4
1 ဖဲစီၤအ့ဟူာ်သံဝံၤအလီၢ်ခံန့ၣ်အံၣ်စရ့လးအပှၤဂီၢ်မုၢ် မၤကဒီးတၢ်ဒဲးဘးထီဒါယွၤန့ၣ်လီၤ.
2 လၢတၢ်န့ၣ်အဃိယွၤပျဲကနၤဧၣ်အစီၤပၤယၤဘံၣ်လၢအပၢတၢ်ဖဲ ဝ့ၢ်ဃါစိၢ်အပူၤ, လၢအကမၤနၢၤအဝဲသ့ၣ်န့ၣ်လီၤ. အဝဲအသုးခိၣ်ဖးဒိၣ်မ့ၢ်ဝဲစီၤစံစရၤလၢအအိၣ်လၢဝ့ၢ်ဃရိၡ့းဘၣ်ဃး ဒီးပှၤကလုာ်ဂၤတဖၣ်န့ၣ်လီၤ.
3 စီၤပၤယၤဘံၣ်အိၣ်ဒီးလ့ၣ်ကဟၣ်ဒုးသုးထးအဆိခွံကယၤ, ဒီးအဝဲပၢအံၣ်စရ့လးအပှၤဂီၢ်မုၢ်လၢတၢ်အၢတၢ်သီဒီး တၢ်မၤအၢမၤနးဖးဒိၣ်အပူၤအနံၣ်ခံဆံန့ၣ်လီၤ. တုၤနုၤတစုအံၣ်စရ့လးအပှၤဂီၢ်မုၢ်ကိးပသူထီၣ်ဆူယွၤအအိၣ် လၢတၢ်မၤစၢၤအဂီၢ်န့ၣ်လီၤ.
4 ဒီးစီၤလံးပံအမါနီၢ်ဒဘိရၤမ့ၢ်ဝံမုၣ်တဂၤလၢအမၤတၢ်ဒ်ပှၤစံၣ်ညီၣ်ကွီၢ်တဂၤ လၢပှၤအံၣ်စရ့လးဖိတဖၣ်အဂီၢ်ဖဲအကတီၢ်န့ၣ်လီၤ.
5 အဝဲညီနုၢ်ဆ့ၣ်နီၤလၢသ့ၣ်စူၣ်ပလိၣ်တထံးအဖီလာ်ဖဲဝ့ၢ်ရၤမါ ဒီးဝ့ၢ်ဘ့ၤသ့လးအဘၢၣ်စၢၤလၢအ့ဖရဲၣ်ကစၢၢ်ကလိ, ဒီးအံၣ်စရ့လးအပှၤဂီၢ်မုၢ်ဘၣ်လဲၤဖဲန့ၣ် လၢအဝဲတၢ်စံၣ်ညီၣ်နီၤဖးအဂီၢ်န့ၣ်လီၤ.
6 တနံၤန့ၣ်အဝဲမၢပှၤလဲၤကိးစီၤအဘံနိၣ်အဖိခွါစီၤဘါရးအိၣ် လၢဝ့ၢ်က့ဒ့ၣ်လၢကီၢ်နးသးလံအပူၤဒီးစံးဘၣ်အီၤ, “ယွၤ, အံၣ်စရ့လးအကစၢ်ယွၤဟ့ၣ်လီၤနၤတၢ်မၤလိာ်တထံၣ်အံၤလီၤ. ဟံးန့ၢ်ပှၤနးသၤလံဖိဒီးပှၤစဘူလိၣ်ဖိအဒူၣ်အကျါအဂၤတကလး ဒီးဆှၢအီၤဆူကစၢၢ်တၤဘိၢ်တက့ၢ်.
7 ဒီးယကဒုးဟဲစီၤပၤယၤဘံၣ်အသုးမုၢ်အသုးခိၣ်ဖးဒိၣ်စီၤစံစရၤ လၢကဒုးတၢ်ဒီးနၤဖဲထံကျိကံၡိၣ်န့ၣ်လီၤ. အဝဲအိၣ်ဒီးလ့ၣ်ကဟၣ်ဒုးသုးဒီးပှၤသုးဖိတဖၣ်လီၤ. ဘၣ်ဆၣ်ဒီးယကဟ့ၣ်နၤလၢတၢ်မၤနၢၤကွံာ်အီၤန့ၣ်လီၤ.”
8 ဒီးစီၤဘါရးစံးဆၢအီၤ, “နမ့ၢ်လဲၤတၢ်ဒီးယၤန့ၣ်ယကလဲၤယဲလီၤ. ဘၣ်ဆၣ်ဒီးနမ့ၢ်တလဲၤတၢ်ဒီးယၤန့ၣ်ယတလဲၤဘၣ်.”
9 နီၢ်ဒဘိရၤစံးဆၢဝဲဒၣ်, “ဂ့ၤလံ. ယကလဲၤဒီးနၤလီၤ. ဘၣ်ဆၣ်ဒီးနတမၤန့ၢ်တၢ်မၤနၢၤအတၢ်လၤကပီၤအံၤဘၣ်. အဂ့ၢ်ဒ်အံၤ, ကစၢ်ယွၤကဟ့ၣ်လီၤစီၤစံစရၤဆူပိာ်မုၣ်တဂၤအစုပူၤန့ၣ်လီၤ.”
10 လၢတၢ်န့ၣ်အဃိစီၤဘါရးကိးန့ၢ်ပှၤစဘူလိၣ်အဒူၣ်, ဒီးပှၤနးသၤလံအဒူၣ်တဖၣ်ဆူက့ဒ့ၣ် ဒီးပှၤပိာ်ခွါအဂၤတကလးပိာ်ထီၣ်အခံလီၤ. ဒီးနီၢ်ဒဘိရၤလဲၤဃုာ်ဒီးအီၤန့ၣ်လီၤ.
11 ဖဲအကတီၢ်အဝဲန့ၣ်, ပှၤက့ၣ်ဖိစီၤဃ့ဘ့ၢ်သူၣ်ထီၣ်အဒဲဘူးဒီးက့ဒ့ၣ်, ဖဲပျီစၤဧနဲၣ်အသ့ထိးဖၣ်တထံးအဃၢၤန့ၣ်လီၤ. အဝဲဟးဖးတ့ၢ်ဒီးပှၤက့ၣ်ဖိအဂၤတဖၣ်လၢအမ့ၢ်စီၤမိၤၡ့အမံၤပှၢ်စီၤဃိဘာ်အစၢၤအသွဲၣ်တဖၣ်န့ၣ်လီၤ.
12 ဖဲစီၤစံစရၤသ့ၣ်ညါလၢစီၤဘါရးလဲၤထီၣ်ဆူကစၢၢ်တၤဘိၢ်အလိၤန့ၣ်ဒီး,
13 အဝဲကိးဖှိၣ်အလ့ၣ်ကဟၣ်ဒုးသုးထးအဆိခွံကယၤဒီးအပှၤတဖၣ်ခဲလၢာ်ဒီး ဆှၢအီၤစးထီၣ်လၢပှၤကလုာ်ဂၤတဖၣ်အဝ့ၢ်ဃရိၡ့းတုၤဆူ ထံကျိကံၡိၣ်န့ၣ်လီၤ.
14 တုၤနုၤတစုနီၢ်ဒဘိရၤစံးဘၣ်စီၤဘါရး, “လဲၤတက့ၢ်. ယွၤဆှၢနၤလီၤ. တနံၤအံၤအဝဲဟ့ၣ်လီၤနၤတၢ်မၤနၢၤလၢစီၤစံစရၤအဖီခိၣ်လီၤ.” မၤသးဒ်န့ၣ်ဒီးစီၤဘါရးဟဲလီၤလၢကစၢၢ်တၤဘိၢ်အဒီခိၣ်ဃုာ်ဒီးအပှၤတကလးဂၤန့ၣ်လီၤ.
15 ဖဲစီၤဘါရးဒုးတၢ်ဃုာ်ဒီးအသုးမုၢ်န့ၣ်ယွၤမၤသဘံၣ်ဘုၣ်စီၤစံစရၤ အလ့ၣ်ကဟၣ်ဒုးသုးတဖၣ်ဒီးအပှၤသုးဖိတဖၣ်လီၤ. စီၤစံစရၤစံၣ်လီၤလၢအလ့ၣ်ကဟၣ်ဒုးသုးအဖီခိၣ်ဒီးဃ့ၢ်ဝဲလၢအခီၣ်လီၤ.
16 စီၤဘါရးလူၤထွဲလ့ၣ်ကဟၣ်ဒုးသုးတဖၣ်ဒီးပှၤသုးဖိတဖၣ်အခံ တုၤဆူပှၤကလုာ်ဂၤတဖၣ်အဝ့ၢ်ဃရိၡ့းဒီးစီၤစံစရၤအသုးမုၢ် ဒီဖုဘၣ်တၢ်မၤသံကွံာ်အီၤခဲလၢာ်လီၤ. ပှၤတအိၣ်လီၤတဲာ်ဘၣ်နီတဂၤဘၣ်.
17 စီၤစံစရၤဃ့ၢ်နုၢ်ဆူပှၤက့ၣ်ဖိစီၤဃ့ဘ့ၢ်အမါနီၢ်ယဧ့လး အဒဲပူၤလီၤ. အဂ့ၢ်ဒ်အံၤ, ဝ့ၢ်ဃါစိၢ်အစီၤပၤယၤဘံၣ်မၤတ့ၢ်တၢ်ဃူတၢ်ဖိးဒီးပှၤဃ့ဘ့ၢ်အဒူၣ်ဖိထၢဖိ န့ၣ်လီၤ.
18 နီၢ်ယဧ့လးလဲၤထီၣ်သဂၢၢ်စီၤစံစရၤဒီးစံးဘၣ်အီၤ, “တၢ်ဒိၣ်ဧၢ, ဟဲနုာ်ဆူယဒဲပူၤတက့ၢ်. ပျံၤတၢ်တဂ့ၤ”. မၤသးဒ်န့ၣ်ဒီးအဝဲလဲၤနုာ်ဝဲဒၣ်လီၤ. ဒီးပိာ်မုၣ်န့ၣ်လုးဘၢအီၤလၢယၣ်တဘ့ၣ်လီၤ.
19 ဒီးအဝဲစံးဘၣ်ပိာ်မုၣ်န့ၣ်, “ဟ့ၣ်ဒုးအီယၤလၢထံတလီခီတက့ၢ်. တၢ်သူယသးလၢထံလီၤ”. ပိာ်မုၣ်န့ၣ်အိးထီၣ်ထၢၣ်တၢ်ဖံးလၢတၢ်ဒၢနုာ်တၢ်နုၢ်ထံ ဒီးဒုးအီအီၤဝံၤလုးဘၢကဒါက့ၤကဒီးအီၤန့ၣ်လီၤ.
20 တုၤနုၤတစုအဝဲစံးဘၣ်ပိာ်မုၣ်န့ၣ်, “ဆၢထၢၣ်ဖဲဒဲအကျဲစၢၤ န့ၣ်, ဒီးပှၤတဂၤဂၤမ့ၢ်သံကွၢ်နၤလၢမ့ၢ်ပှၤအိၣ်ဖဲအံၤတဂၤဂၤဧါန့ၣ်, စံးလၢတအိၣ်ဘၣ်န့ၣ်တက့ၢ်.”
21 စီၤစံစရၤလီၤဘှံးလီၤတီၤတုၤဒၣ်လဲာ်အဝဲမံဘၣ်အသးလၢတၢ်မံယိာ်အပူၤလီၤ. တုၤနုၤတစုနီၢ်ယဧ့လးဟံးန့ၢ်ခံၣ်ခူၣ်တဘိဒီးဒဲအနီၣ်စဲတဘိ ဝံၤလဲၤဝဲကယီကယီဆူအအိၣ် ဒီးတီၢ်နုာ်နီၣ်ခိၣ်စူန့ၣ်လိၤလိၤဖဲအနၢ်သက့ၤထံးတုၤအဖျိကွံာ် ဒီးဆဲးတံၢ်အသးလၢဟီၣ်ခိၣ်န့ၣ်လီၤ.
22 ဖဲစီၤဘါရးဟဲလူၤဃုစီၤစံစရၤန့ၣ်, နီၢ်ယဧ့လးဟဲထီၣ်သဂၢၢ်အီၤဒီးစံးဘၣ်အီၤ, “ဟဲဖဲအံၤတက့ၢ်. ယကဒုးနဲၣ်နၤပှၤလၢနဃုအီၤတဂၤန့ၣ်လီၤ.” မၤသးဒ်န့ၣ်ဒီးအဝဲလဲၤပိာ်ထွဲပိာ်မုၣ်န့ၣ်အခံ, ဒီးထံၣ်ဘၣ်စီၤစံစရၤသံလၢဟီၣ်ခိၣ်လိၤအိၣ်ဒီးနီၣ်ပျၤဆဲးဖျိအခိၣ်န့ၣ်လီၤ.
23 ဒီးလၢမုၢ်တနံၤန့ၣ်ကစၢ်ယွၤဟ့ၣ်ပှၤအံၣ်စရ့လးဖိတဖၣ်လၢတၢ်မၤနၢၤလၢ ပှၤကနၤဧၣ်ဖိအစီၤပၤစီၤယၤဘံၣ်အဖီခိၣ်န့ၣ်လီၤ.
24 ဒီးအဝဲသ့ၣ်မၤဒၢၣ်အီၤယံာ်ထီၣ်ဆူၣ်ထီၣ်တုၤအမၤဟးဂီၤကွံာ်အီၤတစုန့ၣ်လီၤ.