8
1 တုၤနုၤတစုအ့ဖရဲၣ်အပှၤပိာ်ခွါတဖၣ်စံးဘၣ်စီၤကံးဒဧိၣ်, “ဖဲသုလဲၤထီၣ်ဒ်သိးသုကဒုးပှၤမံးဒယၣ်ဖိတဖၣ်န့ၣ်ဘၣ်မနုၤလၢနတကိးပှၤန့ၣ်လဲၣ်. ဘၣ်မနုၤနမၤပှၤဒ်န့ၣ်လဲၣ်.” အဝဲသ့ၣ်ကဒူးကဒ့ၣ်တၢ်ဆူၣ်ဆူၣ်ကလဲာ်လၢတၢ်န့ၣ်အဂ့ၢ်လီၤ.
2 ဘၣ်ဆၣ်ဒီးစီၤကံးဒဧိၣ်စံးဆၢအီၤ, “တၢ်လၢယမၤသ့တဖၣ်န့ၣ် တၢ်ထိၣ်သတြီၤအီၤဒီးတၢ်လၢသုမၤတ့ၢ်တဖၣ်တသ့ဘၣ်. တၢ်အဆံးလၢအ့ဖရဲၣ်အပှၤပိာ်ခွါတဖၣ်မၤဝဲန့ၣ် အလုၢ်အပှ့ၤဒိၣ်န့ၢ်ဒံးတၢ်လၢယပှၤဒီဒူၣ်မၤဝဲန့ၣ်လီၤ.
3 လၢတၢ်ခဲလၢာ်အဖီခိၣ်န့ၣ်, ခီဖျိကစၢ်ယွၤအစိကမီၤအဃိသုမၤသံတ့ၢ် ပှၤမံးဒယၣ်ဖိအပဒိၣ်စီၤဧိရ့ာ်ဒီးစီၤစအ့ာ်တဖၣ်န့ၣ်လီၤ. ဒီးမ့ၢ်ယမၤတ့ၢ်တၢ်မနုၤတမံၤလၢတၢ်ထိၣ်သတြီၤအီၤဒီးတၢ်န့ၣ် သ့ဝဲန့ၣ်လဲၣ်.” တုၤအစံးတၢ်အံၤဒီးအဝဲသ့ၣ်အသးတဒိၣ်ထီၣ်အါကဲၣ်ဆိးလၢၤဘၣ်.
4 ဖဲအကတီၢ်အံၤန့ၣ်, စီၤကံးဒဧိၣ်ဒီးအပှၤသၢကယၤဂၤဟဲတုၤဆူ ထံကျိယၢ်ဒ့ၣ်ဒီးခီဂာ်အီၤလီၤ. အဝဲသ့ၣ်လီၤဘှံးလီၤတီၤဘၣ်ဆၣ်ဒီးလူၤဒံးဝဲအဒုၣ်အဒါတဖၣ်န့ၣ်လီၤ.
5 ဒီးတုၤအဝဲသ့ၣ်တုၤဃီၤဖဲဝ့ၢ်စူးကိၤသးန့ၣ်စီၤကံးဒဧိၣ် စံးဘၣ်ပှၤအိၣ်လၢဝ့ၢ်ပူၤတဖၣ်န့ၣ်, “ဝံသးစူၤဟ့ၣ်ယပှၤတဖၣ်လၢကိၣ်အလိၣ်တနီၤတက့ၢ်. အဝဲသ့ၣ်လီၤဘှံးလီၤတီၤဒီးယလူၤဖီၣ်ဒံး ပှၤမံးဒယၣ်ဖိအစီၤပၤတဖၣ်လၢအမ့ၢ်စီၤစ့ဘၤဒီးစီၤစးလမူနၤန့ၣ်လီၤ.”
6 ဘၣ်ဆၣ်ဒီးဝ့ၢ်စူးကိၤသးအပှၤခိၣ်ပှၤနၢ်တဖၣ်စံး, “ဘၣ်မနုၤအဃိပဘၣ်ဟ့ၣ်နပှၤသုးဖိတဖၣ်လၢတၢ်အီၣ်န့ၣ်လဲၣ်. သုဖီၣ်စီၤစ့ဘၤဒီးစီၤစးလမူနၤတန့ၢ်ဒံးဘၣ်.”
7 မၤသးဒ်န့ၣ်ဒီး, စီၤကံးဒဧိၣ်စံးဝဲဒၣ်, “ဂ့ၤလံ, တုၤယွၤဟ့ၣ်လီၤစီၤစ့ဘၤဒီးစီၤစးလမူနၤဆူယစုပူၤန့ၣ် ယကတီၢ်သုဒီးတၤဆှုၣ်တၤမဲလၢမဲးမုၢ်ခိၣ်တဖၣ်န့ၣ်လီၤ.”
8 စီၤကံးဒဧိၣ်လဲၤဆူညါဆူပနံၤအ့လးဒီးဃ့တၢ်တမံၤဃီလၢ ပှၤအိၣ်ဖဲန့ၣ်တဖၣ်န့ၣ်လီၤ. ဘၣ်ဆၣ်ဒီးပှၤပနံၤအ့လးဖိတဖၣ်စံးဆၢတၢ်တမံၤဃီဒ်ပှၤစူးကိၤသးဖိတဖၣ် အသိးန့ၣ်လီၤ.
9 မၤသးဒ်န့ၣ်ဒီး, အဝဲဒၣ်စံးဘၣ်အီၤ, “ယကဟဲက့ၤဘၣ်ပူၤဒုၣ်ပူၤဒါဒီးတုၤယဟဲက့ၤန့ၣ်ယကမၤလီၤပှီၢ်ကွံာ်သုတိာ်တဖျၢၣ်အံၤန့ၣ်လီၤ.”
10 စီၤစ့ဘၤဒီးစီၤစးလမူနၤအိၣ်ဝဲလၢဝ့ၢ်ကၢ်ကိၢ်ဃုာ်ဒီး အသုးမုၢ်သံၣ်ဘိတဖၣ်န့ၣ်လီၤ. လၢပှၤမဲးမုၢ်ခိၣ်အဒူၣ်အသုးမုၢ်သံၣ်ဘိဒီဖုညါအကျါန့ၣ် ပှၤအိၣ်တ့ၢ်ထဲအဂၤတကလးယဲၢ်ကထိဧိၤန့ၣ်လီၤ. ပှၤသုးဖိအဂၤတကလီၢ်ခံကလးန့ၣ်ဘၣ်တၢ်မၤသံတ့ၢ်လံအီၤန့ၣ်လီၤ.
11 စီၤကံးဒဧိၣ်လဲၤပိာ်ထီၣ်ကျဲလၢမဲးမုၢ်ခိၣ်အသရ့ၤ, အိၣ်လၢဝ့ၢ်နံဘၤဒီးယၤကဘၤအမုၢ်ထီၣ်ဒီးဒုးပှၤသုးမုၢ်တဖၣ်န့ၣ် သတူၢ်ကလာ်လီၤ.
12 ပှၤမံးဒယၣ်ဖိအစီၤပၤစီၤခံဂၤလၢအမ့ၢ်, စီၤစံဘၤဒီးစီၤစးလမူနၤထွးထီၣ်ဃ့ၢ်ကွံာ်ဝဲန့ၣ်လီၤ. ဘၣ်ဆၣ်ဒီးအဝဲသ့ၣ်လူၤထွဲအီၤဒီးမၤန့ၢ်အီၤဒီးဒုးလီၤဘၣ် အဝဲသ့ၣ်အသုးမုၢ်ဒီဖုလၢတၢ်ပျံၤတၢ်ဖုးဒိၣ်ဒိၣ်ကလဲာ်န့ၣ်လီၤ.
13 ဖဲစီၤကံးဒဧိၣ်ဟဲက့ၤလၢတၢ်ဒုးလၢဃ့ရ့းကစၢၢ်ကဆူးအကျဲဒီး,
14 အဝဲဖီၣ်န့ၢ်ဝ့ၢ်စူးကိၤသးအပှၤသးစၢ်တဂၤ, ဒီးသံကွၢ်တၢ်လၢအီၤန့ၣ်လီၤ. ပှၤသးစၢ်န့ၣ်ကွဲးလီၤန့ၢ်စီၤကံးဒဧိၣ်လၢဝ့ၢ်စူးကိၤသးအခိၣ်အနၢ်နွံဆံနွံဂၤအမံၤန့ၣ်လီၤ.
15 တုၤနုၤတစုစီၤကံးဒဧိၣ်လဲၤဆူပှၤစူးကိၤသးအအိၣ်ဒီးစံး, “မ့ၢ်သုသ့ၣ်နီၣ်ထီၣ်ဒံးတဘျီဖဲသုဂ့ၢ်လိာ်လၢသုကမၤစၢၤယၤစ့ၢ်ကီးန့ၣ်ဧါ. သုစံးလၢသုဟ့ၣ်ယပှၤသုးဖိလၢအလီၤဘှံးလီၤတီၤလၢတၢ်အီၣ်တသ့ဘၣ်မ့ၢ်လၢ ယတဖီၣ်န့ၢ်စီၤစ့ဘၤဒီးစီၤစးလမူနၤဒံးဘၣ်အဃိန့ၣ်လီၤ. ဂ့ၤလံ. အဝဲသ့ၣ်အိၣ်ဖဲအံၤလီၤ.”
16 တုၤနုၤတစု, အဝဲဟံးန့ၢ်မဲးမုၢ်ခိၣ်အတၤဆှုၣ်တၤမဲတဖၣ်ဒီးသူဝဲလၢ တၢ်စံၣ်ညီၣ်ဝ့ၢ်စူးကိးသးအခိၣ်အနၢ်တဖၣ်အဂီၢ်န့ၣ်လီၤ.
17 ဒီးအဝဲမၤလီၤပှီၢ်ကွံာ်စ့ၢ်ကီးတိာ်အိၣ်လၢပနံၤအ့လးဒီးမၤသံကွံာ်ပှၤပိာ်ခွါတဖၣ်လၢအအိၣ်လၢဝ့ၢ်ပူၤ တဖၣ်န့ၣ်လီၤ.
18 တုၤနုၤတစု, စီၤကံးဒဧိၣ်သံကွၢ်စီၤစ့ဘၤဒီးစီၤစးလမူနၤ, “ပှၤလၢသုမၤသံကွံာ်အီၤလၢဝ့ၢ်တၤဘိၢ်တဖၣ်န့ၣ်မ့ၢ်ပှၤဒ်လဲၣ်တဖၣ်လဲၣ်.”
ဒီးအဝဲသ့ၣ်စံးဆၢဝဲဒၣ်, “အဝဲသ့ၣ်လီၤဂာ်ဒီးသုလီၤ. အဝဲသ့ၣ်ကိးဂၤဒဲးန့ၣ်, လီၤဂာ်ဒီးစီၤပၤအဖိခွါတဖၣ်န့ၣ်လီၤ.”
19 ဒီးစီၤကံးဒဧိၣ်စံးဝဲဒၣ်, “အဝဲသ့ၣ်မ့ၢ်ယဒီပုၢ်ဝဲၢ်တဖၣ်, ယမိၢ်ဒၣ်ယဲအဖိခွါတဖၣ်န့ၣ်လီၤ. ယဆိၣ်လီၤယသးသညူးသပှၢ်လၢသုမ့ၢ်တမၤသံအဝဲသ့ၣ်ဘၣ်ဒီး ယတမၤသံဘၣ်သုဘၣ်.”
20 တုၤနုၤတစု, အဝဲစံးဘၣ်အဖိခွါဝဲၢ်ကိစီၤယ့သ့ၢ်, “ဂဲၤထၢၣ်ဒီးမၤသံအဝဲသ့ၣ်တက့ၢ်.” ဘၣ်ဆၣ်ဒီးဖိသၣ်ပိာ်ခွါန့ၣ်တထုးထီၣ်အနးဘၣ်. အဝဲအသးသုၣ်ဒံးဝဲမ့ၢ်လၢအမ့ၢ်ဒံးဒၣ်ဖိသၣ်တဂၤအဃိန့ၣ်လီၤ.
21 တုၤနုၤတစု, စီၤစ့ဘၤဒီးစီၤစးလမူနၤစံးဘၣ်စီၤကံးဒဧိၣ်, “ဟဲမၤသံပှၤလၢနနီၢ်ကစၢ်ဒၣ်နဲတက့ၢ်. ပိာ်ခွါအတၢ်မၤန့ၣ်ပိာ်ခွါကဘၣ်မၤဝဲလီၤ.” မၤသးဒ်န့ၣ်ဒီးစီၤကံးဒဧိၣ်မၤသံအဝဲသ့ၣ် ဒီးဟံးန့ၢ်တၢ်ကယၢကယဲလၢအဝဲသ့ၣ်အကီၤလၤအူးတဖၣ်အကိာ်လိၤန့ၣ်လီၤ.
22 တၢ်န့ၣ်အလီၢ်ခံဒီး, ပှၤအံၣ်စရ့လးဖိတဖၣ်စံးဘၣ်စီၤကံးဒဧိၣ်, “ပၢပှၤ, နဲဒၣ်ဒီးနစၢၤနသွဲၣ်တက့ၢ်. နအုၣ်က့ၤခီၣ်က့ၤတ့ၢ်ပှၤလၢပှၤမံးဒယၣ်ဖိတဖၣ်အစုပူၤန့ၣ်လီၤ.”
23 စီၤကံးဒဧိၣ်စံးဆၢဝဲဒၣ်, “ယတပၢသုဘၣ်. ယဖိခွါတဖၣ်စ့ၢ်ကီးတပၢသုဘၣ်. ယွၤကပၢသုန့ၣ်လီၤ.”
24 ဘၣ်ဆၣ်ဒီးစံးအါထီၣ်ဝဲ, “ပျဲယဃ့သုတၢ်တမံၤတက့ၢ်. သုဝဲကိးဂၤဒဲးဟ့ၣ်ယၤနၢ်ဒံးတဖၣ်လၢသုဂုာ်န့ၢ်အီၤတက့ၢ်.” (ဒ်ပှၤမဲးမုၢ်ခိၣ်ဖိအဂၤတဖၣ်အသိးပှၤမံးဒယၣ်ဖိတဖၣ်ဒံးဝဲနၢ်ဒံးန့ၣ်လီၤ.)
25 ဒီးပှၤဂီၢ်မုၢ်စံးဆၢဝဲဒၣ်, “ပသးခုဟ့ၣ်တၢ်တဖၣ်န့ၣ်လၢနၤလီၤ.” အဝဲသ့ၣ်သလၣ်လီၤတၢ်ကံးညာ်တဘ့ၣ် ဒီးပှၤကိးဂၤဒဲးပာ်လီၤနၢ်ဒံးတဖၣ်လၢအဂုာ်န့ၢ်ဝဲန့ၣ်လီၤ.
26 ဒီးနၢ်ဒံးထူလၢစီၤကံးဒဧိၣ်မၤန့ၢ်ဝဲတဖၣ်အတယၢၢ်အိၣ်ဝဲၡက့လးတကထိနွံကယၤန့ၣ်လီၤ. လၢန့ၣ်အမဲာ်ညါ, မၤန့ၢ်စ့ၢ်ကီးဝဲတၢ်ကယၢကယဲတဖၣ်, ဖဲသွဲတဖၣ်, ဒီးတၢ်ကူတၢ်သိးလုးတကုာ်တဖၣ်လၢပှၤမံးဒယၣ်ဖိအစီၤပၤတဖၣ်သိးဝဲ ဒီးအဝဲသ့ၣ်အကီၤလၤအူးအကိာ်ကျီၤတဖၣ်န့ၣ်လီၤ.
27 စီၤကံးဒဧိၣ်သိထီၣ်တၢ်ဂီၤတခါလၢထူဒီးပာ်အီၤလၢအဝ့ၢ်ဒၣ်ဝဲ, ဝ့ၢ်ဧိးဖြၤအပူၤန့ၣ်လီၤ. ဒီးပှၤအံၣ်စရ့လးဖိခဲလၢာ်ညိကွံာ်ကစၢ်ယွၤဒီးလဲၤဖဲန့ၣ်ဒ်သိး အကဘူၣ်ထီၣ်ဘါထီၣ်ဝဲတၢ်ဂီၤသိအသးန့ၣ်လီၤ. တၢ်န့ၣ်ကဲထီၣ်ပျံၤသကွီၤလၢစီၤကံးဒဧိၣ်ဒီးအပှၤဟံၣ်ဖိအဂီၢ်န့ၣ်လီၤ.
28 မၤသးဒ်န့ၣ်ဒီး, ပှၤမံးဒယၣ်ဖိတဖၣ်ဘၣ်တၢ်မၤနၢၤကွံာ်အီၤလၢပှၤအံၣ်စရ့လးဖိ ဒီးတကဲလၢၤဘၣ်တၢ်မၤပျံၤမၤဖုးအလီၢ်လၢၤဘၣ်. ဒီးကီၢ်န့ၢ်အိၣ်မုာ်အိၣ်ခုၣ်ဝဲအနံၣ်လွံၢ်ဆံ, တုၤလၢစီၤကံးဒဧိၣ်သံဝဲတစုန့ၣ်လီၤ.
29 ဒီးစီၤကံးဒဧိၣ်က့ၤကဒါက့ၤဆူအဟံၣ်ဒၣ်ဝဲဒီးအိၣ်ဝဲဆိးဝဲဖဲန့ၣ်လီၤ.
30 အဝဲအိၣ်ဒီးအဖိခွါအဂၤနွံဆံမ့ၢ်လၢအဝဲအိၣ်ဒီးအမါအါဂၤအဃိန့ၣ်လီၤ.
31 အဝဲအိၣ်ဒီးအသံၣ်မါတဂၤလၢဝ့ၢ်ၡက့ၣ်အပူၤဒီးပိာ်မုၣ်န့ၣ်ဆံးစၢ်န့ၢ်အီၤအဖိခွါတဂၤ ဒီးယုၢ်န့ၢ်ဝဲအမံၤလၢစီၤအဘံၤမ့လ့းလီၤ.
32 စီၤယိၤအၣ်အဖိခွါစီၤကံးဒဧိၣ်သံဝဲဖဲအသးပှၢ်တုာ်ဂ့ၤဒီး ဘၣ်တၢ်ခူၣ်လီၤကွံာ်အီၤလၢအပၢ်စီၤယိၤအၣ်အသွၣ်ခိၣ်ပူၤလၢ အဘံၤဧ့စ့ၢ်အဒူၣ်ဖိထၢဖိအဝ့ၢ်, ဝ့ၢ်ဧိးဖြၤန့ၣ်လီၤ.
33 တုၤစီၤကံးဒဧိၣ်သံဝဲအလီၢ်ခံန့ၣ်အံၣ်စရ့လးအပှၤဂီၢ်မုၢ် မၤကဒီးတၢ်တတီတလိၤလၢကစၢ်ယွၤအမဲာ်ညါဒီးဘူၣ်ထီၣ်ထါထီၣ်ဘဧၤလးတဖၣ်န့ၣ်ဒီး, ဒီးအဝဲသ့ၣ်မၤတၢ်အၢၣ်လီၤအီလီၤဒီးဘဧၤလးဒ်အဝဲသ့ၣ်အယွၤန့ၣ်လီၤ.
34 အဝဲသ့ၣ်တမၤလၢၤကစၢ်ယွၤလၢအအုၣ်က့ၤခီၣ်က့ၤတ့ၢ်အီၤလၢအဒုၣ်အဒါ လၢအအိၣ်ဝးတရံးအီၤတဖၣ်အစုပူၤအတၢ်မၤလၢၤဘၣ်န့ၣ်လီၤ.
35 ဒီးအဝဲသ့ၣ်တစံးဘျုးစီၤကံးဒဧိၣ်အဒူၣ်ဖိထၢဖိလၢကယဲၢ်တၢ်ဂ့ၤလၢစီၤကံးဒဧိၣ်မၤတ့ၢ်ဝဲလၢ အံၣ်စရ့လးအဂီၢ်အဃိဘၣ်န့ၣ်လီၤ.