7
1 ဘၣ်တနံၤ, စီၤကံးဒဧိၣ်ဒီးအပှၤတဖၣ်ဆၢထၢၣ်ဂီၤဂီၤဒီး သူၣ်ထီၣ်အဒဲဖဲထံထီၣ်ပၢၢ်ဃရိးအကပၤန့ၣ်လီၤ. ပှၤမံးဒယၣ်ဖိအဒဲတခီ အိၣ်လၢအကလံၤစိးတကပၤ ဖဲတၢ်လူၢ်မိၤရံအခီၣ်ထံးတၢ်ပျီပူၤန့ၣ်လီၤ.
2 ဒီးယွၤစံးဘၣ်စီၤကံးဒဧိၣ်, “ပှၤအိၣ်ဒီးနၤတဖၣ်အါကဲာ်ဆိးလၢယကဟ့ၣ်အီၤ တၢ်မၤနၢၤလၢပှၤမံးဒယၣ်ဖိတဖၣ်အဖီခိၣ်န့ၣ်လီၤ. အဝဲသ့ၣ်ကဆိကမိၣ်ဘၣ်ဖုးလၢအမၤနၢၤတၢ်လၢအနီၢ်ကစၢ်ဒၣ်ဝဲဒီး တဟ့ၣ်ယၤလၢတၢ်လၤကပီၤဘၣ်န့ၣ်လီၤ.
3 ဘိးဘၣ်သ့ၣ်ညါပှၤဂီၢ်မုၢ်ဒီးစံး, ပှၤတဂၤလၢ်လၢ်လၢအပျံၤတၢ်န့ၣ် ကြၢးက့ၤကဒါက့ၤဆူဟံၣ်, ဒီးပကအိၣ်တ့ၢ်ပဝဲဖဲကစၢၢ်ကံးလဧးအံၤလီၤ.” လၢတၢ်န့ၣ်အဃိပှၤအဂၤခံကလးခံကထိ က့ၤကဒါက့ၤဝဲဒီး ပှၤတကလးအိၣ်တီၢ်ဝဲဒၣ်န့ၣ်လီၤ.
4 တုၤနုၤတစု, ယွၤစံးဘၣ်စီၤကံးဒဧိၣ်, “နပှၤအိၣ်ဒံးဝဲအါကဲာ်ဆိးန့ၣ်လီၤ. လဲၤကိးအဝဲသ့ၣ်ဆူထံနံၤဒီးယကနီၤဖးအဝဲသ့ၣ်လၢနဂီၢ်ဖဲန့ၣ်လီၤ. ယမ့ၢ်တဲဘၣ်နၤလၢပှၤတဂၤကြၢးလဲၤဃုာ်တၢ်ဒီးနၤန့ၣ်အဝဲကလဲၤဝဲလီၤ. ယမ့ၢ်တဲလၢပှၤတဂၤတကြၢးလဲၤဃုာ်ဒီးနၤဘၣ်ဒီးတလဲၤဘၣ်ဝဲဘၣ်.”
5 စီၤကံးဒဧိၣ်လဲၤကိးပှၤတဖၣ်န့ၣ်ဆူထံနံၤဒီးယွၤစံးဘၣ်အီၤ, “ပာ်လီၤဆီပှၤကိးဂၤဒဲးလၢအလ့ၣ်ထီၣ်ထံလၢအပျ့ၤဒ်ထွံၣ်တဒုအသိး ဒီးပှၤအဂၤတဖၣ်လၢအတီၤလီၤလၢအခီၣ်လ့ၢ်ခိၣ် ဒ်သိးအကအီထံန့ၣ်တက့ၢ်.”
6 ပှၤအိၣ်ဝဲအဂၤသၢကယၤလၢအဒၢၣ်ထီၣ်ထံလၢအစုပူၤဒီးလ့ၣ်အီဝဲထံန့ၣ်လီၤ. ပှၤအဂၤခဲလၢာ်တီၤလီၤလၢအခီၣ်လ့ၢ်ခိၣ်ဒ်သိးအကအီထံအဂီၢ်န့ၣ်လီၤ.
7 ဒီးယွၤစံးဘၣ်စီၤကံးဒဧိၣ်, “ယကအုၣ်က့ၤခီၣ်က့ၤနၤဒီး ဟ့ၣ်နၤတၢ်မၤနၢၤလၢပှၤမံးဒယၣ်ဖိအဖီခိၣ်, ဃုာ်ဒီးပှၤသၢကယၤလၢအလ့ၣ်အီထံန့ၣ်လီၤ. တဲဘၣ်ပှၤအဂၤတဖၣ် လၢကက့ၤဆူဟံၣ်န့ၣ်တက့ၢ်.”
8 မၤသးဒ်န့ၣ်ဒီးစီၤကံးဒဧိၣ်ဆှၢက့ၤပှၤအံၣ်စရ့လးဖိအဂၤတဖၣ် ဆူဟံၣ်န့ၣ်လီၤ. ပာ်တ့ၢ်ဝဲထဲပှၤသၢကယၤဂၤဧိၤလၢအဟံးဃာ်ကယဲၢ်တၢ်အီၣ်တၢ်အီဒီးကွဲၤတဖၣ် လၢအစုပူၤန့ၣ်လီၤ. ပှၤမံးဒယၣ်ဖိအဒဲတဖၣ်အိၣ်လၢအဝဲသ့ၣ်အဖီလာ်လၢတၢ်ပျီပူၤန့ၣ်လီၤ.
9 လၢမုၢ်နၤအဝဲန့ၣ်ကစၢ်ယွၤမၤလိာ်စီၤကံးဒဧိၣ်စံးဝဲ, “ဂဲၤဆၢထၢၣ်ဒီးလဲၤဒုးပှၤသူၣ်ဒဲအလီၢ်န့ၣ်တက့ၢ်. ယကဟ့ၣ်လီၤနၤတၢ်မၤနၢၤလၢအဝဲသ့ၣ်အဖီခိၣ်န့ၣ်လီၤ.
10 ဘၣ်ဆၣ်နမ့ၢ်ပျံၤလၢနကလဲၤထီၣ်ဒုးတၢ်ဒီးလဲၤလီၤဆူပှၤသူၣ်ဒဲ အလီၢ်န့ၣ်ဃုာ်ဒီးနခ့နပှၤစီၤဖူရါတက့ၢ်.
11 နကနၢ်ဟူတၢ်လၢအဝဲသ့ၣ်ကတိၤဝဲန့ၣ်လီၤ. တုၤနုၤတစုနကအိၣ်ဒီးတၢ်သးဒူလၢနကဒုးတၢ်အဂီၢ်န့ၣ်လီၤ.” မၤသးဒ်န့ၣ်ဒီးစီၤကံးဒဧိၣ်ဒီးအခ့အပှၤစီၤဖူရါလဲၤလီၤဆူ ဒုၣ်ဒါတဖၣ်အဒဲအသရ့ၤန့ၣ်လီၤ.
12 ဒီးပှၤမံးဒယၣ်ဖိ, ပှၤဧမၤလ့းဖိဒီးပှၤမဲးမုၢ်ခိၣ်အဒူၣ်တဖၣ် ရၤလီၤအသးလၢတၢ်ပျီပူၤဒ်ဒွဲၣ်ဧိၤတြၤဧိၤအဖုအဂီၢ်အသိး န့ၣ်လီၤ. အဝဲသ့ၣ်အိၣ်ဒီးကီၤလၤအူးအါမးဒ်မဲးဧိၤဟီၣ်ဧိၤလၢပီၣ် လဲၣ်ကၢၢ်နံၤအသိးန့ၣ်လီၤ.
13 ဖဲစီၤကံးဒဧိၣ်လဲၤတုၤန့ၣ်, အဝဲနၢ်ဟူပှၤတဂၤတဲဘၣ်အတံၤ သကိးလၢတၢ်မံမီၢ်တယုၢ်အဂ့ၢ်န့ၣ်လီၤ. အဝဲစံး, “ယမံမီၢ်လၢဘုမုယီၤအကိၣ်တလိၣ်ဟဲတလ့ၣ်လီၤအသး ဆူပသူၣ်ဒဲအလီၢ်ဒီးဘၣ်ဒိဒဲတဖျၢၣ်လီၤ. ဒီးဒဲန့ၣ်လီၤပှီၢ်ကွံာ်ဝဲအိၣ်ဒါလီၤအသးဘံၣ် သလၣ်လၢဟီၣ်ခိၣ်လိၤလီၤ.”
14 အတံၤသကိးစံးဆၢအီၤ, “တၢ်န့ၣ်မ့ၢ်ပှၤအံၣ်စရ့လးဖိ စီၤယိၤအၣ်အဖိခွါစီၤကံးဒဧိၣ်အနးန့ၣ်လီၤ. အခီပညီအဂၤတအိၣ်ဘၣ်. ကစၢ်ယွၤဟ့ၣ်လီၤအီၤတၢ်မၤနၢၤလၢပှၤမံးဒယၣ်ဖိဒီးပဝဲသုးမုၢ် ဒီဖုညါအဖီခိၣ်လံ.”
15 တုၤစီၤကံးဒဧိၣ်နၢ်ဟူဘၣ်ပှၤတဂၤန့ၣ်အတၢ်မံမီၢ်ဒီးအခီပညီ န့ၣ်အဝဲတီၤလီၤလၢအခီၣ်လ့ၢ်ခိၣ်ဒီးဘူၣ်ထီၣ်ဘါထီၣ်ယွၤန့ၣ် လီၤ. တုၤနုၤတစုအဝဲက့ၤကဒါက့ၤဆူပှၤအံၣ်စရ့လးဖိသူၣ်ဒဲအလီၢ် ဒီးစံးဝဲ, “ဂဲၤထၢၣ်တက့ၢ်. ယွၤဟ့ၣ်လီၤသုတၢ်မၤနၢၤလၢပှၤမံးဒယၣ်ဖိ အသုးမုၢ်အဖီခိၣ်လံ.”
16 အဝဲနီၤဖးလီၤအပှၤသၢဖုဒီးဟ့ၣ်လီၤပှၤတဂၤလၢကွဲၤတဖျၢၣ် ဒီးသပၢၤတဖျၢၣ်စုာ်စုာ်လၢအအိပူၤအိၣ်ဒီးဆှီန့ၣ်လီၤ.
17 ဒီးစံးဘၣ်အဝဲသ့ၣ်, “ဖဲယတုၤဃီၤဆူဒုၣ်ဒါအသူၣ်ဒဲအလီၢ် အသရ့ၤန့ၣ်, ကွၢ်ယၤဒီးမၤတၢ်ဒ်ယမၤအသိးတက့ၢ်.
18 ဖဲယၤဒီးပှၤအိၣ်ဒီးယၤတဖၣ်အူထီၣ်ကွဲၤန့ၣ်, အူထီၣ်သုကွဲၤဝးတရံးတၢ်သူၣ်ဒဲအလီၢ်ဒီးကိးပသူထီၣ်စံး, ‘လၢကစၢ်ယွၤဒီးစီၤကံးဒဧိၣ်အဂီၢ်လီၤ’တက့ၢ်.”
19 စီၤကံးဒဧိၣ်ဒီးအပှၤတကယၤဟဲတုၤဆူတၢ်သူၣ်ထီၣ်အဒဲအလီၢ်အသရ့ၤ, တချုးဖးဖီမုၢ်အကတီၢ်ဖဲပှၤခိးတၢ်ဖိတဖၣ်လဲလိာ်အမူဒါဝံၤသီသီန့ၣ်လီၤ. တုၤနုၤတစုအဝဲသ့ၣ်အူထီၣ်ကွဲၤဒီးဒိသ့ၣ်ဖးသပၢၤလၢအဖီၣ်ဃာ်ဝဲန့ၣ်လီၤ.
20 ဒီးပှၤအဂၤခံဖုန့ၣ်မၤတၢ်တမံၤဃီဒ်န့ၣ်လီၤ. အဝဲသ့ၣ်ခဲလၢာ်စိာ်ဃာ်ဆှီလၢအစုစ့ၣ်, ကွဲၤလၢအစုထွဲဒီး ကိးပသူထီၣ်ဝဲ, “နးတဘ့ၣ်လၢယွၤဒီးစီၤကံးဒဧိၣ်အဂီၢ်” န့ၣ်လီၤ.
21 ဒီးဖဲပှၤကိးဂၤဒဲးဆၢထၢၣ်လၢအလီၢ်ဒၣ်ဝဲဝးတရံးတၢ်သူၣ်ဒဲအလီၢ်န့ၣ် ဒုၣ်ဒါအသုးမုၢ်ဒီဖုဃ့ၢ်ကွံာ်ဝဲအိၣ်ဒီးတၢ်ကိးပသူကိးပသီန့ၣ်လီၤ.
22 ဒီးဖဲစီၤကံးဒဧိၣ်အပှၤတဖၣ်အူထီၣ်ကွဲၤန့ၣ်ယွၤမၤဒ်သိးဒုၣ်ဒါအသုးမုၢ် ကဒုးလိာ်ယၤလိာ်အသး ကဒဲကဒဲလၢအနးဒၣ်ဝဲန့ၣ်လီၤ. အဝဲသ့ၣ်ဃ့ၢ်လိၤလိၤဆူစ့ၤရ့းပၢၢ်တုၤလၢဝ့ၢ်ဘ့ၤသၡံးတၤ ဒီးဝ့ၢ်အၤဘ့လးမဃိလၤ လၢအဘူးဒီးဝ့ၢ်တးဘးန့ၣ်လီၤ.
23 တုၤနုၤတစု, ပှၤပိာ်ခွါတဖၣ်လၢနးသၤလံအဒူၣ်, အၤၡ့ၢ်အဒူၣ်ဒီးမနၤၡ့ၤအဒူၣ်န့ၣ်ဘၣ်တၢ်ကိးထီၣ်အီၤဒီးအဝဲ သ့ၣ်လူၤထွဲပှၤမံးဒယၣ်ဖိတဖၣ်အခံန့ၣ်လီၤ.
24 ဒီးစီၤကံးဒဧိၣ်ဆှၢလီၤပှၤစိာ်တၢ်ကစီၣ်တဖၣ်သကုၤအ့ဖရဲၣ်အတၢ် လူၢ်ဒီခိၣ်လၢအကစံး, “ဟဲလီၤဒီးဒုးပှၤမံးဒယၣ်ဖိတဖၣ်တက့ၢ်. ဟံးဃာ်ထံကျိယၢ်ဒ့ၣ်ဒီးထံကျိဖိတဖၣ်တုၤဃီၤဆူဝ့ၢ်ဘ့ၤသဘါရၤ လၢတၢ်တြီဃာ်ပှၤမံးဒယၣ်ဖိဒ်သိးအသုတဟဲခီဂာ်အီၤ တဂ့ၤန့ၣ်တက့ၢ်.” အ့ဖရဲၣ်အပှၤပိာ်ခွါတဖၣ်ဘၣ်တၢ်ကိးဖှိၣ်အီၤ တပူၤဃီဒီးအဝဲသ့ၣ်ဟံးဃာ်ထံကျိယၢ်ဒ့ၣ်ဒီးထံကျိဖိတဖၣ် ပၢၢ်လၢဝ့ၢ်ဘ့ၤသဘါရၤန့ၣ်လီၤ.
25 ဒီးအဝဲသ့ၣ်ဖီၣ်န့ၢ်ပှၤမံးဒယၣ်ဖိအပဒိၣ်ဖးဒိၣ်ခံဂၤ, စီၤဧိရ့ာ်ဒီးစီၤစအ့ာ်လီၤ. အဝဲသ့ၣ်မၤသံစီၤဧိရ့ာ်ဖဲလၢၢ်ဧိရ့ာ်အလိၤဒီးစီၤစအ့ာ်ဖဲစအ့ာ် အနီၣ်စံၢ်စပံးသၣ်အလီၢ်န့ၣ်လီၤ. အဝဲသ့ၣ်လူၤထွဲကဒီးပှၤမံးဒယၣ်ဖိတဖၣ်ဒီးဟဲက့ၤစိာ်စီၤဧိ ရ့ာ်ဒီးစီၤစအ့ာ်အခိၣ်တဖၣ်ဆူစီၤကံးဒဧိၣ်အအိၣ်လၢအအိၣ်ဝဲဖဲ ထံကျိယၢ်ဒ့ၣ်အမုၢ်ထီၣ်အဖၢမုၢ်န့ၣ်လီၤ.