39
1 မဲာ်တဲးလဲးမံၤတဖၣ်ကဖှံလီၤအကတီၢ်ဖဲလဲၣ်န့ၣ်နသ့ၣ်ညါဧါ. တၤယုၢ်မိၢ်ဖှံလီၤအဖိန့ၣ်နခိးကွၢ်စ့ၢ်ကီးဧါ.
2 အဝဲသ့ၣ်ဒၢဝဲယံာ်ပှဲၤလါလဲၣ်န့ၣ်နဂံၢ်နီၣ်ဧါ. ဒီးအတၢ်ဖှံလီၤအက တီၢ်န့ၣ်နသ့ၣ်ညါဧါ.
3 နသ့ၣ်ညါအဝဲသ့ၣ်ကကိာ်လီၤအသးဒီးဖှံလီၤအဖိတဖၣ်အကတီၢ် ဖဲလဲၣ်စ့ၢ်ကီးဧါ.
4 အဖိတဖၣ်ဒိၣ်ထီၣ်ဆူၣ်ထီၣ်ဝဲလၢပှၢ်လၢ်ကျါဒီးဟးယံၤကွံာ်ဒီး တဟဲက့ၤလၢၤဘၣ်ဆူအဝဲသ့ၣ်အအိၣ်ဘၣ်.
5 မတၤဟ့ၣ်တၢ်သဘျ့လၢကသ့ၣ်ယီၤမံၤတဖၣ်န့ၣ်လဲၣ်. မတၤပျဲထူၣ်ဖျဲးအီၤလၢကလဲၤဖဲအသးဒၣ်ဝဲန့ၣ်လဲၣ်.
6 ယဟ့ၣ်တ့ၢ်အဝဲသ့ၣ်လၢပှၢ်မုၢ်ကနၢဒီးပျဲဟီၣ်ခိၣ်ဟီပျီ တဖၣ်ကမ့ၢ်အတၢ်အိၣ်တၢ်ဆိးအလီၢ်န့ၣ်လီၤ.
7 အဝဲသ့ၣ်အိၣ်ယံၤဒီးဝ့ၢ်တဖၣ်အတၢ်သီၣ်တၢ်သဲဒီးပှၤမၤဘှါ အီၤဒီးမၢအမၤတၢ်သ့တအိၣ်နီတဂၤဘၣ်.
8 ကစၢၢ်ကလိတဖၣ်မ့ၢ်အတၢ်အီၣ်ဆၣ်အလီၢ်လါဟ့ဖဲအဝဲသ့ၣ် အီၣ်တၢ်, ဒီးအလီၢ်ဖဲအဃုထံၣ်န့ၢ်ကယဲၢ်တပံၢ်လါဟ့လၢ ကအီၣ်ဝဲအဂီၢ်န့ၣ်လီၤ.
9 တၤဖးရံၣ်ကမၤနတၢ်ဒီးကအိၣ်ဝဲသီတနၤကျၢၤလၢကျိးလၢ ဆၣ်ဖိကီၢ်ဖိအီၣ်တၢ်အဃၢၤန့ၣ်ဧါ.
10 နစၢဃာ်အီၤလၢပျံၤတဘိဒီးမၢအထဲၣ်တၢ်မ့တမ့ၢ်နဒုးထုး အီၤကကြၢ်လၢနစံၣ်ပျီပူၤဘၣ်ကသ့ဧါ.
11 နနာ်န့ၢ်အတၢ်ဂံၢ်ဆူၣ်ဘါဆူၣ်ဒီးမုၢ်လၢ်အီၤလၢကမၤန့ၢ်နၤ တၢ်မၤအဃၢအစုာ်ဘၣ်ကသ့ဧါ.
12 နမုၢ်လၢ်အီၤလၢကဟဲစိာ်ဘုလၢနကူးအီၤဒီးပာ်ဖှိၣ်ဘု ကဒိၣ်တဖၣ်ဆူနယီၢ်ဘုအလီၢ်န့ၣ်ဧါ.
13 ထိၣ်ကီၤလၤအူးတပျုာ်အဒံးဆ့တဖၣ်ချ့ထဲလဲၣ်, ဘၣ်ဆၣ်ထိၣ်ကီၤလၤအူးယူၤဝဲဒ်ထိၣ်လဲးဝါတသ့ဘၣ်.
14 ထိၣ်ကီၤလၤအူးပာ်လီၤတဲာ်အဒံၣ်လၢဟီၣ်ခိၣ်လိၤဒ်သိးကလၢၤ ဝဲလၢမဲးအကျါ,
15 ဒီးသးပ့ၤနီၣ်လၢအဒံၣ်တဖၣ်ကဘၣ်တၢ်ယီၢ်သဘှံးအီၤမ့ၢ်ဂ့ၤ, ဆၣ်ဖိကီၢ်ဖိအမံၤကမၤသ့ၣ်ဖးအီၤမ့ၢ်ဂ့ၤန့ၣ်လီၤ.
16 အဝဲမၤအသးဒ်အဒံၣ်တဖၣ်တမ့ၢ်တၢ်အသိး, ဒီးအတၢ်ထဲးဂံၢ် ထဲးဘါတဖၣ်ကဲထီၣ်တ့ၢ်တၢ်ကလီကလီဒၣ်လဲာ်တကိၢ်ဝဲဒၣ်ဘၣ်.
17 အဂ့ၢ်ဒ်အံၤ, ကစၢ်ယွၤတဟ့ၣ်ဘၣ်အီၤလၢအတၢ်ကူၣ်သ့, ဒီးအတၢ်နီၤဟ့ၣ်ဘၣ်ဃးဒီးတၢ်ကူၣ်တၢ်ဆးန့ၣ်ဘၣ်.
18 ဘၣ်ဆၣ်ဒီးတုၤအထိၣ်ဂဲၤအသးဒီးဃ့ၢ်ထီၣ်ဝဲန့ၣ်, နံၤဘၣ်ဖၣ်လဲကသ့ၣ်ဒီးပှၤလၢအဒိးအီၤလီၤ.
19 စီၤယိၤဘးဧၢ, ပှၤလၢအဒုးဂံၢ်ဆူၣ်ဘါဆူၣ်ကသ့ၣ်တဖၣ် ဒီးဟ့ၣ်အီၤအကိာ်ဆူၣ်တဖၣ်န့ၣ်မ့ၢ်နၤဧါ.
20 နဒုးစံၣ်အီၤဒ်ဒွဲၣ်ဧိၤတြၤဧိၤအသိးဒီးဒုးမၤပျံၤမၤဖုး ပှၤကညီလၢအနါဒ့အတၢ်ကဟုကညီၣ်န့ၣ်ဘၣ်ကသ့ဧါ.
21 လၢတၢ်သးဆူၣ်န့ၣ်အခီၣ်ဝာ်ဟီၣ်ခိၣ်လၢတၢ်တြီပူၤဒီးဃ့ၢ် သဘျိၣ်ဆူတၢ်ဒုးပျီဃုာ်ဒီးအဂံၢ်အဘါခဲလၢာ်လီၤ.
22 အဝဲတသ့ၣ်ညါတၢ်ပျံၤတၢ်ဖုးအခီပညီ, ဒီးနးဘိးကဒါ က့ၤအီၤဆူအလီၢ်ခံတန့ၢ်ဘၣ်.
23 စုကဝဲၤတဖၣ်လၢပှၤလၢအဒိးအီၤတဖၣ်စိာ်ဝဲန့ၣ်သီၣ်ရဲာ်ရီာ် ဒီးကပြုၢ်ကပြီၤမးလၢမုၢ်အတၢ်ကပီၤအပူၤန့ၣ်လီၤ.
24 တုၤကွဲၤသီၣ်ထီၣ်ဒီးကသ့ၣ်တဖၣ်ကနိးထီၣ်ဒီးတၢ်သူၣ် ဟူးသးဂဲၤတုၤအအိၣ်ဃိတန့ၢ်လၢၤဘၣ်ဒီးဃ့ၢ်သဘျိၣ် ဆူညါန့ၣ်လီၤ.
25 လၢကွဲၤအသီၣ်ထီၣ်တဘီဘၣ်တဘီန့ၣ်သါသဖှိထီၣ်ဝဲဖြူၤဖြူၤ, ဒီးနၢဘၣ်တၢ်ဒုးသုးအသဝံလၢအယံၤ, ဒီးနၢ်ဟူသုးခိၣ်တဖၣ် ကိးပသူထီၣ်ဟ့ၣ်လီၤအကလုၢ်တဖၣ်န့ၣ်လီၤ.
26 လံာ်ဃးတဘ့ၣ်မၤလိတၢ်လၢနအိၣ်ဒ်သိးကယူၤဒ်လဲၣ်, ဖဲအသလၣ်ထီၣ်အဒံးဆ့တဖၣ်ဒီးကွၢ်ဃီၤတၢ်လိၤလိၤဆူကလံၤ ထံး, န့ၣ်ဧါ.
27 လံာ်ကြီကြာ်တဘ့ၣ်, မ့ၢ်အခိးနတၢ်မၤလိာ်ဖဲအကမၤထီၣ် အသွံထီထီလၢကစၢၢ်တဖၣ်အကျါန့ၣ်ဧါ.
28 မၤအဟံၣ်လၢလ့အထီကတၢၢ်တဖၣ်အဖီခိၣ်, ဒီးဒုးကဲထီၣ်ကစၢၢ် အစိခိၣ်တဖၣ်လၢအတိာ်ဧိၤတာ်ဧိၤလီၤ.
29 ဖဲန့ၣ်ခိးကွၢ်ဝဲဆူတၢ်လီၢ်အဘူးဒီးအယံၤဒ်သိးကမၤသံတၢ်တ မံၤမံၤဒီးကအီၣ်ဝဲအဂီၢ်လီၤ.
30 လံာ်ကြီကြာ်တဖၣ်ပာ်ဖှိၣ်အသးဝးတရံးတၢ်သံစိၣ်တဖၣ်ဒီးလံာ် ကြီိကြာ်ဖိတဖၣ်အီဝဲတၢ်သွံၣ်လီၤ.