ထီၣ်ထီအသး, ဘၣ်ဆၣ်ဟ့ၣ်လီၤတၢ်ဘျုးတၢ်ဖှိၣ်လၢပှၤလၢအဆီၣ်လီၤအသးလီၤ.”
7 လၢတၢ်န့ၣ်အဃိ, ဆီၣ်လီၤသုသးလၢကစၢ်ယွၤအဖီလာ် တက့ၢ်. ထီဒါမုၣ်ကီၤလံၢ်ဒီးအဝဲကဃ့ၢ်ထီၣ်ကွံာ်လၢသုအိၣ်လီၤ.
8 သုးဘူးသုသးဆူကစၢ်ယွၤအအိၣ်, ဒီးအဝဲကသုးဘူးအသးဆူ သုအိၣ်လီၤ. ပှၤတၢ်ဒဲးဘးဖိသ့ၣ်ဧၢ, သ့စီကွံာ်သုစုတက့ၢ်. ပှၤလၢအပာ်မၤအသးသ့ၣ်ဧၢ, မၤကဆှီသုသးတက့ၢ်.
9 မ်သုသူၣ်အုးသးအုးအိၣ်ဒီးတၢ်ဟီၣ်တၢ်ယၢၤတက့ၢ်. လဲလိာ်က့ၤသုတၢ်နံၤတၢ်အ့ဆူတၢ်ဟီၣ်တၢ်ယၢၤ, သုတၢ်သးခုဆူတၢ်သးအုးတက့ၢ်.
10 ဆီၣ်လီၤသုသးလၢကစၢ်အဖီလာ်, ဒီးအဝဲဒၣ်ကပာ်ထီၣ်ထီ သုလီၤ.
11 ယဒီပုၢ်ဝဲၢ်သ့ၣ်ဧၢ, တဘၣ်ကတိၤအၢကတိၤသီလိာ်သုသး တဂၤဒီးတဂၤတဂ့ၤ. ပှၤတဂၤဂ့ၤတဂၤဂ့ၤလၢအကတိၤအၢ ကတိၤသီ, မ့တမ့ၢ်စံၣ်ညီၣ်အဒီပုၢ်ဝဲၢ်ပှၤခရံာ်ဖိန့ၣ်, မ့ၢ်အကတိၤအၢ ကတိၤသီဒီးစံၣ်ညီၣ်တၢ်သိၣ်တၢ်သီန့ၣ်လီၤ. သုမ့ၢ်စံၣ်ညီၣ် တၢ်သိၣ်တၢ်သီဒီး, သုတမ့ၢ်လၢၤပှၤလၢ အစူၢ်တၢ်သိၣ်တၢ်သီဘၣ်, မ့မ့ၢ်သုမ့ၢ်ပှၤလၢအစံၣ်ညီၣ် အီၤန့ၣ်လီၤ.
12 ပှၤဟ့ၣ်လီၤတၢ်သိၣ်တၢ်သီဒီးစံၣ်ညီၣ်တၢ်န့ၣ်, မ့ၢ်ဒၣ်ထဲ ကစၢ်ယွၤတဂၤဧိၤလီၤ. အဝဲဒၣ်န့ၣ်, အုၣ်က့ၤခီၣ်က့ၤတၢ်သ့ဒီးမၤဟးဂီၤတၢ်သ့န့ၣ်လီၤ. လၢသုကစံၣ်ညီၣ်သုဒီပုၢ်ဝဲၢ်ကဒဲကဒဲအဂီၢ်, မ့ၢ်သုဆိကမိၣ်လၢသုမ့ၢ်မတၤလဲၣ်.
13 ပှၤလၢအစံး, “တနံၤအံၤမ့တမ့ၢ်ခဲမုၢ်ဆ့ၣ်ပကလဲၤဆူဝ့ၢ် တဖျၢၣ်ဒီးဖဲန့ၣ်ပကအိၣ်တနံၣ်, ဆါတၢ်ပှ့ၤတၢ်ဒီးမၤန့ၢ်စ့အါအါဂီၢ်ဂီၢ်န့ၣ်လီၤ,” သ့ၣ်သုဧၢ, ခဲအံၤဒိကနၣ်ယၤတက့ၢ်.
14 သုတၢ်အိၣ်မူခဲမုၢ်ဆ့ၣ်ကမ့ၢ်တၢ်ဒ်လဲၣ်န့ၣ်, သုတသ့ၣ်ညါ ဒၣ်လဲာ်ဘၣ်. သုလီၤဂာ်ဒီးဘှ့ၣ်လၢအအိၣ်ဖျါတစိၢ်ဖိဝံၤ, လၢခံက့ၤလီၤမၢ်ကွံာ်ဝဲဒၣ်န့ၣ်လီၤ.
15 တၢ်လၢသုကြၢးစံးမ့ၢ်အအံၤ, “ကစၢ်မ့ၢ်ဘၣ်အသးဒီးပကအိၣ်မူ ဒီးမၤတၢ်ဒ်အံၤမ့တမ့ၢ်မၤတၢ်ဒ်နုၤန့ၣ်လီၤ.”
16 ဘၣ်ဆၣ်ဒီး, ခဲအံၤသုပာ်ကဖၢလၢသုသးဒီးသုကတိၤဒိၣ် ကတိၤသွါတၢ်လီၤ. တၢ်ကတိၤဒ်န့ၣ်သိးခဲလၢာ်ကမၣ်ဝဲလီၤ.
17 လၢတၢ်န့ၣ်အဃိ, ပှၤတဂၤလၢအသ့ၣ်ညါမၤတၢ်ဂ့ၤဒီး တမၤဘၣ်ဝဲန့ၣ်မ့ၢ်တၢ်ဒဲးဘးလၢအဂီၢ်လီၤ.