5
1 ဒီးလၢမုၢ်တနံၤန့ၣ်နီၢ်ဒဘိရၤဒီးစီၤအဘံနိၣ်အဖိခွါစီၤဘါရး သးဝံၣ်တၢ်သးဝံၣ်အံၤန့ၣ်လီၤ.
2 စံးထီၣ်ပတြၢၤယွၤတက့ၢ်.
ပှၤအံၣ်စရ့လးဖိတဖၣ်ပာ်လီၤအသးလၢကဒုးတၢ်ဒီး
ပှၤဂီၢ်မုၢ်ဟ့ၣ်လီၤအသးလၢတၢ်သူၣ်အိၣ်သးအိၣ်ဒီးလၢတၢ်သးခုအပူၤန့ၣ်လီၤ.
3 ဒိကနၣ်တက့ၢ်, သုဝဲစီၤပၤသ့ၣ်ဧၢ,
ပာ်သူၣ်ပာ်သးတက့ၢ်, သုဝဲပဒိၣ်သ့ၣ်ဧၢ,
ယကသးဝံၣ်တၢ်ဒီးဒ့တနၢ်
ဆူယွၤ, အံၣ်စရ့လးအကစၢ်အအိၣ်န့ၣ်လီၤ.
4 ယွၤဧၢ, ဖဲနဟးထီၣ်လၢကစၢၢ်စ့ဧၢ်,
ဖဲနဟဲထီၣ်လၢကီၢ်အဒိၣ်ပူၤန့ၣ်,
ဟီၣ်ခိၣ်ဟူးဝးဝဲ, ဒီးတၢ်စူၤလီၤလၢမူကပိာ်လိၤလီၤ.
မ့ၢ်ဝဲလီၤ. တၢ်အၢၣ်တဖၣ်ဒုးစူၤလီၤထံန့ၣ်လီၤ.
5 ကစၢၢ်ကလိတဖၣ်ဟူးဝးဝဲလၢကစၢၢ်စံၤနါအကစၢ်ယွၤ
အမဲာ်ညါ, လၢယွၤ, အံၣ်စရ့လးအကစၢ်အမဲာ်ညါန့ၣ်လီၤ.
6 လၢစီၤဧးနးအဖိခွါစီၤၡးမကၢ်အမုၢ်နံၤတဖၣ်လၢ နီၢ်ယဧ့လးအမုၢ်နံၤတဖၣ်အပူၤ,
ပှၤလဲၤသကိးတၢ်ဒီဖုတဖၣ်တလဲၤခီဖျိလၢၤကီၢ်န့ၣ် အပူၤဘၣ်.
ဒီးပှၤလဲၤတၢ်ဖိတဖၣ်သူဝဲကျဲအဂၤတဖၣ်န့ၣ်လီၤ.
7 ကီၢ်အံၣ်စရ့လးအဝ့ၢ်တဖၣ်အိၣ်သယုၢ်ဝဲ, နီၢ်ဒဘိရၤဧၢ,
အဝဲသ့ၣ်အိၣ်သယုၢ်ဝဲတုၤနဟဲတစု,
နဟဲနဲဒ်မိၢ်တဂၤအသိးလၢအံၣ်စရ့လးအဂီၢ်န့ၣ်လီၤ.
8 ဒီးဖဲပှၤအံၣ်စရ့လးဖိဃုထၢကစၢ်အသီတဖၣ်န့ၣ်, တၢ်ဒုးတၢ်ယၤအိၣ်ထီၣ်လၢကီၢ်န့ၣ်အပူၤလီၤ.
လၢအံၣ်စရ့လးပိာ်ခွါလွံၢ်ကလးအကျါမ့ၢ်ပှၤစိာ်ကတီၤမ့ၢ်ဂ့ၤ, ဘီမ့ၢ်ဂ့ၤတဂၤဂၤန့ၣ်ဧါ.
9 ယသးလဲၤဃုာ်ဒီးအံၣ်စရ့လးအသုးခိၣ်တဖၣ်,
ဃုာ်ဒီးပှၤဂီၢ်မုၢ်လၢအသူၣ်အိၣ်သးအိၣ်ဟ့ၣ်လီၤသးလၢတၢ်သးခု အပူၤန့ၣ်လီၤ.
စံးထီၣ်ပတြၢၤယွၤတက့ၢ်.
10 တဲတၢ်ဂ့ၢ်န့ၣ်, သုဝဲလၢအဒိးကသ့ၣ်ယီၤဝါတဖၣ်,
သုဝဲလၢအဆ့ၣ်နီၤလၢကသ့ၣ်အဂီၤကၢ်အလိၤတဖၣ်,
ဒီးသုဝဲလၢအလဲၤတၢ်တပူၤလၢ်လၢ်သ့ၣ်ဧၢ.
11 ဒိကနၣ်တက့ၢ်. ပှၤဂီၢ်မုၢ်လၢအသီၣ်အသဲဝးတရံးထံပူၤတဖၣ်န့ၣ်
စံၣ်ဃဲၤတဲဃဲၤယွၤအတၢ်မၤနၢၤတဖၣ်,
အံၣ်စရ့လးအပှၤဂီၢ်မုၢ်အတၢ်မၤနၢၤတဖၣ်န့ၣ်လီၤ. အန့ၣ်ဝံၤဒီးယွၤအပှၤဂီၢ်မုၢ်ဟးထီၣ်ဝဲလၢအဝ့ၢ်တဖၣ်ဒီးလဲၤတၢ်လီၤ.
12 ဆှၢဆူညါ, နီၢ်ဒဘိရၤဧၢ, ဆှၢဆူညါတက့ၢ်.
ဆှၢဆူညါ, သးဝံၣ်ထီၣ်တၢ်သးဝံၣ်တယုၢ်, ဆှၢဆူညါတက့ၢ်.
လဲၤထီၣ်ဆူညါ, စီၤအဘံနိၣ်အဖိခွါစီၤဘါရးဧၢဆှၢပှၤလၢတၢ်စိာ်မၢကဲကုၢ်အီၤတဖၣ်တက့ၢ်.
13 တုၤနုၤတစုပှၤအသူၣ်တီအသးလိၤတဖၣ်ဟဲလီၤဆူအခိၣ်အနၢ်တဖၣ်အအိၣ်,
ယွၤအပှၤဂီၢ်မုၢ်ဟဲဆူအအိၣ်, အိၣ်ကတဲာ်ကတီၤသးလၢတၢ်ဒုးအဂီၢ်လီၤ.
14 အဝဲသ့ၣ်ဟဲဝဲလၢအ့ဖရဲၣ်, ပှၤတဖၣ်လၢအိၣ်ဆိးဝဲလၢကီၢ်ဧမၤလ့း,
လၢဘံၣ်ယၤမံၣ်အဒူၣ်ဒီးအပှၤဂီၢ်မုၢ်အလီၢ်ခံလီၤ.
သုးခိၣ်ဖးဒိၣ်တဖၣ်ဟဲဝဲလၢကီၢ်မၤကံၢ်,
ဒီးသုးခိၣ်သုးနၢ်တဖၣ်ဟဲဝဲလၢကီၢ်စဘူလိၣ်လီၤ.
15 ယံးစၣ်ကၢ်အပှၤခိၣ်ပှၤနၢ်တဖၣ်ဟဲဃုာ်ဒီးနီၢ်ဒဘိရၤ,
မ့ၢ်ဝဲလီၤ. ယံးစၣ်ကၢ်ဟဲစ့ၢ်ကီးဒီးစီၤဘါရးလီၤ.
ဒီးအဝဲသ့ၣ်ပိာ်ထီၣ်အဝဲအခံဆူတၢ်တြီၤပူၤလီၤ.
မ့မ့ၢ်ရူၤဘ့ၣ်အဒူၣ်အသးလီၤဖးဝဲ, ဒီးကဟဲဝဲအဂီၢ်ပဲာ်ဖး နီၤဖးအသးတန့ၢ်ဘၣ်.
16 ဘၣ်မနုၤလၢအဝဲသ့ၣ်အိၣ်တ့ၢ်လၢတၢ်လီၢ်ခံဃုာ်ဒီးအသိတဖၣ်န့ၣ် လဲၣ်.
မ့ၢ်ဒ်သိးကကနၣ်ပှၤကွၢ်သိတဖၣ်ကိးအသိအဖုအဂီၢ်အကလုၢ်န့ၣ်ဧါ.
မ့ၢ်ဝဲသၢၣ်. ရူၤဘ့ၣ်အဒူၣ်အသးလီၤဖးလီၤ.
အဝဲသ့ၣ်ကဟဲပိာ်ဝဲအဂီၢ်ပဲာ်ဖးနီၤဖးအသးတန့ၢ်ဘၣ်.
17 ကးအဒူၣ်အိၣ်လၢထံကျိယၢ်ဒ့ၣ်အမုၢ်ထီၣ်တခီ,
ဒီးဒၣ်အဒူၣ်အိၣ်တ့ၢ်ဝဲလၢကဘီတဖၣ်အပူၤလီၤ.
အၤၡ့ၢ်အဒူၣ်အိၣ်တ့ၢ်ဝဲလၢပီၣ်လဲၣ်အကၢၢ်နံၤ
ဒီးအဝဲသ့ၣ်အိၣ်ဆိးဝဲဖဲထံကၢၢ်နံၤန့ၣ်လီၤ.
18 ဘၣ်ဆၣ်ဒီးစဘူလိၣ်အပှၤဂီၢ်မုၢ်ဒီးနးသၤလံအပှၤဂီၢ်မုၢ်ဟ့ၣ်လီၤအသးဒူဒူလၢတၢ်ဒုးပျီအပူၤန့ၣ်လီၤ.
19 ဖဲဝ့ၢ်တၤနးလၢထံကျိဖိမကံးဒိၤအနံၤန့ၣ်ကနၤဧၣ်အစီၤပၤတဖၣ်ဟဲဒုးတၢ်လီၤ. ဘၣ်ဆၣ်ဒီးတဟံးန့ၢ်ဘၣ်စ့နီၢ်နီတစဲးဘၣ်.
20 ဆၣ်ဧိၤဖီဧိၤတဖၣ်ဒုးတၢ်လၢမူကပိာ်လိၤ
ဖဲအသုးအသးခီဂာ်မူကပိာ်လိၤန့ၣ်လီၤ.
အဝဲသ့ၣ်ဒုးတၢ်ထီဒါစီၤစံစရၤလီၤ.
21 ထံကျိကံၡိၣ်အထံဒိၣ်န့ၣ်မၤလီၤထွံကွံာ်အဝဲသ့ၣ်,
ထံကျိကံၡိၣ်လၢအယွၤလီၤဆူၣ်ဆူၣ်န့ၣ်လီၤ.
ယကထီၣ်, လဲၤထီၣ်ဆူညါ, အိၣ်ဒီးတၢ်ဂံၢ်တၢ်ဘါလီၤ.
22 တုၤနုၤတစုကသ့ၣ်တဖၣ်ဟဲဃ့ၢ်ပတ့ၢ်ပတီၤထီၣ်ဆူညါ, ယီၢ်လီၤဟီၣ်ခိၣ်လၢအခီၣ်မ့ၣ်ထးတဖၣ်လီၤ.
23 ယွၤအကလူးစံးဝဲ, “ပာ်တၢ်ဆိၣ်အၢလၢဝ့ၢ်မ့ရိးအဖီခိၣ်တက့ၢ်.
တၢ်ဆိၣ်အၢတမံၤ, တၢ်ဆိၣ်အၢတမံၤလၢပှၤအိၣ်ဖဲန့ၣ်တဖၣ်အလိၤတက့ၢ်.
အဝဲသ့ၣ်တဟဲဘၣ်ဝဲလၢကမၤစၢၤယွၤအဂီၢ်ဘၣ်.
တဟဲဘၣ်ဝဲဒ်သုးဖိတဖၣ်အသိးလၢကဒုးတၢ်အဂီၢ်ဘၣ်.”
24 ပိာ်မုၣ်လၢအဘူၣ်အတီၢ်ဂ့ၤကတၢၢ်မ့ၢ်ဝဲနီၢ်ယဧ့လး, ပှၤက့ၣ်ဖိစီၤဃ့ဘ့ၢ်အမါ,
ပှၤအဘူၣ်အတီၤဂ့ၤကတၢၢ်လၢပိာ်မုၣ်တဖၣ်အကျါလၢအအိၣ်ဆိးလၢဒဲ တဖၣ်အပူၤန့ၣ်လီၤ.
25 စီၤစံစရၤဃ့အီထံ, ဘၣ်ဆၣ်ဒီးအဝဲဒုးအီအီၤတၢ်နုၢ်ထံ,
အဝဲဟဲစိာ်န့ၢ်အီၤတၢ်နုၢ်ထံအလီၤသကၤလၢလီခီဃံလၤတဖျၢၣ်အပူၤလီၤ.
26 အဝဲဟံးန့ၢ်ဒဲအနီၣ်ခိၣ်စူတဘိလၢအစုတခီ,
ပှၤမၤတၢ်ဖိအခံၣ်ခူၣ်လၢအစုအဂၤတခီလီၤ.
အဝဲတီၢ်စီၤစံစရၤဒီးမၤသ့ၣ်ဖးအခိၣ်ကု, ဒီးဆဲးဖျိးအနၢ်သက့ၤထံးလီၤ.
27 အဝဲလီၤဃံၤလၢအခီၣ်လ့ၣ်ခိၣ်,
ဒီးမံလီၤဂၢၢ်တပၢၢ်လၢပိာ်မုၣ်န့ၣ်အခီၣ်ထံးလီၤ.
လၢပိာ်မုၣ်အခီၣ်ထံးန့ၣ်လီၤဃံၤဝဲလၢအခီၣ်လ့ၣ်ခိၣ်, ဒီးလီၤဃံၤဝဲလီၤ.
လီၤဃံၤဝဲလၢဟီၣ်ခိၣ်လိၤဒီးသံဝဲလီၤ.
28 စီၤစံစရၤအမိၢ်ကွၢ်ဃီၤတၢ်လၢပဲတြီဖိ,
အဝဲကိးပသူထီၣ်လၢတၢ်ကွၢ်ခူသူၣ်တၢ်အပူၤလီၤ.
ဒီးအဝဲသံကွၢ်ဝဲ, “ဘၣ်မနုၤလၢအဝဲ အလ့ၣ်ကဟၣ်ဒုးသုးဟဲက့ၤတုၤစဲၤခံန့ၣ်လဲၣ်.
ဘၣ်မနုၤလၢအကသ့ၣ်တဖၣ်ဟဲက့ၤတုၤဃၢ ဒိၣ်မးန့ၣ်လဲၣ်.”
29 အပှၤပိာ်မုၣ်လၢအကူၣ်သ့ဒိၣ်ကတၢၢ်တဖၣ်စံးဆၢအီၤ,
ဒီးအဝဲစံးလီၤက့ၤအသးခဲအံၤခဲအံၤ,
30 “အဝဲသ့ၣ်လူၤဃုဒၣ်ထဲတၢ်တဖၣ်လၢကမၤန့ၢ်ဝဲ ဒီးနီၤဖးဝဲအဂီၢ်,
ပိာ်မုၣ်ဖိတဂၤမ့တမ့ၢ်ခံဂၤလၢပှၤသုးဖိတဂၤ စုာ်စုာ်အဂီၢ်,
တၢ်ကူတၢ်သိးအလုၢ်ဒိၣ်ပှ့ၤဒိၣ်လၢစီၤစံစရၤအဂီၢ်,
တၢ်ဆးကံၣ်ဆးဝ့ၤအတၢ်ကယၢကယဲတဖၣ်လၢနီၢ်ပၤမုၣ်အကိာ်အဂီၢ်လီၤ.
31 မ်နဒုၣ်နဒါခဲလၢာ်သံဝဲဒ်န့ၣ်အသိး, ယွၤဧၢ,
ဘၣ်ဆၣ်ဒီးမ်နတံၤသကိးတဖၣ်ကပီၤထီၣ်ဒ်မုၢ်ဟဲထီၣ်အသိးတက့ၢ်.
ဒီးတၢ်မုာ်တၢ်ခုၣ်အိၣ်ထီၣ်လၢကီၢ်ပူၤအနံၣ်လွံၢ်ဆံန့ၣ်လီၤ.